Maak 5

1Jesu ki̶ jeplop fi̶ri mo can am bahar ɗel, ɓe mo j`i wul mɓin ɗi̶ghi̶r mu yil nGarasin. 2Kaaɗi Jesu wuri put ndi̶ghi̶n jirgi ni abet ɓe wuri kaat ki̶ mee gwar ɗi wuri ki̶ riin ɗiibish, ki̶ wurii tong a ndi̶ghi̶n goghot ki̶cir mo. 3A peetong kì̵ gwar ni mmi̶ni. Ba mee gurum kat ɓal ɗin mmak yaa wuri ɓwaghat kas. Koo ɗi mo ɓwaghat wuri a shi ti̶sek, ɓe wuri saa ti̶sek ni. 4Jí moo naa njwal shii fi̶ri mo mɓut nfut, ki̶ mo ɓwaghat sar fi̶ri mo shi ti̶sek, amma wurii roghop nfut ni, ki̶ wurii ki̶ram ti̶sek ni fwo. Ba mee gurum mak c`in mee mbii nwuri kas. 5Par ki̶ puus, ɓe wurii tong a ndi̶ghi̶n ki̶cir, ki̶ ndi̶ghi̶n jwak mo, ki̶ wurii le or, ki̶ wurii koon shin fi̶ri nkaa jwak ni mo. 6Kaaɗi wuri naa Jesu ki̶ j`i jong-jong, ɓe wuri yaghal su so kurum nfurum ntoghom fi̶ri. 7Ɓe wuri le or shiɓal nee, "A me kaat mun ki̶ wugha? Jesu Làa kì̵ Naan Ɗiihai! Wan ɗang pu wugha mpee sum kì̵ Naan, taji a lejeel nwan kas." 8Gwar ni sat ki̶si, a mpeeɗi Jesu kì̵ sat nriin ɗiibish ni nee, "A put aku mɓut ngwar ni, wugha riin ɗiibish." 9Jesu tal pu gwar ni nee, "Sum fugha a weye?" Gwar ni lap nee, "Sum fi̶na ni a Lijiyon, ɗi shii kì̵ mi̶ni nee, mun ɗi ɗes." 10Riin ɗiibish ni mo ɗang pu Jesu hakyeng, mpeku taji wuri ceen mo pwat ndi̶ghi̶n yil mi̶ni kas. 11Kus ki̶ peemi̶ni, ɓe kuur kì̵ tughus mo ɗi ɗes, mo nkaa se shit shitughur jwak. 12Riin ɗiibish ni mo ɗang pu Jesu, ku wuri cínpee mmo, ku mo so ɗel ɗi ndi̶ghi̶n tughus ni mo. 13Jesu wuri cínpee mmo, ɓe riin ɗiibish ni mo pwat aku ndi̶ghi̶n gwar ni, ɓe mo so ɗel ndi̶ghi̶n tughus ni mo. Ɗuu kì̵ tughus ni mo wul duɓu vul, mo yaghal swa sham a shitughur jwak, ɓe mo sham ɓeer ndi̶ghi̶n am canɗar ni, har mo murap jir. 14Nyemnaa tughus ni mo swa so sat ngurum mo ndi̶ghi̶n birni, ki̶ jepyil mo jir. Gurum mo pwat j`i mpee naa mbii ɗi ni kì̵ c`in. 15Mo j`i pe Jesu ɗi, ɓe mo naa gwar ɗi jí wuri ki̶ riin ɗiibish mo si, wurii tong, ki̶ nli̶r a li̶lop, ki̶ wuri ndi̶ghi̶n ɗyen fi̶ri riret, ɓe ki̶i̶rmuut yaa mo. 16Nyem ɗi mo c`in mbii ɗiisi ni a yit furu, ɓe mo yakshii ni ngurum mo, kaaɗi Jesu bar gwar ɗi jí wuri ki̶ riin ɗiibish mo si, ki̶ kaaɗi tughus ni mo murap si. 17Ɗangɓe nyemyil ni mo ɗang pu Jesu, ku wuri yaghal put aku ndi̶ghi̶n yil furu. 18Kaaɗi Jesu wurin ndung ɗel ndi̶ghi̶n jirgi am, ɓe gwar ɗi, wuri ki̶ riin ɗiibish si, wuri ɗang pu Jesu nee, "A yit wan so ɗi ndang wugha." 19Amma ba Jesu riɓet kas. Wuri sat ngwar ni nee, "A baaso ntulu, pe ɗyemni̶ghi̶n fugha mo ɗi, mpeku a satpo ɗi mmo nkaa mbii ɗiiɗes ɗi Naan kì̵ c`in wugha, ki̶ ɗi wuri kì̵ naajeel fugha." 