Luk 11

1Parmee puus, kaaɗi Jesu nkaa c`in aduwa mmeepee, ɓe aɓwoon ɗi wuri kì̵ kyes c`in aduwa ni, ɓe memee ndi̶ghi̶n jeplop fi̶ri mo, sat nwuri nee, "Daa, a kám c`in aduwa mmun, kaaɗi Joon kám c`in aduwa nyemlop fi̶ri mo si." 2Jesu sat mmo nee. Katɗang wu ɗoghom c`in aduwa, ɓe wu sat nee, "Puun funu, a yit ku mu lesum fugha a ɗiiɓang, ku mulki fugha ni j`i ɗi. 3A cín mmun mbiise ɗi mun nse shidaar-shidaar. 4A fwo shikbish funu mo mmun, kaaɗi mun muu fwo shikbish ɗi gurum mo c`in mmun si zak. Taji a yit ku mu so a peeɗi mon njwaan mun kas." 5Jesu sat njeplop fi̶ri mo zak nee, "A we ndi̶ghi̶n wun, ɗi wuri ki̶ mee shaar, ɗangɓe wuri so pe shaar fi̶ri ni ɗi nnaar par, ɓe wuri sat nshaar ni nee, shaar fi̶na, a hop bred mo nwan kun wa? 6Mpeeɗi mee shaar fi̶na ɗi wuri a ar mwaan wuri j`i pe wan ɗi, ki̶ ba wan ki̶ mee mbiise ɗi wan ncín nwuri se kas. 7Katɗang shaar fugha ni wuri lap nwugha ndi̶ghi̶n-ndi̶ghi̶n nlu fi̶ri nee, 'Taji a daampee nwan kas, ki̶n ten nshaghat polu, ki̶ wan nsaam ashak ki̶ jep fi̶na mo, mpeemi̶ni, ɓe ba wan mmak yaghal kun cín mee mbii ɗi nwugha kas.' 8Wan sat nwun nee, 'koo ɗi ba wurin mmak yaghal a peesaam, mpeku wuri cín mee mbii ɗi nwuri kas, amma mpeeɗi wuri a shaar fi̶ri, ki̶ mpeeɗi wuri naa nɗ`iin ɗang ni pu wuri, ɓe nin nle ku shaar ni yaghal cín nwuri, koo ɗi wurii riɓet mo a kong ye.' 9"Ni aasi zak, wan sat nwun nee, Wu naa ndang mbii, ɓe mon ncín nwun. Wu naa ntang mbii, ɓe wun nkat. Wu naa mɓwappee, ɓe mon nwang polu ni nwun. 10Mpeeɗi koo ngo ɗiiɗang ye ɗi wuri ɗang, ɓe wurin nlap, ki̶ ngo ɗi wuri tang, ɓe wurin nkat, ki̶ ngo ɗi wuri ɓwappee, ɓe mon nwang polu ni nwuri. 11A we ndi̶ghi̶n wun ɗi wuri a puun, ɗi katɗang ɓe làa fi̶ri ɗang pupwap pu wuri, ɓe wurin ncín nwoo nlàa ni ye? 12Koo katɗang làa ni ɗang aaskwee, ɓe wurin ncín a ɗi̶ghi̶r nlàa ni ye? 13Katɗang ɓe wun ɗi wun a ɗiibish mo, wu man cín mbii ɗiiret njep fuu mo, ɗang j`iɗee a puun fuu ɗi wuri aɗeng aa? Wurin ncín Riin fi̶ri Ɗiiɓang mpee nyem ɗi mo ɗang pu wuri." 14Jesu wuri nkaa ceen mee riin ɗiibish, ɗi ngo ni a ti̶ding, ɓe kaaɗi riin ɗiibish ni put. Ɓe gwar ɗi riin ɗiibish ndi̶ghi̶n wuri ni, wuri ɗoghom katpo. Ni aapo nkuur kì̵ gurum ni mo. 15Amma pak gurum