Luk 8

1Aɓwoon ɗi mo lang ɗiilee, ɓe Jesu wuri mwaan ɗel ndi̶ghi̶n birni ni mo, ki̶ jepyil mo, wurin nkaa satpo kì̵ Naan, ki̶ satpo ɗiiret nkaa mulki kì̵ Naan. Wuri so ashak ki̶ jeplop fi̶ri ɗiikaghapaat baavul ni mo. 2Ki̶ pak mat ɗi jí wuri kì̵ ceen riin ɗiibish mo pwat aku mɓut mmo, ki̶ pak shwal mo shini-shini. Ndi̶ghi̶n mat ni mo, ɓe Meeri ɗi, ɗi moo pet wura a Makdalin, ɗi jí Jesu pwat ki̶ riin ɗiibish mo povul mɓut nwura. 3Ki̶ Joana mat kì̵ Kuza, ɗi wuri a ɗiiɗes nkaa lu kì̵ Herot, ki̶ Suzana, ki̶ pak mat ni mo ɗes zak, ɗi mo c`in ɗak ki̶ long furu mo, mpee ɓam Jesu ki̶ jeplop fi̶ri mo. 4Kaaɗi gurum ɗi mo pwat j`i shiyil-shiyil, mo jí kuur ɗes pe Jesu ɗi, ɓe wuri satpo mmo shi sumpo nee, 5"Mee nguɓwot cirem wuri put mpee so ɓwot cirem fi̶ri. Kaaɗi wuri nkaa ɓwot cirem ni, ɓe pak cirem ni mo táa nkaa ar ɓe gurum mo ti̶reng mo shi shii, ny`er ɗii aɗeng mo sham kyak se. 6Pak cirem ni mo taa nkaa kwaghap zak, ɓe kaaɗi mo kaa ɗoghom wurang, ɓe mo cighi̶r fii, mpeeɗi ba yil ni ki̶ am kas. 7Pak cirem ni mo taa mɓut nhi̶r, ɓe mo wurang ashak ki̶ ɗiɓen ni, ɓe hi̶r ti̶reng káa nɗiɓen ni mo. 8Pak cirem ni mo taa mɓut nyil ɗiiret, mo kàa wurang, ɓe mo le àa, pak ɗari-ɗari." Kaaɗi Jesu wuri satpo mi̶ni, ɓe wuri sat nee, "Ngo ɗi wuri ki̶ kom mu ki̶lingpee, ɓe ni ret ku wuri ki̶ling." 9Jeplop kì̵ Jesu mo tal shii kì̵ sumpo mi̶ni pu wuri ɗi. 10Ɓe wuri lap mmo nee, "Mo kì̵ cín man nwun, mpeku wu manshii kì̵ mbii ɗi mo a si̶sok mu mulki kì̵ Naan. Amma mpee kaghar gurum mo, ɓe wan satpo mmo a shi sumpo mo. Mpeku koo ɗi mo naa, ɓe ba mon nnaa kas, ki̶ koo ɗi mo ki̶ling, ɓe ba mon mmanshii ni kas." 11"A shii kì̵ sumpo ni nɗiisi, cirem ni a po kì̵ Naan. 12Cirem ɗi mo taa nkaa ar si, mo a kaa nyem ɗi moo ki̶lingpo kì̵ Naan ni, ɓe Shetan wuri j`i hi̶r ni put ki̶ni aku ndi̶ghi̶n putughup furu mo, mpeku taji mo cínzeen, ku mo kat ɓam ɗi kas. 13Cirem ɗi mo taa nkaa kwaghap si, mo a kaa nyem ɗi moo ki̶lingpo Naan ni, ɓe mo lap ni shi retnyit, amma ba moo mee peeɗi po nin nsham seen ɗi kas. Cínzeen kì̵ mo ni a mpee shiiteer mo kong ɓejee ɗak. Katɗang ɓe kyam j`i, ɓe mo cighi̶r pal baa shiɓwoon ki̶lak-ki̶lak. 14Cirem ɗi mo taa mɓut nhi̶r sí, mo a kaa nyem ɗi moo ki̶lingpo Naan ni, ɗangɓe jwaan ki̶ shang mu mbii ɗii mu yil ɗiisi mo, koo a tang long, ki̶ se, ki̶ shwaa mu seen ɗiiyaksi, mo ti̶reng mo, har ni le ku ba moo