Hiburu 4

1Mpeemi̶ni, kaaɗi po ɗi Naan wuri kì̵ ten tuwoor ni, mpee ɗel ndi̶ghi̶n pee nookɗi, ni ɗi a wuwang mpee mun, ɓe mu tap, ki̶ mu ki̶i̶r, mpeku taji memee fuu taakat mpee ɗel ndi̶ghi̶n pee nookɗi kì̵ Naan ni kas. 2Mpeeɗi mun kì̵ ki̶lingpo ɗiiret ni, kaaɗi gyet mo ki̶ling si. Amma po ɗi gyet mo ki̶ling ni, ba gyet ni ki̶ mee koghop ni pe mo ɗi kas, mpeeɗi nyem ɗi gyet mo ki̶lingpo ni, ɓe ba mo lap ni shi cínzeen kas. 3Amma mun nyem ɗi mu cínzeen ɓe mu ɗel ndi̶ghi̶n pee Nookɗi mu Naan ni, kaaɗi Naan wuri kì̵ ten sat si nee: "Wan tuwoorpo ni a mpee wat putughup nee. Ba mon nkyam ɗel ndi̶ghi̶n pee nookɗi fi̶na kas." Jir ki̶si, ɓe ɗak fi̶ri ni a ɗiiki̶kyes pugyet ɗi nshee le yil ni. 4Mee peeɗi ndi̶ghi̶n takarda kì̵ Naan, ɓe wuri satpo nkaa puus ɗiipovul ni nee: "Naan wuri nook ɗak fi̶ri mo jir parpuus ɗiipovul ni." 5Ki̶ mo sat ndi̶ghi̶n pee ɗiici ni zak nee: "Ba mon nkyam ɗel ndi̶ghi̶n pee nookɗi fi̶na kas." 6Ɗiisi ni kám nee, har yaksi, ɓe peeɗi, mpeku pak mo kat ɗel ɗi. Nyem ɗi gyet mo shee ki̶lingpo ɗiiret ni, ɓe ba gyet mo mak ɗel kas, mpeeɗi ba gyet mo cínzeen kas. 7Mpeemi̶ni, ɓe Naan wuri kì̵ le mee puus ni ɗi, ɗi wuri pet ni a cicinsi. Aɓwoon kì̵ ɓit mo ɗes, ɓe wuri katpo shi Devid, kaaɗi gyet mo sat si nee: "Katɗang wu ki̶ling ɗoo kì̵ Naan cicinsi, ɓe taji wu shaghat putughup fuu mo kas." 8Mpeeɗi katɗang gyet Joshuwa wuri kì̵ cín nookɗi mmo, ɓe ba ɗi Naan wurin nwaa ba sat mee po ɗi nkaa mee puus kas. 9Amma, har yaksi, ɓe mee nookɗi mu puus ɗiipovul ni ɗi mpee nyem kì̵ Naan mo. 10Mpeeɗi koo a weye ɗi wuri ɗel ndi̶ghi̶n pee nookɗi kì̵ Naan, ɓe wuri nookɗi ki̶ ɗak fi̶ri mo jir, kaaɗi gyet Naan wuri nookɗi ki̶ ɗak fi̶ri mo si. 11Wu yit ku mu gung hakyeng, mpeku mu ɗel ɗi ndi̶ghi̶n pee nookɗi kì̵ Naan. Taji memee funu kwar c`in mbii ɗi Naan sat kas, mpeku taji mu táa mu kat mpee ɗel ndi̶ghi̶n pee nookɗi kì̵ Naan, kaaɗi gyet mo taakat mpee ɗel ɗi si. 12Po kì̵ Naan ni ki̶ seen, ki̶ nii c`in ɗak ɓal-ɓal. Ni se met nkwai ɗi nii see koghop vul. Ni mak canpee ɗi seen ki̶ riin moo kaat ɗi, ki̶ ni mak canpee ɗi kwak mo kaat ɗi ki̶ nv`el. Ki̶ nii tokɗiyeel mpan ki̶ kyaghar mu putughup mu gurum mo. 13Ba mee mbii mo ɗi a si̶sok nyit kì̵ Naan, ndi̶ghi̶n mbii ɗi wuri kì̵ ten le mo kas. Mbii mo jir, ɗi Naan kì̵ le mo, mo a ɗiiwuwang agaak nyit fi̶ri. A wuri a ngo ɗi parmeeci ɓe mun nɗar ntoghom fi̶ri, mpeku mu yakshii kì̵ mbii ɗi muu ten mu c`in mo ɗi. 14Kaaɗi mun ki̶ Pris ɗiiɗes met jir, ɗi wuri kì̵ kàa ndi̶ghi̶n ɗengnaan mo, wuri a Jesu Làa kì̵ Naan. Ɓe wu yit ku mu yaa ɓal-ɓal cínzeen ɗi muu c`in langting ni. 15Pris funu ɗiiɗes met, wuri ki̶ mak shwaajeel ashak ki̶ ɓwaar funu mo. Ba wuri a ngo ɗi wuri kwar naajeel funu kas. Amma wuri a ngo ɗi gyet mo kyam wuri koo a ndi̶ghi̶n ar ɗiiɗang ye kaa mun si. Amma jir ki̶si, ɓe ba gyet wuri c`in shikbish kas. 16Wu yit ku mu j`i kus ki̶ peetong mu mulki kì̵ Naan, ba ashak ki̶ ki̶i̶rmuut kas, mpeku mu kat yit naajeel kì̵ Naan ki̶ ɗiiret fi̶ri, mpeku mo ɓam mun ɗi katɗang mun ndi̶ghi̶n jeel.

will be added

X\