Luk 21

1Jesu wuri cighi̶r naapee, ɓe wuri naa nyemlong mo nkaa ɓwot shaghal furu mɓut kwati mu ɓwot mbiizughum, ɗi mo le ni nLu kì̵ Naan ɗiiɗes ni. 2Ɓe wuri naa mee matkáa ɗi wura a matjeel, wura ɓwot rep anini mo vul ndi̶ghi̶n ni zak. 3Jesu wuri sat mmo nee, "Azeen-nzeen ki̶n sat nwun, mbii ɗi matkáa ɗi wura a matjeel ɗiisi wura ɓwot ndi̶ghi̶n kwati ni, ni met mu kaghar ni mo jir. 4Mpeeɗi nyem ɗiisi mo jir, mo ɓwot mbiizughum ni a mɓut nɗes kì̵ long ɗi mo ki̶ni, amma wura, mɓut jeel fi̶ra, ɓe wura ɓwot a kyes kì̵ mbii ɗi wura ki̶ni mpee se fi̶ra mmi̶ni." 5Pak gurum ɗi mo so ndang Jesu, mo satpo nkaa ret kì̵ ɗik Lu kì̵ Naan ɗiiɗes, ɗi mo kì̵ tap ɗak ni shi jwak ɗiiriret mo, kì̵ mbiizughum ɗi gurum mo kì̵ cín nNaan. Jesu wuri sat mmo nee, 6"Wuu naa mbii ɗiisi mo jir aa? Teer ni moo j`i, ɗi ba mon nyit mee nhi̶k tong nkaa nhi̶k mpee ɗiisi kas. Mon nshirip mo jir." 7Ɗangɓe mo tal pu wuri nee, "Ngukám, mbii ɗiisi mon nyaghal c`in a pi̶rang ye? Mon naa a alama ɗiiɗang ɗi nin nkám ne mbii ɗiisi mon nc`in ye?" 8Jesu wuri lap mmo nee, "Wu tap, taji mee gurum num wun kas. Mpeeɗi gurum mo ɗes, mon nj`i ndi̶ghi̶n sum fi̶na, ku mo sat ɗi ne, 'Wuɗun a Kristi', ki̶ mon nsat zak nee, 'teer ni mo kì̵ j`i wul' ɓe taji wu so ndang mo kas. 9Katɗang wu ki̶ling po nkaa lek mo, ki̶ or mu lek mo, ɓe taji ni leki̶i̶rmuut nwun kas, mpeeɗi ting mbii ɗiisi mon nshee cín akuɗang, amma parkyes kì̵ yil ni kuɗi." 10Ɗangɓe wuri sat mmo nee, "Mee yil nyaghal lek nkaa mee yil, ki̶ mee mulki nyaghal lek nkaa mee mulki. 11Yil nin ntungpee ɗes-ɗes shipee-shipee, neen ki̶ shwal mu lemuut mon ntaa nkaa pee mo shini-shini, ki̶ mbii aapo mo shini-shini mon ntong aɗeng sham. 12Amma akuɗang mbii ɗiisi moo c`in jir, ɓe mon nyak wun, kì̵ mon nlejeel nwun, mon nseet wun nsar kì̵ nyem ɗi moo tap kì̵ lu kì̵ Naan mo, ki̶ mon nle wun nlushaghat, ki̶ mon nso ki̶ wun ntoghom kì̵ mishkagham mo, ki̶ Gofna mo, mpee sum fi̶na. 13Ɗiisi nin ncínpee nwun, mpeku wu katpee satpo ɗiiret ni ɗi mmo. 14Mpeemi̶ni, ɓe taji wu ansuk mpee mbii ɗi wun nlap mmo mpee put kì̵ káa fuu kas. 15Mpeeɗi a wan ncín po ni, ki̶ seen ni nwun, ɗi ba shaarlek fuu mon kat ɓal ɗi mon nɗar ɗi kas, koo mo cíipo ki̶ ni kas zak. 16A puun fuu mo, ki̶ ni̶ghi̶n fuu mo, ki̶ ɗyemni̶ghi̶n fuu mo, ki̶ nyem fuu mo, ki̶ shaar fuu mo, mon nyaghal seet wun, ki̶ mon nle ku mo twa pak mo mɓut nwun zak. 17Gurum mon nkwar wun jir mpee sum fi̶na. 18Amma ba mee shoopkáa fuu mi̶ndong mmak lagham kas. 19Wu ɗar ɓal-ɓal, mpeku Naan wuri ɓam wun ɗi." 20"Katɗang wu naa nyemlek mo j`i neer Jerusalem cighi̶rkaat shi lek, ɓe wu man nee, shirip fi̶ra ni j`i wul kus