Luk 22

1Kaaɗi puus retnyit mu bred ɗi ba ni kì̵ yist kas, ɗi ni a mu retnyit mu Canɗel ni wul kus. 2Ɓe pris ɗiinan mo kì̵ nyemkám Waar kì̵ Mosis mo, mo tang ar ɗi mon mmak tu Jesu ɗi, amma mo ki̶i̶r ɗuu kì̵ gurum ni mo. 3Amma Shetan ɗel ndi̶ghi̶n putughup kì̵ Judas ɗi moo pet wuri a Iskariyot. Wuri a memee mɓut jeplop kì̵ Jesu ɗiikaghapaat baavul si mo. 4Judas wuri so lepo ashak kì̵ pris ɗiinan mo, kì̵ nyemlek ɗiinan ɗi moo tap ki̶ Lu kì̵ Naan ɗiiɗes, mpeku wuri sat ar ɗi wurin mmak seet Jesu ɗi mmo. 5Mo kat retnyit zam, ki̶ mo sat nee, wuɗun ncín shaghal nwuri. 6Ɓe Judas riɓet. Aɓwoon mi̶ni ɓe wuri ɗoghom tang ar ɗi wurin nseet Jesu ɗi mmo, ɗi ba gurum mo man kas. 7Parpuus ɗi moo se bred ɗi ba ni ki̶ yist kas ni wul, ɗi ni a puus ɗi moo fet long mu mbiise retnyit mu Canɗel ni ɗi zak. 8Ɓe Jesu lop Pita, ki̶ Joon, wuri sat mmo nee, "Wu so wu ɗak mbiise Tong Ashak mu Canɗel ni mmun mpeku mu se ɗi." 9Mo sat nwuri nee, "Aa riɓet ku mo so mu ɗak ni a mpee ɗiiɗang ye?" 10Wuri lap mmo nee, "Katɗang wu ɗel ndi̶ghi̶n birni ni, ɓe wun nkaat ki̶ mee gwar ɗi wuri ki̶ tughul am nkáa, ɓe wu so ndang wuri, har ndi̶ghi̶n lu ɗi wurin nso ɗel ɗi. 11Ɓe wu sat ngulu ni nee, 'Ngukám wuri sat ne, lu mi̶zep ɗi wan nse mbiise Tong Ashak mu Canɗel ashak kì̵ jeplop fi̶na mo ni a neye?' 12Ngulu ni wurin nkám mee luɗeng ɗiiɗes nwun, ɗi mo ki̶ ɗak le, ɓe wu ɗak mbiise ni mmun nlu mi̶ni." 13Mo so kat ni a kaaɗi Jesu sat mmo si, ɓe mo ɗak mbiise Tong Ashak mu Canɗel ni ɗi nlu mi̶ni. 14Kaaɗi pee ni wul, ɓe Jesu tong a peesese ashak ki̶ jeplop fi̶ri mo. 15Wuri sat mmo nee, "Wan ki̶n fes nriɓet se Tong Ashak ɗiisi ni ashak ki̶ wun akuɗang wan ki̶n shwaajeel. 16Wan sat nwun, ba wan mmak baase ni ɗi, zak kas, see mo gamshii kì̵ ni ndi̶ghi̶n mulki kì̵ Naan, akuɗang." 17Jesu wuri mang mee laaɗaa, ɓe wuri c`in aduwa mu pi̶lang Naan, ɓe wuri sat mmo nee, "Wu lap ɗiisi, wu ɓàk ni nnaar fuu. 18Mpeeɗi yaghal ncicinsi, ɓe ba wan nshwaa am anab ɗiisi ni ɗi kas, see mulki kì̵ Naan ni baaj`i akuɗang." 