Matiyu 22

1Jesu wuri baa sat mee sumpo ngurum mo zak nee, 2"Mulki kì̵ Naan ni a kaa mee mishkagham, ɗi wuri cet gwommat mpee làa fi̶ri. 3Wuri lop ki̶rom fi̶ri mo so mpee pet nyem ɗi wuri kì̵ ten sat mmo, mpeku mo j`i ɗi a pee seriɓet mu ɗik ni, amma mo kwar j`i. 4Mishkagham ni wuri baa lop pak ki̶rom fi̶ri mo so ɗi zak ki̶ lop ɗiisi nee, Wu so wu sat nyem ɗi muu ten mu pi̶rep mo mpee ɗik ni nee, wan ki̶n ten nfet randong fi̶na, ki̶ pak long fi̶na ɗiimwaghal mo, ki̶ wan ki̶n kyes c`in mbii mo jir. Mpeemi̶ni ɓe wu j`i mpee seriɓet mu ɗik ni ɗak. 5Amma ba mo kak kas, har koo weye so a ar fi̶ri. Memee so mmaar ki̶ memee so nwor fi̶ri. 6Amma kaghar ni mo yak ki̶rom kì̵ mishkagham ni mo, mo lejeel mo ɗes, har mo twa mo. 7Ni wat putughup mmishkagham ni zam, har wuri lop sooja fi̶ri mo, mpeku mo so twa nyemtukáa ni mo, ki̶ mo caan yil furu ni zak. 8Ɗangɓe mishkagham ni wuri sat nki̶rom fi̶ri mo nee, 'Muu kyes ɗak mbiise mu ɗik ni jir, amma nyem ɗi muu ten mu pi̶rep mo, ɓe mo kwar j`i mpee seriɓet mu ɗik ni.' 9Mpeemi̶ni wu pwat wu so a ar mo, ku koo ngo ɗiiɗang ye ɗi wu kat, ɓe wu pet wuri j`i, ku wuri se mbiise mu ɗik ni ɗi. 10Ki̶rom ni mo pwat so a ar mo, mo pi̶rep koo weye ɗi mo kat, nyemɗiibish mo ki̶ ɗiiret mo, har lu se mbiise mu ɗik ni gam ki̶ mi̶zep mo. 11"Kaaɗi mishkagham ni wuri ɗel ndi̶ghi̶n lu seriɓet ni, mpee naa mi̶zep mo, ɓe wuri naa mee gwar wuri ɗi a pee ni, ɗi ba wuri lop nli̶r ɗi moo lop mpee ɗik kas. 12Ɓe wuri sat ngwar ni nee, 'Shaar fi̶na, a me le ɗangɓe a ɗel ndi̶ghi̶n pee ɗiisi ɗin nli̶r ɗi moo lop mpee ɗik ni ye?' Ɓe gwar ni ɗok titik. 13Mishkagham ni wuri sat nyemɗak fi̶ri mo nee, 'Wu ɓwaghat wuri sar ki̶ shii, ku wu mang wuri wu put wu vwet a ti̶leng mɓut nkoo, a peeɗi wurin nwal ki̶ sum aghas ɗi mmi̶ni.' 14Moo pi̶rep gurum mo ɗes, amma mo bi̶lip mo a lee-lee ɗak." 15Ɗangɓe nyem Farisi mo so lepo furu ashak, mpeku mo tang ar ɗi mon nyaa Jesu ɗi, shi mbii ɗi ni put mpo fi̶ri. 16Mo lop nyemlop mo so pe wuri ɗi ashak ki̶ pak nyem kì̵ Herot mo, ɓe mo tal pu wuri nee, "Ngukám, mu man ne wugha a nguzeen, ki̶ aa kám ar kì̵ Naan ngurum mo azeen-nzeen, ba wugha kì̵ kak mee gurum kas. 17A sat pan fugha mmun, kyet nin ndi̶re ku mu kwat wap nSiza, (mishkagham ɗiiɗes mu nyem Rom mo) aa koo mu nook kwat ni ye?" 18Mpeeɗi Jesu wuri man pan ɗiibish mu putughup furu mo, ɓe wuri lap mmo nee, "A me le ɗang wuu kyam wan ye? Wun nyemso ndang Naan shi putughup vul-vul mo. 19Wu cín mee shaghal ɗi wuu kwat wap ni ɗi nwan naa." Ɓe mo cín mee shaghal nwuri. 