Luk 5

1Kaaɗi Jesu wurii ɗar mpo am canɗar mu Genesaret, ɓe kuur kì̵ gurum mo j`i neer wuri, mpeku mo ki̶lingpo kì̵ Naan ɗi. 2Jesu wuri naa jirgi am mo vul, moo ɗar mpo am canɗar ni, amma nyemyak pupwap ni mo kì̵ ten pwat, mo nkaa vwang shang yak pupwap furu mo. 3Jesu wuri ɗel ndi̶ghi̶n memee mɓut jirgi am ni mo, ɗi ni a mu Simon Pita. Wuri ɗang pu Pita mpeku wuri gyes so ki̶ni ɗiilee mpoɗi̶ghi̶r. Ɓe Jesu wuri tong ndi̶ghi̶n jirgi ni, ki̶ wuri yaa kámpo Naan ɗi kuur kì̵ gurum ni mo. 4Kaaɗi wuri kyes kám ni, ɓe wuri sat mPita nee, "A gyes so ɗi ki̶ jirgi ni ndi̶ghi̶n am ɗiijurung, ku wu ɓwot shang fuu mo ɗi mpee yak pupwap ni mo." 5Pita lap nwuri nee, "Daa, doghon muu teer ɗak yak pupwap ni mpar, ɓe ba mu yaa mee mbii kas, amma mpee sat fugha, ɓe wan mɓwot shang ni mo sham ɗi mɓut am ni." 6Kaaɗi mo ɓwot shang ni mo, ɓe mo yak pupwap mo ɗes, har shang furu ni mo ɗoghom tee. 7Mo wiip sar so niyee furu ɗi mo ndi̶ghi̶n jirgi am ɗiici si, mo pet mo, mpeku mo j`i ɓam mo ɗi. Mo j`i, mo gam jirgi ni mo vul weet shi pupwap ni mo, har jirgi ni mo ɗoghom ru ndi̶ghi̶n am. 8Kaaɗi Pita naa mi̶ni, ɓe wuri kurum nfurum ntoghom kì̵ Jesu, kì̵ wuri sat nee, "A baku pe wan ɗi Daa, mpeeɗi wan a ngushikbish." 9Mbii ɗiisi ni aapo nwuri, ki̶ nyem ɗi mo ashak ki̶ wuri jir, mpee pupwap ɗi mo yak ni mo. 10Ni aapo Jemis kì̵ Joon, jep kì̵ Zeɓeɗi mo, ɗi mo a shaarɗak kì̵ Pita, aasi zak. Jesu wuri sat mPita nee, "Taji ki̶i̶rmuut yaa wugha kas. Aɓwoon ɗiisi, ɓe wughan nyak a gurum mo." 11Kaaɗi mo j`i wul ki̶ jirgi furu mo mpoɗi̶ghi̶r, ɓe mo yaghal yit mbii mo jir, ku mo so ɗi ndang Jesu. 12Kaaɗi Jesu wuri ɗi ndi̶ghi̶n mee birni, ɓe mee gwar wuri ɗi, ɗi loghom fes tu wuri bish-bish hakyeng. Kaaɗi nguloghom ni wuri naa Jesu, ɓe wuri j`i kurum nyil ntoghom fi̶ri, wuri ɗang pu Jesu, kì̵ wuri sat nee, "Daa, katɗang wugha riɓet, ɓe wugha mak bar wan, kun ɗee ɗi a ɗiiɓang." 13Ɗangɓe Jesu wuri zan sar fi̶ri, ɓe wuri tuwaas gwar ni, ki̶ wuri sat nee, "Wan riɓet, a ɗee a ɗiibi̶bar." Abet, ɓe loghom ni kyes ngwar ni. 14Jesu satpo ngwar ni shiɓal nee, "Taji a woo ngurum mo kas, amma a so a kám sak fugha mpris, ki̶ a cín mbiizughum, kaaɗi gyet Mosis kì̵ ten sat si, mpeku gurum mo man ɗi nee, aa ɗee a ɗiibi̶bar." 15Amma jir ki̶si, ɓe po nkaa Jesu ni waa si̶ghi̶t so shipee-shipee met nɗiiyam, har ni le ku gurum mo ɗes mo j`i kuur ashak mpee ki̶ling wuri, ki̶ mpeku wuri bar mo ɗi mɓut shwal furu mo zak. 16Amma Jesu wuri put so a yil mpee c`in aduwa, a peeɗi ba mee gurum ɗi kas. 17Parmee puus, kaaɗi Jesu wuri nkaa kám, ɓe pak nyem Farisi mo ki̶ nyemkám Waar kì̵ Mosis mo, ɗi mo pwat ndi̶ghi̶n koo laayil ɗiiɗang ye, ɗi mo a mu Galili, ki̶ nJudiya, ki̶ Jerusalem, moo tong ɗi a pee ni. Iiko kì̵ Naan ni ɗi ashak kì̵ Jesu, mpeku wuri bar nyemgok mo ɗi. 18Mee das mo mang mee gwar ɗi shin fi̶ri ni fii, mo j`i ki̶ wuri nkaa mbiisaam. Mo tangpee ɗi mon nɗel ku mo le wuri ɗi ntoghom kì̵ Jesu. 19Amma mpee ɗuu kì̵ gurum ni mo, ɓe ba mo katpee ɗi mon nɗel ɗi ki̶ gwar ni kas. Ɓe mo kàa wang ɗenglu ni, ku mo lop gwar ni sham ɗi nkaa mbiisaam ntoghom kì̵ Jesu. 20Kaaɗi Jesu naa cínzeen furu, ɓe wuri sat ngwar ni nee, "Ngo fi̶na, mo kì̵ fwo shikbish fugha mo nwugha." 