19Wuri mang bred zak, ɓe kaaɗi wuri c`in aduwa mu pi̶lang Naan, ɓe wuri yilang, wuri cín mmo. Ɓe wuri sat mmo nee, "Ɗiisi a san fi̶na [ɗi mo cín ni mpee wun, wu naa nc`in mi̶ni mpee pan wan." 20Aasi zak, aɓwoon ɗi mo kì̵ se bred ni, ɓe wuri mang laaɗaa ni, wuri sat nee, "Laaɗaa ɗiisi ni ɗee a tuwoorpo shi toghom ɗiipoo mu Naan, ɗi ni yaa ɗak mpee toghom fi̶na ɗi mon mɓeer ni mpee wun.] 21Amma wu naa ngo ɗi wurin ndung seet wan, wurii tong ashak ki̶ wan a peese mbiise ɗiisi ni. 22Mpeeɗi ni a ting Làa kì̵ Gurum wurin mmuut ntiit ki̶ mbii ɗi Naan kì̵ ten le, amma jeel ntaa nkaa ngo ɗi wurin nseet Làa kì̵ Gurum." 23Mo ɗoghom tal pushak nee, koo kyet a we ndi̶ghi̶n mo, wurin nc`in mbii mi̶ni ye? 24Ɓeetshik yaghal nnaar ki̶ jeplop kì̵ Jesu mo nkaa a we a ngo ɗiiɗes met mɓut mmo ye? 25Jesu sat mmo nee, "Mishkagham mu nyem ɗi ba mo a nyem Yahudi mo kas, moo ti̶reng gurum furu ni mo shi iiko, ki̶ nyem ɗi mo a ɗiiɗes nkaa mo ni, moo lesut a kaa nyemɓam gurum mo si. 26Amma ba wun nɗee aasi kas, ni ret ku ngo ɗi wuri a ɗiiɗes ndi̶ghi̶n wun, ɓe ting wuri ɗee a kaa làa ɗiilee si. Ngo ɗi wuri a ngusel fuu, ɓe ting wuri ɗee a laaɗak fuu. 27A we a ngo ɗiiɗes met ye? A ngo ɗi wurii tong a peesese ni aa? Aa koo a ngo ɗi wurii cín mbiise ni ye? A ngo ɗi wurii tong a peese mbiise ni a ɗiiɗes. Amma wan ɗi nnaar fuu kaa nguc`in ɗak nwun si. 28"A wun a nyem ɗi wuu ɗar mɓwoon fi̶na ndi̶ghi̶n kyam ɗi moo kat wan. 29Kaaɗi puun fi̶na wuri cín mulki nwan, ɓe wan cín nwun aasi zak. 30Wun nse ki̶ wun nshwaa ashak ki̶ wan nkaa teebul ndi̶ghi̶n mulki fi̶na, ki̶ wun ntong nkaa mbiitong mu mishkagham mo, ku wu tokɗiyeel ɗi nsaghan mu Isreil ɗiikaghapaat baavul si mo. 31"Simon, Simon! A naa Shetan wuri ki̶ tangpee mpee kyam wun, kaaɗi moo pus kàss si. 32Amma wan ki̶n c`in aduwa mpee wugha Simon, mpeku taji cínzeen fugha ni taa taakat kas. Mpeeɗi parɗi a mpi̶ring a baaj`i, ɓe a nle ku ɗymni̶ghi̶n fugha mo ɗar ɓal-ɓal." 33Pita lap nJesu nee, "Daa wan ki̶n ɗak san mpee so ndang wugha, koo ɗi a nlushaghat, ki̶ koo ɗi a muut zak." 34Jesu lap nee, "Wan sat nwugha Pita cicinsi mpar akuɗang deel ki̶ taaɗoo, ɓe wughan nciipo yitkun, ne ba a man wan kas." 35Jesu wuri tal pu jeplop fi̶ri mo nee, "Kaaɗi jí wan lop wun si, ɓe ba jí wun ki̶ shaghal ndaam, koo kuluk, koo kwaghazak kas, ɓe jí mee mbii jee nwun me?" Mo lap nee, "Waash." 