Maak 9

1Jesu wuri sat mmo nee, "Azeen-nzeen ki̶n sat nwun nee, pak mo ɗi ndi̶ghi̶n nyem ɗi moo ɗirang mpesi, ba mon mmurap kas, see mo naa mulki kì̵ Naan ni j`i shi iiko akuɗang." 2Aɓwoon kì̵ shiiteer mo peemee, ɓe Jesu wuri mang Pita, ki̶ Jemis, ki̶ Joon. Wuri kàa ki̶ mo a mee ɗeng jwak ɗiiwurang, mo mmusut. Ɓe shin kì̵ Jesu ni cighi̶r ndi̶ghi̶n ɗiiɗes fi̶ri a yit furu. 3Nli̶r fi̶ri mo cighi̶r ɗee a ɗiipiyaa peng-peng, har ni mang yit mmo. Ba mee gurum ndi̶ghi̶n yil si mak vwang nli̶r piyaa kaa mi̶ni si kas. 4Ɗangɓe nyemso ndang Jesu mo naa Mosis, ki̶ Ilaija mon nkaa katpo ki̶ Jesu. 5Ɓe Pita wuri sat nJesu nee, "Ngukám, ni ret kaaɗi mun ɗi mpesi si. A yit ku mu ɗik b`it mo kun, memee mpee wugha, memee mpee Mosis, ki̶ memee mpee Ilaija." 6Ba Pita wuri manshii kì̵ mbii ɗi wurii sat kas, mpeeɗi ki̶i̶rmuut nii fes yaa mo. 7Ɗangɓe nluu j`i paa mo, ki̶ mo ki̶ling mee ɗoo ni put ndi̶ghi̶n nluu ni, ɗi ni sat nee, "Ɗiisi a Làa fi̶na, ɗi wan wal nwuri zam. Wu ki̶ling wuri." 8Abet, kaaɗi mo cighi̶r naapee, ɓe ba mo naa mee gurum kuɗi ashak ki̶ mo kas, see a Jesu mmi̶shin ɓejee. 9Kaaɗi mo a ar sham aɗeng jwak ni, ɓe Jesu wuri sat mmo shiɓal nee, taji mo sat mmee gurum mbii ɗi mo naa kas, see Làa kì̵ Gurum wuri yaghal a peemúut akuɗang. 10Ba mo sat mbii ɗi mo kì̵ naa ni mmee gurum kas, amma mo tal pushak nee, "A me a shii kì̵ yaghal a peemúut ni ye?" 11Mo tal pu Jesu nee, "A me le ɗang nyemkám Waar kì̵ Mosis mo sat nee, 'Ting see Ilaija wuri shee j`i akuɗang ye?' " 12Jesu wuri lap mmo nee, "Ilaija wurin nshee j`i, mpeku wuri baa ɗak mbii mo ɗi ndi̶re jir. Ɓe a me le ɗangɓe mo kì̵ ten ran nee, Làa kì̵ Gurum wurin nshwaajeel mo ɗes shini-shini ki̶ mon mɓák wuri, ki̶ le wuri a ɗiibuu ye? 13Amma wan sat nwun nee, Ilaija wuri kì̵ ten j`i, ki̶ mo kì̵ c`in mbii ɗi mo riɓet ki̶ wuri jir, kaaɗi mo kì̵ ran ndi̶ghi̶n takarda kì̵ Naan nkaa wuri si." 14Kaaɗi mo sham wul pe kaghar nyemso ndang wuri ni mo ɗi, ɓe mo naa ɗuu kì̵ gurum mo ɗes pe mo ɗi, ki̶ nyemkám Waar kì̵ Mosis mo, mo nkaa ɓeetshik ki̶ nyemso ndang Jesu ni mo. 15Kaaɗi ɗuu kì̵ gurum ni mo naa Jesu, ɓe ni aapo mo jir. Abet, ɓe mo swa so pe wuri ɗi, ɓe mo tok ki̶ wuri. 16Jesu wuri tal pu nyemso ndang wuri ni mo nee, "Wuu ɓeet a me ki̶ mo ye?" 17Ɓe mee gwar mɓut ɗuu kì̵ gurum ni mo wuri lap nee, "Ngukám, wan j`i ki̶ làa fi̶na pe wugha ɗi, mpeeɗi wuri ki̶ riin ɗiibish, ɗi ni cíi katpo nwuri. 