Luk 3

1Ɗangɓe ndi̶ghi̶n ɓit ɗiikaghapaat baapaat mu mishkagham ɗiiɗes Tiberiyus Siza, ɗi Pontus Pailet wuri a Gofna nyil nJudiya, ki̶ Herot wuri a mishkagham nGalili, ki̶ ɗyemni̶ghi̶n fi̶ri Filip wuri a mishkagham Ituriya ki̶ Trakonitis ki̶ Lisaniyas wuri a mishkagham Abilene. 2Ndi̶ghi̶n ɓit ɗi Annas ki̶ Kayafas mo a pris ɗiiɗes mo, ɓe po kì̵ Naan ni j`i pe Joon làa kì̵ Zakariya ɗi a naar yil. 3Joon mwaan so nyil ɗi mo neer podung nJodan jir, wurin nkaa satpo ɗiiret ngurum mo nee, "Wu tuwap, ku wu yit shikbish fuu mo, ku mo c`in Baptisma ɗi nwun, ɓe Naan wurin nfwo shikbish fuu mo nwun." 4Kaaɗi mo kì̵ ran ndi̶ghi̶n takarda kì̵ ngusatpo kì̵ Naan Aizaya si nee: "Mee ngo ki̶ pi̶reppee shi ɗoo ɗiiɓal a naar yil, nee, 'wu ɗak ar kì̵ Daa. 5Wu gam koo a kwal ɗiiɗang ye. Koo a jwak ɗiiɗang ye, koo a gi̶i̶t ɗiiɗang ye ɓe wu per mo. Wu ɗak ar ɗiigi̶rong mo, ku mo ɗee ɗin ndi̶re jir. Wu ɗak ar ɗiibish mo, ku mo ɗee a ɗiiret mwaan. 6Jep gurum mo jir, mon nnaa ɓam kì̵ Naan.' " 7Mpeemi̶ni Joon sat nkuur kì̵ gurum ɗi mo pwat j`i pe wuri ɗi, mpee lap baptisma nee, "Wun jep pang mo! A we kì̵ sat nwun nee, wu swa aku mɓut tughup kì̵ Naan ɗi nin ndung j`i ye? 8Wu c`in ɗak ɗi ni kám nee, wuu tuwap azeen-nzeen. Taji wu ɗoghom canjagham ki̶ suk nee, 'puun funu a Abraham kas.' Wan sat nwun nee, Naan wurin mmak cighi̶r ki̶ jwak ɗiisi mo, ku mo ɗee ɗi a jep kì̵ Abraham mo. 9Koo a yaksi, ɓe mo kì̵ le sep mpee saa seen ting ni mo. Koo a ting ɗiiɗang ye ɗi ba ni làa-làa ɗiiret kas, ɓe mon ncan, ɓwot nwus." 10Kuur kì̵ gurum ni mo tal pu Joon nee, "Mun nc`in a meye?" 11Wuri lap mmo nee, "Ngo ɗi wuri ki̶ nli̶r mo vul, ɓe wuri cín memee ngo ɗi ba wuri ki̶ ni kas, ki̶ ngo ɗi wuri ki̶ mbiise, ɓe wuri cín pak nyem ɗi ba mo ki̶ni kas." 12Pak nyemlapwap mo j`i, mpeku Joon c`in mbaptisma ɗi mmo zak. Mo tal pu wuri nee, "Ngukám, mun mun nc`in a meye?" 13Joon lap mmo nee, "Taji wu tul shaghal met mbii ɗi mo kì̵ sat nwun kas." 14Sooja mo tal pu wuri zak nee, "Mun, munn c`in a meye?" Joon lap mmo nee, "Taji wu hi̶r mee mbii nkaa mee gurum shi tughur kas, ki̶ taji wu c`in nɗung nkaa mee gurum kas. Wu gung ki̶ shaghal tar fuu mo." 15Kaaɗi kuur kì̵ gurum ni mo nkaa naa mbii ɗi Joon wuri c`in mo, ɓe mo ɗoghom pan ndi̶ghi̶n putughup furu mo nee, ngul a Joon wuri a Kristi ni. 16Ɗangɓe Joon wuri sat mmo jir nee, "Wan ki̶n c`in mbaptisma nwun a shi am, amma mee gurum ndung j`i, ɗi wuri ɓal met nwan, ɗi ba ɗiiret fi̶na ni mak, ku koo a teng kwaghazak fi̶ri, ɓe ba wan mak fwoon ni kas. A wurin nc`in mbaptisma nwun shi Riin Ɗiiɓang ki̶ wus zak. 17Wuri ki̶ kutut fi̶ri ni ndi̶ghi̶n sar