Jemis 2

1Ɗyemnaa fi̶na mo, kaaɗi wun a nyemcínzeen ndi̶ghi̶n Daa funu Jesu Kristi si, ɗi wuri a ɗiiɗes met jir, ɓe taji wu shwatyit ngurum mo kas. 2Katɗang mee ngo j`i ɗel ndi̶ghi̶n kuur fuu ki̶ kawan mu zinariya nkaa ni̶kongsar fi̶ri, ki̶ nli̶r ɗiiret mo, ɗang kat mee ngujeel j`i ɗel ndi̶ghi̶n kuur fuu, ki̶ goklee. 3Katɗang wu tap wu kaat gwar ɗi wuri loplee ɗiiret sí, ki̶ wu sat nwuri nee, a j`i a tong a peetong ɗiiret si, amma wu sat ngujeel ni nee, wugha ɗar si, koo wu sat nwuri nee, a tong nyil mpesi nder shii fi̶na. 4Katɗang wuu c`in mbii kaa mi̶ni si, ɓe wu c`in a shikbish. Wuu shwatyit ngurum mo nnaar fuu, ɓe wu ɗee a nyemtokɗiyeel mo, shi pan ɗiibish mo. 5Ɗyemnaa mo, ɗi wan wal nwun, wu lekom, Naan wurii bi̶lip a nyemjeel mo ndi̶ghi̶n yil ɗiisi, mpeku mo cínzeen ɗi nDaa Jesu Kristi, ki̶ mpeku mo kat mulki ɗi gyet Naan wuri kì̵ ten sat ne, wuɗin ncín nyem ɗi mo wal nwuɗi mo. 6Amma wun, wu kàss nyemjeel ni mo. A nyemlong moo seen a wun, har mo dul wun so ki̶ ni nluɗiyeel. 7Ki̶, a nyemlong ni moo satpo ɗiibish nkaa sum ɗiiret, ɗi Naan wurii le ku mo pet wun ɗishik, kaa nyem fi̶ri mo si zak. 8Katɗang wu fes wu gam waar, ɗi ni put a pe Naan ɗi azeen-nzeen, ɗi mo kì̵ ten ran ni ndi̶ghi̶n takarda kì̵ Naan nee: "A wal ngi̶nang fugha kaa sak fugha si." Ɓe wu c`in a mbii ɗiiret hakyeng. 9Amma katɗang wuu cín ɗiiɗes ngurum mo, a shi shwatyit, ɓe mon nkat wun a ɗiibish, mpeeɗi wu tep waar kì̵ Naan. 10Koo ɗi gurum gam waar kì̵ Naan ni mo jir, amma wuri taa kat ndi̶ghi̶n memee mi̶ndong ɓejee ɗak, ɓe wuri kì̵ ɗee a ɗiipi̶pal nyit kì̵ Naan mɓut kaghar waar ni mo jir. 11Ngo ɗi wuri sat nee: "Taji wu c`in ngaa kas, ki̶ 'taji wu tukáa kas.' " Amma katɗang mee ngo tukáa, ɓe gwar mi̶ni kì̵ tep waar kì̵ Naan ni mi̶ni, koo ɗi ba wuri c`in ngaa kas, ɓe ni ɗee nee, gwar mi̶ni taa pal ndi̶ghi̶n mbii ɗi Naan kì̵ ten sat ne taji wu c`in kas. 12Mpeemi̶ni, ɓe wan ki̶n sat nwun nee, ndi̶ghi̶n mbii mo jir, ɗi wuu sat, ki̶ ɗi wuu c`in, ɓe taji wu mander nee, a Naan wurin ntokɗiyeel mmun shi waar fi̶ri, ɗi ni cínpee mmun, ku mu ɗee ɗi a mukáa funu mo. 13Katɗang mee gurum kwar naajeel kì̵ niyee mo, ɓe Naan wurin nkwar naajeel ki̶ gwar mi̶ni, parɗi Naan wurin ntokɗiyeel ngwar mi̶ni zak. Amma naajeel kì̵ Naan ni se koghorong nkaa ɗiyeel. 