mmi̶ni. 21Parmi̶ni, ɓe nyem ɗi mon ndi̶ghi̶n yil nJudiya jir, mo swa so mɓut njwak mo, ki̶ nyem ɗi mo ɗi ndi̶ghi̶n birni ni, ɓe mo pwat so a ti̶leng, ki̶ nyem ɗi mo mɓut njepyil mo, ɓe taji mo waa j`i ɗel ndi̶ghi̶n birni ni kas. 22Mpeeɗi teer mi̶ni mo a mu lapkwat, mpeku mbii ɗi mo kì̵ ten ran ni ndi̶ghi̶n takarda kì̵ Naan ni gam ɗi jir. 23Jeel ni si̶ghi̶t naat, nin ntaa nkaa mat ɗi mo ki̶ aak, ki̶ mat ɗi mo nkaa cín wur njep mo ndi̶ghi̶n teer mi̶ni mo. Mpeeɗi jeel ɗi ni a ɗiinaat zam, nin ntaa ndi̶ghi̶n yil ni, ki̶ tughup kì̵ Naan nin nsham nkaa nyem ɗiisi mo. 24Mon ntwa pak mo shi kwai, ki̶ mon nyak pak mo so ki̶ mo kaa ki̶rom mo si, ndi̶ghi̶n yil mo jir. Nyem ɗi ba mo a nyem Yahudi mo kas, mon nti̶reng Jerusalem shi shii zak, har parɗi ɓit kì̵ nyem ɗi ba mo a nyem Yahudi mo kas ni gam." 25"Mon nnaa mbii aapo mo nkaa puus, ki̶ nkaa tar, ki̶ zar mo zak. Mbii mi̶ni ndaampee ngurum ɗi mo ndi̶ghi̶n yil ni hakyeng, ki̶ ki̶i̶rmuut nin nyaa mo, mpee or kì̵ am bahar mo, ki̶ tungpee kì̵ am ni. 26Ni̶ghi̶ntoghom nin nl`ee gurum mo, ki̶ tiip nin ntwa mo mpee ki̶i̶rmuut mu mbii ɗi mon ntaa nkaa yil ni, mpeeɗi mbii ɗi aɗeng mon nyoghon. 27Ɗangɓe mon nnaa Làa kì̵ Gurum wurii sham put ndi̶ghi̶n nluu ɗi aɗeng shi iiko, ki̶ Ɗiihai fi̶ri ɗiiɗes. 28Katɗang wu naa mbii ɗiisi mo ɗoghom c`in, ɓe wu yaghal wu ɗiyeepkáa fuu mo. Wu naapee aɗeng, mpeeɗi ɓam fuu nii j`i wul kus." 29Jesu sat mee sumpo mmo nee, "Wu yit ku tingkoon, ki̶ kaghar ting mo jir, mo ɗee a mbiikám pe wun ɗi. 30Katɗang wu naa ting ni mo ɗoghom tangkom, ɓe wu man nee, tarlok ni wul kus. 31Ni aasi zak, katɗang wu naa mbii ɗiisi mo ɗoghom c`in, ɓe wu man nee, mulki kì̵ Naan ni kus kì̵ j`i. 32Azeen-nzeen, ki̶n sat nwun nee, ba gurum ɗiiyaksi mon mmurap kas, see mbii ɗiisi mo gam jir akuɗang. 33Ɗeng ki̶ yil mon nɗel so, amma ba po fi̶na mon mmak kyam ɗel so kas." 34"Wu tap ki̶ káa fuu mo, mpeku taji wu lepan fuu mo ɗee nkaa seriɓet, ki̶ shwaayughur, ki̶ mbii ɗi mo a mu yil ɗiisi mo, har parɗi puus mi̶ni j`i taa nkaa wun ɗin mman kaa cip si kas. 35Mpeeɗi puus mi̶ni ndung j`i taa nkaa gurum mo aasi, ɗi moo tong ndi̶ghi̶n yil ni jir. 36Amma wu tong shi gongpee ki̶ c`in aduwa, koo pi̶rang ye, mpeku wu katɓal ɗi wun nɗee ɗi a koghorong nkaa mbii ɗi mon ndung c`in si jir, kì̵ mpeku par wu j`i ɗi ntoghom kì̵ Làa kì̵ Gurum." 37Jesu kámpo kì̵ Naan ngurum mo ndi̶ghi̶n Lu kì̵ Naan ɗiiɗes, koo a puus ɗiiɗang ye, amma katɗang par c`in, ɓe wurii put kàa teer mɓut njwak ɗi moo pet ni a Jwakpaat. 38Mɓít-mɓít ɓe gurum moo naa mpwat j`i pe wuri ɗi ndi̶ghi̶n Lu kì̵ Naan ɗiiɗes, mpeku mo ki̶ling kám fi̶ri ɗi.

will be added

X\