1 Ntiit ki̶ teer mi̶ni mo, ɓe Jesu ki̶ jeplop fi̶ri mo, mo mwaan so ɗel mɓut mmaar ɗiɓen mo parpuus Nookɗi. Neenláa njeplop fi̶ri mo, ɓe mo ɗoghom ti̶lang ɗiɓen mpeku mo se. 2 Amma kaaɗi nyem Farisi mo naa mi̶ni, ɓe mo sat nJesu nee, "A naa! Jeplop fugha mo nkaa c`in mbii ɗi ba ni ret ku mo c`in parpuus Nookɗi kas." 3 Jesu lap mmo nee, "Ba wuu kyam tang mbii ɗi mo ran ndi̶ghi̶n takarda kì̵ Naan nkaa mbii ɗi gyet Devid ki̶ nyem ɗi mo ashak ki̶ wuri mo c`in, kaaɗi neenláa mo si kas aa? 4 Kaaɗi gyet wuri ɗel ndi̶ghi̶n Lu kì̵ Naan ɗiiɗes, ɓe wuri se bred ɗi mo kì̵ ten c`in ni nNaan, ki̶ wuri c`in pak nyem ɗi mo ashak ki̶ wuri zak. Bred ɗi ba a mee gurum buu mak se ni kas, see a pris mo ɗak. 5 Koo ba wu tang ndi̶ghi̶n Waar kì̵ Mosis kas aa? Ɗi pris moo tep Waar mu puus Nookɗi, kaaɗi moo c`in ɗak Lu kì̵ Naan ɗiiɗes parpuus Nookɗi, amma ba mo c`in a shikbish kas. 6 Wan sat nwun nee, mee ngo ɗi wuri a ɗiiɗes met nLu kì̵ Naan ɗiiɗes wuri ɗi mpesi. 7 Katɗang ɓe ɗi wu manshii kì̵ po ɗi mo kì̵ ten ran ni ndi̶ghi̶n takarda kì̵ Mosis nee. 'Wan riɓet a kussuk, ba a zughum kas' ɓe ba ɗi wun ncanɗiyeel ɗiibish nkaa nyem ɗin ndi̶re mo kas, 8 Làa kì̵ Gurum a wuri a Daa mu parpuus Nookɗi ni." 9 Jesu wuri yaghal yit peemi̶ni, ɓe wuri ɗel ndi̶ghi̶n mee lu kì̵ Naan furu. 10 Ɓe mee gwar ɗi sar fi̶ri ni fii, wuri ɗi nlu ni. Pak gurum mo tal pu Jesu nee, "Kyet nin ndi̶re ku mo bar gurum parpuus Nookɗi wa?" Mo c`in tal mi̶ni, mpeku mo katpee c`in mwaanaa ɗi nkaa Jesu. 11 Jesu wuri lap mmo nee, "A we ndi̶ghi̶n wun, ɗi wuri ki̶ mee tum, katɗang ɓe tum ni taa ndi̶ghi̶n tughun parpuus Nookɗi, ɓe ba wurin nso shang ni kas ye? 12 Azeen gurum ki̶ koghop ni met ntum. Nin ndi̶re ku mo c`in mbii ɗiiret ngurum parpuus Nookɗi." 13 Ɓe Jesu wuri sat ngwar ɗi sar fi̶ri fii ni nee, "A zan sar fugha" Ɓe gwar ni wuri zan sar ni, ɓe sar ni zughum, har ni ɗee kaa sar ɗiivul ni si. 14 Amma nyem Farisi mo pwat ɗi nlu ni, ku mo yaa ɓeetpo ashak nkaa ar ɗi mon nc`in ku mo katpee tu Jesu ɗi. 15 Kaaɗi Jesu wuri man po ɗi mo ɓeet mpeku mo tu wuri ɗi, ɓe wuri yaghal yit peemi̶ni. Ɓe gurum mo ɗes mo so ndang wuri. Jesu bar nyem ɗi mo a gok jir. 16 Wuri sat mo shiɓal nee, taji mo le ku gurum mo man wuɗi kas. 17 Wuri satpo mi̶ni a mpeku po ni gam mbii ɗi mo kì̵ ten sat ni nsar ki̶ ngusatpo kì̵ Naan Aizaya nee: 18 "Wu naa, a ki̶rom fi̶na ɗi wan bi̶lip wuri nɗiisi! Ɗi wan wal nwuri, ɗi wuri tong ɗyen wan ɗes zam. Wan nle Riin fi̶na nkaa wuri, wurin ntokɗiyeel mu zeen pee nyem ɗi ba mo a nyem Yahudi mo kas. 19 Ba wurin nɗee mɓeetshik kas, ki̶ ba wurin nle or kas zak. Ba mee gurum nki̶ling ɗoo fi̶ri a ar mo, koo ndi̶ghi̶n birni kas. 20 Wurin ntap fwang nyem ɗi ba cínzeen furu ni ɓal kas mɓut ɗyen, ki̶ wurin naajeel kì̵ nyem ɗi ba mo ki̶ mee ɓal kas. Wurin ngung har wuri le zeen nkaa zeen ɗee a koghorong. 