Matiyu 15

1Ɗangɓe pak nyem Farisi mo ki̶ nyemkám Waar kì̵ Mosis, mo pwat nJerusalem mo j`i pe Jesu ɗi, ɓe mo tal nee, 2"A me le ɗangɓe jeplop fugha mo ɗel aki̶ po kì̵ nyemnan ɗiiyam mo ye? Ba moo vwang sar furu mo akuɗang mo se mbiise kas." 3Jesu wuri lap mmo nee, "A me le ɗang wuu tep Waar kì̵ Naan, mpeku wu tap ɗi ki̶ mbii ɗi puun fuu mo loghot ki̶ c`in ni ɗi ye? 4Naan wuri sat nee, 'A cín ɗiiɗes mpuun fugha ki̶ ni̶ghi̶n fugha,' ki̶ zak nee, 'ngo ɗi wuri satpo ɗiibish nkaa puun, koo ni̶ghi̶n fi̶ri, ɓe mon ntu wuri ting.' 5Amma wuu kám ngurum mo nee, 'Koo ngo ɗiiɗang ye ɗi wuri sat mpuun, koo ni̶ghi̶n fi̶ri nee, ɓam ɗi wun nkat pu wan ɗi, ɓe wan ki̶n cín ni nNaan. 6Ɓe ba ni a ting ku wuri cín ɗiiɗes mpuun fi̶ri kas.' Wuu lepo ɗi Naan sat nee, wu c`in mo a ɗiibuu, mpeku wu tap po kì̵ puun fuu mo ɗi. 7Wun nyemso ndang Naan shi putughup vul-vul mo, gyet Aizaya wuri satpo nkaa wun a ndi̶re nee: 8'Nyem ɗiisi moo cín ɗiiɗes nwan a shi mi̶shpoo furu mo. Amma putughup furu mo jong ki̶ wan. 9Moo seyil nwan a buu, kám ɗi moo kám ni a Waar kì̵ gurum mo.' " 10Jesu wuri pet ɗuu kì̵ gurum ni mo jir j`i pe shin ɗi, ɓe wuri sat mmo nee, "Wu lekom ku wu ki̶ling mbii ɗi nwan nsat ɗi, ku wu manshii kì̵ ni ɗi zak. 11Ba a mbii ɗi gurum ki̶ se mpo, a mon nle gurum ɗee a ɗiibish nyit kì̵ Naan kas, amma a mbii ɗi moo kàa put mpo kì̵ gurum, a mi̶ni moo le gurum ɗee a ɗiibish." 12Ɗangɓe jeplop kì̵ Jesu mo j`i sat nwuri nee, "Ba a man ne ni láa nyem Farisi mo mɓut kaaɗi mo ki̶lingpo mi̶ni kas aa?" 13Jesu wuri sat nee, "Koo a mbii ki̶kop ɗiiɗang ye ɗi ba a puun fi̶na ɗi wuri aɗeng wuri kop ni kas, ɓe mon ntoghot ni fwo jir. 14Wu yit mo ɗi kawe. Mo a nyemsel ɗi mo a vum mo. Katɗang ɓe mee nguvum yaakam nguvum, ɓe mo mon ntaa ntughun weet." 15Amma Pita sat wuri nee, "A kámshii kì̵ sumpo ɗiisi mmun." 16Jesu wuri sat nee, "Har yaksi, ɓe ba wun, wu manshii kì̵ ni kas aa? 17Wu man nee, koo a mbii ɗiiɗang ye ɗi ni ɗel mpo kì̵ gurum, ɓe nii ɗel sham a ndi̶ghi̶n ɓut fi̶ri, ki̶ har ni waa ɗel sham put nɗyes zak. 18Amma a mbii ɗi moo kàa put mpo kì̵ gurum, moo kàa put a ndi̶ghi̶n putughup kì̵ ngo ni, a mi̶ni moo le gurum ɗee a ɗiibish. 19Mpeeɗi pan ɗiibish moo pwat a ndi̶ghi̶n putughup kì̵ gurum. Mbii mo kaa tukáa si, ki̶ ngaa, ki̶ wat, ki̶ langting ɗii mu ɗung, ki̶ po ɗiibish mo. 20A mbii ɗiisi moo le gurum ɗee a ɗiibish. Amma se mbiise shi sar nɗin nvwang, ba nin mmak le gurum ɗee a ɗiibish kas." 21Jesu wuri yaghal a peemi̶ni, ɓe wuri so nkoghop nyil nTaya ki̶ Sidon. 