36Jesu sat mmo nee, "Amma yaksi, ngo ɗi wuri ki̶ daam shaghal, koo kuluk, ɓe wuri mang. Ngo ɗi ba wuri ki̶ kwai kas, ɓe wuri mang mbiisup fi̶ri seet, ku wuri seet mee kwai ɗi. 37Wan sat nwun nee, ni a ting ku mbii ɗi mo kì̵ ten ran ni nkaa wan ndi̶ghi̶n takarda kì̵ Naan ni gam ɗi. Mo kì̵ ten ran nee, 'Mo tang wuri ashak ki̶ nyemɗiibish mo.' Aasi ɓe mbii ɗi mo kì̵ ten ran mo nkaa wan, a mo nkaa gam nɗiisi." 38Ɗangɓe jeplop kì̵ Jesu mo sat nee, "Daa, a naa mun ki̶ kwai mo vul mpesi." Jesu sat mmo nee, "Mi̶ni mo mak." 39Jesu wuri put so kàa aɗeng Jwakpaat, kaaɗi wurii naa nc`in ni si. Jeplop fi̶ri mo so ndang wuri. 40Kaaɗi wuri wul a pee ni, ɓe wuri sat njeplop fi̶ri mo nee, "Wu c`in aduwa, mpeku taji wu taa mɓut njwaan kas." 41Wuri gyes so ɗi jong ki̶ mo, kaaɗi gurum mak vwet ndi̶ng so wul ɗi si, ɓe wuri kurum nfurum, kì̵ wuri c`in aduwa. 42Wuri sat nee, "Puun fi̶na, katɗang ni mak c`in, ɓe a baa ki̶ ɗaa mu jeel ɗiisi aku pe wan ɗi, ba a kaaɗi wan ki̶n riɓet si kas, amma see a kaaɗi aa riɓet si." 43Ɗangɓe mee ngulop kì̵ Naan, tong aɗeng sham pe Jesu ɗi, mpeku ngulop ni cínɓal ɗi nwuri. 44Mpeeɗi Jesu mɓut jeel ɗiinaat zam. Jesu wuri waa baa c`in aduwa ɗi tal-tal, har wun fi̶ri ni ɗyong sham nyil kaa toghom si. 45Kaaɗi wuri yaghal a pee aduwa ni, ɓe wuri baaj`i pe jeplop fi̶ri mo ɗi, ɓe wuri kat mo nkaa saam, kì̵ putughup ɗiiwuwat. 46Wuri sat mmo nee, "A me le ɗang wun nkaa saam ye? Wu yaghal, wu c`in aduwa, mpeku taji wu taa ndi̶ghi̶n jwaan kas." 47Kaaɗi Jesu kuɗi nkaa katpo, ɓe Judas Iskariyot ɗi wuri a memee mɓut jeplop kì̵ Jesu ɗiikaghapaat baavul si mo, wuri j`i wul ashak ki̶ kuur gurum mo ɗes ndang wuri. Wuri j`i kus kì̵ Jesu, mpee tok ki̶ wuri shi mi̶shpoo. 48Amma Jesu sat nwuri nee, "Judas, ashee, wughan nseet Làa kì̵ Gurum a shi tokshik shi mi̶shpoo wa?" 49Kaaɗi nyemso ndang Jesu ɗi mo ɗi ashak ki̶ wuri, mo naa mbii ɗi nin ndung c`in, ɓe mo tal pu wuri nee, "Daa, mu c`in lek shi kwai me?" 50Ɗangɓe memee ndi̶ghi̶n nyem ɗi mo ashak kì̵ Jesu, wuri shang kwai fi̶ri, ɓe wuri can kom ɗin nsarse mu ki̶rom kì̵ pris ɗiiɗes met jir ni vwet nyil. 51Amma Jesu sat nee, "Taji wu baa wu cín mi̶ni ɗi kas." Jesu tuwaas kom kì̵ ki̶rom ni, har kom ni zughum nwuri. 