18Tong ɓe nii j`i yaghal yaa wuri karmat, ɓe nii mang wuri shoor nyil, ki̶ ti̶fil ki̶ j`i put wurin mmpo, ki̶ wurii sum aghas, har nii le ku shin fi̶ri ni fii. Wan ki̶n ɗang pu nyemso ndang wugha mo, mpeku mo ceen riin ɗiibish ni put ɗi, amma ba mo mak kas." 19Jesu wuri sat mmo nee, "Wun nyem ɗin ny`iicinsi ba wu cínzeen kas! Wan ntong ashak ki̶ wun har mpee vit aa? Wu j`i ki̶ làa ni pe wan ɗi." 20Mo j`i ki̶ làa ni pe Jesu ɗi. Kaaɗi riin ɗiibish ni naa Jesu, ɓe abet ni yoghon làa ni, ki̶ ni mang wuri shoor nyil, ɓe làa ni wuri ɓi̶ring nyil, ki̶ ti̶fil j`i put wurin mmpo. 21Jesu wuri tal pu puun kì̵ làa ni nee, "Mbii ɗiisi ni yaa c`in ɗyem fugha ni a pi̶rang ye?" Puun ni wuri lap nee, "Pugyet wuri kuɗi a làa ɗiilee. 22Nii naa mang wuri vwet ndi̶ghi̶n wus, ki̶ ndi̶ghi̶n am zak, mpeku ni tu wuri ɗi. Amma katɗang wugha mak c`in mee mbii, ɓe a naajeel funu, kussuk a ɓam mun." 23Jesu sat nwuri nee, "A me le ɗang wugha sat nee. 'Katɗang wan mak ye?' Ngo ɗi wuri cínzeen, ɓe mbii mo jir, mon mmak c`in mpee wuri." 24Abet-abet, ɓe puun kì̵ làa ni wuri ɗiyeep ɗoo fi̶ri nee, "Wan cínzeen. A ɓam wan ki̶ ciin cínzeen fi̶na ni!" 25Kaaɗi Jesu wuri naa ɗuu kì̵ gurum ni mo gyar j`i kus-kus, ɓe wuri gwak riin ɗiibish ni, wuri sat nni nee, "Wugha, riin ɗiibish ɗi wugha cíi katpo ki̶ ki̶lingpee ngurum. Wan sat nwugha, a put aku mɓut nlàa ni. Taji a baa ɗel ndi̶ghi̶n làa ni zak kas." 26Aɓwoon ɗi riin ɗiibish ni le or, ɓe ni yoghon làa ni shiɓal, har ni mang làa ni vwet nyil, ɓe ni put. Làa ni wuri gan nyil kaa wuri kì̵ mumuut si, har ni̶ghi̶n kì̵ gurum ni mo sat nee, "Làa ni kì̵ muut." 27Amma Jesu wuri yaa sar kì̵ làa ni, wuri ɗiyeep wuri, ɓe làa ni yaghal ɗar a ting. 28Aɓwoon mi̶ni, ɓe Jesu wuri ɗel ndi̶ghi̶n lu, ɓe nyemso ndang wuri mo tal pu wuri caghat nee, "A me le ɗangɓe ɗi ba mun mu mak put ki̶ riin ɗiibish ni kas ye?" 29Jesu wuri lap mmo nee, "Ba mbii kaa ɗiisi nin mmak put kas, see a shi aduwa." 30Jesu ki̶ nyemso ndang wuri ni mo yaghal yit peemi̶ni, ɓe mo yaa ar ɗel nyil nGalili, ɓe ba wuri riɓet ku gurum mo man peeɗi wuri ɗi kas. 31Mpeeɗi wuri nkaa kám nyemso ndang wuri mo nee, "Mon ncín Làa kì̵ Gurum ndi̶ghi̶n sar kì̵ gurum mo, ɓe mon ntu wuri, amma puus ɗiikun ɓe wurin nyaghal a peemúut." 32Amma ba nyemso ndang Jesu ni mo manshii kì̵ po mi̶ni kas, ki̶ mo ki̶i̶r tal ni pu wuri zak. 33Kaaɗi mo j`i wul nyil nKaparnahum, ɓe Jesu wuri ɗel ndi̶ghi̶n lu, ɓe wuri tal pu nyemso ndang wuri ni mo nee, "Ɗi wuu ɓeetshik, a nkaa me, a ar si ye?" 34Amma mo ɗok titik, mpeeɗi mo kì̵ ɓeetshik ki̶ shak a ar nee, a we a ɗiiɗes met jir ndi̶ghi̶n ɗun ye? 35Jesu wuri tong nyil, ɓe wuri pi̶rep nyemso ndang wuri ɗiikaghapaat baavul ni mo, ɓe wuri sat mmo nee, "Katɗang mee gurum riɓet ɗee a ɗin nshee, ɓe ni ret ku wuri ɗee a