Luk 18

1Jesu sat mee sumpo njeplop fi̶ri mo, ɗi ni kám mmo nee, ni ret ku mo c`in aduwa shidaar-shidaar, taji ni ɗughur mmo kas. 2Wuri sat nee, "Mee ngutokɗiyeel wuri ɗi mmee birni, ɗi ba wurii ki̶i̶r Naan koo wurii kak mee gurum kas zak. 3Ki̶ mee matkáa wura ɗi ndi̶ghi̶n birni mi̶ni zak, wuraa naa nso pe wuri ɗi, wura sat nwuri nee, 'A ɓam wan nsar kì̵ shaarlek fi̶na mo.' 4Nshee ni, ɓe wurii naa nkwar ɓam wura. Amma aɓwoon, ɓe wuri sat ndi̶ghi̶n putughup fi̶ri nee, 'Koo ɗi ba wan ki̶n ki̶i̶r Naan koo kak mee gurum kas si, 5jir ki̶si, ɓe mpeeɗi matkáa ɗiisi wuraa naa ndaampee nwan, wan mɓam wura, mpeku taji wura naa nj`i ndaampee nwan shidaar-shidaar kas.' " 6Daa wuri sat nee, "Wu ki̶ling mbii ɗi ngutokɗiyeel ɗi ba wuri ki̶ zeen kas si wuri sat. 7Naan wurin mɓam nyem fi̶ri ɗi wuri ki̶ bi̶lip mo, ɗi moo naa nwal pu wuri mpar ki̶ puus. Ba wuri waa ɓes mpee ɓam mo kas. 8Wan sat nwun nee, Naan wurin mɓam nyem fi̶ri mo ki̶lak-ki̶lak. Amma katɗang Làa kì̵ Gurum wurin mbaaj`i, ɓe kyet wurin nkat nyemcínzeen mo ɗi ndi̶ghi̶n yil ɗiisi ni wa?" 9Pak gurum mo ɗi, ɗi moo lekáa furu mo a nyem ɗin ndi̶re mo, ki̶ moo ɓák kaghar gurum mo. Jesu wuri sat sumpo ɗiisi nkaa nyem mi̶ni mo nee, 10"Gurum mo vul mo kàa nLu kì̵ Naan ɗiiɗes mpee c`in aduwa. Memee a ngu Farisi, ki̶ memee a ngulapwap. 11Ngu Farisi ni wuri yaghal so ɗar a naar, ɓe wuri c`in aduwa nkaa shin nee, 'Daa Naan, wan pi̶lang wugha, mpeeɗi ba wan a kaa kaghar gurum mo si kas, nyemwat mo, nyemɗiibish mo, nyemngaa mo, koo kaa ngulapwap ɗiisi si. 12Wan ki̶n wet ki̶ neen yit vul ndi̶ghi̶n teer povul. Wan ki̶n cín mi̶ndong ndi̶ghi̶n kaghapaat mɓut mbii ɗi wan kat mo jir.' 13"Amma ngulapwap ni wuri yaghal ɗar jong-jong, ba wuri ɗiyeep yit fi̶ri kàa aɗeng kas. Amma wuri zum, ki̶ wuri cut tughur fi̶ri, ɓe wuri sat nee, 'Daa Naan, a c`in kussuk nwan ngushikbish.' " 14Jesu sat mmo nee, "ngulapwap ni wuri baa waa fi̶ri, a ngo ɗin ndi̶re nyit kì̵ Naan met ngu Farisi si. Mpeeɗi ngo ɗi wuri ɗiyeepkáa fi̶ri a ɗiiɗes, ɓe mon nsham ki̶ wuri a ɗiilee, amma ngo ɗi wuri sham ki̶ káa fi̶ri a ɗiilee, ɓe mon nɗiyeep wuri ɗee a ɗiiɗes." 15Pak gurum mo j`i ki̶ jep ɗiiɗween-ɗween mo pe Jesu ɗi, mpeku wuri lesar fi̶ri ɗi nkaa mo. Amma kaaɗi nyemso ndang Jesu mo naa mi̶ni, ɓe mo gwak gurum ni mo. 16Amma Jesu pi̶rep jep ɗiiɗween-ɗween ni mo j`i pe shin ɗi, ɓe wuri sat nee, "Wu yit ku jep ɗiiɗween mo j`i pe wan ɗi. Taji wu daam mo kas, mpeeɗi mulki kì̵ Naan ni a mpee gurum mo kaa jep ɗiiɗween mo si. 17Azeen-nzeen, ki̶n sat nwun nee, koo weye, ɗi ba wuri lap mulki kì̵ Naan kaa làa ɗiilee si kas, ɓe ba wurin mmak ɗel ndi̶ghi̶n ni kas, koo ɗiɓen." 18Mee nguti̶leng kì̵ nyem Yahudi mo, wuri j`i tal pu Jesu nee, "Ngukám ɗiiret. Wan nc`in a ɗak ɗiiret ɗiiɗang, mpeku wan kat seen ɗiiso ngaa-ngaa ɗi ye?" 19Jesu lap nwuri nee, "A me le ɗang wugha pet wan a Ngukám ɗiiret ye? Ba mee gurum a ɗiiret kas, see a Naan mmi̶shin ɓejee. 