Matiyu 19

1Ɗangɓe kaaɗi Jesu wuri si̶ghi̶t satpo ɗiisi mo, ɓe wuri yaghal yit Galili, ki̶ wuri j`i nkoghop nyil nJudiya ɗi ni nkoghop mɓin dung nJodan. 2Ɗuu kì̵ gurum mo ɗes mo so ndang wuri, har wuri bar nyem ɗi mo a gok jir, a peemi̶ni. 3Ɗangɓe pak nyem Farisi mo j`i pe wuri ɗi, mpeku mo kyam wuri ɗi, ɓe mo tal nee, "Kyet Waar kì̵ Mosis ni sat nee, gurum mak ceen mat fi̶ri, mpee koo a rep mbii ɗiibish ɗiiɗang ye ɗi wura c`in wa?" 4Jesu wuri lap mmo nee, "Ashee, ba wuu kyam tang mbii ɗi mo kì̵ ran ndi̶ghi̶n takarda kì̵ Naan kas aa? Nee, 'a Naan wuri le mish ki̶ mat, pugyet ɗin nshee kì̵ yil ni kas me?' 5Naan sat zak nee, 'Mpeemi̶ni ɓe gurum wurin nyit puun ki̶ ni̶ghi̶n fi̶ri mo, mpeku wuri ɓàlkáa fi̶ri ɗi ashak ki̶ mat fi̶ri. Ɗangɓe mo weet mon nɗee a nan ɗiimi̶ndong.' 6Aɓwoon ɗiisi ɓe ba mo kuɗi a vul kas, amma mo kì̵ ɗee a nan ɗiimi̶ndong mi̶ni. Mpeemi̶ni ɓe nyem ɗi Naan wuri kì̵ ten ɓàl mo ashak, ɓe taji mee gurum ɓàk mo kas." 7Nyem Farisi mo tal pu wuri nee, "A me le ɗang Mosis wuri cínpee ngurum ku wuri cín takarda mu tuɗik ɗi mpee ceen mat fi̶ri ye?" 8Jesu wuri lap mmo nee, "Mosis wuri cínpee nwun mpeku wu ceen mat fuu mo, a mpeeɗi ba wuu ki̶lingpee kas. Pugyet ɗin nshee, ɓe ba ni aasi kas. 9Amma wan sat nwun zak nee, koo ngo ɗiiɗang ye ɗi wuri ceen mat fi̶ri, katɗang ba a mpeeɗi wura kì̵ c`in a ngaa kas, ɗangɓe wuri lap mee mat ɗiici ɗi, ɓe ngo mi̶ni c`in a ngaa mmi̶ni. [Ki̶ ngo ɗi wuri lap mat ɗi mo kì̵ ceen wura, ɓe ngo mi̶ni c`in a ngaa mmi̶ni zak.]" 10Jeplop fi̶ri mo sat nwuri nee, "Katɗang po nkaa mish ki̶ mat ni aasi, ɓe gyal gurum mo nook lap mat." 11Amma Jesu wuri lap mmo nee, "Ba a gurum mo jir mo mak lap kám ɗiisi kas, amma see a nyem ɗi Naan wuri kì̵ ten cín kám ni mmo. 12Pak gurum mo ɗi, ɗi mo a miyeermuut, mpeeɗi mo kì̵ làa mo aasi, ki̶ pak mo a miyeermuut, mpeeɗi a gurum mo le mo, ki̶ pak mo a miyeermuut, mpeeɗi a mo lesut furu aasi mpee mulki kì̵ Naan. Ngo ɗi wuri mak lap kám ɗiisi, ɓe wuri lap ni." 13Pak gurum mo j`i ki̶ jep ɗiiɗween mo pe Jesu ɗi, mpeku wuri lesar fi̶ri ɗi nkaa mo, ki̶ wuri c`in aduwa ɗi nkaa mo zak. Ɓe jeplop fi̶ri mo gwak gurum ni mo. 14Amma Jesu wuri sat mmo nee, "Wu yit ku jep ɗiiɗween-ɗween mo j`i pe wan ɗi. Taji wu daam mo kas, mpeeɗi mulki kì̵ Naan ni a mpee nyem ɗi mo ki̶ mi̶se kaa mu jep ɗiiɗween-ɗween mo si." 15Wuri lesar fi̶ri nkaa mo ɓe wuri yaghal yit peemi̶ni. 16Mee