21Nyemkám Waar kì̵ Mosis mo, ki̶ nyem Farisi mo, mo ɗoghom satpo ki̶ shak nee, "Gwar ɗiisi wuri a we, ɗi wurii satpo ɗiibish nkaa Naan ye? A Naan a ngo ɗi wuri mak fwo shikbish ɓejee ɗak." 22Jesu wuri man pan ɗi ni ndi̶ghi̶n putughup furu mo, ɓe wuri lap mmo nee, "A me le ɗang wuu pan mbii ɗiisi mo ndi̶ghi̶n putughup fuu mo ye? 23A ɗiiɗang fiyeel met ye? A ɗin wan nsat nee, Mo kì̵ fwo shikbish fugha mo nwugha, aa koo a ɗi wan nsat ngwar ni nee, A yaghal a mwaan ye. 24Amma mpeku wu man ɗi nee, Làa kì̵ Gurum wuri ki̶ iiko nkaa yil ni, mpee fwo shikbish mo." Mpeemi̶ni, ɓe Jesu wuri sat ngo ɗi shin fi̶ri ni fii nee, "Wan sat nwugha, a yaghal a mang mbiisaam fugha, a so waa." 25Abet-abet, ɓe gwar ni yaghal ɗar a kiyeen kì̵ gurum ni mo, ɓe wuri mang mbiisaam fi̶ri wuri so waa. Wurin nkaa kwoop Naan. 26Mbii ɗiisi ni aapo ngurum ni mo jir hakyeng, har mo kwoop Naan, ki̶ mo gam ki̶ ki̶i̶rmuut. Mo sat nee, "Muu naa mbii lukshik mo cicinsi." 27Aɓwoon ɗiisi, ɓe Jesu put, ɓe wuri naa mee ngulapwap wurii tong a pee lapwap, ɗi sum fi̶ri a Livai. Jesu sat nwuri nee, "A j`i ndang wan." 28Ɓe Livai wuri yit mbii mo jir, ku wuri yaghal so ɗi ndang Jesu. 29Livai wuri ɗak mbiiseriɓet ɗiiɗes mpee Jesu ntulu fi̶ri. Ndi̶ghi̶n mi̶zep ni mo, ɓe nyemlapwap mo ɗes, ki̶ pak gurum mo, mo nkaa sese ashak ki̶ wuri. 30Pak nyem Farisi mo, ki̶ nyemkám Waar kì̵ Mosis mo, mo so c`in mwaanaa pe jeplop kì̵ Jesu mo ɗi nee, "A me le ɗang wuu se ki̶ shwaa ashak ki̶ nyemlapwap mo, ki̶ nyemshikbish mo ye?" 31Jesu lap mmo nee, "Ba nyem ɗi mon nkagham, mon ntang nguyen kas, amma a nyem ɗi mo a gok. 32Ba wan j`i a mpee pet nyem ɗin ndi̶re mo kas, amma a nyemɗiibish mo, mpeku mo tuwap ɗi." 33Pak gurum mo sat nJesu nee, "Nyemlop kì̵ Joon moo wet ki̶ neen ɗiki̶-ɗiki̶, ki̶ moo c`in aduwa, ki̶ jeplop kì̵ nyem Farisi mo, moo c`in aasi zak. Amma nyemlop fugha moo se ki̶ shwaa." 34Jesu lap mmo nee, "Wu pan nee, nin mmak c`in ku mi̶zep ɗi mo a pee seriɓet mu ɗik, mon ntong ki̶ neen, ɓe mish kì̵ matpoo ni wuri ɗi ashak ki̶ mo me? 35Amma puus ni mon nj`i, ɗi mon mmang mish ni aki̶ mo, ɗangɓe mon ntong ki̶ neen a ndi̶ghi̶n teer mi̶ni mo." 36Jesu sat mee sumpo mmo zak nee, "Ba mee gurum mmak can fuwaat ɗiipoo, ku wuri lus goknli̶r ɗishik kas, katɗang wuri c`in ki̶si, ɓe nli̶r nin nsi̶ghi̶t tee, mpeeɗi ba fuwaat ɗiipoo nin nyakshak ki̶ ɗiisi̶ghi̶r ni kas. 37Ki̶ zak, ba mee gurum mmak ɗoo am anab ɗiipoo, ndi̶ghi̶n tughulshim ɗiisi̶ghi̶r mo kas, katɗang wuri c`in ki̶si, ɓe am anab ɗiipoo nin ntee tughulshim ni mo, ki̶ am anab nin mɓeer, ki̶ tughulshim ni mon nɗee a ɗiiwuwat zak. 38Amma moo ɗoo am anab ɗiipoo a ndi̶ghi̶n tughulshim ɗiipoo mo. 39Ba mee gurum, ɗi wuri kì̵ ten shwaa am anab ɗiisi̶ghi̶r, ɓe wurin waa baa riɓet shwaa am anab ɗiipoo zak kas, mpeeɗi wurin nsat nee, ɗiisi̶ghi̶r nii ret ɗi vit."

will be added

X\