Matiyu 11

1Aɓwoon ɗi Jesu wuri kì̵ kyes po ki̶ jeplop fi̶ri ɗiikaghapaat baavul si mo, ɓe wuri yaghal yit peemi̶ni, ku wuri so kám, ki̶ satpo Naan ɗi ngurum mo ndi̶ghi̶n birni furu mo. 2Joon wuri ɗi ndi̶ghi̶n lushaghat, wuri ki̶lingpo nkaa ɗak ɗi Kristi c`in mo. Ɓe Joon wuri lop nyemlop fi̶ri mo so pe wuri ɗi. 3Ku mo tal ɗi pu wuri nee, "A wugha a ngo ɗin ndung j`i si aa? Koo mu gong j`i ki̶ mee ngo ɗiici ye?" 4Jesu wuri lap mo nee, "Wu so wu sat nJoon, mbii ɗi wu ki̶ling ki̶ mbii ɗi wu naa zak. 5Nyemvum mo naapee, kundung mo mwaan, nyemloghom mo bar, ki̶ komɗwaghar mo ki̶lingpee. Nyem ɗi mo kì̵ ten murap, mo yaghal a peemúut, ki̶ nyemjeel mo ki̶lingpo ɗiiret. 6Nyem ɗi mon nkat ɗiiret, a mo a nyem ɗi ba mo ki̶ mee kyetwa nkaa wan kas." 7Kaaɗi nyemlop kì̵ Joon ni mo kì̵ baa, ɓe Jesu wuri sat nɗuu kì̵ gurum ni mo nkaa Joon nee, "Wu pwat wu so a yil a mpee naa a meye? A mpee naa ɓel ɗi kut ki̶ cut ni me? 8Wuu pwat a mpee so naa meye? A ngo ɗi wuri jwallée ɗiiret mo me? Nyem ɗi moo jwal nli̶r ɗiiret mo, moo tong a ntulu kì̵ mishkagham mo. 9Wu sat nwan, jí wuu pwat wu so, ku wu naa a meye? Ku wu naa a mee ngusatpo Naan ɗi me? Ii, wan sat nwun nee, har Joon wuri met ngusatpo kì̵ Naan. 10Mpeeɗi a wuri a ngo ɗi mo kì̵ ten ran po nkaa wuri ndi̶ghi̶n takarda kì̵ Naan nee: 'A naa, wan ndung lop ngulop fi̶na ati̶leng wugha. Ɗi wurin nɗak ar fugha akuɗang aa j`i.' 11Azeen-nzeen wan sat nwun nee, ndi̶ghi̶n jep gurum mo jir ɗi mat mo làa mo, ɓe ba memee ɗes met Joon nguc`in baptisma kas. Jir ki̶si, ɓe ngo ɗi wuri a ɗiilee met jir ndi̶ghi̶n mulki kì̵ Naan wuri met nJoon. 12Yaghal mɓít kì̵ Joon nguc`in baptisma har yaksi, ɓe mo nkaa c`in lek mpee mulki kì̵ Naan ni. Nyemlek ni moo gung mpeku mo kat ni ɗi shiɓal. 13Nyemsatpo kì̵ Naan mo, ki̶ Waar mu Mosis mo, mo kì̵ ten satpo nkaa mbii ɗi mon nc`in har mɓít kì̵ Joon. 14Katɗang ɓe wu riɓet lappo ni, ɓe Joon wuri a Ilaija, ɗi mo kì̵ ten satpo nkaa wuri. 15Ngo ɗi wuri ki̶ kom mu ki̶lingpee, ɓe ni ret ku wuri ki̶lingpee. 16"Wan nsat a me nyem ɗi mon ny`iicinsi ye? Mo a kaa jep ɗi moo tong mpokasuwa, ɗi moo pet shaartan furu mo nee. 17Mu taa nvelang wun, ɓe ba wu c`in kook ni kas. Mun mmaap, ɓe ba wu wal kas. 18Jí Joon wuri j`i, ɓe wuri tong ki̶ neen mpee rep teer mo, ki̶ ba wuri shwaa am anab kas, ɓe wu sat nee, wuri ki̶ riin ɗiibish. 19Amma Làa kì̵ Gurum wuri j`i, ɓe wu sat nee. Wu naa, ngusepee, ki̶ ngushwaapee. Shaar kì̵ nyemlapwap mo, ki̶ shaar kì̵ nyemshikbish mo. Muu man seen kì̵ Naan azeen-nzeen a mpee ɗak fi̶ri mo." 20Ɗangɓe Jesu wuri gwak nyem ɗi mon ndi̶ghi̶n birni ɗi wuri kì̵ c`in ɗak fi̶ri ɗiinan-nan mo ɗes ndi̶ghi̶n mo, mpeeɗi ba mo tuwap kas. Ɓe wuri sat nee, 21"Jeel ntaa nkaa wii, Korazin! Jeel ntaa nkaa wii, Betseda! Mpeeɗi katɗang ɗi mo kì̵ ten c`in ɗak ɗiinan-nan si mo a ndi̶ghi̶n yil nTaya ki̶ Sidon, kaaɗi mo kì̵ c`in ndi̶ghi̶n wun si, ɓe ɗi puji mo kì̵ tuwap ɗi shi tong mɓut fwat kì̵ shi goklee. 22Amma wan sat nwun nee, parpuus ɗiyeel, ɓe Naan wurin naajeel ki̶ Taya ki̶ Sidon met nwun. 23Wun nyem Kaparnahum mo. Wuu riɓet ku mo ɗiyeep wun har kàa wul ɗengnaan me? Mon nsham ki̶ wun har aawus. Mpeeɗi katɗang ɗi mo kì̵ c`in ɗak ɗiinan si mo a ndi̶ghi̶n Sodom, kaaɗi mo kì̵ c`in ndi̶ghi̶n wun si, ɓe ɗi yil nSodom ɗi har cicinsi. 24Amma wan sat nwun nee, parpuus ɗiyeel, ɓe Naan naajeel kì̵ nyem Sodom mo met nwun." 25A mpeemi̶ni, ɓe Jesu wuri sat nee, "Wan pi̶lang wugha, Daa, puun fi̶na, ngule ɗengnaan ki̶ yil, mpeeɗi wugha kì̵ sok mbii ɗiisi mo nyemman mo, ki̶ nyemman mbii mo, amma wugha woo ni nlàa nlaanjuu mo. 26Ii, puun fi̶na, ni a ɗyen fugha, mpeku mbii ni mo ɗee aasi. 27A puun fi̶na wuri le mbii mo nsar fi̶na jir. Ba mee gurum man Làa ni kas, see a puun ɓejee, ki̶ zak, ba mee gurum man puun ni kas, see a Làa ni ɓejee, ki̶ see ngo ɗi Làa ni wuri bi̶lip mpeku wuri woo puun ɗi nwuri. 28Wu j`i pe wan ɗi jir, wun nyem ɗi wuu c`in ɗak, ki̶ lee nii toghon nwun zak, ɓe wan ncín nookɗi nwun. 29Wu ɗel mɓut ɗak fi̶na, ku wu kám shiimwaan fi̶na ɗi, mpeeɗi wan a ngusham ki̶ káa fi̶na, ki̶ wan ki̶n tap c`in mbii mo a mɓut ɗyen. Katɗang wu ɗel mɓut ɗak fi̶na, ɓe wun nkat nookɗi mpee seen fuu mo. 30Mpeeɗi ba ɗak fi̶na ni luk kas, ki̶ lée fi̶na ni a ɗiifiyeel zak."

will be added

X\