Joon 3

1Mee ngu Farisi ɗi, ɗi sum fi̶ri a Nikodimus, wuri a memee mɓut nyem ɗiinan-nan mu nyem Yahudi mo. 2Gwar ɗiisi wuri so pe Jesu ɗi mpar, wuri sat nwuri nee, "Ngukám, mu man nee, wugha put a pe Naan ɗi a sham, mpeeɗi ba mee gurum mak c`in mbii lukshik ɗi wugha c`in si mo kas, katɗang ba a Naan ashak ki̶ gwar ni kas." 3Jesu lap nwuri nee, "Azeen-nzeen wan sat nwugha nee, katɗang ba mo shee làa gurum ɗi mpoo kas, ɓe ba wurin mmak ɗel ndi̶ghi̶n mulki kì̵ Naan kas." 4Nikodimus tal pu Jesu nee, "Cirang mon mbaa làa gurum ɗi aɓwoon ɗi wuri ki̶ ɗee a ngunan ye? Wurin mmak baakàa ɗi ndi̶ghi̶n ɓut kì̵ ni̶ghi̶n fi̶ri, ku wura baa làa wuri ɗi zak aa?" 5Jesu lap nwuri nee, "Azeen-nzeen, wan sat nwugha ba mee gurum mmak ɗel ndi̶ghi̶n mulki kì̵ Naan kas. See mo baa làa gurum shi am, ki̶ Riin, akuɗang. 6Mbii ɗi gurum làa, ɓe ni a mu gurum, mbii ɗi Riin làa ɓe ni a mu Riin. 7Taji ni aapo nwugha kas, mpeeɗi wan sat nwugha nee, 'See ting mo baa làa wun ɗi zak aku.' 8Kut nii cut peeso a peeɗi ni riɓet, wugha ki̶ ki̶ling tungpee ni, amma ba a man peeɗi ni put ɗi j`i kas, koo a peeɗi nii riɓet so ɗi kas. Ni aasi zak, ki̶ koo a weye ɗi mo làa wuri ndi̶ghi̶n Riin." 9Ɗangɓe Nikodimus tal pu Jesu nee, "Cirang ɗangɓe mmi̶ni mmak c`in ye?" 10Jesu lap nwuri nee, "Ashee, wugha ɗi wugha a ngukám ɗiiɗes mu nyem Isreil mo, ɓe ba a man mbii ɗiisi kas aa? 11Azeen-nzeen ki̶n sat nwugha nee. Mun muu sat a mbii ɗi mu man, ki̶ muu c`in langting a nkaa mbii ɗi muu naa zak, amma wu kwar cínzeen nlangting funu ni. 12Wan ki̶n sat mbii ɗi mu yil ɗiisi mo nwun, ɓe ba wu cínzeen kas, ɓe cirang ɗang wun ncínzeen, katɗang wan satpo nwun nkaa mbii ɗi mo a mu ɗengnaan ye? 13Ba mee gurum kì̵ kyam kàa a ɗengnaan kas, see a Làa kì̵ Gurum ɗi wuri tong a ɗengnaan sham. 14Kaaɗi gyet Mosis ɗiyeep nw`oo ɗi mo ɗak ni shi boong nkaa shiyeep a naar yil, ɓe ni a ting mon nɗiyeep Làa kì̵ Gurum aasi zak. 15Mpeku koo weye ɗi cínzeen nwuri, ɓe gwar mi̶nin nkat seen ɗiiso ngaa-ngaa." 16"Mpeeɗi Naan wal mun gurum ɗi mun ndi̶ghi̶n yil ni jir, har wuri lop Làa fi̶ri ɗiimi̶ndong sham, mpeku koo weye ɗi cínzeen nwuri, ɓe ba ngo mi̶nin mmuut kas, amma nwurin nkat seen ɗiiso ngaa-ngaa. 17Ba Naan wuri lop Làa fi̶ri sham ndi̶ghi̶n yil ni a mpeku wuri tokɗiyeel ɗin ngurum ɗi mo ndi̶ghi̶n yil ni kas, amma a mpeku mo kat ɓam ɗi mpee wuri. 18Koo weye ɗi wuri cínzeen nLàa kì̵ Naan, ɓe ba mon ncanɗiyeel muut ngo mi̶ni kas. Amma ngo ɗi ba wuri cínzeen kas, ɓe mo kì̵ ten canɗiyeel muut ngo mi̶ni, mpeeɗi ba ngo mi̶ni cínzeen nLàa kì̵ Naan ɗiimi̶ndong kas. 19A ɗiyeel ni nɗiisi, peeɓang ni sham ndi̶ghi̶n yil ni, amma gurum mo wal mpeenkoo met mpeeɓang ni, mpeeɗi ɗak furu mo a ɗiibish. 