1 Nyem Farisi mo, ki̶ pak nyemkám Waar kì̵ Mosis mo, ɗi mo tong nJerusalem, mo j`i kuur pe Jesu ɗi. 2 Ɓe mo naa pak jeplop kì̵ Jesu moo se mbiise shi sar ɗii ba ni ɓang kas, shii ki̶ mi̶ni nee, ba mo vwang sar furu mo kaaɗi nyem Farisi mo sat ne, mo c`in si kas. 3 Ba nyem Farisi mo ki̶ nyem Yahudi mo jir, moo see mbiise kas, see mo shee vwang sar furu mo riret akuɗang. Moo tap aa mbii ɗi gyet puun furu moo loghot ki̶ c`in ni. 4 Katɗang mo tong nkasuwa j`i, ɓe ba mon nse mee mbii kas, see mo shee vwang sut riret akuɗang. Pak mbii mo ɗi ɗes, ɗi moo c`in, ɗi mo kám a pu puun furu mo, kaa vwang laaɗaa mo, ki̶ tughul mo, ki̶ ɗaa boong mo si. 5 Nyem Farisi mo, ki̶ nyemkám Waar kì̵ Mosis mo tal pu Jesu nee, "A me le ɗangɓe ba jeplop fugha moo tap ki̶ kám kì̵ puun funu mo kas ye? Har moo se mbiise shi sar ɗi ba mo ɓang kas." 6 Jesu wuri lap mmo nee, "Wun nyemso ndang Naan shi putughup vul-vul mo. Gyet Aizaya wuri satpo nkaa wun a ndi̶re nee: 'Nyem ɗiisi moo cín ɗiiɗes nwan a shi mi̶shpoo furu mo. Amma putughup furu mo jong ki̶ wan. 7 Moo seyil nwan a buu. Kám ɗi moo kám ni a Waar mu gurum mo.' 8 Wun kì̵ yit Waar kì̵ Naan, ku wu ɗyel a Waar ɗi gurum moo loghot ki̶ c`in ni." 9 Wuri sat mmo zak nee, "Wun ki̶ mee ar seen mpee kwar Waar kì̵ Naan mo, mpeku wu ɗyel kám fuu mo ɗi. 10 Mosis wuri sat nee, 'A cín ɗiiɗes mpuun fugha ki̶ ni̶ghi̶n fugha,' ki̶ zak nee, 'ngo ɗi wuri satpo ɗiibish nkaa puun koo ni̶ghi̶n fi̶ri, ɓe mon ntu wuri ting.' 11 Amma wuu kám ngurum mo nee, 'Katɗang gurum wuri ki̶ mee mbii ɗi ni ret ku wuri ɓam puun fi̶ri, koo ni̶ghi̶n fi̶ri ɗishik, ɗangɓe wuri sat nee, ni a Korban,' (ɗi shii ki̶ mi̶ni ne, ni a mu Naan). 12 Ɓe ba wu kuɗi wuu yit nwuri c`in mee mbii mpee ɓam puun fi̶ri ki̶ ni̶ghi̶n fi̶ri kas. 13 A mpee kám fuu ɗiisi mo, ɓe wuu lepo kì̵ Naan ɗee a mbii ɗiibuu, ki̶ mbii mo ɗes ɗi wuu c`in mo aasi zak." 14 Jesu wuri waa baa pet ɗuu kì̵ gurum ni mo, ɓe wuri sat mmo nee, "Wu lekom, ku wu ki̶ling mbii ɗi wan nsat ɗi, ku wu manshii kì̵ ni ɗi zak. 15 Ba mee mbii ɗi gurum kì̵ se mpo, nin nle ku gurum ɗee a ɗiibish nyit kì̵ Naan kas, amma a mbii ɗi moo kàa pwat mpo kì̵ gurum, a mi̶ni moo le gurum ɗee a ɗiibish nyit kì̵ Naan." [ 16 Katɗang mee ngo ki̶ kom mpee ki̶lingpee, ɓe wuri ki̶ling.] 17 Kaaɗi Jesu wuri yaghal yit ɗuu kì̵ gurum ni mo, ɓe wuri so ɗel ndi̶ghi̶n lu. Ɓe jeplop fi̶ri mo tal shii kì̵ sumpo mi̶ni pu wuri. 18 Jesu wuri sat mmo nee, "Ba wun wu manshii kì̵ ni kas zak aa? Wu man nee; koo a mbii ɗiiɗang ye ɗi gurum se, ɓe ba nin mmak le gurum ɗee a ɗiibish nyit kì̵ Naan kas. 19 Mpeeɗi mbii ɗi gurum se, ɓe ba nii ɗel sham a ndi̶ghi̶n putughup fi̶ri kas, amma nii ɗel sham a ndi̶ghi̶n ɓut fi̶ri, har