c`in ɗak ɗiiret mo kas. 15Cirem ɗi mo taa nkaa yil ɗiiret sí, mo a kaa nyem ɗi mo ki̶lingpo kì̵ Naan ni, ɓe mo lap ni ɗyel shi gung putughup mi̶ndong, har mo c`in ɗak ɗiiret mo." 16"Ba mee gurum nkyam lewus nfitila, ɗangɓe wuri waa paa ni shi ɗaa ɗiiɗes, koo wuri waa le ni nder peesaam kas. Amma wurin nle ni a ɗengpee, a pee le fitila ni, mpeku katɗang gurum mo ɗel ɗi, ɓe mo naa peeɓang mu fitila ni ɗi. 17Ba mee mbii ɗi, ɗi ni a pi̶paa, ɗi nin nnook put agaak kas, ki̶ ba mee mbii ɗi, ɗi ni a si̶sok ɗi gurum mon nnook man ni kas. 18Wu tap ki̶ mbii ɗi wuu ki̶ling, mpeeɗi koo a weye ɗi wuri ki̶ mbii, ɓe mon ncín ɗiki̶ nwuri. Amma ngo ɗi ba wuri ki̶ mee mbii kas, ɓe mon nyaa wuri ki̶ rep mbii ɗi wuri pan ne wuɗi ki̶ni." 19Ni̶ghi̶n kì̵ Jesu, ki̶ ɗyemni̶ghi̶n fi̶ri mo j`i pe wuri ɗi, amma mpee ɗuu kì̵ gurum mo, ɓe ba mo mak so wul kus pe wuri ɗi kas. 20Mee gurum sat nwuri nee, "Ni̶ghi̶n fugha, ki̶ ɗyemni̶ghi̶n fugha mo, moo ɗar ati̶l`eng, mo riɓet naa wugha." 21Amma Jesu wuri lap mmo jir nee, "Ni̶ghi̶n fi̶na, ki̶ ɗyemni̶ghi̶n fi̶na mo, mo a nyem ɗi moo ki̶lingpo kì̵ Naan, ɗangɓe mo c`in ɗak ki̶ni zak." 22Parmeeci, ɓe Jesu wuri ɗel ndi̶ghi̶n jirgi am ashak ki̶ jeplop fi̶ri mo, wuri sat mmo nee, "Wu yit ku mu can am canɗar ɗiisi, ku mu ɗel mu so mɓin ɗiisí." Ɓe mo yaghal mo ɗoghom so. 23Kaaɗi mon nkaa so nkaa am ni, ɓe saam mang Jesu ndi̶ghi̶n jirgi ni. Ɓe mee kut ɗiiɗes ni yaghal nkaa am canɗar ni, har jirgi furu ni ɗoghom ru ndi̶ghi̶n am ni, ɗee kaa mon mmumurap si. 24Jeplop kì̵ Jesu mo j`i pe wuri ɗi. Mo mii wuri, ɓe mo sat nwuri nee, "Daa, Daa, mun kus ki̶ lagham." Wuri mii nsaam ni, ɓe wuri sat nkut ni ɗok titik. Ɓe am ni ɗar caghat, pee ɗokshik titik. 25Jesu wuri sat mmo nee, "Wu le cínzeen fuu ni a neye?" Ni le ki̶i̶rmuut mmo, ki̶ ni aapo mmo ɗes, har mo sat ki̶ shak nee, "Gwar ɗiisi wuri a we mmi̶ni ye, ɗi har kut ki̶ am, mo ki̶lingpo fi̶ri ye?" 26Jesu ki̶ jeplop fi̶ri mo, mo j`i wul nkoghop nyil nGarasin, ɗi nin nkoghop mɓin ɗiisí mu am canɗar mu yil nGalili. 