20Koo weye ɗi wurii c`in ɗak ɗiibish, ɓe wurii kwar a peeɓang ni, ki̶ ba wuri riɓet j`i kus ki̶ peeɓang ni kas, mpeku taji ɗak fi̶ri ɗiibish ni mo ɗee agaak. 21Amma ngo ɗi wurii mwaan ndi̶ghi̶n zeen, ɓe wurii j`i a peeɗi peeɓang ɗi, mpeku gurum mo naa ɗi agaak nee, ɗak ɗi wurii c`in ni mo a shi ɓam kì̵ Naan." 22Aɓwoon ɗiisi, ɓe Jesu ki̶ nyemso ndang wuri mo yaghal so nyil nJudiya. Jesu wuri pan tong ɗi ashak ki̶ mo, ki̶ wuri c`in baptisma. 23Joon wuri c`in baptisma ndi̶ghi̶n Anon kus ki̶ Salim zak, mpeeɗi am ɗiiɗes ɗi mpeemi̶ni. Gurum moo pwat so pe wuri ɗi, mpeku wuri c`in baptisma ɗi mmo. 24(Ntiit ki̶ mi̶ni, ɓe ba mo kì̵ yaa Joon shaghat nlushaghat kas.) 25Ɓeetshik yaghal nnaar ki̶ pak nyemlop kì̵ Joon mo, ki̶ mee ngu Yahudi, nkaa vwang sut mpeku mo ɗee ɗi a ɗiiɓang. 26Mo j`i pe Joon ɗi, mo sat nwuri nee, "Ngukám, gwar ɗi jí wun ashak ki̶ wuri mɓin dung nJodan si, ɗi jí a c`in langting nkaa wuri sí, wuri nkaa c`in baptisma, har koo weye ki̶ so pe wuri ɗi." 27Ɗangɓe Joon lap mmo nee, "Ba mee gurum mak kat mee mbii kas, see Naan cín nwuri. 28Wun shikáa fuu wun a langting fi̶na, kaaɗi wan ki̶n sat nwun si, nee, 'Ba wan a Kristi kas, amma wan a ngulop ɗi mo lop wan j`i a ti̶leng nwuri.' 29Ngu matpoo a wuri a mish mat. Shaar ki̶ mish matpoo ni, wurii ɗar kus, ku wuri ki̶ling mbii ɗi ngu matpoo wuri nsat ɗi. Wurii kat retnyit zam, mpee ki̶ling ɗoo ki̶ mish matpoo ni. Ni aasi zak, retnyit mi̶na nii gam. 30Ni a ting wuri ɗee a ɗiiɗes, ku wan ɗee ɗi a ɗiilee. 31"Gwar ɗi wuri tong aɗeng sham, wuri ɗes met kaghar ni mo jir. Gwar ɗi wuri a mu yil ni, ɓe wuri a mu yil, ki̶ wurii katpo a nkaa mbii mu yil ni mo. Gwar ɗi wuri tong aɗeng sham, wuri ɗes met kaghar ni mo jir. 32Wurii satpo a nkaa mbii ɗi wuri ki̶ naa mo, ki̶ ɗi wuri kì̵ ki̶ling zak, amma ba mee gurum lappo langting fi̶ri ni kas. 33Ngo ɗi lappo fi̶ri, ɓe gwar mi̶ni ki̶ kám agaak nee, Naan wuri a nguzeen, azeen-nzeen. 34Gwar ɗi Naan lop, a wurii satpo ɗi Naan sat mo, mpeeɗi Naan wuri ki̶ gam gwar ni hakyeng shi Riin fi̶ri. 35Puun ni wuri wal nLàa ni zam, har wuri ki̶ le mbii mo jir a nsar ki̶ làa ni. 36Koo a weye ɗi wuri cínzeen nLàa ni, ɓe gwar mi̶ni ki̶ seen ɗiiso ngaa-ngaa. Amma gwar ɗi wuri kwar Làa ni, ɓe ba gwar mi̶ni nkat seen kas, mpeeɗi tughup kì̵ Naan nɗee nkaa gwar mi̶ni har vit."

will be added

X\