Maak 14

1Ɗee teer mo ɗi vul, ku mo c`in retnyit mu Canɗel ɗi, ki̶ mu retnyit mu bred ɗi ba ni ki̶ yist kas. Ɓe pris ɗiinan mo, ki̶ nyemkám Waar kì̵ Mosis mo, mo tang ar ɗi mon nyaa Jesu ɗi shi seen, mpeku mo tu wuri ɗi. 2Amma mo waa sat nee, "Ba mun nyaa wuri a ndi̶ghi̶n teer mu retnyit si kas, mpeku taji gurum ni mo yaghal lek nkaa mun kas." 3Kaaɗi Jesu wuri nyil mBetani, ndi̶ghi̶n lu kì̵ Siman nguloghom, ɓe wuri nkaa se mbiise. Ɓe mee mat wura j`i ki̶ tughut mwoor ɗi ni ɗu shang-shang ɗi moo pet ni a nard, ɗi ni ki̶rim zam. Ɓe wura tep took kì̵ tughut ni, mpeku wura ɗoo mwoor nin nJesu nkáa. 4Amma ni láa mpak gurum ɗi mo ɗi mɓut, har mo satpo ki̶ shak nee, "A me le ɗangɓe moo ti̶kook ki̶ mwoor ɗiisi aasi ye? 5Ɗi ni ret ku mo seet mwoor ɗiisi ni nkaa shaghal zinariya ɗi ni met nɗarikun, mpeku mo cín shaghal ni ɗi nyemjeel mo." Pak gurum ni mo gwak mat ni wura, shi tughup. 6Amma Jesu wuri sat mmo nee, "Wu yit wura ɗi. A me le ɗang wuu daampee nwura ye? Wura c`in a ɗak ɗiiret nwan hakyeng. 7Wun ɗi ashak ki̶ nyemjeel mo shidaar-shidaar, mpeemi̶ni ɓe koo a par ɗiiɗang ye ɗi wuu riɓet, ɓe wun mmak c`in ɗiiret mmo. Amma ba wun nkat wan ashak ki̶ wun shidaar-shidaar kas. 8Wura kì̵ c`in mbii ɗi wura mak c`in ni. Mwoor ɗi wura kì̵ ɗoo nkaa san fi̶na si, wura c`in mi̶ni a mpee ɗak san fi̶na mpee wum. 9Azeen-nzeen ki̶n sat nwun nee, koo a pee ɗiiɗang ye ndi̶ghi̶n yil ɗiisi jir, ɗi mon nsatpo ɗiiret ɗiisi ni, ɓe mbii ɗi mat ɗiisi wura c`in nwan, ɓe mon nki̶i̶ sat ni mpee pan wura." 10Judas Iskariyot, ɗi wuri a memee ndi̶ghi̶n jeplop kì̵ Jesu ɗiikaghapaat baavul si mo. Wuri so pe pris ɗiinan-nan mo ɗi, mpeku wuri seet Jesu ɗi ndi̶ghi̶n sar furu. 11Kaaɗi mo ki̶lingpo mi̶ni, ɓe ni ret mon nyit zam, har mo tuwoorpo nee, mon ncín shaghal nwuri. Yaghal mparmi̶ni, ɓe Judas Iskariyot wuri naa ntang ar ɗi wurin nseet Jesu ɗi mmo. 12Parpuus ɗin nshee ɗii mu bred ɗi ba ni ki̶ yist kas, ɗi ni a puus ɗi moo fet tum mo, mpee mbiise mu retnyit mu Canɗel ni. Ɓe jeplop kì̵ Jesu mo tal pu wuri nee, "Aa riɓet ku mu so mu ɗak peese mbiise mu Canɗel ni nwugha a neye?" 13Jesu wuri lop memee mo vul ndi̶ghi̶n jeplop fi̶ri mo, wuri sat mmo nee, "Wu ɗel ndi̶ghi̶n birni ni, ɓe wun nkaat ki̶ mee gurum ɗi wuri ki̶ tughul am nkáa, ɓe wu so ndang wuri, 14har ndi̶ghi̶n lu ɗi wurin nso ɗel ɗi. Ɓe wu tal pu ngulu ni nee, 'Ngukám wuri sat ne, lu mi̶zep ɗi wan nse mbiise Tong Ashak mu Canɗel ashak ki̶ jeplop fi̶na mo, ni a neye?' 15Ngulu ni wurin nkám mee luɗeng ɗiiɗes nwun, ɗi mo kì̵ ɗakle. Ɓe wu ɗak mbiise ni mmun, nlu mi̶ni." 16Jeplop ɗiivul ni mo yaghal so ɗel ndi̶ghi̶n birni ni, ɓe mo kat ni a kaaɗi Jesu wuri sat mmo si, ɓe mo ɗak mbiise Tong Ashak mu Canɗel ni nlu ni. 17Kaaɗi kansi̶ghi̶n c`in, ɓe Jesu wuri j`i ashak ki̶ jeplop ɗiikaghapaat baavul ni mo. 18Mon nkaa se mbiise ni, ɓe Jesu wuri sat mmo nee, "Azeen-nzeen, ki̶n sat nwun, memee ndi̶ghi̶n wun wurin nseet wan. A ngo ɗi mun nkaa sese ashak ki̶ wuri yaksi." 