Luk 7

1Aɓwoon ɗi Jesu wuri kyes satpo ɗiisi mo ngurum ni mo, ɓe wuri yaghal ɗel nKaparnahum. 2Ɓe mee ngo ɗiiɗes nkaa sooja mu Rom mo, wuri ki̶ mee ki̶rom ɗi wuri wal nwuri zam. Ki̶rom ni wuri agok, wuri kus ki̶ muut. 3Kaaɗi ngo ɗiiɗes nkaa sooja mu Rom ni mo, wuri ki̶ling po nkaa Jesu, ɓe wuri lop pak nyemnan mu nyem Yahudi mo so pe Jesu ɗi, mpeku mo ɗang ɗi pu Jesu, mpeku wuri j`i bar ki̶rom ni ɗi. 4Kaaɗi mo j`i pe Jesu ɗi, mo ɗang pu wuri hakyeng, mo sat nee, "Ni ret ku a ɓam gwar ɗiisi. 5Mpeeɗi wurii wal nyem funu mo, ki̶ a wuri shikáa fi̶ri, wuri ɗik mee lu kì̵ Naan mmun." 6Jesu wuri so ndang mo. Kaaɗi wuri wul kus kì̵ tulu ni, ɓe ngo ɗiiɗes nkaa sooja ni mo. Wuri lop shaar fi̶ri mo so pe Jesu ɗi nee, "Daa, taji a lejeel nsak mpee j`i ntulu fi̶na kas, mpeeɗi ba ɗin ndi̶re fi̶na ni mak mpeku a j`i ntulu fi̶na kas. 7Ki̶ zak, ba ɗiiret fi̶na ni mak mpeku wan son kaat wugha kas, amma a sat a po ɓejee, ɓe ki̶rom fi̶na wurin mbar. 8Mpeeɗi wan shikáa fi̶na, wan a nder kì̵ iiko kì̵ mee gurum zak, ki̶ wan ki̶ sooja mo nder fi̶na zak. Katɗang wan sat memee nee, 'A so sí', ɓe wurin nso, katɗang wan sat memee nee, 'a j`i si,' ɓe wurin nj`i. Katɗang wan sat ki̶rom fi̶na nee, a c`in mbii ɗiisi, ɓe wurin nc`in." 9Kaaɗi Jesu ki̶lingpo mi̶ni, ɓe ni aapo nwuri zam. Jesu wuri cighi̶r naa kuur kì̵ gurum ɗi mon ndang wuri, ɓe wuri sat mmo nee, "Wan sat nwun, koo a ndi̶ghi̶n nyem Isreil mo, ɓe ba wan ki̶n kyam kat cínzeen ɗiiɗes kaa ɗiisi si kas." 10Kaaɗi nyem ɗi mo lop mo so pe Jesu ɗi, mo baa ntulu, ɓe mo kat ki̶rom ni wuri kì̵ bar. 11Aɓwoon mi̶ni lee, ɓe Jesu wuri so mmee birni ɗi moo pet ni a Nayin, jeplop fi̶ri mo so ashak ki̶ wuri, ki̶ gurum mo ɗes. 12Kaaɗi wuri wul kus ki̶ pukok fwang mu birni ni, ɓe gurum mo ɗes ɗi mo ndi̶ghi̶n birni ni, moo put ki̶ kúm kì̵ mee ɗyem, ɗi a wuri mi̶ndong nni̶ghi̶n fi̶ri ɓejee, ki̶ wura a matkáa zak; wura ɗi ndang kúm ni. 13Kaaɗi Daa wuri naa matkáa ni wura, ɓe wuri naajeel fi̶ra, wuri sat nwura nee, "Taji yi wal kas." 14Ɓe Jesu wuri gyes so ɗi, wuri tuwaas mbii mang kúm ni, ɓe nyemmang kúm ni mo ɗar caghat. Jesu wuri sat nee, "Ɗyem zi̶lang, wan sat nwugha nee a yaghal." 15Ɗyem zi̶lang ɗi wuri kì̵ muut ni, wuri yaghal tong ating, ɓe wuri ɗoghom katpo. Ɓe Jesu cín wuri nni̶ghi̶n fi̶ri. 16Ki̶i̶rmuut yaa gurum ni mo jir, ki̶ mo cín ɗiiɗes nNaan, mo sat nee, "Mee ngusatpo kì̵ Naan ɗiiɗes wuri j`i put ɗi nnaar funu. Ki̶ zak, Naan wuri kì̵ sham mpee ɓam nyem fi̶ri mo." 17Po nkaa Jesu ni ɗel so ndi̶ghi̶n yil nJudiya, ki̶ yil ɗi mo neerpee mi̶ni jir. 18Nyemlop kì̵ nJoon mo satpo Joon nkaa mbii ɗiisi mo jir. 