21 A ndi̶ghi̶n sum fi̶ri, ɓe gurum mo jir mon nle canciin furu ɗi." 22 Mee das mo j`i ki̶ mee nguvum ɗi wuri a ti̶ding, wuri ki̶ riin ɗiibish zak, pe Jesu ɗi. Jesu wuri bar gwar ni, har gwar ni katpo, ki̶ wuri naapee zak. 23 Mbii ɗi Jesu c`in ni aapo nɗuu kì̵ gurum ni mo jir, har mo sat nee, "Kyet gwar ɗiisi a làa kì̵ Devid wa?" 24 Amma kaaɗi nyem Farisi mo ki̶lingpo mi̶ni, ɓe mo sat nee, "Gwar ɗiisi wurii ceen riin ɗiibish ni mo a shi iiko mu Beelzebul, mishkagham kì̵ riin ɗiibish mo." 25 Mpeeɗi Jesu wuri man pan ɗi mo nkaa c`in ni, ɓe wuri sat mmo nee, "Koo mulki ɗiiɗang ye ɗi ni ɓàk sat vul, ɓe nin nwat. Koo a nyem birni ɗiiɗang ye, ki̶ koo a nyemtulu ɗiiɗang ye ɗi mo ɓàk sut vul, ɓe birni ni, koo tulu mi̶ni nwat. 26 Katɗang Shetan wuri ceen nyem fi̶ri mo, ɓe wuri ɓàkshin a vul mmi̶ni. Ɓe cirang ɗangɓe mulki fi̶ri nin mmak ɗar ye? 27 Katɗang wan ki̶n ceen riin ɗiibish mo a shi iiko mu Beelzebul, ɓe nyemso ndang kám fuu moo ceen riin ɗiibish ni mo a shi iiko mu weye? Mpeemi̶ni, ɓe a nyem fuu mon ncanɗiyeel nee wuu c`in a ɗung, nee wan ki̶n ceen Shetan a shi iiko mu Beelzebul. 28 Amma katɗang wan ki̶n ceen riin ɗiibish mo a shi iiko mu Riin kì̵ Naan, ɓe mulki mu Naan ni j`i pe wun ɗi nɗiisi. 29 Cirang gurum mmak ɗel nlu kì̵ mee nguɓal, ku wuri hi̶r long kì̵ nguɓal ni, katɗang ba wuri kì̵ shee ɓwaghat nguɓal ni akuɗang kas ye? Aɓwoon mi̶ni, ɓe wurin mmak hi̶r long nlu kì̵ nguɓal ni. 30 "Ngo ɗi ba wuri ashak ki̶ wan kas, ɓe wuri a shaarlek fi̶na mmi̶ni. Ngo ɗi ba wurin mɓam wan mpee j`i kì̵ gurum mo ɓe Naan ɗi kas, ɓe wurii waa titiit mo so jong kì̵ Naan. 31 Mpeemi̶ni wan sat nwun nee, koo a shikbish ɗiiɗang ye, ki̶ koo a po ɗiibish ɗiiɗang ye ɗi gurum moo sat nkaa Naan, ɓe mon nfwo mi̶ni ngurum mo, amma po ɗiibish nkaa Riin kì̵ Naan, ɓe ba mon nfwo mi̶ni ngurum kas. 32 Jir ngo ɗiiɗang ye ɗi wuri sat po ɗiibish nkaa Làa kì̵ Gurum, ɓe mon nfwo mi̶ni nwuri. Amma ngo ɗi wuri sat mee po ɗiibish nkaa Riin kì̵ Naan, ɓe ba mon nfwo mi̶ni nwuri kas, koo a yaksi, ki̶ koo yil ɗi ni ɗung j`i." 33 "See wu le ting ni a ɗiiret, ɗangɓe làa ni mon nɗee a ɗiiret. Koo wu le ting ni a ɗiibish, ɗangɓe làa ni mon nɗee a ɗiibish zak. Mpeeɗi mon mman ting a mpee làa fi̶ra mo. 34 Wun a kaa jep nw`oo pang mo si! Cirang ɗang wun ɗiibish, wun mmak sat mee mbii ɗiiret ye? Mpeeɗi a mbii ɗi nin mputughup kì̵ gurum, a nii kàa put mpo fi̶ri zak. 35 Ngo ɗiiret, wurii put ki̶ mbii ɗiiret mo ndi̶ghi̶n long fi̶ri ɗiiret, ɗi wuri kì̵ tap sok mo ndi̶ghi̶n putughup fi̶ri. Ngo ɗiibish, wurii put ki̶ mbii ɗiibish mo, ndi̶ghi̶n long fi̶ri ɗiibish, ɗi wuri kì̵ tap sok mo ndi̶ghi̶n putughup fi̶ri. 36 Wan sat nwun nee, koo a po ɗiibish ɗiiɗang ye ɗi gurum mo kì̵ ten sat ni, ɓe mon nyakshii ni shimi̶ndong- shimi̶ndong parpuus ɗiyeel. 