Matiyu 20

1"Mulki kì̵ Naan ni a kaa mee ngulu, ɗi wuri put mɓít-mɓít mpee tang gurum mo mpee so c`in ɗak ndi̶ghi̶n bong anab fi̶ri. 2Wuri le kwat ni ashak ki̶ nyemɗak ni mo, nkaa zinariya mi̶ndong mpee wet mi̶ndong, ɓe wuri lop mo so nɗak ndi̶ghi̶n bong anab fi̶ri. 3Kaaɗi karfe pofeer c`in, ɓe wuri baa put zak, wuri naa mee das moo ɗirang buu ndi̶ghi̶n kasuwa. 4Wuri sat mmo nee, 'Wu so wu c`in ɗak nwan ndi̶ghi̶n bong anab fi̶na, ɗangɓe wan ncín mbii ɗin naa ni ret nwun'. 5Das ni mo so mbong ni. Aɓwoon mi̶ni, ɓe wuri baa put ɗi mpuus a naar, ki̶ kaaɗi puus kì̵ cighi̶r tep zak, ɓe wuri kat mee das moo ɗar ɗi zak. 6Ki̶ kaaɗi karfe paat c`in, ɓe wuri baa put zak, ɓe wuri kat mee das moo ɗirang buu zak, ɓe wuri tal pu mo nee, 'A me le ɗang wuu wet wu ɗar ki̶si buu ye?' 7Mo lap nwuri nee, 'Mpeeɗi ba mee gurum cín ɗak mmun kas'. Wuri sat mmo nee, 'Wu so wu c`in ɗak ndi̶ghi̶n bong anab fi̶na.' 8"Kaaɗi kansi̶ghi̶n c`in, ɓe ngubong anab ni wuri sat ngo ɗiiɗes nkaa nyemɗak fi̶ri mo nee. A pet nyemɗak ni mo j`i ashak, ku a kwat mo ɗi. A shee kwat nyem ɗi mo j`i mɓwoon met jir, har a j`i a kyes shi nyem ɗi mo shee j`i mɓít-mɓít. 9Ɗangɓe nyem ɗi mo j`i yaa ɗak ni kus ki̶ yak puus nru si, mo j`i lap zinariya mi̶ndong. 10Kaaɗi nyem ɗi mo shee j`i mɓít-mɓít si mo j`i, mo pan ne wuɗun nlap shaghal ɗi ni ɗes met mu das ɗi mo j`i mɓwoon ni mo. Amma koo weye ndi̶ghi̶n mo, ɓe wuri j`i lap a zinariya mi̶ndong ɓejee ɗak. 11Aɓwoon ɗi mo lap shaghal ni, ɓe mo satpo nɗagham-nɗagham nkaa ngulu ni. 12Mo sat nee, 'Nyem ɗi mo j`i mɓwoon met jir si, mo c`in ɗak a mpee awa mi̶ndong ɗak, har ɓe wugha j`i a kwat mo ntiit-ntiit ki̶ mun ɗi mu wet mu shwaajeel nkaa puus.' " 13Amma ngulu ni wuri lap wuri sat mmemee ndi̶ghi̶n mo nee, "Shaar fi̶na ba wan seen a wun kas. Ba ɗi mu le kwat ni ki̶ wun a nkaa zinariya mi̶ndong mpee wet kas me? 14A mang zinariya fugha, ku a so hi̶ha ɗi. A shi riɓet fi̶na ɗangɓe wan kwat nyem ɗi mo j`i mɓwoon ntiit-ntiit ki̶ wun zak. 15Ba ni a ndi̶re ku wan c`in mbii ɗi wan ki̶n riɓet shi shaghal fi̶na kas aa? Aa koo aa c`in a zughur ki̶ ɗiiret ɗi wan cín ni ye? 16Mpeemi̶ni nyem ɗi mon mɓwoon, ɓe mon nyaghal ɗee a ɗin nshee, ki̶ nyem ɗi mo a ɗin nshee, ɓe mon nyaghal ɗee a ɗin mɓwoon zak." 17Kaaɗi Jesu wuri a ar kàa nJerusalem, ɓe wuri mang jeplop fi̶ri ɗiikaghapaat baavul ni mo so mmee koghop mmusut kaaɗi mo nwaan ni, ɓe wuri sat mo nee, 18"Wu naa, mun a ar kàa nJerusalem nɗiisi, katɗang mu wul, ɓe mon nseet Làa kì̵ Gurum nsar kì̵ pris ɗiinan mo, ki̶ nsar kì̵ nyemkám Waar kì̵ Mosis mo, ɗang mon ncanɗiyeel mu muut nwuri. 