20Jesu wuri tal pu mo nee, "A foto mukáa kì̵ we, ki̶ a sum kì̵ we a riran nkaa shaghal ni ye?" 21Mo lap nee, "A mu Siza." Jesu wuri sat mmo nee, "Wu cín nSiza mbii ɗi ni a mu Siza, ki̶ wu cín nNaan mbii ɗi ni a mu Naan zak." 22Kaaɗi mo ki̶ling lappo mi̶ni, ɓe ni aapo mmo, har mo yaghal yit wuri ɗi, ku mo so ɗi a ar furu. 23Parpuus mi̶ni, ɓe pak nyem Saddusi, ɗi moo sat ne, ba mee gurum mmak yaghal a peemúut ki̶ seen kas. Mo tal pu Jesu nee, 24"Ngukám, Mosis wuri sat nee, 'katɗang mee gurum muut yaghal yit mat fi̶ri ɗi, ɗi ba wuraa làa kas, ɓe ne, mee ɗyemni̶ghi̶n fi̶ri lap matkáa ni, mpeku wura làa-làa mo ɗin ɗyemni̶ghi̶n fi̶ri ɗi wuri kì̵ ten muut ni.' 25Gyet mun ɗi ki̶ mee ɗyemni̶ghi̶nshak mo povul, gwar ɗin nshee ni wuri lapmat, ɓe wuri muut nɗin nlàa mee làa, wuri yit matkáa ni pe ɗyemni̶ghi̶n fi̶ri ɗi. 26Gwar ɗiivul ni wuri muut aasi zak, ki̶ ɗiikun ni wuri muut aasi zak, har so wul ngwar ɗiipovul ni. 27Kyes kì̵ ni, ɓe har mat ni wura nyaghal muut zak. 28To, katɗang parpuus ɗi mon yaghal a peemúut ni, ɓe wuran nɗee a mat kì̵ we ndi̶ghi̶n mo povul si ye? Mpeeɗi mo jir mo kì̵ lap wuran mmat." 29Jesu wuri lap mmo nee, "Wun wuu ɗel ɗiki̶, mpeeɗi ba wu man mbii ɗi mo kì̵ ten ran ndi̶ghi̶n takarda kì̵ Naan kas, ki̶ ba wu man ɗiiɗes kì̵ Naan kas zak. 30Mpeeɗi parpuus ɗi nyem ɗi mon nyaghal a peemúut, ɓe mon nɗee a kaa nyemlop kì̵ Naan ɗi aɗeng mo si. Ba mee lapmat ɗi, koo yaghal ɗik ɗi kas. 31Ba wuu kyam tangpo ɗi Naan wuri kì̵ ten sat ni nwun, nkaa yaghal a peemúut si kas aa? Ɗi ni sat nee, 32'Wan a Naan kì̵ Abraham, ki̶ Naan kì̵ Aizik, ki̶ Naan kì̵ Jekop.' " Ɗiisi ni kám mmun nee, koo ɗi mo kì̵ ten murap ɓe mo ki̶ seen pu Naan ɗi. 33Ba wuri a Naan mu nyemmuut mo kas, amma a mu nyem ɗin mmeen mo. Ɗiisi ni kám mmun nee, koo ɗi mo kì̵ ten murap ɓe mo ki̶ seen pu Naan ɗi. 34Kaaɗi nyem Farisi mo ki̶ling nee, Jesu wuri kì̵ le ku nyem Saddusi mo ɗok titik, ɓe mo kuur ashak. 35Ɗangɓe memee ndi̶ghi̶n nyem Farisi ni mo, ɗi wuri a nguman Waar kì̵ Mosis, wuri tang ar ɗi wurin nkyam Jesu ɗi shi tal nee, 36"Ngukám, a Waar ɗiiɗang a ɗiiɗes met jir mɓut Waar kì̵ Mosis mo ye?" 37Jesu lap nwuri nee, "A wal nDaa Naan fugha shi putughup fugha jir, ki̶ shi seen fugha jir, ki̶ shi pan fugha jir. 38A ɗiisi a Waar ɗin nshee ɗiiɗes met jir. 39Ɗiivul ni a kaa mi̶ni si zak, nee, 'A wal gi̶nang fugha kaa sak fugha si.' 40Mo lang kaghar Waar kì̵ Mosis ni mo jir ki̶ po kì̵ nyemsatpo Naan mo a nkaa Waar ɗiivul si mo." 41Kaaɗi nyem Farisi mo kuur ashak, ɓe Jesu wuri tal pu mo, nee, 42"Wu pan ne Kristi wuri a weye, wuri a làa kì̵ weye?" Mo lap nwuri nee, "Wuri a làa kì̵ Devid." 43Jesu wuri tal pu mo nee, "Cirang ɗangɓe Riin kì̵ Naan le ku Devid pet wuri a Daa ye? Har Devid sat nee, 44Daa wuri sat nDaa fi̶na nee, 'A tong nsarse fi̶na, har parɗi wan le shaarlek fugha mo tong nder shii fugha.' 45Katɗang gyet Devid pet Kristi a Daa fi̶ri, ɓe cirang ɗangɓe Kristi wuri waa ɗee a làa kì̵ Devid ye?" 46Ba mee gurum waa mak baa lap mee po ɗi nJesu kas. Yaghal mpar puusmi̶ni, ɓe baa mee gurum mak baa tal mee mbii ɗi pu wuri zak kas.

will be added

X\