Maak 15

1Kaaɗi ɓit mang, ɓe pris ɗiinan-nan mo, ashak ki̶ nyemnan-nan mo, ki̶ nyemkám Waar kì̵ Mosis mo, ki̶ nyemɓeetpo ni mo jir, mo kuur ashak, ɓe mo lepo, har mo ɓwaghat sar kì̵ Jesu, ki̶ mo so cín wuri mPailet. 2Pailet tal pu Jesu nee, "A wugha a mishkagham mu nyem Yahudi mo me?" Jesu lap nee, "Wugha kì̵ ten sat." 3Pris ɗiinan-nan ni mo j`i ki̶ langting mu ɗung mo ɗes nkaa Jesu. 4Pailet, wuri waa baa tal ɗi pu Jesu nee, "Ba wugha ki̶ mee po ɗi wughan nlap kas aa? A naa po mo ɗes ɗi mo j`i ki̶ mo nkaa wugha" 5Amma ba Jesu lap mee po nwuri koo mi̶ndong kas, har ni fes aapo mPailet zam. 6Gyet ɓe koo a parpuus mu retnyit mu Canɗel ɗiiɗang ye, ɓe Pailet wurii loghot ki̶ ɓwot mee gurum ɗii ɓuɓwaghat mi̶ndong mmo, ɗi gurum ni moo riɓet. 7Mee gwar ɗi moo pet sum fi̶ri a Barabbas, wuri ɗi a ɓuɓwaghat nlushaghat ashak ki̶ nyemtawai mo, ɗi mo kì̵ tukáa ndi̶ghi̶n tawai furu ni. 8Ɗuu kì̵ gurum ni mo j`i kus, ɓe mo ɗoghom ɗang ni pu Pailet, ku wuri ɓwot mee gurum ɗi mmo, kaaɗi wurii loghot ki̶ c`in ni si. 9Pailet tal pu mo nee, "Wuu riɓet ku wan ɓwot a mishkagham mu nyem Yahudi mo nwun me?" 10Pailet man nee, pris ɗiinan ni mo j`i kì̵ Jesu ntoghom fi̶ɗi a mpee zughur. 11Amma pris ɗiinan mo kar ɗuu kì̵ gurum ni mo, mpeku mo ɗang pu Pailet ku wuri ɓwot Barabbas ɗi mmo. 12Pailet waa baa sat mmo nee, "Wuu riɓet ku wan c`in a me ki̶ gwar ɗi wuu pet wuri a mishkagham mu nyem Yahudi mo ye?" 13Amma mo waa si̶ghi̶t le or shiɓal nee, "A le ku mo pwas wuri nkaa shiyeep." 14Pailet sat mmo nee, "A mpee meye? Wuri cín a mbii ɗiibish ɗiiɗang ye?" Amma mo waa si̶ghi̶t le or shi ɗoo ɗiiɗes hakyeng nee! "A le ku mo pwas wuri nkaa shiyeep! A le ku mo pwas wuri nkaa shiyeep!" 15Mpeeɗi Pailet wuri riɓet ku ni ret ɗi nɗuu kì̵ gurum ni mon nyit, ɓe wuri ɓwot Barabbas mmo. Amma aɓwoon ɗi wuri fwo ngwam nJesu, ɓe wuri cín Jesu mmo, mpeku mo so pwas wuri ɗi nkaa shiyeep. 16Ɗangɓe sooja mo ɗel ki̶ Jesu ndi̶ghi̶n lu mu gofna ni, ɗi moo pet ni a Praitoriyum, ɓe mo pi̶rep sooja ɗin mpee mi̶ni mo jir, mo j`i kuur ashak pe Jesu ɗi. 17Mo lop mee nli̶r ɗi ni naat pan a tup nJesu, ki̶ mo ráa mee mbiikáa hi̶r, mo lop nwuri nkáa. 18Ɗangɓe mo tok ki̶ nwuri nee, "Muu tok ki̶ wugha mishkagham mu nyem Yahudi mo." 19Ɓe mo cut wurin nkáa shi raas, ki̶ mo twas lii nkaa wuri. Ɓe mo kurum nfurum, ku mo seyil nwuri. 