Jemis 1

1Wasika ɗiisi ni put a nsar kì̵ Jemis ki̶rom mu Naan kì̵ Daa Jesu Kristi, tokshik mpee nyem kì̵ Naan, ɗi mo a titiit koo a neye ndi̶ghi̶n yil ɗiisi. 2Ɗyemnaa mo, wu c`in retnyit, katɗang wu ɗel ndi̶ghi̶n jwaan mo shini-shini. 3Mpeeɗi wu man nee, katɗang mo kyam cínzeen fuu ni, ɓe nin nle ku gung fuu ni ɗee a ɗiiɓal. 4Wu yit ku gung fuu ni sat a nwurang ɗak, mpeku wu ɗee ɗi a ɗiigi̶gam ndi̶ghi̶n mbii mo jir. 5Katɗang mee ngo ndi̶ghi̶n wun ɗi ba wuri ki̶ seen kas, ɓe wu yit ku gwar mi̶ni ɗang pu Naan, mpeku Naan cín seen ɗi nwuri. Naan wurii zughum zam, wuri naa ncín mbii ngurum mo jir, ba wurii kyakpo mpee cín mbii ngurum mo kas. Naan wurin ncín seen nkoo weye ɗi mo ɗang pu wuri. 6Katɗang mee ngo ɗang mee mbii pe Naan ɗi, ɓe ni a ting gwar ni cínzeen nee, Naan wurin ncín mbii ni nwuri. Taji gwar mi̶ni pan kyetwa ndi̶ghi̶n putughup fi̶ri kas. Mpeeɗi gwar ɗi wurii pan kyetwa ndi̶ghi̶n putughup fi̶ri, ɓe wuri ɗee a kaa am ɗi kut ki̶ cut ni so ki̶ ni, koo a pee ɗiiɗang ye si. 7Mpeemi̶ni, ɓe taji gwar mi̶ni lepan ne, wuɗin nkat mee mbii pu Daa ɗi kas. 8Gwar mi̶ni a ngupan mo vul-vul, ki̶ ba wurii ɗar a pee mi̶ndong kas, koo diɓen. 9Nguso ndang Jesu Kristi, ɗi ba wuri ki̶ long kas, ɓe wuri c`in retnyit, mpeeɗi Naan kì̵ ten cín ɗiiɗes nwuri. 10Nguso ndang Jesu Kristi, ɗi wuri ki̶ long, ɓe ni ret ku wuri c`in retnyit zak, mpeeɗi Naan ki̶ le ku wuri sham ki̶ káa fi̶ri. Mpeeɗi ngo mi̶ni man nee, jir ki̶ long fi̶ri ni, ɓe wurin nɗel so ki̶lak-ki̶lak, a kaa pel mu ɗem ɗi nii ki̶lak ki̶ fii si. 11Puus ni kàa yaapee nkaa pel mo, ɓe ni le ku mo fii. Pel ni mo ɗyong, ɓe men furu ni kyes mmi̶ni vit. Ni aasi zak, ɓe ngulong wurii muut kaaɗi wuri nkaa tang long ni ɗiki̶. 12Ngo ɗi wuri gung jwaan mo, ɓe wurin nkat ɗiiret. Mpeeɗi katɗang wuri se koghorong nkaa jwaan ni mo jir, ɓe Naan ncín seen nwuri, ɗi nin nɗee a koppee kì̵ kwat ni, kaaɗi Naan wuri kì̵ ten sat nee, wuɗin ncín ngurum mo jir, ɗi mo wal nwuɗi. 13Katɗang jwaan kat mee gurum, ɓe taji ngo mi̶ni sat nee, a Naan jwaan wuɗi kas. Ba mee mbii ɗi nin mmak jwaan Naan, mpeku wuri c`in mbii ɗiibish ɗi kas. Naan shikáa fi̶ri, ba wurii kyam jwaan mee gurum, mpeku gwar mi̶ni c`in mbii ɗiibish ɗi kas. 14A kyaghar ɗiibish ɗi ni ndi̶ghi̶n putughup kì̵ gurum, a nii jwaan gurum, mpeku wuri c`in mbii ɗiibish mo ɗi. 15Kyaghar ɗiibish ɗiisi ni, a nii le ku gurum c`in mbii ɗiibish mo. Katɗang mbii ɗiibish ni wurang, ɓe peekyes kì̵ ni a muut. 16Ɗyemnaa fi̶na mo, taji wu le ku mee gurum num wun kas. 17Mbii ɗiiret mo, ki̶ ɗi azeen mo jir, moo tong a pe Naan j`i. Mbii ɗiisi mo jir, a zughum ɗi moo pwat a pe Naan ɗi, ɗi wuri lepuus, ki̶ zar mo, ki̶ tar ndi̶ghi̶n ɗengnaan. Naan wuri shikáa fi̶ri, ba wurii kyam sheeɗi kas, ku ni le ku mu ɗee ɗi nkoo kas. 18A mɓut pan mu káa fi̶ri, ɗang wuri naa ni ret wurin nyit, ndi̶ghi̶n po fi̶ri ɗi ni azeen, ɓe wuri cín seen mmun, mpeku mu ɗee ɗi a jep ɗin nshee mo ndi̶ghi̶n mbii ɗi wuri kì̵ ten le mo ndi̶ghi̶n yil ɗiisi. 19Ɗyemnaa mo, ɗi wan wal nwun. Ni ret ku wu man mbii ɗiisi mo, koo a weye, ɓe wuri lekom mpee ki̶lingpee ki̶lak-ki̶lak, amma ni ret ku koo a weye, ɓe taji wuri lappo ki̶lak-ki̶lak kas. Taji mee mbii ki̶lak láa nwun mɓut kas. 20Ngo ɗi wuri ki̶lak ki̶ langtughup, ɓe ba gwar mi̶ni mak c`in mbii ɗi mo ret nNaan nyit kas. 21Mpeemi̶ni wan ki̶n sat nwun nee, wu baa ki̶ mbii ɗiibish mo jir ndi̶ghi̶n tong fuu mo. Wu fwo mo sí. Wu kwar mbii ɗiibish mo jir, wu sham ki̶ káa fuu mo ntoghom kì̵ Naan. Wu ki̶lingpo ɗi Naan wuri kì̵ ten kop ni ndi̶ghi̶n putughup fuu mo, mpeeɗi a ndi̶ghi̶n ɓal kì̵ po fi̶ri, ɗangɓe wurin mɓam seen fuu mo. 22Amma ni a ting wu c`in mbii ɗi po kì̵ Naan ni sat ne wu c`in ni, ba nee, wu ki̶ling a shi kom ɓejee ɗak kas. Nyem ɗi mo ki̶lingpo kì̵ Naan, ɗangɓe ba mo c`in mbii ɗi po ni sat ne mo c`in kas, ɓe nyem mi̶ni moo num a káa furu ɓejee. 23Katɗang gurum ki̶ ki̶ling a po ni ɓejee, ɗangɓe ba gwar ni c`in mbii ɗi po ni sat kas, ɓe ni ɗee a kaa gwar ɗi wuri naa shin fi̶ri ndi̶ghi̶n mbii naayit si. 24Ɗi aɓwoon ɗi wuri kì̵ ten naa shin ndi̶ghi̶n mbii naayit ni, ɓe kaaɗi wuri cighi̶r ki̶ ɓwoon mbii naayit ni, ɓe wuri cighi̶r mander nyit fi̶ri ɗi wuri kì̵ naa ni. 25Amma gwar ɗi wuri tap bi̶lip waar kì̵ Naan, ɗangɓe wuri c`in mbii ɗi waar ni mo sat, ba wuri ki̶ki̶ling ɓejee kas, ɗi nin nle ku wuri mander mbii ni mo kas, amma wuri tap c`in mbii ɗi waar ni sat, ɓe Naan wurin nle ɗiiret nkaa gwar mi̶ni hakyeng. Mpeeɗi waar kì̵ Naan mo a ɗin ndi̶re-ndi̶re, mo ɓál mpee cínpee mmun, mpeku mu ɗee ɗi a mukáa funu. 26Katɗang mee gurum leshin a kaa nguso ndang Naan si, ɗangɓe ba gwar mi̶ni tap ki̶ liis fi̶ri kas, ɓe gwar mi̶ni num a káa fi̶ri ɓejee. Mwaan fi̶ri ɗi ni a mu nyemso ndang Naan mo, ni ɗee a buu. 27Nyit kì̵ Naan ɗi wuri a puun funu jir, ɓe mwaan ɗi mi̶ni a mu nyemso ndang Naan ɗi ni azeen-nzeen, ɓe a gwar ɗi wurii tap ki̶ lukáa mo, ki̶ matkáa mo, ɗi mo nkaa shwaajeel, ki̶ zak, gwar mi̶ni tap ki̶ káa fi̶ri, mpeku taji mbii ɗiibish mu yil ɗiisi mo num wuri, ku mo le ku wuri c`in shikbish kas.

will be added

X\