Matiyu 10

1Jesu wuri pi̶rep jeplop fi̶ri ɗiikaghapaat baavul si mo, wuri cín iiko mmo mpee ceen riin ɗiibish mo, ki̶ mpeku mo bar koo a shwal ɗiiɗang ye, ki̶ koo a gok ɗiiɗang ye zak. 2Sum kì̵ jeplop ɗiikaghapaat baavul ni mon nɗiisi. Ɗin nshee ni a Simon ɗi moo pet wuri a Pita, ki̶ Andru ɗyemni̶ghi̶n fi̶ri, kì̵ Jemis làa kì̵ Zeɓeɗi, ki̶ Joon ɗyemni̶ghi̶n fi̶ri, 3ki̶ Filip, ki̶ Bartolomi, ki̶ Tomas ki̶ Matiyu ngulapwap, ki̶ Jemis làa kì̵ Alfiyas, ki̶ Taddawus. 4Ki̶ Simon ɗi wuri a memee mɓut Zeelot (nyem ɗi gyet mo ɓàlkáa furu mpee tang mulki mu yil furu), ki̶ Judas Iskariyot ngo ɗi a wuri yaghal seet Jesu si. 5Jesu wuri lop jeplop fi̶ri ɗiikaghapaat baavul ni mo, ɓe wuri satpo mmo nee, "Taji wu táa wu mer nyil kì̵ nyem ɗi ba mo a nyem Yahudi mo kas, ki̶ taji wu ɗel ndi̶ghi̶n mee birni kì̵ nyem Sameriya mo kas. 6Amma see wu so pe nyem Isreil ɗi mo a kaa tum ɗiili̶lagham mo si. 7Katɗang wun a ar so ni, ɓe wu satpo Naan ngurum mo nee, mulki kì̵ Naan ni kus. 8Wu bar nyemgok mo. Wu yaghal ki̶ nyemmuut mo. Wu bar nyemloghom mo, ki̶ wu ceen riin ɗiibish mo. Kaaɗi wun kì̵ ten lap a shi zughum nsar kì̵ Naan si, ɓe ni ret ku wu cín ngurum mo nzughum zak. 9Taji wu ɗyel mee shaghal zinariya koo azurfa koo boong ndi̶ghi̶n sar mbanti, fuu mo kas. 10Taji wu ɗyel mee kuluk a ar mwaan fuu, koo nli̶r mo vul, koo a kwaghazak, koo kammwaan kas, mpeeɗi nyem ɗi wun nso wu satpo Naan ni mmo, ɓe nin ndi̶re ku mo cín mbiise nwun, ki̶ mbii ɗi wun nriɓet jir. 11"Koo birni ɗiiɗang ye, ki̶ koo a laayil ɗiiɗang ye ɗi wu ɗel ndi̶ghi̶n ni, ɓe wu tang mee ngo ɗin ndi̶re ɗi wurin nlap wun, ɓe wu tong ashak ki̶ wuri, har parpuus ɗi wun nyit peemi̶ni. 12Katɗang wu ɗel ndi̶ghi̶n mee tulu, ɓe wu tokshik ki̶ nyemtulu ni mo. 13Katɗang nyemtulu ni mo lap wun, ɓe wu yit ku riyang mu tokshik fuu ni sham nkaa tulu mi̶ni. Katɗang ɓe ba nyemtulu ni mo lap wun kas, ɓe wu yit ku riyang mu tokshik fuu ni baa pe wun ɗi. 14Koo a ngo ɗiiɗang ye ɗi ba wuri lap wun kas, ki̶ wuri kwar ki̶lingpo fuu, ɓe katɗang wun a ar put ntulu ni, koo mbirni ni, ɓe wu ɓwap i̶rong ɗi ni nkaa shii fuu mo. 15Azeen-nzeen wan sat nwun nee, parpuus ɗiyeel, ɓe Naan naajeel kì̵ nyem yil nSodom mo ki̶ Gomora met mbirni mi̶ni." 16Jesu wuri waa baa sat mmo nee, "Wu naa wan lop wun a kaa tum ɗi mon nnaar kì̵ ncuwe mo si. Mpeemi̶ni ɓe wu seen kaa nw`oo mo si, ki̶ wu ɗee a nyem ɗiiret mo kaa mbul mo si zak. 17Amma wu tap ki̶ gurum mo, mpeeɗi mon nyaghal yak wun so ni pe nyemɗiyeel mo ɗi, ki̶ mon nfwo ngwam nwun ndi̶ghi̶n lu kì̵ Naan mo. 18Ki̶ mon nso ki̶ wun pe nyem ɗiinan-nan furu mo ɗi, ki̶ pe mishkagham mo ɗi mpee sum fi̶na. Ɓe wun nsatpo ɗiiret ni mmo, ki̶ nyem ɗi ba mo a nyem Yahudi mo kas. 19Katɗang mo yak wun, ɓe taji wu an suk mpee po ɗi wun nsat ni kas, koo mbii ɗi wun nlappo mmo kas, mpeeɗi Naan wurin ncín nwun mbii ɗi wun nsat parmi̶ni. 20Po ɗi wun nsat ni, ba a muu kas, amma a mu riin kì̵ puun fuu ɗi wuri cín ni nwun. 21"Ɗyemni̶ghi̶nshak mon nyaghal si̶rep shak har mpee muut, ki̶ puun wurin nseet làa