20Aɓwoon ɗi mo kì̵ shwar, ki̶ ɓák wuri, ɓe mo shang nli̶r ɗiinaat pan a tup ni nkaa wuri, ɗangɓe mo lop nli̶r fi̶ri mo nwuri. Ɓe mo put so ki̶ wuri ati̶leng, mpeku mo pwas wuri ɗi. 21Kaaɗi mo a ar so ni, ɓe mo taa kaat ki̶ mee gwar, ɗi moo pet sum fi̶ri a Simon, wuri a ngu Sairin, puun kì̵ Alekzanda ki̶ Rufus, wuri tong mmee laayil j`i ɗi, ɓe sooja ni mo le wuri mang shiyeepmúut kì̵ Jesu ni ting. 22Mo j`i wul ki̶ Jesu mmee peeɗi moo pet ni a Golgofa (shii ki̶ Golgofa ni a ɗyeskáa.) 23Mo cín am anab ɗi mo kì̵ riyeep ni ki̶ mee yen ɗi moo pet ni a mar nwuri, amma wuri kwar shwaa ni. 24Kaaɗi mo pwas Jesu nkaa shiyeep, ɓe mo koospaa mpee ɓàk nli̶r fi̶ri. Mo ɓàk nli̶r fi̶ri mo nnaar furu. Mo bi̶lip mpeku mo naa mbii ɗi koo ngo ɗiiɗang ye wurin nkat ɗi. 25Mo pwas Jesu nkaa shiyeepyoghom ni a kaa karfe pofeer ɗii mu bít si. 26Mo ran po kì̵ mbii ɗi ni le ɗang mo tu Jesu, mo lang nkaa shiyeepyoghom ni aɗeng nkáa kì̵ Jesu, ɗi ni sat nee, "A Mishkagham mu nyem Yahudi mo nɗiisi." 27Mo pwas mee kus wat mo vul ashak ki̶ Jesu zak. Mo pwas memee nkoghop sarse fi̶ri, ki̶ memee nkoghop sarkul fi̶ri zak. [ 28Mo c`in mbii ɗiisi mo jir a mpeku po ɗi mo kì̵ ten ran ndi̶ghi̶n takarda kì̵ Naan ni gam ɗi nee, "Mon tang wuri mɓut nyemɗiibish mo.]" 29Nyem ɗi mo ɗel ar a peeɗi mo pwas Jesu ɗi, mo zi̶kkáa furu mo, ki̶ mo nwangpo nwuri nee, "Kwegwa! Wugha ɗi jí a sat nee; wughan nshirip Lu kì̵ Naan ɗiiɗes, ɗangɓe wugha baa ɗik ni ɗi ndi̶ghi̶n shiiteer mo kun zak. 30A ɓam sak fugha shing! A sham aku nkaa shiyeep ni shing." 31Pris ɗiinan-nan mo, ki̶ nyemkám Waar kì̵ Mosis mo, mo shwar, ki̶ toklong nJesu zak, mo sat nee, "Wugha ɓam nyemɗiici mo, amma ba wugha mak ɓam sak kas. 32Katɗang wugha a Kristi azeen-nzeen, mishkagham mu nyem Isreil mo. Ɓe a sham nyil nkaa shiyeepmúut ni yaksi, mpeku mu naa, ku mu cínzeen ɗi." Wat ɗi mo pwas mo ashak ki̶ Jesu, mo satpo ɗiibuu nwuri zak. 33Kaaɗi karfe kaghapaat baavul mu puus a naar ting-ting ni wul, ɓe pee ni rii ndi̶ghi̶n yil ni jir, har so wul karfe kun mu puus. 34Kaaɗi karfe kun ni c`in, ɓe Jesu