fi̶ri, mpeku wuri fii mukap ni ɗi jir ɓang-ɓang, ku wuri hi̶r ɗiɓen ni, so ɗi ki̶ ni nɗiyaar fi̶ri. Ɗangɓe wurin ncaan mukap ni, shi wus ɗi ba nii pit kas." 18Pak po ɗiiret mo ɗes ɗi Joon sat nkuur gurum ni mo ɗiki̶ zak. 19Amma kaaɗi Joon gwak mishkagham Herot mpee Herodiyas mat kì̵ ɗyemni̶ghi̶n fi̶ri, ki̶ mpee mbii ɗiibish mo jir, ɗi Herot wuri kì̵ c`in mo, 20ɗiki̶ nkaa mi̶ni mo jir, ɓe Herot waa baa ɓwaghat Joon le ndi̶ghi̶n lushaghat zak. 21Ɗangɓe aɓwoon ɗi mo kì̵ c`in baptisma ngurum mo jir, ɓe mo c`in baptisma nJesu zak. Kaaɗi wurin nkaa c`in aduwa, ɓe ɗengnaan ni wang. 22Ɓe Riin Ɗiiɓang sham nkaa wuri kaa mɓul si. Ɓe gurum mo ki̶ling mee ɗoo ɗi ni put aɗeng sham, ɗi ni sat nee, "Wugha a Làa fi̶na ɗi wan wal nwugha, ki̶ wan ki̶n kat retnyit ki̶ wugha hakyeng." 23Kaaɗi Jesu wul ɓit mo laarkun, ɓe wuri yaa c`in ɗak fi̶ri. Wuri a làa kì̵ Josep ɗi Josep wuri a làa kì̵ Heli, kaaɗi gyet gurum mo pan si. 24Heli wuri a làa kì̵ Mattat, Mattat làa kì̵ Livai, Livai làa kì̵ Malki, Malki làa kì̵ Jannai, Jannai làa kì̵ Josep. 25Josep làa kì̵ Matayas, Matayas làa kì̵ Amos, Amos làa kì̵ Nahum, Nahum làa kì̵ Esli, Esli làa kì̵ Nagai, 26Nagai làa kì̵ Maat, Maat làa kì̵ Matayas, Matayas làa kì̵ Semein, Semein làa kì̵ Josek, Josek làa kì̵ Joda, 27Joda làa kì̵ Joanan, Joanan làa kì̵ Resa, Resa làa kì̵ Zerubabel, Zerubabel làa kì̵ Shealtiyel, Shealtiyel làa kì̵ Neri. 28Neri làa kì̵ Malki, Malki làa kì̵ Addi, Addi làa kì̵ Kosam, Kosam làa kì̵ Elmadam, Elmadam làa kì̵ Er. 29Er làa kì̵ Joshuwa, Joshuwa làa kì̵ Eliyezer, Eliyezer làa kì̵ Jorim, Jorim làa kì̵ Mattafa, Mattafa làa kì̵ Livai, 30Livai làa kì̵ Simiyon, Simiyon làa kì̵ Juda, Juda làa kì̵ Josep. Josep làa kì̵ Joonam, Joonam làa kì̵ Eliyakim. 31Eliyakim làa kì̵ Meleya, Meleya làa kì̵ Maina, Maina làa kì̵ Matatat, Matatat làa kì̵ Natan, Natan làa kì̵ Devid. 32Devid làa kì̵ Jesse, Jesse làa kì̵ Obed, Obed làa kì̵ Bowas, Bowas làa kì̵ Salmon, Salmon làa kì̵ Nashon, 33Nashon làa kì̵ Aminadab, Aminadab làa kì̵ Aram, Aram làa kì̵ Heziron, Herizon làa kì̵ Peres, Peres làa kì̵ Juda, 34Juda làa kì̵ Jekop, Jekop làa kì̵ Aizik, Aizik làa kì̵ Abraham, Abraham làa kì̵ Tera, Tera làa kì̵ Nahor, 35Nahor làa kì̵ Seruk, Seruk làa kì̵ Reyu, Reyu làa kì̵ Pelek, Pelek làa kì̵ Eber, Eber làa kì̵ Shela. 36Shela làa kì̵ Kainan, Kainan làa kì̵ Arfakzad, Arfakzad làa kì̵ Shem, Shem làa kì̵ Nowa, Nowa làa kì̵ Lamek, 37Lamek làa kì̵ Metusela, Metusela làa kì̵ Enok, Enok làa kì̵ Jared, Jared làa kì̵ Mahalalel, Mahalalel làa kì̵ Kainan, 38Kainan làa kì̵ Enos, Enos làa kì̵ Seth, Seth làa kì̵ Adam, Adam làa kì̵ Naan.

will be added

X\