1 Jesu wuri gam ki̶ Riin Ɗiiɓang. Wuri yaghal yit dung nJodan, ɓe abet Riin kì̵ Naan so ki̶ wuri a naar yil. Wuri c`in teer laarfeer ɗi a naar yil ni, 2 ɓe Shetan nkaa kyam Jesu, mpee jwaan wuri. Ba Jesu se mee mbiise ndi̶ghi̶n shiiteer mi̶ni mo kas. Aɓwoon kì̵ teer laarfeer ni, ɓe neenláa nwuri. 3 Shetan sat nJesu nee, "Katɗang wugha a Làa kì̵ Naan, ɓe a cighi̶r ki̶ jwak ɗiisi mo, ku mo ɗee ɗi nwugha a mbiise." 4 Amma Jesu wuri lap nShetan nee, "Ni a riran ndi̶ghi̶n takarda kì̵ Naan nee, 'Ba gurum nkat seen a shi mbiise ɓejee ɗak kas', [amma a shi po ɗiiret ɗi ni put pe Naan ɗi!]" 5 Ɗangɓe Shetan kàa ki̶ Jesu a mee ɗengpee ɗiiwurang, ɓe wuri kám ɗiiɗes mu mulki kì̵ yil ni mon nJesu jir, ki̶lak-ki̶lak kaa ɗyaghapyit si. 6 Shetan sat nJesu nee, "Wan ncín iiko ki̶ ɗiiɗes mu yil ɗiisi nwugha jir, mpeeɗi mo kì̵ ten cín mo nwan, ki̶ zak, wan mmak cín mo jir, ngo ɗi wan ki̶n riɓet zak. 7 Katɗang ɓe wugha taa nyil, mpeku a seyil ɗi nwan, ɓe wan ncín mo nwugha jir." 8 Jesu lap nShetan nee, "Mo kì̵ ten ran ndi̶ghi̶n takarda kì̵ Naan nee, A seyil nDaa Naan fugha, ki̶ a wuri mi̶ndong ɗi wughan nc`in ɗak nwuri ɓejee!" 9 Ɗangɓe Shetan so ki̶ Jesu nJerusalem. Shetan kàa ɗar ki̶ Jesu nkaa pee ɗiiwurang met jir, aɗeng Lu kì̵ Naan ɗiiɗes ni. Wuri sat nJesu nee, "Katɗang ɓe wugha a Làa kì̵ Naan, ɓe a met a sham nyil mpesi. 10 Mpeeɗi ni a riran nee, 'Naan wurin nlop nyemlop fi̶ri mo, mpeku mo fwang wugha ɗi.' 11 Ki̶ zak, mon fwang wugha shi sar furu mo, mpeku taji a sham a cut shii fugha nkaa jwak kas." 12 Jesu lap nShetan nee, "Mo kì̵ ten sat ndi̶ghi̶n takarda kì̵ Naan nee, 'Taji a kyam Daa Naan fugha mpeku a jwaan wuri ɗi kas.' " 13 Aɓwoon ɗi Shetan kì̵ kyam Jesu shi koo a jwaan ɗiiɗang ye, ɓe wuri yaghal yit Jesu ɗi mpee rep pee lee. 14 Jesu wuri waa baaj`i nGalili, ɓe iiko mu Riin kì̵ Naan ni ashak ki̶ wuri. Nyem ɗi mo neer yil ni cighi̶rkaat jir, mo ki̶lingpo nkaa wuri. 15 Wuri kam-kam ngurum mo ndi̶ghi̶n lu kì̵ Naan furu mo, har gurum mo jir, mo kwoop wuri. 16 Jesu wuri j`i nNazaret, a peeɗi wuri wurang ɗi. Ɓe wuri ɗel ndi̶ghi̶n mee lu kì̵ Naan parpuus Nookɗi, kaaɗi wurii loghot ki̶ ɗel ɗi si. Wuri yaghal ɗar a ting, mpeku wuri tang takarda kì̵ Naan ɗi. 17 Ɓe mo cín takarda kì̵ ngusatpo kì̵ Naan Aizaya nwuri. Jesu fwoon takarda ni, ɓe wuri katpee ɗi mo ran ɗi nee: 18 "Riin kì̵ Jihova Naan wuri nkaa wan. Mpeeɗi wuri kì̵ ten bi̶lip wan, mpeku wan satpo ɗiiret ɗi nyemjeel mo. Wuri lop wan ku wan satpo fwoon ɗi mpee nyem ɗi mo a ɓuɓwaghat mo, ku wan wang yit kì̵ vum mo ɗi, ku wan ɓwot nyem ɗi gurum moo ti̶reng mo ɗi. 19 Mpeku wan satpo ɗi nee, ɓit ɓam ɗi Daa wurin mɓam nyem fi̶ri mo ni kì̵ j`i wul." 20 Jesu wuri ciɓet takarda ni, ɓe wuri baa cín ngutap ki̶ takarda ni. Ɓe wuri waa tong nyil. Jir nyem ɗi mo ɗi ndi̶ghi̶n lu kì̵ Naan ni, mo ti̶ghi̶r yit furu mo nkaa wuri. 21 Jesu wuri sat mmo nee, "Cicinsi, ɓe po ɗiisi ni ɗee a ɗiigi̶gam nyit fuu mo." 22 Gurum mo jir, mo satpo ɗiiret nkaa wuri, mpeeɗi ni aapo mo mpee po ɗiiret ɗi mo pwat ndi̶ghi̶n po fi̶ri, har mo sat nee, "Ba a làa kì̵ Josep si nɗiisi kas me?" 23 Jesu wuri sat mmo nee, "Wan man azeen nee, wun nsat sumpo ɗiisi a nee, 'Nguyen, a bar sak