mo sat nee, "Jesu wurii ceen riin ɗiibish ni mo pwat a shi iiko mu Beelzebul, mishkagham kì̵ riin ɗiibish mo." 16Pak gurum ni mo c`in tal mpee kyam Jesu zak nee, muu riɓet ku a kám mee mbii aapo, ɗi ni tong aɗeng sham ɗi mmun. 17Amma mpeeɗi Jesu wuri man pan furu mo, ɓe wuri sat mmo nee, "Koo mulki ɗiiɗang ye ɗi ni ɓàk sat vul, ɓe nin nwat. Ki̶ koo a lu ɗiiɗang ye ɗi ni ɓàk vul, ɓe nin nshirip zak. 18Katɗang ɓe Shetan ɓàkshin vul, ɓe cirang ɗang mulki fi̶ri nin nɗar ye? Mpeeɗi wuu sat nee, wan ki̶n ceen riin ɗiibish mo a shi iiko mu Beelzebul. 19Katɗang ɓe wan ki̶n ceen riin ɗiibish mo a shi iiko mu Beelzebul, ɓe nyemso ndang kám fuu moo ceen riin ɗiibish ni mo a shi iiko mu weye? A nyemso ndang kám fuu mo a langting nee, ba po ɗi wuu sat ni azeen kas. 20Amma katɗang wan ki̶n ceen riin ɗiibish ni mo a shi iiko mu Naan, ɓe a mulki kì̵ Naan ni j`i pe wun ɗi nɗiisi. 21"Nguɓal ɗi wuri ki̶ leelek fi̶ri mo a ɗiiɗi̶ɗak, ɓe wurii tap ki̶ lu fi̶ri mmi̶ni, ɓe ba mee wat ntung long fi̶ri mo kas. 22Amma katɗang mee ngo ɗiiɓal met ngulu ni j`i taa nkaa wuri, har wuri se koghorong nkaa ngulu ni, ɓe nguɓal nin nyaa wuri ki̶ leelek ni mo jir, ɗi ngulu ni wurii gangkáa fi̶ri nkaa mo, ɓe wurin nhi̶r long kì̵ ngulu ni mo so ki̶ni. 23Ngo ɗi ba wuri ashak ki̶ wan kas, ɓe wuri a shaarlek fi̶na. Ngo ɗi ba wuri ɓam wan mpee j`i ki̶ gurum mo pe Naan ɗi kas, ɓe a ngo mi̶ni ki̶ waa tiit mo so jong kì̵ Naan." 24"Kaaɗi mee riin ɗiibish ni put mɓut mmee gurum, ɓe ni mwaan so mpee ɗi ba nii am kas, nin nkaa tangpee nookɗi. Kaaɗi ba ni katpee nookɗi ni kas, ɓe ni sat nee, 'Wan mbaaso ntulu fi̶na, peeɗi baaj`i wan put ɗi.' 25Kaaɗi ni baaj`i ɗi ntulu ni, ɓe ni j`i kat lu ni a ɗiifi̶fet, ki̶ mo ki̶ tap ɗak ni le riret zak. 26Ɓe ni waa baaso hi̶r pak riin ɗiibish ɗiici mo ɗiki̶ povul, ɗi mo bish met nni. Mo j`i ɗel tong ndi̶ghi̶n lu ni. Peekyes ki̶ni, ɓe tong kì̵ gwar ɗiisi ni waa bish met nɗin nshee ni." 27Kaaɗi Jesu nkaa sat mbii ɗiisi mo, ɓe mee mat mɓut kuur ni, wura ɗiyeep ɗoo fi̶ra, wura sat nwuri nee, "Mat ɗi wura làa wugha, ki̶ har wura kiyeer wugha j`i wurang, wura kat ɗiiret." 