19Joon wuri pet memee mo vul mɓut nyemlop fi̶ri mo, ɓe wuri lop mo so pe Daa ɗi, ku mo tal ɗi nee, "A wugha a ngo ɗi wurin ndung j`i si, aa koo mun ngong j`i kì̵ mee ngo ɗiici ye?" 20Kaaɗi jeplop kì̵ Joon ni mo j`i pe Jesu ɗi, ɓe mo sat nee, "A Joon nguc`in baptisma wuri lop mun j`i pe wugha ɗi, ne, a wugha a ngo ɗi wurin ndung j`i si aa, koo mun ngong j`i kì̵ mee ngo ɗiici ye?" 21Ntiit ki̶ peemi̶ni, ɓe Jesu wurii bar gurum mo ɗes mɓut shwal mo shini-shini, ki̶ wuri pwat ki̶ riin ɗiibish mo, ki̶ wurii le ku nyemvum mo ɗes mo naapee. 22Ɗangɓe Jesu wuri lap mmo nee, "Wu so wu sat nJoon mbii ɗi wuu naa, ki̶ mbii ɗi wuu ki̶ling. Nyemvum mo naapee, kiɓel mo mwaan riret. Nyemloghom mo ɗee a ɗiibi̶bar, komɗwaghar mo ki̶lingpee, nyemmuut mo yaghal a peemúut. Nyemjeel mo nkaa ki̶lingpo kì̵ Naan ɗiiret. 23Nyem ɗi ba mo ki̶ mee kyetwa nkaa wan kas, ɓe mo kat ɗiiret." 24Aɓwoon ɗi nyemlop kì̵ Joon ni mo kì̵ so, ɓe Jesu wuri ɗoghom sat nkuur kì̵ gurum ni mo nkaa Joon nee, "Jí wu pwat wu so a naar yil si a mpee naa meye? A mpee ɓel ɗi kut ki̶ cut ni aa? 25J`i wuu pwat wu so a mpee naa meye? A mpee naa mee ngo ɗi wurii lop nli̶r ɗiiki̶rim mo me? Nyem ɗi moo jwal nli̶r ɗiiki̶rim mo, ki̶ ɗi moo se ki̶ shwaa, moo tong a ndi̶ghi̶n tulu kì̵ mishkagham mo. 26Wu sat nwan, jí wuu pwat wu so a mpee naa a meye? A mee ngusatpo kì̵ Naan aa? Ii, jí wu so wu naa a ngusatpo kì̵ Naan, amma wan sat nwun, wuri ɗes met ngusatpo kì̵ Naan. 27Joon wuri a ngo ɗi mo kì̵ ten ran ndi̶ghi̶n takarda kì̵ Naan nkaa wuri nee: 'A naa, wan ndung lop ngulop fi̶na a ti̶leng nwugha, ɗi wurin nɗak ar fugha akuɗang aa j`i.' 28Azeen-nzeen wan sat nwun nee, ndi̶ghi̶n jep gurum mo jir, ɗi mat moo làa mo, ɓe ba memee ɗes met nJoon nguc`in baptisma kas, jir ki̶si, ɓe ngo ɗi wuri a ɗiilee met jir ndi̶ghi̶n mulki kì̵ Naan, wuri met nJoon." 29(Kaaɗi kuur kì̵ gurum ni mo, ki̶ nyemlapwap mo ki̶lingpo kì̵ Jesu ni, ɓe mo man azeen-nzeen nee, Naan wuri a nguc`in mbii mo ndi̶re-ndi̶re, mpeeɗi mo ki̶ lap baptisma pu Joon ɗi. 30Amma nyem Farisi mo, ki̶ nyemkám Waar kì̵ Mosis mo, ba mo riɓet lap ɗyen kì̵ Naan ndi̶ghi̶n putughup furu mo kas, mpeeɗi jí mo kwar lap baptisma pu Joon ɗi.) 31Jesu wuri sekiyeen ki̶ po ni nee, "Wan nkám tong nyem ɗin ny`iicinsi mo, a shi meye? Mo a kaa me si ye? 32Mo a kaa jep ɗi moo tong mpokasuwa si, ɗi moo pi̶rep shaartan furu mo nee, 'Mu taa nvelang nwun, ɓe ba wu c`in kook ni kas. Mun mmaap, ɓe ba wu wal kas.' 33Jí Joon nguc`in baptisma wuri j`i, ba wuri se mbiise, ki̶ shwaa am anab kas, ɓe jí wu sat ne wuri ki̶ riin ɗiibish. 