27Kaaɗi wuri put kàa a mpoɗi̶ghi̶r, ɓe wuri kaat ki̶ mee gwar ɗi wuri ki̶ riin ɗiibish mo, ɗi wuri put a ndi̶ghi̶n birni ni j`i. Gwar ni wuri kì̵ tong ɗes, ɗi wurii mwaan a ngum, ba wuri lop mee nli̶r kas. Ba wuri kuɗi ki̶ tong ntulu kas, see wurii tong a ndi̶ghi̶n ki̶cir mo. 28Kaaɗi wuri naa Jesu, ɓe wuri le or shiɓal, ki̶ wuri taa ntoghom kì̵ Jesu. Ɓe wuri sat shi ɗoo ɗiiɗes nee, "A me kaat mun ki̶ wugha ye? Jesu Làa kì̵ Naan Ɗiihai. Wan ɗang pu wugha, taji a lejeel nwan kas." 29Wuri sat ki̶si a mpeeɗi Jesu wuri kì̵ sat riin ɗiibish ni ne, ni put aku mɓut ngwar ni. Riin ɗiibish ni kì̵ fes tong ɗes ndi̶ghi̶n gwar ni, mpeeɗi yit mo ɗes, ɓe riin ɗiibish nii j`i yaghal nwuri. Moo naa ɓwaghat wuri shi ti̶sek, ki̶ teng ɗiimwaghal mo, amma jir ki̶si, ɓe wurii saa mo fwo, kì̵ riin ɗiibish nii mang gwar ni so a naar yil. 30Jesu wuri tal pu gwar ni nee, "Sum fugha a weye?" Gwar ni lap nee, "sum fi̶na ni a Lijiyon," ɗi shii kì̵ mi̶ni nee, "Mun ɗi ɗes." Mpeeɗi riin ɗiibish mo ɗi ɗes ndi̶ghi̶n gwar ni. 31Riin ɗiibish ni mo ɗang pu Jesu, ku taji wuri ceen mo so ɓwot ndi̶ghi̶n tughun ɗiiɗes ɗiijurung ɗi ba nii peeɗar kas si. 32Kus ki̶ peemi̶ni, ɓe mee kuur kì̵ tughus mo nkaa sese shitughur jwak. Riin ɗiibish ni mo ɗang pu Jesu, ku wuri cínpee mmo so ɗel ɗi ndi̶ghi̶n tughus ni mo. Jesu wuri cínpee mmo. 33Riin ɗiibish ni mo pwat aku ndi̶ghi̶n gwar ni, ɓe mo so ɗel mɓut tughus ni mo. Kuur kì̵ tughus ni mo yaghal swa sham ɗi a shitughur jwak ni, ɓe mo sham ɓeer ndi̶ghi̶n am canɗar ni, har mo murap jir. 34Kaaɗi nyemnaa tughus ni mo naa mbii ɗi ni c`in, ɓe mo swa, mo so sat nyem ɗin ndi̶ghi̶n birni mo, ki̶ nyem ɗi mo ndi̶ghi̶n jepyil mo. 35Gurum mo pwat j`i mpee naa mbii ɗi ni kì̵ c`in. Mo j`i pe Jesu ɗi, ɓe mo kat gwar ɗi jí riin ɗiibish mo ndi̶ghi̶n wuri, mo kì̵ pwat. Wuri kì̵ tong caghat nshii kì̵ Jesu, ki̶ nli̶r a li̶lop, ki̶ wuri ndi̶ghi̶n ɗyen fi̶ri riret zak. Ki̶i̶rmuut yaa mo. 36Nyem ɗi mo naa mbii ni, ɓe mo yakshii ni ngurum mo, kaaɗi Jesu bar gwar ɗi wuri ki̶ riin ɗiibish ni si. 37Ɗangɓe nyemyil nGarasin mo jir, mo ɗang pu Jesu, ku wuri yaghal put aku ndi̶ghi̶n yil furu, mpeeɗi ki̶i̶rmuut ɗiiɗes ni yaa mo. Mpeemi̶ni, ɓe Jesu wuri ɗel ndi̶ghi̶n jirgi am, ku wuri yaghal yit yil mi̶ni ɗi. 38Amma gwar ɗi riin ɗiibish mo pwat ndi̶ghi̶n wuri, wuri ɗang pu Jesu nee, "A yit nwan so ɗi ndang wugha." Amma Jesu cíi nwuri. Jesu sat nwuri nee, 39"A baa waa ntulu fugha, ku a satpo ɗi nkaa mbii ɗiiɗes ɗi Naan wuri kì̵ c`in nwugha." Gwar ni wuri baaso ndi̶ghi̶n birni ni, wuri yaa satpo ngurum mo nkaa mbii ɗiiɗes ɗi Jesu kì̵ c`in mo nwuri. 