Luk 16

1Jesu wuri sat njeplop fi̶ri mo nee, "Gyet mee ngulong wuri ɗi, ɗi wuri ki̶ mee gwar ɗi wurii tap ki̶ long fi̶ri mo. Gurum mo j`i woo ngulong ni nee, gwar ɗi wurii tap ki̶ long fugha ni mo, wurii ti̶kook ki̶ long fugha ni mo. 2Ɗangɓe ngulong ni wuri pet ngutap long ni mo j`i, ɓe wuri sat nee, 'Wan ki̶n ki̶ling gurum moo sat ne, aa ti̶kook ki̶ long fi̶na mo. A j`i, a yakshii kì̵ mbii ɗi wugha aa c`in ki̶ long fi̶na ni mo. Mpeeɗi ba wugha nkuɗi a mee nguɗak fi̶na kas.' 3Ɗangɓe nguɗak ni wuri pan ndi̶ghi̶n putughup fi̶ri nee, wan nc`in a me kaaɗi ngulu fi̶na wurin ndung ceen wan nɗak ni si ye? Ba wan ki̶ ɓal ɗi wan mmak sak maar kas. Ki̶ katɗang wan ɗee a nguɗang, ɓe nin nshoop wan. 4A mbii ɗi wan nc`in nɗiisi, mpeku gurum mo lap wan ɗi ntulu furu mo, aɓwoon ɗi ngulu fi̶na wuri kì̵ ceen wan nɗak ni. 5Wuri pi̶rep nyem ɗi mo ki̶ kaat ngulu fi̶ri shimi̶ndong-shimi̶ndong, ɓe wuri sat ngo ɗin nshee ni nee, 'kaat ɗi wugha ki̶ ni ngulu fi̶na ni wul a kong ye? 6Gwar ni lap nee, a garwa mwoor mo ɗari. Nguɗak ni wuri sat nwuri nee, a mang haal takarda fugha a tong nyil, ku a ran ɗi kyen ne, mo a laarpaat.' 7Ɗangɓe wuri sat memee zak nee, 'Kaat ɗi wugha ki̶ ni ngulu fi̶na ni wul a kong ye?' Gwar ni lap ne, 'a tip mu alkama mo ɗari.' Nguɗak ni wuri sat ngwar ni nee, 'a mang haal takarda fugha, a ran ne, mo a laarpokun.' 8Ɗangɓe ngulu kì̵ nguɗak ni kwoop wuri, mpee seen fi̶ri. Mpeeɗi gurum ɗi mo ndi̶ghi̶n yil ɗiisi, mo seen mpee c`in mbii furu mo, met nyem ɗi mo a mu peeɓang mo." 9Jesu sat nee, "Wan sat nwun, wu c`in nɗak ki̶ long ɗii mu yil ɗiisi, mpeku wu kat shaar mo ɗi mpee káa fuu mo, mpeku katɗang par ɗi long fuu ni mo kyes, ɓe mo mak lap wun ɗi ndi̶ghi̶n peetong ɗiiso ngaa-ngaa mo. 10Ngo ɗi gurum mo mak cínzeen nwuri mpee tap ki̶ mbii ɗiilee mo, ɓe mon mmak cínzeen nwuri mpee tap ki̶ mbii ɗiiɗes mo zak. Ki̶ ngo ɗi ba gurum mo mak cínzeen wuri mpee tap ki̶ mbii ɗiilee mo kas, ɓe ba mon mak cínzeen wuri mpee tap ki̶ mbii ɗiiɗes mo kas zak. 11Katɗang ba mo mak cínzeen ne, wun mmak tap ki̶ long ɗii mu yil ɗiisi kas, ɓe a we mmak lelong ɗi mo a mu zeen nsar fuu ye? 12Ki̶ zak, katɗang ba wu mak tap ki̶ long ɗi gurum mo le sar fuu kas, ɓe a we mmak cín long ɗiimukáa fuu nwun ye? 13Ba mee ki̶rom mmak c`in nɗak ngulu mo vul ntiit-ntiit kas, mpeeɗi wurin nkwar memee, ki̶ wurin nwal memee, koo wuri cín ɗiiɗes memee, ku wuri ɓák memee ɗi. Ba gurum mmak c`in ɗak nDaa Naan, ɗangɓe wurii seyil nlong zak kas." 14Mpeeɗi nyem Farisi mo a nyem wal nshaghal zam. Kaaɗi mo ki̶lingpo ɗi Jesu sat ni, ɓe mo naa wuri shi yit mu ɓákpee. 15Amma Jesu wuri sat mmo nee, "A wun a nyem ɗi wuu lesuk fuu mo a ɗin ndi̶re nyit kì̵ gurum mo, amma Naan wuri man putughup fuu mo. Mpeeɗi mbii ɗi gurum moo le ni ki̶ koghop ni ɗes hakyeng, ɓe ni a mbii ɗiibish nyit kì̵ Naan. 16"Gyet gurum moo c`in ɗak a shi Waar kì̵ Mosis, ki̶ nyemsatpo kì̵ Naan mo, har j`i wul mɓít kì̵ Joon nguc`in mbaptisma. Yaghal mmi̶ni, ɓe mo nkaa satpo ɗiiret ngurum mo nkaa mulki kì̵ Naan, ɓe koo ngo ɗiiɗang ye wurii ɗel ndi̶ghi̶n ni a shiɓal. 