19Po ɗi Jesu sat, ni wat putughup mmo zam, har mo ɗoghom tal pu wuri shimi̶ndong-shimi̶ndong nee, "Daa a wan aa?" 20Wuri sat mmo nee, "A memee ndi̶ghi̶n wun ɗiikaghapaat baavul si mo. A ngo ɗi wurii sham ki̶ bred nsar mpee lop mpuk nɗaa ki̶ wan. 21Mpeeɗi Làa kì̵ Gurum, wan mmuut a kaaɗi mo kì̵ ten ran ndi̶ghi̶n takarda kì̵ Naan nkaa wuri si. Amma jeel nin ntaa nkaa ngo ɗi wuri seet Làa kì̵ Gurum. Ngyal ɗeesi ɓe, jí mon nnook làa gwar mi̶ni, ɓe ɗi ni ret nwuri met." 22Kaaɗi mo nkaa sese ni, ɓe Jesu wuri mang bred, ɓe wuri c`in aduwa mu pi̶lang Naan nkaa ni, ɓe wuri yilang ni, ɓe wuri cín njeplop fi̶ri mo. Wuri sat mmo nee, "Wu lap ɗiisi, ni a san fi̶na." 23Wuri mang mee laaɗaa zak, ɓe wuri c`in aduwa mu pi̶lang Naan nkaa ni, ɓe wuri cín mmo. Ɓe mo jir mo shwaa ndi̶ghi̶n ni. 24Ɓe wuri sat mmo nee, "Ɗiisi ni a toghom fi̶na ɗi ni ɗee a gam mu tuwoorpo ɗiipoo shi toghom mu Naan, ɗi ni yaa ɗak mpee toghom fi̶na ɗi mon mɓeer ni mpee gurum mo ɗes. 25Azeen-nzeen, ki̶n sat nwun nee, ba wan mbaa shwaa am kì̵ anab ɗi kas, see parɗi wan nshwaa am kì̵ anab ɗiipoo ni ndi̶ghi̶n mulki kì̵ Naan." 26Kaaɗi mo c`in kook, ɓe mo pwat so a Jwakpaat. 27Jesu wuri sat mmo nee, "Wun jir wun nswa wu yit wan ɗi, mpeeɗi mo kì̵ ten ran ndi̶ghi̶n takarda kì̵ Naan nee, 'Naan wurin ntu ngukiyeer tum ni mo, ɓe tum ni mon ntiit shini-shini.' 28Amma aɓwoon ɗi Naan wuri baa yaghal ki̶ wan a peemúut, ɓe wan nso nwun akiyeen nyil nGalili." 29Pita sat nJesu nee, "Koo ɗi mo jir mo swa yit wugha ɗi, ɓe ba wan nkyam yit wugha kas." 30Jesu sat mPita nee, "Azeen-nzeen ki̶n sat wugha nee, mpar cicinsi, akuɗang deel ki̶ taaɗoo yit vul, ɓe wughan nciipo yit kun nee, ba wugha man wan kas." 31Amma Pita lappo nJesu shiɓal hakyeng nee, "Koo ɗi ni ating ku wan muut ashak ki̶ wugha, ɓe ba wan nkyam cíipo kas." Ɓe kaghar jeplop kì̵ Jesu ni mo sat aasi zak. 32Mo j`i wul mee peeɗi moo pet ni a Getsamani, ɓe Jesu wuri sat njeplop fi̶ri mo nee, "Wu tong mpesi, aku wan c`in aduwa ɗi." 33Ɓe Jesu wuri so ashak ki̶ Pita, ki̶ Jemis, ki̶ Joon. Putughup fi̶ri ni wat, ki̶ ni daampee nwuri zam hakyeng. 