28Amma Jesu lap nee, "A nyem ɗi moo ki̶ling po kì̵ Naan, ɗang mo c`in mbii ɗi po ni mo sat zak, a mo a nyem ɗi mo kat ɗiiret ni." 29Kaaɗi ɗuu kì̵ gurum mo j`i kuur pe Jesu ɗi, ɓe wuri ɗoghom sat nee, "Nyem ɗin ny`iicinsi mo a nyemɗiibish mo. Moo riɓet naa mee mbii aapo mo, amma ba mon ncín mee mbii aapo mmo kas, see a mbii aapo mu Joona si ɗak. 30Mpeeɗi kaaɗi gyet Joona ɗee a langting mpee nyem Ninevi mo, ɓe Làa kì̵ Gurum wurin nɗee a langting mpee nyem ɗin ny`iicinsi mo zak. 31Parpuus tokɗiyeel, ɓe mishkagham ɗiimat nkoghop ngween, wuran nyaghal ɗar nɗiyeel ashak ki̶ nyem ɗin ny`iicinsi mo, ɓe wuran ngan mo nɗiyeel. Mpeeɗi gyet wura put a yil ɗiijong-jong, ku wura j`i ki̶ling kám mu seen kì̵ Solomon ɗi. Amma wu naa, ngo ɗiiɗes met nSolomon wuri ɗi mpesi. 32Parpuus tokɗiyeel, ɓe nyem Ninevi mon nyaghal ɗar nɗiyeel ashak ki̶ nyem ɗin ny`iicinsi mo, ɓe mon ngan mo nɗiyeel. Mpeeɗi gyet mo tuwap kaaɗi mo ki̶ling po Naan nsar kì̵ Joona. Amma wu naa ngo ɗiiɗes met nJoona wuri ɗi mpesi." 33"Ba mee gurum nlewus nfitila, ɗang wuri waa lop ni sham mɓut tughun kas, koo wuri paa ni shi mee ɗaa kas. Amma see wuri le ni a ɗengpee, mpeku nyem ɗi mo ɗel ɗi nlu ni jir, ɓe mo naa peeɓang ni ɗi. 34Yit fugha mo a kaa fitila mu sak fugha si. Katɗang ɓe yit fugha nin nkagham, ɓe sak fugha ni jir, nin ngam ki̶ peeɓang, amma katɗang ba yit fugha nin nkagham kas, ɓe sak fugha ni jir, nin ngam ki̶ peenkoo. 35Mpeemi̶ni ɓe a tap, taji peeɓang ɗi ni ndi̶ghi̶n wugha ni ɗee a peenkoo kas. 36Katɗang ɓe sak fugha ni gam ki̶ peeɓang hakyeng, har ba mee peenkoo ɗee ɗi kas, ɓe nin mɓangpee jir, ntiit ki̶ fitila ɗi nii ɓangpee nwugha riret si." 37Kaaɗi Jesu kyes satpo ni, ɓe mee ngu Farisi ɗang pu wuri, mpeku wuri so se mbiise ashak ki̶ wuri. Ɓe Jesu so ashak ki̶ ngu Farisi ni, har wuri j`i ɗel tong mpee sese ni. 38Ni aapo ngu Farisi ni wuri, mpeeɗi wuri naa ba Jesu shee vwang shin akuɗang wurii se mbiise kas. 39Daa wuri sat ngu Farisi ni nee, "Wun nyem Farisi mo, wuu vwang a ɓwoon kì̵ laaɗaa mo, ki̶ ɗaa mo, amma ndi̶ghi̶n putughup fuu mo, mo gam ki̶ riɓet mbii, ki̶ ɓutbish. 