wurin nso ki̶n ni nɗyes." Jesu wuri satpo ɗiisi, a mpeku wuri kám ɗi nee, ba mee mbiise mak le gurum ɗee a ɗiibish nyit kì̵ Naan kas. 20 Jesu wuri sat zak nee, "A mbii ɗi moo kàa pwat ndi̶ghi̶n putughup kì̵ gurum, a moo le gurum a ɗiibish nyit kì̵ Naan. 21 Mpeeɗi a ndi̶ghi̶n putughup kì̵ gurum, ɓe pan ɗiibish moo pwat a ɗi. Mbii mo kaa tang mat mo, ki̶ wat, ki̶ tukáa, ki̶ ngaa. 22 Ki̶ riɓet mbii, ki̶ zughur, ki̶ ɓutbish, ki̶ numpee, ciin yaasut, ki̶ roghop, ki̶ ndaghap. 23 A mbii ɗiibish ɗiisi mo jir, ɗi moo pwat ndi̶ghi̶n putughup kì̵ gurum, a mi̶ni moo le gurum ɗee a ɗiibish nyit kì̵ Naan." 24 Jesu wuri yaghal a peemi̶ni zak, ɓe wuri so ndi̶ghi̶n yil nTaya ki̶ Sidon. Wuri so ɗel ndi̶ghi̶n mee lu, ɗi ba wuri riɓet ku mee gurum manpee ɗi wuri ɗi kas, amma jir ki̶si, ɓe gurum mo so tang wuri kat. 25 Kaaɗi mee mat, ɗi riin ɗiibish ndi̶ghi̶n reep fi̶ra ɗiilee, wura ki̶lingpo nkaa Jesu, ɓe abet, wura j`i taa ntoghom fi̶ri. 26 Ba mat ni wura a mat Yahudi kas, wura a mat Heleni. Mo làa wura a nFonisha, ɗi nin nyil nSiriya. Wura ɗang pu Jesu, mpeku wuri ceen riin ɗiibish ni put aku mɓut nreep fi̶ra ni. 27 Jesu wuri lap nwura nee, "Yi yit ku mu cín mbiise njeplu mo hi̶ɓi̶l ɗi aku, mpeeɗi ba ni ret ku mu mang mbiise mu jep mo, ku mo fwo nin as mo kas." 28 Amma wura sat nee, "Ii, ni aasi Daa, amma as ni moo se rep pak mbiise ɗi nii ɗyong nyil, nder peetong mu sese kì̵ jeplu ni mo." 29 Jesu wuri sat nwura nee, "Mpee po ɗi yi sat si, ɓe yi so waa yiyi, riin ɗiibish ni kì̵ put mɓut nreep fii ni." 30 Kaaɗi mat ni wura baaso ntulu fi̶ra, ɓe wura kat reep fi̶ra nsaam nkaa mbiisaam. Riin ɗiibish ni kì̵ put ndi̶ghi̶n reep ni jee. 31 Jesu wuri yaghal yit yil nTaya, ɓe wuri taa mer nSidon, har wuri j`i wul mbahar mu Galili, nkoghop nyil nDikapolis. 32 Mee das mo j`i ki̶ mee ti̶ding, ɗi ba wurii mak katpo kas pe Jesu ɗi. Mo ɗang pu wuri, ku wuri lesar fi̶ri nkaa ti̶ding ni. 33 Mɓut ɗuu kì̵ gurum ni mo, ɓe Jesu wuri yaa ti̶ding ni nsar, so ki̶ wuri mee koghop caghat mmi̶shin. Jesu wuri jwal ni̶kongsar fi̶ri mo ndi̶ghi̶n kom kì̵ gwar ni, ki̶ wuri tus lii, ɓe wuri tuwaas liis kì̵ gwar ni zak. 34 Jesu wuri naapee kàa aɗeng, ɗangɓe wuri nook puut, ɓe wuri sat nti̶ding ni shi li̶po mu nyem Arameek mo nee, "Iffata." ɗi shii kì̵ mi̶ni nee, "Wang!" 35 Ɓe abet, ɓe gwar ni ki̶lingpee, ki̶ liis fi̶ri ni fwoon, har wuri katpo riret. 36 Jesu wuri satpo ngurum ni mo shiɓal nee, taji mo satpo nkaa ni mmee gurum kas, amma a koppee ɗi mon nɗok titik, ɓe mo waa so satpo ngurum mo nkaa ni ɗes. 37 Ni aapo ngurum ni mo hakyeng, har mo sat nee, "Wuri c`in mbii mo jir a ndi̶re-ndi̶re. Wurii le ku komɗwaghar mo ki̶lingpee, ki̶ ti̶ding mo katpo zak."