34Wuri sat mmo nee, "Putughup fi̶na ni wat zam, har kaa nin ntutu wan si. Wu tong mpesi, ku wu gongpee ɗi." 35Wuri gyes so ɗi akiyeen lee, ɓe wuri so kurum nyil, ki̶ wuri c`in aduwa nee, "Puun fi̶na, katɗang ɗi ni mak c`in, ɓe taji wan shwaajeel ɗiisi ni kas." 36Ki̶ wuri sat nee, "Daa, puun fi̶na, wugha ki̶ mak c`in mbii mo jir, ɓe a baa ki̶ kap mu jeel ɗiisi aku pe wan ɗi. Ba a kaaɗi wan ki̶n riɓet si kas, amma see a kaaɗi wugha aa riɓet si." 37Wuri baaso pee jeplop fi̶ri ɗiikun ni mo ɗi, ɓe wuri kat mo nkaa saam. Ɓe wuri sat mPita nee, "Simon wugha a nkaa saam wa? Ashee, ba a mak gongpee mpee awa mi̶ndong kas aa? 38Wu tong shi gongpee, ki̶ wu c`in aduwa, mpeku taji wu ɗel mɓut jwaan kas. Riin ni riɓet ɗak, amma nan ni kwar, mpeeɗi ba ni ɓal kas." 39Jesu wuri waa baaso ɗi, a pee aduwa ni, ɓe wuri waa baa c`in aduwa a kaaɗi wuri c`in nshee si zak. 40Wuri waa baaj`i kat jeplop ɗiikun ni mo ɗi nsaam zak, mpeeɗi yit furu mo toghon ki̶ nsaam. Ba mo man mbii ɗi mon nlap nwuri kas. 41Kaaɗi wuri waa baaj`i pe jeplop ni mo ɗi yit ɗiikun, ɓe wuri sat mmo nee, "Har yaksi, ɓe wun ɗi nkaa saam ki̶ nookɗi aa? Ni mak ki̶si, pee ni kì̵ wul. Mo kì̵ seet Làa kì̵ Gurum nsar kì̵ nyemshikbish mo. 42Wu yaghal mmun so. Wu naa ngo ɗi wuri kì̵ seet wan wurii j`i wul." 43Kaaɗi Jesu wuri kuɗi nkaa katpo mi̶ni, ɓe Judas Iskariyot, ɗi wuri a memee ndi̶ghi̶n jeplop kì̵ Jesu ɗiikaghapaat baavul si mo, wuri j`i wul ashak ki̶ ɗuu kì̵ gurum mo ɗes ndang wuri. Gurum ni mo ki̶ kwai mo, ki̶ kam mo. A pris ɗiinan-nan mo, ki̶ nyemkám Waar kì̵ Mosis mo, ki̶ nyemnan-nan mo, a mo lop gurum ni mo. 44Ngo ɗi wuri seet Jesu ni, wuri kì̵ ten c`in mee alama mmo nee, "Ngo ɗi wan tok ki̶ wuri, ɗang wan tuwaas wuri shi mi̶shpoo, ɓe a gwar ni mmi̶ni. Ɓe wu yaa wuri riret, wu so ki̶ wuri." 45Kaaɗi Judas j`i, ɓe wuri so pe Jesu ɗi abet, ki̶ wuri sat nee, "Ngukám." Ɓe wuri tok kì̵ Jesu, ɗangɓe wuri tuwaas Jesu shi mi̶shpoo zak. 46Ɗangɓe mo j`i yaa Jesu. 47Amma memee ndi̶ghi̶n nyem ɗi moo ɗar ɗi a pee ni, wuri shang kwai fi̶ri, ɓe wuri can kom kì̵ ki̶rom mu pris ɗiiɗes met jir ni vwet nyil. 48Jesu wuri sat nɗuu kì̵ gurum ni mo nee, "Wun, wu pwat wu j`i ki̶ kwai mo, ki̶ dughul mo, mpeku wu yaa wan ɗi, kaa wan a mee kus wat si aa? 49Shidaar-shidaar ɓe wan ɗi ashak ki̶ wun, ki̶ wan ki̶n kám nwun ndi̶ghi̶n Lu kì̵ Naan ɗiiɗes, ɓe ba wu yaa wan kas. Amma mbii ɗiisi mo c`in aasi jir, a mpeku po ɗi mo kì̵ ten ran mo ndi̶ghi̶n takarda kì̵ Naan mo gam ɗi." 50Jeplop fi̶ri mo jir, mo yaghal swa yit wuri ɗi. 51Mee ɗyem zi̶lang wuri ɗi, ɗi wuri sup a mee fuwaat nkaa shin ɓejee, wuri so ndang Jesu, kaaɗi mo yaa wuri, 52ɓe wuri su so ngum, wuri yit fuwaat ni mmo. 53Mo so ki̶ Jesu ntulu kì̵ pris ɗiiɗes met jir ni, a peeɗi pris ɗiinan-nan mo, ki̶ nyemnan-nan mo, ki̶ nyemkám Waar kì̵ Mosis moo kuur ɗi ashak. 