37 A shi mbii ɗi a sat shi po fugha, ɗangɓe mon mman ɗin ndi̶re fugha, a shi mbii ɗi a sat, ɗangɓe mon ncanɗiyeel ɗiibish nwugha zak." 38 Ɗangɓe pak mo mɓut nyemkám Waar kì̵ Mosis mo ki̶ Farisi mo, mo sat nwuri nee, "Ngukám, muu riɓet naa mee mbii aapo nsar fugha." 39 Jesu wuri lap mmo nee, "Nyemɗiibish ɗi mo kwar Naan ny`iicinsi, moo riɓet naa mee mbii aapo. Amma ba mon nkám mee mbii aapo mmo kas, see a mbii aapo mu Joona ngusatpo kì̵ Naan ɓejee. 40 Kaaɗi gyet Joona wuri wet puus kun, ki̶ teer kun ndi̶ghi̶n ɓut ki̶ pupwap, ɓe ni aasi zak, mon nwum Làa kì̵ Gurum mpee puus kun, ki̶ teer kun ndi̶ghi̶n yil ni. 41 Parpuus tokɗiyeel ni, ɓe gurum mon nkám ɗak kì̵ nyem Ninevi mo, ki̶ ɗak kì̵ nyem ɗin ny`iicinsi mo, ɓe ɗak kì̵ nyem Ninevi mo, nin nret met nɗak mumo ni, mpeeɗi gyet nyem Ninevi mo tuwap mpee po Naan ɗi gyet Joona sat. Amma nyem ɗin ny`iicinsi mo kwar ki̶ling kám kì̵ ngo ɗiiɗes met Joona ɗi wuri mpesi. 42 Parpuus tokɗiyeel ni, ɓe gurum mon nkám ɗak kì̵ mishkagham ɗiimat, ki̶ ɗak mu nyem ɗin ny`iicinsi mo, ɓe mon nnaa ɗak kì̵ mi̶ra nin nret met mumo, ɓe wuran ncanɗiyeel ɗiibish mo, mpeeɗi gyet wura put nyil fi̶ra jong-jong, mpeku wura j`i naa seen mu Solomon ɗi. Amma nyem ɗin ny`iicinsi mo kwar ki̶ling kám kì̵ ngo ɗiiɗes met Solomon ɗi wuri mpesi." 43 "Katɗang riin ɗiibish ni put ndi̶ghi̶n mee gurum, ɓe ni mwaan a naar yil a peeɗi ba mee am ɗi kas, mpee tangpee nookɗi, amma ba ni kat mee pee nookɗi kas. 44 Ɗangɓe ni sat nee, 'wan mbaa ntulu fi̶na, a peeɗi jí wan put ɗi'. Kaaɗi ni baaj`i, ɓe ni kat lu nin nfii, mpeeɗi mo kì̵ fet lu ni kì̵ mo ɗak ni zak. 45 Ɗangɓe ni so j`i ki̶ pak riin ɗiibish mo povul, ɗi mo bish met nni, ki̶ mo ɗel tong ɗi ndi̶ghi̶n lu ni. Ɓe yaksi tong kì̵ gwar ɗiisi ni waa bish met nɗin nshee. A mbii ɗi nin nc`in nyemɗiibish ɗi mon ny`iicinsi aasi zak." 46 Kaaɗi Jesu wuri kuɗi nkaa katpo ki̶ ɗuu gurum ni mo, ɓe ni̶ghi̶n fi̶ri ki̶ ɗyemni̶ghi̶n fi̶ri mo, mo j`i ɗar ati̶leng, ki̶ mo riɓet katpo ki̶ wuri. 47 Mee gurum sat nJesu nee, "A naa ni̶ghi̶n fugha, ki̶ ɗyemni̶ghi̶n fugha mo, moo ɗar ati̶leng, ki̶ moo riɓet katpo ki̶ wugha." 48 Jesu lap ngwar ni nee, "A we a ni̶ghi̶n fi̶na ye? Ki̶ a we mo a ɗyemni̶ghi̶n fi̶na ye?" 49 Ɗangɓe wuri sel sar fi̶ri nkoghop peeɗi jeplop fi̶ri mo ɗi, ɓe wuri sat nee, "Wu naa, a ni̶ghi̶n fi̶na ki̶ ɗyemni̶ghi̶n fi̶na mon nɗiisi. 50 Mpeeɗi koo ngo ɗiiɗang ye ɗi wuri c`in ɗyen kì̵ puun fi̶na ɗi wurin ndi̶ghi̶n ɗengnaan, ɓe a gwar mi̶ni a ɗyemni̶ghi̶n fi̶na, ki̶ ɗyemni̶ghi̶n fi̶na ɗiimat, ki̶ ni̶ghi̶n fi̶na zak."