fugha,' ki̶ wun nsat nwan zak nee, mbii ɗi mu ki̶ling a c`in mo nKaparnahum jir, ɓe a c`in mi̶ni mo mpesi ndi̶ghi̶n yil fugha zak." Jesu wuri waa sat ɗiki̶ mmo nee, "Azeen-nzeen ki̶n sat nwun. 24 Ba mee ngusatpo kì̵ Naan, ɗi gurum mon mmak lap wuri ndi̶ghi̶n yil fi̶ri kas." 25 Amma azeen ki̶n sat nwun nee, "Ndi̶ghi̶n mɓít kì̵ Ilaija, ɓe gyet matkáa mo ɗi ɗes ndi̶ghi̶n yil nIsreil, kaaɗi gyet fwan nook j`i, mpee ɓit kun ki̶ kaghar. Mɓít mi̶ni mo, ɓe neen ɗiiɗes ni táa nkaa yil ni jir. 26 Jir ki̶si, ɓe ba gyet mo lop Ilaija so pe mee matkáa ɗi mi̶ndong ndi̶ghi̶n yil nIsreil kas, amma gyet mo lop wuri so a pe mee matkáa ɗi wuraa tong a nZarifat, ndi̶ghi̶n yil nSidon ɓejee ɗak. 27 "Ndi̶ghi̶n ɓit kì̵ ngusatpo kì̵ Naan Ilaisha zak, ɓe gyet nyemloghom mo ɗi ɗes ndi̶ghi̶n yil nIsreil, amma ba gyet memee mi̶ndong ndi̶ghi̶n mo kat bar kas, amma see gyet a Na"aman ngu Siriya kat bar ɓejee ɗak." 28 Kaaɗi nyem ɗi mo ɗi ndi̶ghi̶n Lu kì̵ Naan ni mo ki̶lingpo mi̶ni, ɓe mo c`in tughup zam. 29 Ɓe mo yaghal mo ɗul Jesu put ki̶ wuri aɓwoon kì̵ birni ni. Mo kàa kì̵ wuri, mpeku mo vwet wuri sham táa ɗi shi káa. 30 Amma wuri taa lagham nnaar furu, ɓe wuri ɗel so ɗiɗi. 31 Ɗangɓe Jesu wuri so nKaparnahum, ɗi ni a mee birni ndi̶ghi̶n yil nGalili. Parpuus Nookɗi, ɓe Jesu wuri kámpo Naan ngurum mo. 32 Kám fi̶ri ni aapo mmo, mpeeɗi kám fi̶ri ni ki̶ iiko. 33 Ndi̶ghi̶n lu kì̵ Naan ni, ɓe mee gwar wuri ɗi, ɗi wuri ki̶ riin ɗiibish. Gwar ni ɗiyeep ɗoo shiɓal nee, 34 "Jesu ngu Nazaret, a me kaat mun kì̵ wugha ye? A j`i a mpee twa mun aa? Wan man nee, wugha a ngo ɗiiɓang mu Naan." 35 Jesu gwak gwar ni, ki̶ wuri sat nriin ɗiibish ni nee, "A ɗok titik! A put aku." Kaaɗi riin ɗiibish ni mang gwar ni vwet nyil mɓut ngurum ni mo, ɓe ni put aku mɓut gwar ni. Ba ni le mee láa ngwar ni kas. 36 Mbii ɗiisi ni aapo ngurum mo jir, har mo sat ki̶ shak nee, "A gwar ɗiiɗang nɗiisi ye? Mpeeɗi shi gwak, ki̶ shi iiko, ɓe wuri satpo nriin ɗiibish mo, ɓe moo pwat aku." 37 Po nkaa Jesu ni so shipee-shipee mɓut nyil ɗi mo neerpee mi̶ni cighi̶rkaat. 38 Jesu yaghal yit lu kì̵ Naan ni, ɓe wuri so ɗel ntulu kì̵ Simon Pita. Ɓe mo kat ni̶ghi̶nkaam kì̵ Pita wuraa gan nyil ki̶ mee cilem ɗi ni shwal hakyeng, ɓe mo ɗang Jesu mpeku wuri bar wura ɗi. 39 Ɗangɓe Jesu wuri so ɗar kus ki̶ wura, ɓe wuri jighi̶r cilem ni, ɓe cilem ni kyes. Abet, ɓe wura yaghal c`in mbiise mmo. 40 Kaaɗi puus ndung ru, ɓe nyem ɗi mo ki̶ nyemgok mo, ki̶ shwal mo shini-shini, mo j`i ki̶ mo pe Jesu ɗi. Wuri lesar fi̶ri nkaa mo, ki̶ wuri bar mo jir. 41 Riin ɗiibish mo pwat mɓut ngurum mo ɗes, moo le or nee, "Wugha a Làa kì̵ Naan!" Amma Jesu wuri jighi̶r mo shiɓal, mpeeɗi ba wurii riɓet, ku mo katpo kas, mpeeɗi riin ɗiibish ni mo man nee a wuri a Kristi. 42 Kaaɗi ɓit ni mang, ɓe Jesu wuri put yit birni ni, wuri so mmee peeɗi ba gurum mo ɗi kas, mmi̶shin. Ɓe kuur kì̵ gurum ni mo yaghal tang wuri, har mo j`i a peeɗi wuri ɗi. Ba mo riɓet ku wuri yaghal yit mo kas. 43 Amma wuri sat mmo nee, "Ting wan satpo ɗiiret mu mulki kì̵ Naan ndi̶ghi̶n kaghar birni ni mo zak, mpeeɗi Naan wuri lop wan sham a mpeemi̶ni." 44 Ɗangɓe wuri sekiyeen ki̶ satpo kì̵ Naan ndi̶ghi̶n lu kì̵ Naan ɗin nyil nJudiya mo.