wuri petpee shi ɗoo ɗiiɗes, nee, "Eloi, Eloi, lama sabaktani?" Shii kì̵ ni nee, "Naan fi̶na, Naan fi̶na. A me le ɗang wugha yit wan ye?" 35Kaaɗi pak gurum mo mɓut nyem ɗi moo ɗar ɗi a pee ni, mo ki̶ling petpee mi̶ni, ɓe mo sat nee, "Gwar ɗiisi wurii pet a Ilaija" 36Ɓe memee ndi̶ghi̶n mo, wuri su so mang tuvuk lop ndi̶ghi̶n am anab ɗiiɗwang, wuri lop nkaa rep mee kam. Wuri lop kàa nJesu mpeku wuri ɗwas ɗi. Pak gurum ni mo sat nee, "Wu ɗar aku mu naa mbii ɗi nin nc`in ɗi ɗe, kyet Ilaija wurin nj`i ɓam wuri wa?" 37Jesu wuri waa ba le or shi ɗoo ɗiiɗes, ɓe wuri shang nookmuut. 38Ɓe fuwaat ɗi ni ndi̶ghi̶n Lu kì̵ Naan ɗiiɗes ɗi nii paapee ɗiiɓang met jir, ni tee sham a naar har ni ɓàk vul. 39Kaaɗi ngo ɗiiɗes nkaa sooja mo ɗari mi̶ndong ɗi wurii ɗar kus ki̶ shiyeepmúut ni, wuri naa kaaɗi Jesu wuri shang nookmuut, ɓe wuri sat nee, "Azeen-nzeen, gwar ɗiisi wuri a Làa kì̵ Naan." 40Pak mat moo ɗar ɗi pan jong, mo nkaa naa mbii ɗi nii c`in jir. Ndi̶ghi̶n mat ni mo, ɓe Meeri Makdalin wura ɗi, ki̶ Salome ki̶ Meeri ni̶ghi̶n kì̵ Jemis ɗiilee ki̶ Josep. 41A mo a mat ɗi jí mo so ndang Jesu, ki̶ moo c`in ɗak nwuri kaaɗi jí wuri kuɗi ndi̶ghi̶n yil nGalili, ki̶ pak mat mo ɗes ɗi mo yaghal nGalili j`i ashak ki̶ wuri nJerusalem. 42Ntiit ki̶ mi̶ni, ɓe kansi̶ghi̶n kì̵ c`in, a parpuus ɗi gurum moo ɗak sut ɗi, mpeeɗi ɗaar ni a puus nookɗi. 43Ɓe Josep ngu Arimafiya, mee ngo ɗiiɗes, ɗi wuri ndi̶ghi̶n nyemɓeetpo mo, wuri shikáa fi̶ri wurin nkaa gong j`i kì̵ mulki kì̵ Naan. Wuri yaa putughup, ɓe wuri so ɗang kúm kì̵ Jesu pu Pailet, mpeku wuri so wum ɗi. 44Ni aapo mPailet zam, mpeeɗi wuri ki̶ling nee, Jesu wuri kì̵ ten muut. Ɗangɓe Pailet pet sooja ɗiiɗes ni, ɓe wuri tal pu sooja ni nee, "Kyet Jesu wuri kì̵ ten muut a yam wa?" 45Kaaɗi Pailet ki̶ling mbii ɗi sooja ni sat, ɓe Pailet sat mmo ku mo so cín kúm kì̵ Jesu nin nJosep. 46Ɗangɓe Josep wuri seet mee fuwaat ɗiipiyaa. Ɓe wuri sham ki̶ kúm ki̶ Jesu ni, wuri ɓwaghat kúm ni shi fuwaat ni. Ɓe wuri so le kúm kì̵ Jesu ni ndi̶ghi̶n ki̶cir ɗi mo am ni ndi̶ghi̶n jwak. Ɓe wuri tup mee nhi̶k ɗiiɗes, wuri paa po ki̶cir ni ɗi. 47Meeri Makdalin, ki̶ Meeri ni̶ghi̶n kì̵ Josep, moo naapee ɗi mo le kì̵ Jesu ni ɗi.

will be added

X\