17Amma jir ki̶si, ɓe nin nki̶lak, mpeku ɗeng ki̶ yil mo ɗel so jee, met aku ɗi rep mee dot mi̶ndong mɓut Waar ni mo ɗee a ɗiibuu." 18"Koo ngo ɗiiɗang ye ɗi wuri ceen mat fi̶ri, mpeku wuri baa lap memee ɗi, ɓe wuri c`in a ngaa mmi̶ni, ki̶ ngo ɗi wuri lapmat ɗi mee mish kì̵ ten ceen wura, ɓe wuri c`in a ngaa mmi̶ni zak." 19"Gyet mee ngulong wuri ɗi, ɗi wurii jwal nli̶r ɗi mo pan a naat jilau ki̶ ɗiipiyaa-piyaa mo, lée ɗiisi mo a ɗiiki̶rim zak. Wurii naa nse mbiiseriɓet ɗiiriret mo shidaar-shidaar, ki̶ wurii kat retnyit fi̶ri. 20Gyet mee ngujeel ɗi zak, ɗi sum fi̶ri a Lazarus, ɗi shin fi̶ri ni gam ki̶ si̶rap mo. Gurum mo j`i le wuri mpolu kì̵ ngulong ni. 21Lazarus wurii naa leyit, mpeku wuri kat rep pak mbiise ɗi nii ɗyong nder teebul kì̵ ngulong ni. As moo naa nj`i ɓi̶lem láa fi̶ri ni mo zak. 22"Peekyes kì̵ ni, ɓe Lazarus wuri muut, ɓe nyemlop kì̵ Naan mo j`i mang wuri, so ki̶ wuri pu Abraham ɗi. Lang ɗiilee ɓe ngulong ni wuri muut zak, ɓe mo wum wuri. 23Kaaɗi wuri nkaa shwaajeel ɗiinaat a peeɗi nyemmuut mo ɗi, ɓe wuri ɗiyeep yit fi̶ri kàa aɗeng, ɓe wuri naa Abraham jong-jong, ki̶ Lazarus ki̶ ki̶k aki̶ wuri. 24Ngulong ni wuri ɗiyeep ɗoo fi̶ri, wuri sat nee, 'Daa Abraham, a naajeel fi̶na, a lop Lazarus, ku wuri so lop ni̶kongsar fi̶ri mɓut am, ku wuri j`i le ɗi nwan nkaa liis fi̶na, mpeku ni pan zughum ɗi nwan, mpeeɗi wan nkaa shwaajeel mɓut aawus ɗiisi.' 25Amma Abraham lap nwuri nee, 'Làa fi̶na, a pan, kaaɗi jí wugha kuɗi kì̵ seen ndi̶ghi̶n yil ni, ɓe jí wugha ki̶ kat mbii ɗiiret mo, amma jí Lazarus wurii shwaajeel, amma yaksi, Lazarus wuri nkaa ki̶lingshang fi̶ri mpesi, ku wugha shwaajeel ɗi. 26Koo ɗi ba mi̶ni kas, ɓe mee kong ɗiijurung-jurung ɗi mmun nnaar ki̶ wun, mpeku taji nyem ɗi mo riɓet yaghal mpesi canɗel so pe wun ɗi, ɓe ba mon mmak canɗel kas, ki̶ mpeku taji nyem ɗi mo riɓet yaghal pe wun ɗi, mpeku mo canɗel pe mun ɗi, ɓe ba mon mmak canɗel kas zak.' 27Ɗangɓe ngulong ni wuri sat Abraham nee, 'Daa, wan ɗang pu wugha, a lop Lazarus wuri so ntulu kì̵ puun fi̶na. 28Mpeeɗi wan ki̶ ɗyemni̶ghi̶n ɗiimish mo paat, mpeku wuri so satpo Naan ɗi mmo, mpeku taji mo j`i ɗel ndi̶ghi̶n peejeel ɗiisi zak kas!' 29Amma Abraham sat nee, 'Mosis ki̶ nyemsatpo kì̵ Naan mo ɗi ashak kì̵ ɗyemni̶ghi̶n fugha ni mo, ni ret ku mo ki̶ling mo shing!' 30Ngulong ni wuri sat nee, 'Waash, Daa Abraham, ba mon nki̶ling Mosis ki̶ nyemsatpo kì̵ Naan ni mo kas, amma katɗang, a mee gurum yaghal a peemúut, ku wuri so pe mo ɗi, ɓe mon ntuwap!' 31Abraham sat nwuri nee, 'Katɗang ba mo ki̶ling Mosis ki̶ nyemsatpo kì̵ Naan mo kas, ɓe koo ɗi mee gurum yaghal a peemúut, ku wuri so pe mo ɗi, ɓe ba mon ntuwap kas.' "

will be added

X\