52Ɗangɓe Jesu sat mpris ɗiinan mo, ki̶ nyemɗiinan ɗi moo tap ki̶ Lu kì̵ Naan ɗiiɗes, ki̶ nyemɗiinan mu gurum ni mo nee, "Wun wu pwat wu j`i ki̶ kwai mo, ki̶ dughul mo, mpeku wu j`i wu yaa wan ɗi, kaa wan a mee kus wat si aa? 53Ba jí wan ɗi ashak ki̶ wun, shidaar-shidaar ndi̶ghi̶n Lu kì̵ Naan ɗiiɗes, ɓe ba wu yaa wan kas, amma yaksi, pee fuu ni wul, mpeku wu c`in mbii ɗi wuu riɓet ɗi, ɗi ni a mu iiko mu peenkoo ni." 54Nyem ɗi mo yaa Jesu, ɓe mo so ki̶ wuri ntulu kì̵ pris ɗiiɗes met jir ni. Ɓe Pita wuri so mɓwoon kì̵ mo jong-jong. 55Kaaɗi mo lewus a naarfur, ɓe Pita j`i tong ashak ki̶ nyem ɗi mo nkaa ki̶ling wong kì̵ wus ni. 56Ɓe mee reepɗak wura naa Pita wurii tong ashak ki̶ gurum ni mo a yit wus, ɓe wura ti̶ghi̶r yit nkaa wuri, ɓe wura sat nee, "Gwar ɗiisi wuri ashak kì̵ Jesu." 57Amma Pita cíipo, wuri sat nee, "Mat si, ba wan man wuri kas." 58Lang ɗiilee, ɓe mee ngo naa Pita zak, ɓe gwar ni sat nee, "Wugha a memee mɓut nyem ki̶ Jesu ni mo zak" Pita lap nee, "Waash! daa." 59Aɓwoon kì̵ awa mi̶ndong, ɓe mee gwar wuri sat shiɓal nee, "Azeen-nzeen, gwar ɗiisi wuri ashak kì̵ Jesu, mpeeɗi wuri a ngu Galili." 60Amma Pita sat nee, "Kai, wugha! Ba wan man mbii ɗi wugha aa sat ni kas." Abet-abet, akuɗang wurii ɗokpo, ɓe deel taaɗoo. 61Ɓe Daa wuri cighi̶r naa Pita. Ɓe Pita panpo ɗi Jesu ki̶ sat nwuri nee, "Cicinsi mpar, akuɗang deel kì̵ taaɗoo, ɓe wughan nciipo yit kun, ne ba a man wan kas." 62Pita put ati̶leng, ɓe wuri yaa maap ɗi ni a ɗiinaat. 63Ɗangɓe nyem ɗi mo yaa Jesu, mo shwar wuri, ki̶ mo nas wuri. 64Mo paa yit fi̶ri mo, ɗang mo tal pu wuri nee, "A sat mmun ngo ɗi cut wugha." 65Mo sat pak po ɗiibuu mo nkaa wuri ɗes, ki̶ mo fulup wuri zak. 66Kaaɗi ɓit mang, ɓe kuur kì̵ nyemnan-nan mo, ki̶ pris ɗiinan mo, ki̶ nyemkám Waar kì̵ Mosis mo, mo kuur ashak, ndi̶ghi̶n luɓeetpo furu. Ɓe mo j`i ki̶ Jesu ntoghom furu, ɓe mo sat nJesu nee, 67"Katɗang wugha a Kristi, ɓe a sat mmun." Amma Jesu lap mmo nee, "Koo ɗi wan sat nwun, ɓe ba wun ncínzeen kas. 68Ki̶ katɗang ɓe wan tal mee po pu wun zak, ɓe ba wun nlap kas. 69Amma yaghal nyaksi, ɓe Làa kì̵ Gurum wurin ntong nsarse mu iiko kì̵ Naan." 70Mo jir mo sat nee, "Ashee, wugha, a Làa kì̵ Naan wa?" Jesu lap mmo nee, "Wun ki̶ sat nee, wan a Làa kì̵ Naan." 71Mo sat nee, "Mun nwaa mu tang a mee langting ɗiiɗang ɗiki̶ zak ye? Mpeeɗi mun shikáa funu, muu ki̶ling mbii ɗi wuri sat shi po fi̶ri."

will be added

X\