19Mon ncín wuri nsar kì̵ nyem ɗi ba mo a nyem Yahudi mo kas. Mon nshwar wuri, ki̶ mon nfwo ngwam nwuri, ki̶ mon mpwas wuri nkaa shiyeepyoghom. Amma parpuus ɗiikun ɓe wurin mbaa yaghal a peemúut zak." 20Mat kì̵ Zeɓeɗi wura j`i pe Jesu ɗi ashak ki̶ jep fi̶ra mo. Wura j`i kurum nfurum ntoghom fi̶ri, ɓe wura ɗang mee mbii pu wuri. 21Jesu tal pu wura nee, "Yii riɓet a meye?" Wura lap nwuri nee, "A tuwoorpo nwan ne jep fi̶na ɗiivul si mon ntong ashak ki̶ wugha ndi̶ghi̶n mulki fugha. A le memee nsarse fugha, ki̶ memee nsarkul fugha wa?" 22Amma Jesu wuri lap nwura nee, "Ba wu man mbii ɗi wuu ɗang ni kas. Wun mmak shwaajeel ɗi wan nshwaa ni me?" Mo lap nwuri nee, "Ii, Mun mmak." 23Ɗangɓe Jesu sat mmo nee, "Wun mmak shwaajeel mpee sum fi̶na, amma mpee cínpee nwun tong nsarse fi̶na ki̶ nsarkul fi̶na, ba wan ki̶ iiko ɗi wan ncín mi̶ni kas. Amma ni a mpee nyem ɗi puun fi̶na wuri kì̵ ten ɗak ni le mpee mo." 24Kaaɗi jeplop ɗiikaghapaat si mo ki̶lingpo ɗang mi̶ni, ɓe mo langtughup ki̶ ɗyemni̶ghi̶nshak ɗiivul si mo zam. 25Amma Jesu wuri pi̶rep mo ashak jir, ɓe wuri sat mmo nee, "Wu man ne mishkagham kì̵ nyem ɗi ba mo a nyem Yahudi mo kas. Moo lesut furu a ɗiiɗes nkaa nyem furu mo, ki̶ nyemnan furu mo, moo kám iiko furu mmo zam, nkaa gurum ni mo zak. 26Ba nin nɗen nnaar fuu aasi kas. Amma koo ngo ɗiiɗang ye ɗi wuri riɓet ɗee a ɗiiɗes nnaar fuu, ɓe ni a ting ku wuri sham ki̶ káa fi̶ri mpee c`in ɗak wun. 27Koo ngo ɗiiɗang ye ɗi wuri riɓet ɗee a ɗin nshee nnaar fuu, ɓe ni a ting ku wuri ɗee a ki̶rom fuu. 28Kaaɗi Làa kì̵ Gurum wuri j`i si, ba a mpeku gurum mo c`in ɗak ɗi nwuri kas, amma a mpeku wuri c`in ɗak ɗi ngurum mo, ki̶ wuri cín seen fi̶ri ɗi mpee ang gurum mo ɗes mɓut shikbish furu mo zak." 29Kaaɗi Jesu ki̶ jeplop fi̶ri mo a ar put nJeriko, ɓe ɗuu kì̵ gurum mo ɗes mo so ndang mo. 30Ɓe mee nyemvum mo vul, ɗi moo tong a pukom ar, mo ki̶ling ne a Jesu wuri a ar j`i ɗel so, ɓe mo ɗiyeep ɗoo furu mo shiɓal, mo sat nee, "Daa Làa kì̵ Devid a naajeel funu" 31Ɗuu kì̵ gurum ni mo gwak mo ne, mo ɗok titik. Amma mo waa si̶ghi̶t ɗiyeep ɗoo shiɓal nee, "A naajeel funu, wugha Làa kì̵ Devid!" 32Jesu wuri ɗar, ɓe wuri pet nyemvum ni mo, wuri sat nee, "Wu riɓet ku wan c`in a me nwun ye?" 33Mo lap nwuri nee, "Daa, a le ku yit funu mo naapee!" 34Jesu wuri naajeel furu, har wuri tuwaas yit furu mo. Abet ɓe yit furu mo naapee. Aɓwoon kì̵ mi̶ni, ɓe mo so ndang wuri.

will be added

X\