34Amma Làa kì̵ Gurum wuri j`i, ɓe wurii se mbiise ki̶ shwaa, ɓe wu sat nee, 'ngugyar sepee, ki̶ ngugyar shwaapee. Shaar mu nyemlapwap mo, ki̶ nyemshikbish mo.' 35Jir aasi, ɓe seen kì̵ Naan, nii kám sat azeen ndi̶ghi̶n nyem ɗi mo ki̶ lap seen kì̵ Naan ni." 36Mee ngu Farisi pet Jesu, mpeku Jesu so sese ɗi ashak ki̶ wuri ntulu fi̶ri. Jesu wuri so ntulu kì̵ ngu Farisi ni, wuri tong nyil a peesese ni. 37Ndi̶ghi̶n birni mi̶ni, ɓe mee mat wura ɗi, ɗi wura a mat shikbish. Kaaɗi wura ki̶ling nee, Jesu wurii tong a peesese ndi̶ghi̶n ntulu kì̵ ngu Farisi ni, ɓe wura j`i kì̵ mee been mwoor ɗi moo pet a alabasta, ɗi ni ɗu shang-shang. 38Wura ɗar nkoghop mɓwoon nshii kì̵ Jesu, wura nkaa wal, ki̶ wura lok shii fi̶ri mo shi yitmwaan fi̶ra, ɓe wura pwos yitmwaan ɗi ni nkaa shii fi̶ri ni shi shoopkáa fi̶ra, wura ɗwas shii fi̶ri mo shi mi̶shpoo fi̶ra, ki̶ wura pwos mwoor ɗi ni ɗu shang-shang ni nkaa shii fi̶ri. 39Kaaɗi ngu Farisi ɗi wuri pet Jesu ni, wuri naa mi̶ni, ɓe wuri pan ndi̶ghi̶n putughup fi̶ri nee, "Katɗang ɗi gwar ɗiisi a ngusatpo kì̵ Naan azeen-nzeen, ɓe ɗi wurin mman kiyeet kì̵ mat shikbish ɗi wuraa tuwaas wuri si." 40Jesu wuri sat nwuri nee, "Simon, wan ki̶ mee mbii mpee sat nwugha." Simon wuri lap nee, "Ngukám, a sat mbii ni ɗak." 41Jesu wuri sat nee, "Mee gurum mo ɗi vul, ɗi mo lap kaat shaghal pu mee ngo ɗi wurii cín hop shaghal ngurum mo. Memee hop shaghal zinariya mo ɗaripaat, ki̶ memee hop mo laarpaat. 42Kaaɗi ba mo mak kat mee mbii mpee kwat shaghal nin ngwar ni kas, ɓe wuri fwo kaat ni mo weet. Ndi̶ghi̶n mo vul, ɓe a we nwal ngucín hop shaghal ni met ye?" 43Simon wuri lap nee, "Wan ben nee, a ngo ɗi mo fwo kaat mi̶ri ɗes met sí." Jesu sat wuri nee, "A lap a ndi̶re." 44Ɗangɓe Jesu cighi̶r naa mat ni, ɓe wuri sat Simon nee, "A naa mat ɗiisi aa? Wan j`i ndi̶ghi̶n ntulu fugha, ba a cín am vwang shii nwan kas, amma wura lok shii fi̶na mo shi yitmwaan fi̶ra, ki̶ wura pwos mo shi shoopkáa fi̶ra. 45Ba wugha tuwaas shii fi̶na mo shi mi̶shpoo kas. Puɗi wura ɗel ɗi, ɓe ba wura ki̶ nook tuwaas shii fi̶na mo shi mi̶shpoo fi̶ra kas. 46Ba wugha pwos mwoor nwan kas, amma wura pwos shii fi̶na mo shi mwoor ɗi ni ɗu shang-shang. 47Mpeemi̶ni, wan sat nwugha, shikbish fi̶ra ɗi mo ɗes si, mo kì̵ fwo mo nwura jir, mpeeɗi wura wal nwan ɗes. Amma ngo ɗi mo fwo nwuri lee, ɓe wuri wal a lee ɗak zak." 48Jesu wuri sat mmat ni nee, "Mo kì̵ fwo shikbish fii mon nyi." 49Mi̶zep ɗi moo tong a pee sese ni ashak ki̶ wuri, mo ɗoghom sat ki̶ shak nee, "Gwar ɗiisi wuri a we, ɗi wuri mak fwo shikbish ye?" 50Amma Jesu wuri sat mmat ni nee, "Cínzeen fii ni ɓam yi, yi so yiyi riyang."

will be added

X\