20Gwar ni wuri baa waa, ɓe wuri taa satpo ni nyem ɗin nkoghop nyil nDikapolis mo, nkaa mbii ɗiiɗes ɗi Jesu kì̵ c`in nwuri. Mbii ɗi gwar ni sat ni aapo ngurum mo. 21Jesu wuri waa baa canɗel nkoghop mɓin ɗiisi, ndi̶ghi̶n am, ɓe gurum mo ɗes mo j`i kuur pe wuri ɗi, mpo am bahar ni. 22Mee gwar ɗi moo pet sum fi̶ri a Jairus, wuri a memee ndi̶ghi̶n nyemnan-nan mu mee lu kì̵ Naan, wuri j`i kurum ntoghom kì̵ Jesu. 23Wuri ɗang pu Jesu hakyeng, wuri sat nee, "Reep fi̶na ɗiilee wuran ndung muut. A j`i a lesar fugha mo nkaa wura, mpeku wura kat seen ɗi." 24Jesu wuri yaghal so ashak ki̶ Jairus, ɓe gurum mo ɗes mo so ndang wuri, har mo neer wuri cighi̶rkaat kus-kus. 25Mee mat wura ɗi zak, ɗi wura kì̵ ɓeer toghom mpee ɓit mo kaghapaat baavul. 26Wura kì̵ kyes long fi̶ra mo jir pu nyemyen mo, jir ki̶si, ɓe ba memee mak bar wura kas. Amma shwal fi̶ra nii waa si̶ghi̶t cicíi nni. 27Kaaɗi wura ki̶lingpo nkaa mbii ɗi Jesu wurii c`in mo, ɓe wura so ɗel mɓut ɗuu kì̵ gurum ni mo. Ɓe wura tap so mɓwoon kì̵ Jesu, ɓe wura tung pukom nli̶r fi̶ri. 28Mpeeɗi wura kì̵ ten pan ndi̶ghi̶n putughup fi̶ra nee, "Katɗang ɓe wan tung koo a pukom nli̶r fi̶ri ɓejee ɗak, ɓe wan mbar." 29Aasi ɓe, wura tung pukom nli̶r fi̶ri ni, ɓe abet, toghom fi̶ra ni ɗar. Wura man ndi̶ghi̶n sat fi̶ra nee, shwal fi̶ra ni kì̵ kyes jee. 30Abet Jesu wuri man nee; iiko ki̶ put ndi̶ghi̶n shin fi̶ri, ɓe wuri cighi̶r tal pu gurum ni mo, nee, "A we tung nli̶r fi̶na ye?" 31Jeplop fi̶ri mo lap nwuri nee, "A naa ɗuu kì̵ gurum ni mo neer wugha cighi̶r kaat, ɓe a sat nee, 'A we tung wugha ye aa?' " 32Jesu wuri cighi̶r mpeku wuri naa ngo ɗi tung pukom nli̶r fi̶ri ni ɗi. 33Mat ni wura man kagham ɗi wura kì̵ kat ni, ɓe wura j`i shi ki̶i̶rmuut ki̶ ɗaar, wura kurum nyil ntoghom kì̵ Jesu, ɓe wura sat zeen nwuri jir mbii ɗi ni ki̶ c`in. 34Jesu wuri sat nwura nee, "Reep fi̶na, cínzeen fii ni le ku yi ɗee a ɗiibi̶bar. Shwal fii ni kyes. Yi so yiyi riyang." 35Kaaɗi Jesu wuri kuɗi nkaa satpo mi̶ni, ɓe mee das mo tong ntulu kì̵ Jairus j`i, ɓe mo sat wuri nee, "Reep fugha wura kì̵ muut, mpeemi̶ni ɓe taji a lejeel Ngukám wuri kas." 36Amma Jesu wuri lekom kaa baa wuri ki̶lingpo ɗi mo sat ni kas si. Ɓe wuri sat nJairus nee, "Taji putughup fugha wat kas, amma a cínzeen ɓejee." 37Ba Jesu wuri yit ku mee gurum so ndang wuri kas, see a Pita, ki̶ Jemis ki̶ Joon ɗyemni̶ghi̶n kì̵ Jemis ɓejee ɗak. 38Kaaɗi mo j`i wul ntulu kì̵ Jairus ni, ɓe Jesu wuri naa gurum mo nkaa fwo ruruu, ki̶ mo nkaa wal, ki̶ mo nkaa maap zak. 39Wuri ɗel ndi̶ghi̶n lu ni ɓe, wuri sat mmo nee, "A me le ɗang, wuu fwo ruruu ki̶ wun mmaap ye? Ba laareep ni wura kì̵ muut kas, amma wura a nsaam ɓejee." 40Amma gurum ni mo jir, mo shwar wuri shi shwar mu ɓakpee. Kaaɗi wuri le ku gurum ni mo pwat ati̶leng jir. Ɓe wuri le ku puun ki̶ ni̶ghi̶n kì̵ reep ni, ki̶ nyem ɗi mo ashak ki̶ wuri, mo ɗel ndi̶ghi̶n lu ɗi laareep ni wuraa saam ɗi. 41Ɓe wuri yaa sar kì̵ laareep ni, ɓe wuri sat wura nee, "Talifa kumi" (ɗi shii kì̵ mi̶ni a nee,) "Apa, wan sat yi, yi yaghal." 42Abet ɓe reep ni wura yaghal ɗar, ki̶ wura yaa mwaan. Ɓitlàa fi̶ra ni mo a kaghapaat baavul. Ni aapo ngurum mo ɗes hakyeng. 43Jesu wuri satpo mmo shiɓal nee, "Taji wu satpo mmee gurum nkaa ni kas." Wuri sat zak nee, "wu cín mbiise nwura se."

will be added

X\