14Ɗyemnaa mo, katɗang mee gurum sat nee, wuɗi cínzeen nNaan, amma, ba wurii c`in ɗak ɗi Naan sat ne mu c`in mo kas, ɓe ba cínzeen mi̶ni ki̶ mee koghop ni kas. Cirang ɗangɓe cínzeen mi̶nin mɓam wuri ye? 15Katɗang ɓe, mee ɗyemni̶ghi̶n ɗiimish koo ɗiimat, ba mo ki̶ leelop, koo mbiise kas. 16Ɗangɓe wu sat nwuri nee, "A so riyang, Naan le ku a kat mbiise ki̶ leelop mo zak." Amma ba wu cín leelop, koo mbiise nwuri kas, ɓe koghop mi̶ni a meye? 17Ni aasi zak, ki̶ cínzeen ɗi ba ni ashak ki̶ ɗak kas, ɓe ni a ɗiimumuut. 18Amma mee gurum mmak sat nee, "Mee ngo ki̶ cínzeen, ki̶ memee ki̶ c`in ɗak ɗiiret mo," wan nlap ngo mi̶ni a nee, "A kám cínzeen kì̵ mee gurum nwan, ɗi ba ni ashak ki̶ ɗak kas ɗe! Ɓe wan nkám cínzeen fi̶na nwugha, shi ɗak fi̶na mo." 19Wugha cínzeen nee, Naan ɗi azeen, wuri a mi̶ndong, kaaɗi a sat aasi, ɓe ni ret. Amma koo a riin ɗiibish mo, ɓe mo cínzeen nee, Naan wuri a mi̶ndong, har ki̶i̶rmuut ki̶ yaa mo, ki̶ moo ɗaar zak. 20Wugha mwen, ba a man nee, katɗang gurum cínzeen nNaan, ɗangɓe ba gwar mi̶ni ki̶ c`in ɗak ɗiiret kas, ɓe cínzeen fi̶ri ni ɗee a buu mmi̶ni kas aa? 21A pan puun funu Abraham, gyet a me le ɗangɓe Naan naa Abraham kaa ngo ɗin ndi̶re si ye? A mpee ɗi gyet wuri mang làa fi̶ri Aizik, mpeku wuri cín mbiizughum ɗi nNaan, kaaɗi gyet Naan kì̵ ten sat ne wuri c`in si. 22Ni agaak nee, gyet ndi̶ghi̶n tong kì̵ Abraham, ɓe cínzeen, ki̶ c`in mbii ɗiiret mo, moo so a ndangshak. Mbii ɗi gyet wuri c`in ni, ni gam cínzeen fi̶ri. 23Ni gam mbii ɗi gyet mo kì̵ ten ran ni ndi̶ghi̶n takarda kì̵ Naan si nee: "Abraham wuri cínzeen nNaan, mpeemi̶ni ɓe Abraham wuri ɗee a ngo ɗin ndi̶re nyit kì̵ Naan." Har gyet gurum moo pet wuri a shaar kì̵ Naan. 24Yaksi ɓe wugha naa agaak nee, a ndi̶ghi̶n ɗak ɗiiret ɗi gurum ki̶ c`in, ɗangɓe gurum ki̶ mak ɗee a ɗiiret nyit kì̵ Naan, ba a cínzeen nNaan ɓejee ɗak kas. 25Ni aasi zak Rahab, mat ngaa si, gyet wura lap nyemcoghol mo, ki̶ zak, gyet wura tap sel mo a mee ar ɗiiɗik. Ba gyet a mpee ɗak ɗiiret ɗiisi, ɗangɓe wura ɗee a ɗiiret nyit kì̵ Naan kas aa? 26Ni aasi zak, kat ba riin kuɗi ndi̶ghi̶n gurum kas, ɓe ngo mi̶ni ɗee a kúm ni. Aasi, cínzeen nɗin nc`in ɗak ɗiiret mo, ɓe ni a ɗiimumuut zak.

will be added

X\