ɗin mɓwoon, ki̶ a wurin nɗee a nguɗak niyee mo jir zak." 36Wuri pet mee làa ɗiilee, ɓe wuri le làa ni ɗar nnaar furu, ɓe wuri mang làa ni nsar fi̶ri, ɓe wuri sat mmo nee, 37"Koo ngo ɗiiɗang ye, ɗi wuri lap mee làa ɗiilee kaa ɗiisi si, ndi̶ghi̶n sum fi̶na, ɓe gwar ni lap a wan mmi̶ni. Ki̶ koo ngo ɗiiɗang ye ɗi wuri lap wan zak, ɓe ba wuri lap a wan mmi̶san ɓejee kas, amma wuri lap a ngo ɗi wuri lop wan j`i mmi̶ni zak." 38Joon sat nwuri nee, "Ngukám ɗi mu naa mee gwar wuri nkaa ceen riin ɗiibish mo pwat ndi̶ghi̶n gurum mo shi sum fugha, ɓe mu cíi nwuri, mpeeɗi ba wuri a memee ndi̶ghi̶n mun kas." 39Amma Jesu wuri sat mmo nee, "Taji wu cíi nwuri kas. Mpeeɗi ba mee gurum mak c`in mee mbii aapo shi sum fi̶na, ɗangɓe wuri waa cighi̶r satpo ɗiibish nkaa wan kas. 40Mpeeɗi ngo ɗi ba wuri a shaarlek funu kas, ɓe ngo ni a munu mmi̶ni. 41Azeen-nzeen ki̶n sat nwun nee, koo ngo ɗiiɗang ye, ɗi wuri cín am nwun shwaa, mpeeɗi wun a mu Kristi mo, ɓe gwar mi̶nin nlap kwat ni hakyeng." 42"Koo ngo ɗiiɗang ye ɗi wuri le ku memee mi̶ndong ndi̶ghi̶n ɗiilee si mo, ɗi mo cínzeen nwan, mo c`in shikbish, ɓe ɗi nin nret ku mo ɗiin mee fin ɗiyees shiit ɗiitoghon ntook kì̵ gwar mi̶ni, ku mo vwet wuri ɗi ndi̶ghi̶n am bahar. 43Katɗang sar fugha ni le ku a c`in shikbish, ɓe a can ni a vwet. Mpeeɗi ngyal ɗeesi ɓe a ɗel ndi̶ghi̶n peeseen ki̶ sar mi̶ndong, ni ret met aku ɗi mon nvwet wugha ndi̶ghi̶n aawus ɗiiso ngaa-ngaa, ɓe wugha ki̶ sar mo vul. [ 44A peeɗi nyet ɗi moo se gurum mo, ba mon nkyam murap kas, ki̶ ba wus nin nkyam pit ɗi kas zak.] 45Ki̶ katɗang ɓe shii fugha ni le ku a c`in shikbish, ɓe a can ni a vwet. Mpeeɗi ngyal a ɗel ndi̶ghi̶n peeseen shi shii mi̶ndong, ni ret met, aku ɗi mon nvwet wugha ndi̶ghi̶n aawus ɗiiso ngaa-ngaa ɓe wugha ki̶ shii mo vul. [ 46A peeɗi nyet ɗi moo se gurum mo, ba mon nkyam murap kas, ki̶ ba wus nin nkyam pit ɗi kas zak.] 47Ki̶ katɗang ɓe yit fugha ni le ku a c`in shikbish, ɓe a pun ni a vwet. Mpeeɗi ngyal ɗeesi ɓe a ɗel ndi̶ghi̶n mulki mu Naan ki̶ yit mi̶ndong, ni ret met aku ɗi mon nvwet wugha ndi̶ghi̶n aawus ɗiiso ngaa-ngaa, ɓe wugha ki̶ yit mo vul. 48A peeɗi nyet ɗi moo se gurum mo, ba mon nkyam murap kas, ki̶ ba wus nin nkyam pit ɗi kas zak. 49"Mon nc`in ɗak shi wus, mpeku mo le gurum mo pan shee ret ɗi jir, kaaɗi moo le ki̶i̶n nkaa mbii, mpeku taji ni wam kas si. 50Ki̶i̶n ni a mbii ɗiiret, amma katɗang ba ki̶i̶n ni kuɗi kì̵ shang kas, ɓe mon nɗak ni a shi me, mpeku ni baa shang ɗi ye? Wun nyemso ndang wan mo, wu tongriyang ki̶ shak, kaa ki̶i̶n ɗi ba nii ɓàkshak ki̶ shang kì̵ ni kas si."

will be added

X\