40Kaaɗi Jesu wuri baaj`i, ɓe kuur kì̵ gurum ni mo kaat wuri, mpeeɗi mo jir, mo ɗi pu gong baaj`i fi̶ri. 41Ɗangɓe mee gwar ɗi moo pet sum fi̶ri a Jairus, ɗi wuri a memee ndi̶ghi̶n nyem ɗiinan-nan mu mee lu kì̵ Naan, wuri j`i kurum ntoghom kì̵ Jesu, ɓe wuri ɗang pu Jesu, mpeku wuri so ɗi ntulu fi̶ri. 42Wuri kì̵ mee reep mi̶ndong, ɗi ɓit fi̶ra mo wul kaghapaat baavul, wura ndung muut. Amma kaaɗi Jesu a ar so ntulu kì̵ Jairus ni, ɓe kuur kì̵ gurum ni mo neer wuri cighi̶rkaat kus-kus. 43Amma mee mat wura ɗi, ɗi wuraa ɓeer toghom, mpee ɓit mo kaghapaat baavul, wura kì̵ kyes long fi̶ra mo jir pu nyemyen mo, jir ki̶si, ɓe ba memee mak bar wura kas. 44Wura tap j`i nkoghop mɓwoon kì̵ Jesu, ɓe wura tuwaas pukom nli̶r fi̶ri. Ɓe abet, toghom ɗi nii ɓeer nwura ni ɗar. 45Jesu wuri sat nee, "A we tuwaas wan ye?" Gurum mo cíipo jir. Ɓe Pita wuri sat nee, "Daa, a naa ɗuu gurum ɗi mo neer wugha cighi̶rkaat a mo tuwaas wugha." 46Amma Jesu wuri sat nee, "Azeen-nzeen mee gurum kì̵ tuwaas wan ting, mpeeɗi wan man mee iiko ni kì̵ put ndi̶ghi̶n wan." 47Kaaɗi mat ni wura naa nee, ba wura mak sok sat kas, ɓe wura j`i shi ɗaar, wura kurum ntoghom kì̵ Jesu, ɓe wura sat mbii ɗi ni le ɗang wura tuwaas wuri ni, kì̵ kaaɗi wura kat bar abet zak. 48Jesu wuri sat nwura nee, "Reep fi̶na, cínzeen fii ni le ku yi a ɗee ɗiibi̶bar. Yi so yiyi riyang." 49Kaaɗi Jesu wuri nkaa katpo mi̶ni, ɓe mee ngulop yaghal ntulu kì̵ ngo ɗiiɗes nkaa mee lu kì̵ Naan, wuri j`i ɗi, wuri sat nJairus nee, "Reep fugha wura kì̵ muut. Mpeemi̶ni, ɓe taji a waa lejeel ɗin Ngukám wuri kas." 50Amma kaaɗi Jesu wuri ki̶ling aasi, ɓe wuri sat nJairus nee, "Taji ki̶i̶rmuut yaa wugha kas. Amma a cínzeen ɓejee, ɓe reep fugha wuran mbar." 51Kaaɗi Jesu wuri j`i wul ntulu ni, ɓe ba wuri yit ku mee gurum ɗel ashak ki̶ wuri ndi̶ghi̶n lu ni kas, see a Pita, ki̶ Joon, ki̶ Jemis, ki̶ puun, ki̶ ni̶ghi̶n kì̵ reep ni ɓejee ɗak. 52Koo weye mon nkaa wal maap mpee reep ni wura, amma Jesu wuri sat mmo nee, "Taji wu wal kas, mpeeɗi ba reep ni wura kì̵ muut kas, amma wura a nsaam ɓejee." 53Gurum ni mo jir, mo shwar Jesu, shi shwar mu ɓákpee, mpeeɗi mo man nee, wura kì̵ ten muut azeen-nzeen. 54Amma Jesu wuri yaa sar kì̵ reep ni, ɓe wuri petpee nee, "Làa fi̶na, yi yaghal." 55Ɓe seen fi̶ra ni baaj`i, yaksi wura yaghal tong ating abet-abet. Jesu wuri sat mmo cín mbiise nwura se. 56Ni aapo puun ki̶ ni̶ghi̶n fi̶ra mo. Amma Jesu wuri sat mmo nee, taji mo sat mbii ɗi ni kì̵ c`in ni mmee gurum kas.

will be added

X\