zi̶lang wuri j`i tal pu Jesu nee, "Ngukám, wan nc`in a ɗak ɗiiret ɗiiɗang, mpeku wan kat seen ɗiiso ngaa-ngaa ɗi ye?" 17Jesu lap nwuri nee, "A me le ɗang wugha tal pu wan nkaa ɗak ɗiiret ye? A Naan a ngo ɗiiret ɓejee. Katɗang aa riɓet kat seen ɗiiso ngaa-ngaa, ɓe a tap Waar ni mo." 18Ɗangɓe gwar ni tal nee, "A Waar ɗiiɗang mo ye?" Jesu wuri lap nee, "Taji a tukáa kas. Taji a c`in ngaa kas. Taji a c`in wat kas. Taji a c`in langting mu ɗung kas. 19A cín ɗiiɗes mpuun fugha ki̶ ni̶ghi̶n fugha, ki̶ a wal ngi̶nang fugha kaa sak fugha si zak." 20Zi̶lang ni sat wuri nee, "Wan ki̶n ten tap Waar ɗiisi mo jir. A me ɗee ɗi nwan zak ye?" 21Jesu sat nwuri nee, "Katɗang wugha riɓet ɗee a ngo ɗin ndi̶re-ndi̶re, ɓe a so a si̶rep long fugha mo jir, ku a ɓàk shaghal ni ɗi nyemjeel mo, ɗangɓe a nkat long ɗes ndi̶ghi̶n ɗengnaan. Aɓwoon kì̵ mi̶ni, ɓe a j`i ndang wan." 22Kaaɗi zi̶lang ni wuri ki̶lingpo mi̶ni, ɓe ni wat putughup nwuri zam, har wuri yaghal baa waa shi putughup ɗiiwuwat, mpeeɗi wuri a ngulong zam. 23Ɗangɓe Jesu wuri sat nyemso ndang wuri mo nee, "Azeen-nzeen, ki̶n sat nwun, nin nluk ku ngulong wuri ɗel ndi̶ghi̶n mulki ki̶ ɗengnaan. 24Wan baa sat nwun zak nee. Gyal ɗeesi ɓe raakumi nki̶lak ɗel ndi̶ghi̶n fung kì̵ luɓi̶ra, met aku, ɗi ngulong wurin nɗel mulki ki̶ ɗengnaan." 25Kaaɗi jeplop mo ki̶lingpo mi̶ni, ɓe ni aapo mmo zam, har mo tal nee, "Katɗang mbii ni aasi, ɓe a we mmak kat ɓam ye?" 26Jesu wuri lyap mo, ɓe wuri sat mmo nee, "Ba gurum mak c`in mbii ɗiisi mo kas, amma Naan wurii mak c`in mbii mo jir." 27Ɗangɓe Pita wuri sat nee, "A naa, mun kì̵ yit mbii mo jir, mpeku mu so ɗi ndang wugha, ɓe mun nkat a meye?" 28Jesu sat mmo nee, "Azeen-nzeen ki̶n sat nwun. Wun ɗi wu j`i ndang wan si, kat parɗi Làa kì̵ Gurum, wurin ntong nkaa mbiitong mu mulki kì̵ ɗiiɗes fi̶ri, parɗi Naan wurin ncighi̶r ki̶ mbii mo ɗee a ɗiipoo jir. Ɓe wun ntong nkaa mbiitong mu mulki mo kaghapaat baavul, ku wu tokɗiyeel ɗi nsaghan kì̵ nyem Isreil ɗiikaghapaat baavul si mo. 29Koo ngo ɗiiɗang ye ɗi wuri yit tulu fi̶ri, ki̶ koo a ɗyemni̶ghi̶n ɗiimish mo, koo a ɗyemni̶ghi̶n ɗiimat mo, koo puun, koo ni̶ghi̶n, koo jep mo, koo a maar mo, mpee sum fi̶na, ɓe wurin nkat li̶ɓet mo ɗari, ki̶ seen ɗiiso ngaa-ngaa zak. 30Amma pak gurum ɗin nshee mo ɗes, mon nyaghal ɗee a nyem ɗin mɓwoon mo, ki̶ nyem ɗin mɓwoon mo, mon nyaghal ɗee a nyem ɗin nshee mo zak."

will be added

X\