fi̶ri, ki̶ jep mon nyaghal lek nkaa puun furu mo, har mon nle ku mo twa mo. 22Gurum mo jir mon nyaghal kwar wun mpee sum fi̶na zak. Amma ngo ɗi wuri gung har peekyes, ɓe a wurin nkat ɓam ɗi. 23Katɗang mo lejeel wun ndi̶ghi̶n mee birni, ɓe wu swa wu so mmee birni ɗiici, mpeeɗi azeen wan ki̶n sat nwun nee, Làa kì̵ Gurum wurin nten j`i akuɗang wuu kyes ɗak fuu mo ndi̶ghi̶n birni kì̵ nyem Isreil mo. 24"Ba mee làa makaranta wurin nɗes met ngo ɗiikám nwuri kas, ki̶ ba ki̶rom wuri ɗes met daa fi̶ri kas. 25Ni mak c`in ku làa makaranta wuri mwaan nɗang shiimwaan kì̵ ngukám fi̶ri, ki̶ nii mak c`in ku ki̶rom wuri ɗee kaa daa fi̶ri si zak. Katɗang mo pet ngulu ni a Beelzebul, ɓe mon mpet nyemlu fi̶ri mo a shi sum ɗiibish mmi̶ni." 26"Mpeemi̶ni taji wu ki̶i̶r gurum mo kas, mpeeɗi ba mee mbii ɗi, ɗi ni a ɗiipi̶paa ɗi nin nnook put agaak kas. Ba mee mbii ɗi, ɗi ni a si̶sok ɗi ba gurum mon nnook man ni kas. 27Mbii ɗi wan sat nwun mpar, ɓe wu sat nin mpuus. Mbii ɗi wu ki̶ling nkom caghat, ɓe wu satpo nkaa ni agaak. 28Taji wu ki̶i̶r nyem ɗi mon ntu suk fuu mo kas, amma ba mon mmak tu seen fuu mo kas. Gyal wu ki̶i̶r a Naan, ɗi wuri mak tu seen fuu mo shi aawus, ɗi wuri kì̵ ɗak le mpee Shetan. 29Ba moo seet ny`er kushing mo vul nkaa koɓo kas aa? Ba memee mi̶ndong mak taa nyil nɗin mman kì̵ puun fuu kas. 30Amma pee wun, ɓe shoopkáa fuu mo a ɗiiti̶tang shimi̶ndong-shimi̶ndong. 31Mpeemi̶ni ɓe taji ki̶i̶rmuut yaa wun kas, wun ki̶ koghop ni ɗes met ny`er kushing si mo." 32Jesu wuri sat nee, "Koo ngo ɗiiɗang ye ɗi wuri sat agaak ntoghom kì̵ gurum mo nee, wuɗi a mi̶na, ɓe wan nsat agaak ntoghom kì̵ puun fi̶na ɗi wuri aɗeng nee, gwar mi̶ni a mi̶na aasi zak. 33Koo ngo ɗiiɗang ye ɗi wuri cíipo fi̶na ntoghom kì̵ gurum mo, ɓe wan nciipo ki̶ ngo mi̶ni ntoghom kì̵ puun fi̶na ɗi wuri aɗeng zak." 34"Taji wu pan nee, wan j`i a mpee leriyang nkaa yil ni kas, ba wan j`i a mpee leriyang kas, see mpee ɓàk gurum mo. 35Amma wan j`i a mpee ɓàk làa mo ki̶ puun fi̶ri, reep mo ki̶ ni̶ghi̶n fi̶ra. Ni̶wel mo ki̶ noghonkaam fi̶ra. 36Shaarlek kì̵ gurum, a nyemtulu fi̶ri mo. 37"Ngo ɗi wuri wal mpuun, koo ni̶ghi̶n met wan, ɓe ba wuri mak ɗee a mi̶na kas. Ngo ɗi wuri wal nlàa fi̶ri ɗiimish koo làa ɗiimat met nwan, ɓe ba wuri mak ɗee a mi̶na kas. 38Ki̶ ngo ɗi ba wuri mang shiyeepmúut fi̶ri ku wuri j`i ndang wan kas, ɓe ba wurin mmak ɗee a mi̶na kas zak. 39Ngo ɗi wuri tap kyee seen fi̶ri, ɓe nin nlagham nkaa wuri, amma ngo ɗi wuri cín seen fi̶ri mpee wan, ɓe wurin nkat ni." 40"Ngo ɗi wuri lap wun, ɓe wuri lap a wan mmi̶ni, amma ngo ɗi wuri lap wan, ɓe wuri lap a ngo ɗi wuri lop wan mmi̶ni zak. 41Ngo ɗi wuri lap ngusatpo Naan, ɓe wurin nlap kwat ntiit ki̶ ngusatpo Naan. Ngo ɗi wuri lap ngo ɗin ndi̶re, ɓe wurin nlap pak kwat ntiit ki̶ ngo ɗin ndi̶re zak. 42Koo ngo ɗiiɗang ye ɗi wuri cín rep ɗaa am ɗiizughum mpee, memee mi̶ndong ndi̶ghi̶n nyemso ndang wan si mo, ku wuri shwaa, mpeeɗi wuri a mee laalop fi̶na, ɓe azeen-nzeen wan ki̶n sat nwun nee, Naan wurin nkwat ngo ni."

will be added

X\