22Ɗangɓe mee mat yil nKenaan wura ɗiyeep ɗoo fi̶ra shiɓal, wura sat nee, "A naajeel fi̶na, Daa, Làa kì̵ Devid. Reep fi̶na wuraa shwaajeel, ki̶ riin ɗiibish." 23Amma ba Jesu wuri lap mee po nwura kas. Ɗangɓe jeplop fi̶ri mo j`i ɗang pu wuri nee, "A ceen wura so waa, mpeeɗi wura ɗwaghar kom mmun, ki̶ wal ndang mun." 24Jesu wuri lap mmo nee, "Mo lop wan j`i a mpee tang nyem Isreil ɗiili̶lagham mo ɓejee ɗak." 25Amma mat ni wura j`i kurum ntoghom fi̶ri, ki̶ wura sat nee, "Daa, a ɓam an!" 26Jesu wuri sat nee, "Ba ni ret ku mo mang mbiise mu jep mo ku mo fwo as mo kas." 27Amma mat ni wura sat nee, "Ii, ni aasi, Daa, amma as ni moo se a rep pak mbiise ɗi ni ɗyong nyil, nder peetong mu sese kì̵ puun furu mo zak." 28Ɗangɓe Jesu wuri sat nwura nee. "Kai naa! Cínzeen fii ni a ɗiiɗes hakyeng! Ɓam ɗi yi ɗang ni, wan ki̶n cín nyi." Ntiit ki̶ peemi̶ni, ɓe abet reep fi̶ra ni bar. 29Jesu wuri yaghal a peemi̶ni, ɓe wuri ɗel so nkoghop am canɗar ɗiiɗes nyil nGalili. Wuri kàa aɗeng jwak, ɓe wuri tong ɗi. 30Ɗangɓe ɗuu gurum mo ɗes mo j`i ki̶ kiɓel mo, ki̶ kundung mo, ki̶ vum mo, ki̶ komɗwaghar mo, ki̶ pak mo ɗi ɗes zak, mo j`i le mo ntoghom kì̵ Jesu, ɓe wuri bar mo. 31Mpeemi̶ni, ni aapo nɗuu kì̵ gurum ni mo zam, kaaɗi mo naa ti̶ding mo katpo, ki̶ kundung mo bar, kì̵ kiɓel mo mwaan, vum mo naapee, ɓe mo kwoop Naan kì̵ nyem Isreil mo. 32Jesu wuri pet nyemso ndang wuri mo j`i pe shin ɗi, ɓe wuri sat mmo nee, "Wan naajeel kì̵ ɗuu gurum ni mo, mpeeɗi mo kì̵ c`in teer kun ashak ki̶ wan, ɓe ba mo kì̵ se mee mbiise kas. Ba wan riɓet sel mo so ki̶ neen kas, mpeku taji mo táa muutleet a ar kas." 33Ɗangɓe jeplop fi̶ri mo sat nwuri nee, "Mun nkat mbiise a ne, a naar yil ɗiisi, ɗi ɗuu gurum si mon nse, ku ni mak hi̶ɓi̶l mo ɗi ye?" 34Jesu wuri talpu mo nee, "Wun ki̶ bred mo a kong ye?" Mo lap nee, "Mun ki̶ mo povul, ki̶ rep pak pupwap ɗiiɗween mo kong ɗak." 35Jesu wuri sat nɗuu kì̵ gurum ni mo tong nyil. 36Ɓe wuri mang bred ɗiipovul ni mo, ki̶ pupwap ni mo, ɓe wuri c`in aduwa mu pi̶lang Naan, ɓe wuri yilang bred ni mo, wuri cín nyemso ndang wuri mo, mpeku mo swap ɗi nɗuu kì̵ gurum ni mo. 37Ɗuu kì̵ gurum ni mo se, har mo hi̶ɓi̶l jir. Ɗangɓe nyemso ndang Jesu mo kyak kaghar mbiise ɗi ni ɗee ɗi, har ni gam kacik mo povul. 38Nyem ɗi mo se ni, ɓe a mish mo duɓu feer, ba mo tang mat mo ki̶ jeplop mo ɗiki̶ kas. 39Jesu wuri sel ɗuu kì̵ gurum ni mo so, ɓe wuri ɗel ndi̶ghi̶n jirgi am, mpeku wuri so ɗi nyil mMagadan.

will be added

X\