54Pita tap so ndang Jesu mɓwoon jong-jong, har ntulu kì̵ pris ɗiiɗes met jir ni, ɓe wuri ɗel tong ashak ki̶ nyemtappee mo, ku wuri ki̶ling wong kì̵ wus ɗi. 55Pris ɗiinan-nan ni mo, ki̶ kuur kì̵ nyemnan-nan ni mo jir, mo tang mbii ɗi mon c`in langting mu ɗung mo nkaa wuri, mpeku mo katpee tu Jesu ɗi, amma ba mo kat kas. 56Koo ɗi gurum mo ɗes mo j`i ki̶ langting mu ɗung mo nkaa Jesu, ɓe ba mbii ɗi mo sat nkaa Jesu ni mo yakshak kas. 57Pak gurum mo yaghal ɗar ating, ku mo sat mbii ɗii mu ɗung nkaa Jesu nee, 58"Mu ki̶ling wuri sat nee, 'wuɗin nshirip Lu kì̵ Naan ɗiiɗes si, ɗi gurum mo ɗik ni shi sar, ɗangɓe wuɗin mbaa ɗik memee ɗi ndi̶ghi̶n shiiteer mo kun zak, ɗi ba a shi sar kas.' " 59Jir ki̶si, ɓe ba mbii ɗi mo sat ni mo yakshak kas. 60Ɗangɓe pris ɗiiɗes met jir ni wuri yaghal ɗar a ting nnaar furu. Ɓe wuri tal pu Jesu nee, "Ba wugha ki̶ mee mbii ɗi wughan nlap nkaa po ɗiisi mo kas aa? A sat a me nkaa mbii ɗi das ɗiisi mo sat nkaa wugha ye?" 61Amma Jesu wuri ɗok titik, ba wuri lap mee po kas. Ɓe pris ɗiiɗes met jir ni wuri waa baa tal ɗi pu Jesu zak nee, "A wugha a Kristi Làa kì̵ Naan Ɗiihai aa?" 62Jesu wuri lap nee, "A wan a wuri, ki̶ wun nnaa Làa kì̵ Gurum, wuri tong nsarse kì̵ Naan ɗiiɓal met jir, ki̶ wun nnaa wurii j`i ndi̶ghi̶n nluu ɗi aɗeng mo zak." 63Kaaɗi pris ɗiiɗes met jir, wuri ki̶lingpo mi̶ni, ɓe wuri yilang nli̶r fi̶ri mo, ki̶ wuri sat nee, "Muu tang a langting ɗiiɗang ɗiki̶ zak ye? 64Yaksi, wu ki̶lingpo ɗi Jesu wuri sat, ɗi wuri leshin a kaa Naan si. Wu naa arang nkaa po mi̶ni ye?" Ɓe mo jir, mo canɗiyeel muut nJesu. 65Pak mo ɗoghom twas lii nkaa wuri, ki̶ mo paa yit fi̶ri mo, har mo ni̶ram wuri, ki̶ mo sat nwuri nee, "A woo mmun ngo ɗi cut wugha ni." Ɓe nyemtappee mo nas wuri hakyeng. 66Kaaɗi Pita wurii ɗar a fur nder luɗiyeel ni, ɓe mee reep ɗi wura a ki̶rom mu pris ɗiiɗes ni wura j`i. 67Ɓe kaaɗi wura naa Pita nkaa tong a wus, ɓe wura ti̶ghi̶r yit nzi̶ng nkaa Pita, ki̶ wura sat nee, "Wugha ashak ki̶ Jesu ngu Nazaret zak!" 68Amma Pita cíipo nee, "Ba wan man mbii ɗi yii sat ni kas, ki̶ ba wan manshii kì̵ po mi̶ni kas." Ɓe wuri yaa ar ɗel put nshiyeepki̶pang. 69Ɓe reep ɗi wura a ki̶rom mu pris ɗiiɗes met jir ni wura baa naa wuri, ɓe wura sat nyem ɗi moo ɗar mpo shiyeepki̶pang ni mo nee, "Gwar ɗiisi wuri a memee mɓut nyem kì̵ Jesu ni mo." 70Amma Pita waa baa cíipo ɗi zak. Lang ɗiilee, ɓe nyem ɗi moo ɗar ɗi a pee ni, mo sat mPita nee, "Azeen-nzeen, wugha a memee mɓut nyem kì̵ Jesu ni mo, mpeeɗi wugha a ngu Galili." 71Amma Pita cíipo, wurin ɗalwus, wuri sat nee, "Naan cín kar nwan katɗang wan man gwar ɗi wuu satpo nkaa wuri ni." 72Abet-abet, ɓe deel taa ɗoo ɗiivul. Ɓe Pita panpo ɗi Jesu sat nwuri sí nee, "Akuɗang deel ki̶ taa ɗoo yit vul, ɓe wughan cíipo fi̶na yit kun ne, ba a man wan kas." Kaaɗi Pita panpo mi̶ni, ɓe ni tep kwak nwuri, ki̶ wuri yaa maap.

will be added

X\