20Wugha man mbii ɗi Waar kì̵ Mosis ni mo sat jir nee, 'Taji a c`in ngaa kas, taji a tukáa kas, taji a c`in wat kas, taji a c`in nɗung nkaa gi̶nang fugha kas. A cín ɗiiɗes mpuun fugha ki̶ ni̶ghi̶n fugha.' " 21Gwar ni lap nee, "Wan ki̶n tap ki̶ Waar ɗiisi mo jir, pugyet wan kuɗi a zi̶lang." 22Kaaɗi Jesu ki̶ling mi̶ni, ɓe wuri sat ngulong ni nee, "A mbii mi̶ndong ɗee ɗi nwugha ɓejee. A so a si̶rep long fugha mo jir, ku a ɓàk shaghal ni ɗi nyemjeel mo, ɗangɓe wughan nkat long ɗes ndi̶ghi̶n ɗengnaan. Aɓwoon mi̶ni, ɓe a j`i ndang wan." 23Amma kaaɗi gwar ni ki̶lingpo mi̶ni, ɓe ni wat putughup nwuri zam, mpeeɗi wuri a ngulong hakyeng. 24Kaaɗi Jesu wuri ti̶ghi̶r yit nkaa gwar ni, ɓe wuri sat nee, "Nin nluk, ku ngulong wurin nɗel ndi̶ghi̶n mulki kì̵ Naan. 25Gyal ɗeesi ɓe raakumi nki̶lak ɗel ndi̶ghi̶n fung kì̵ luɓi̶ra, met aku ɗi ngulong wurin nɗel ndi̶ghi̶n mulki kì̵ Naan." 26Nyem ɗi mo ki̶lingpo mi̶ni, ɓe mo sat nee, "Katɗang mbii ni aasi, ɓe a we mak kat ɓam ye?" 27Amma Jesu lap mmo nee, "Ba gurum mak c`in mbii ɗiisi mo kas, amma Naan wuri mak c`in mbii mo jir." 28Ɗangɓe Pita sat nee, "A naa, mun ki̶ yit tulu funu mu, ku mo so ɗi ndang wugha." 29Jesu sat mmo nee, "Azeen-nzeen ki̶n sat nwun nee, koo a weye ɗi wuri yit tulu, koo mat, koo ɗyemni̶ghi̶n mo, koo puun mo, koo jep mo mpee mulki kì̵ Naan. 30Ɓe wurin nkat li̶ɓet mo ɗes ndi̶ghi̶n ɓit ɗiiyaksi, ki̶ wurin nkat seen ɗiiso ngaa-ngaa ndi̶ghi̶n ɓit ɗi nin ndung j`i zak." 31Jesu pi̶rep jeplop fi̶ri ɗiikaghapaat baavul si mo so mee koghop mmusut, ɓe wuri sat mmo nee, "Wu naa, mun a ar kàa nJerusalem nɗiisi, ɓe mbii ɗi gyet nyemsatpo kì̵ Naan mo kì̵ ten ran nkaa Làa kì̵ Gurum mon ngam. 32Mon nseet wuri, nsar kì̵ nyem ɗi ba mo a nyem Yahudi mo kas, mon nshwar wuri, ki̶ mon ncín jeel nwuri, ki̶ mon ntwas lii nkaa wuri. 33Mon nfwo ngwam wuri, ki̶ mon ntu wuri zak. Amma parpuus ɗiikun, ɓe wurin nyaghal a peemúut zak." 34Amma, ba jeplop fi̶ri ni mo manshii kì̵ po mi̶ni mo kas, koo mi̶ndong, mpeeɗi po ɗiisi ni mo ɗee a ɗiisi̶sok pe mo ɗi. Ba mo manshii kì̵ po ɗi wuri sat mmo ni kas. 35Kaaɗi Jesu j`i wul kus ki̶ Jeriko, ɓe mee nguvum wurii tong mpo ar, wurin nkaa ɗang-ɗang. [ 36Ɓe wuri ki̶ling kuur kì̵ gurum moo j`i ɗel, ɓe wuri tal nee, "A me ɗi ye?"] 37Mo sat nwuri nee, "A Jesu ngu Nazaret wurii j`i." 38Nguvum ni wuri le or shiɓal nee, "Jesu Làa kì̵ Devid a naajeel fi̶na, a c`in kussuk nwan." 39Nyem ɗi mo ati̶leng kì̵ Jesu, mo gwak nguvum ni, mpeku wuri ɗok titik, amma nguvum ni wuri waa si̶ghi̶t le or shiɓal nee, "Jesu Làa kì̵ Devid, a naajeel fi̶na, a c`in kussuk nwan." 40Jesu wuri ɗar, ɓe wuri sat mmo j`i ki̶ nguvum ni. Kaaɗi nguvum ni wuri j`i wul, ɓe Jesu tal pu wuri nee, 41"Aa riɓet ku wan c`in a me nwugha ye?" Nguvum ni wuri lap nee, "Daa, a le ku yit fi̶na mo naapee." 42Jesu sat nguvum ni nee, "A naapee ɗak, cínzeen fugha ni le ku yit fugha mo naapee." 43Abet-abet, ɓe yit fi̶ri mo naapee. Wuri so ndang Jesu, ki̶ wuri nkaa cín ɗiiɗes nNaan. Kaaɗi kuur kì̵ gurum ni mo naa mi̶ni, ɓe mo kwoop Naan zak.

will be added

X\