40Wun mwen mo! Ba a Naan wuri le ɓwoon ni, ki̶ ɗi̶ghi̶n ni zak kas aa? 41Gyal wu cín mbii ɗi wun ki̶ni ndi̶ghi̶n laaɗaa fuu ni mon nyemjeel mo, ɗangɓe mbii mo jir, mon nɗee a ɗiiɓang pe wun ɗi. 42"Amma jeel ntaa nkaa wun nyem Farisi mo! Wuu cín mi̶ndong ndi̶ghi̶n kaghapaat mu pumbwan mo, ɗi moo le mbiise shang, kaa lamsi̶r, ki̶ koo kompee ɗiiɗang ye ɗi nii le mbiise shang, amma wu kwar zeen, ki̶ wu kwar wal nNaan. A ɗiisi mo a mbii ɗi ni ret ku wu c`in mo, ki̶ taji wu yit kaghar ni mo nɗin nc`in kas zak. 43"Jeel ntaa nkaa wun nyem Farisi mo, mpeeɗi wuu riɓet ku gurum mo cín peetong ɗiiɗes mo nwun ndi̶ghi̶n lu kì̵ Naan mo, ki̶ mo tok ki̶ wun ndi̶ghi̶n kasuwa mo zak. 44"Jeel ntaa nkaa wun! Mpeeɗi wun a kaa ki̶cir, ɗi ba gurum mo man ne mee ki̶cir ɗi kas, har mo mwaan nkaa ni nɗin mman." 45Ɗangɓe memee mɓut nyemkám Waar kì̵ Mosis mo, wuri sat nJesu nee, "Ngukám, po ɗi aa sat si mo, ɓe wugha aa kàss a mumun mmi̶ni zak." 46Jesu lap nwuri nee, "Jeel ntaa nkaa wun nyemkám Waar kì̵ Mosis mo zak! Mpeeɗi wuu le lee ɗiitoghon ngurum mo, amma ba wun shikáa fuu wu mak kyam tuwaas lee ni mo shi ni̶kongsar fuu mo kas! 47Jeel ntaa nkaa wun! Mpeeɗi wun nkaa ɗik ki̶cir mu nyemsatpo kì̵ Naan mo riret, ɗi gyet puun fuu mo twa mo. 48Ni aasi, wun shikáa fuu, wu ɗee a langting nee, wu lap ii, kì̵ ɗak ɗi gyet puun fuu ni mo c`in ni, mpeeɗi gyet a mo twa nyemsatpo kì̵ Naan mo, ki̶ wuwun nkaa ɗik ki̶cir kì̵ mo ni zak. 49Mpeemi̶ni, ɓe Naan ndi̶ghi̶n seen fi̶ri, wuri sat zak nee, 'Wan lop nyemsatpo fi̶na mo, ki̶ nyemlop mo pe mo ɗi, ɓe mo twa mpak mo, ki̶ mo lejeel pak mo zak.' 50Mon nkar nyem ɗin ny`iicinsi mo mpee toghom kì̵ nyemsatpo fi̶na mo jir, ɗi mo twa mo, pugyet mo shee leyil ɗi. 51Yaghal ntoghom kì̵ Ebel, har so wul ntoghom kì̵ Zakariya, ɗi mo tu wuri nnaar kì̵ pee cín zughum nNaan, ki̶ pee ɗiiɓang. Azeen-nzeen ki̶n sat nwun nee, mon nkar nyem, ɗin ny`iicinsi mo, mpee toghom kì̵ nyemsatpo kì̵ Naan ni mo jir. 52"Jeel ntaa nkaa wun nyemkám Waar kì̵ Mosis mo! Mpeeɗi wu mang mbii wang polu mu man wu sok, ɓe ba wun shikáa fuu wu ɗel ɗi kas, amma nyem ɗi moo riɓet ɗel ɗi, ɓe wu waa wu cíi mmo zak." 53Kaaɗi Jesu yaghal yit peemi̶ni, ɓe nyemkám Waar kì̵ Mosis mo, ki̶ nyem Farisi mo, mo ɗoghom kwar wuri shiɓal hakyeng, ki̶ mo tal mbii mo ɗes pu wuri. 54Mo gung, mpeku mo lecip ɗi nwuri, ku mo kat mee mbii ɗiibish ɗi nin mput mpo fi̶ri, mpeku mo katpee yaa wuri ɗi.

will be added

X\