Hiburu 12

1Mpeemi̶ni ɓe, kaaɗi mun ɗi ki̶ nyemlangting mo ɗuu-ɗuu duɓu ɗes si, ɓe wu yit ku mu fwo mbii ɗi mo toghon mmun, ki̶ shikbish ɗi mo las nkaa mun. Wu yit ku mu su shi gung, sushii ɗi ni ɗi a kiyeen funu. 2Wu yit ku mu leyit funu mo a nkaa Jesu, ɗi wuri a nguti̶leng ɗin nshee ki̶ ngugam mu kyes mu cínzeen funu ni. Gyet a mpee retnyit ɗi mo le nwuri, ɓe wuri gung, har wuri le ku mo pwas wuri nkaa shiyeep. Ba gyet wuri le yitluwaan mu muut nkaa shiyeepyoghom ni a mee mbii kas. Yaksi ɓe wuri a ti̶tong nsarse kì̵ mbiitong mu mulki kì̵ Naan. 3Wu c`in pan nkaa wuri, ɗi gyet wuri gung ki̶ nyemshikbish ɗi mo kwar wuri si mo. Mpeemi̶ni ɓe, taji kwak fuu mo murap kas, ki̶ taji wu pwat ki̶ putughup fuu mo kas. 4Mpeeɗi kaghan ɗi wun nkaa c`in ni ki̶ shikbish, ɓe ba ni ki̶ wul mpee ɗi har mo ɓeer toghom fuu mo ɗi kas. 5Kyet wun kì̵ mander po ɗii mu caapee, ɗi Naan wuri sat nee, a wun a jep fi̶ri ɗiimish mo si wa? "Làa fi̶na, taji a c`in tan kì̵ kar mu Daa kas, ki̶ katɗang wuri gwak wugha, ɓe taji a put ki̶ putughup kas. 6Mpeeɗi Daa wurii kar a nyem ɗi wuri wal mmo. Kì̵ wurii cín kar a nyem ɗi wurii lap mo, kaa jep fi̶ri ɗiimish mo si." 7Wu gung ndi̶ghi̶n jeel ɗi wuu shwaa ni, kaa kar si, mpeeɗi Naan wurii cín kar wun a kaa jep fi̶ri ɗiimish mo si. Kyet wu kat mee làa ɗi, ɗi ba puun fi̶ri ki̶ kar nwuri kas wa? 8Katɗang ba wuri kar wun kas, (ɓe ba wun a jep fi̶ri mo azeen-nzeen kas,) ɓe wun a jep aaknuk mo mmi̶ni. 9Azeen jí mun jir, ɓe mun ki̶ puun ɗi mu nan mo, ɗi jí moo kar mun, ɓe jí muu cín ɗiiɗes mmo zak. Katɗang ni aasi, ɓe ting mu cínkáa funu mon mpuun ɗi wuri a mu riin, mpeku mu kat seen ɗi. 10Puun funu ɗi mu nan mo, moo kar mun a mpee rep pee lee ɓejee ɗak, shi pan ɗi mo naa ni ret mmo nyit. Amma Naan wurii cín kar mmun, a mpeku mu ɗee ɗi a nyem ɗiiret mo, mpeku mu katpak ɗiiret fi̶ri mo ɗi. 11Katɗang mon nkaa kar mee gurum, ɓe ba ni a mbii retnyit kas, ni shwal zam, amma mɓwoon ɗi kar ni ɗel, ɓe gwar ɗi wuri kì̵ ten lap kar ni, nii j`i ki̶ tongriyang wuri ndi̶ghi̶n putughup fi̶ri, ki̶ nii le ku ngo mi̶ni c`in ɗak ɗin ndi̶re mo ndi̶ghi̶n tong fi̶ri zak. 12Mpeemi̶ni ɓe, wu ɗiyeep sar fuu ɗi mo waam ni mo, ki̶ wu ɗiyeep kufurum fuu ɗi mo murap ni mo. 13Wu ɗak ar nin ndi̶re mpee shii fuu mo, mpeku taji nyem ɗi moo daghar mo si̶ghi̶t ɗee a kundung mo kas, amma mo kat bar zak. 14Wu tongriyang ashak ki̶ gurum mo jir, ki̶ wu gung, ku tong fuu ni ɗee ɗi a ɗiiɓang, mpeeɗi katɗang ba gurum a ɗiiɓang kas, ɓe ba wurin mmak naa Daa kas. 15Wu tap, taji mee ngo cighi̶r ki̶ ki̶ɓwoon nɗiiret kì̵ Naan kas, ki̶ taji memee fuu ɗee a kaa seenting ɗiiɗeet si, ɗi nii j`i ki̶ ciin tongriyang niyee mo, ki̶ nii wat mo si kas zak. 16Taji memee fuu ɗee a ngungaa koo ngukwar ki̶i̶r Naan kaa gyet Iso si kas. Gyet a mpee mbiise, yit mi̶ndong ɓejee, ɓe wuri mang ɗiiɗes mu pee shee làa fi̶ri kaa làa ɗin nshee si seet. 17Amma aɓwoon mi̶ni, kaaɗi wu man si. Gyet kaaɗi wurii riɓet lap ɗiiret mu puun fi̶ri, ɓe puun ni kwar, mpeeɗi ba gyet wuri man mee ar ɗi wurin ncighi̶r ki̶ mbii ɗi wuri kì̵ ten sat ni kas. Koo ɗi gyet wuri tang ɗiiret ni shi yitmwaan, ɓe ba gyet wuri kat kas. 18To, ba wuu j`i wu wul a pe jwak ɗi wu mak tung ni kas, nii lap wus, ki̶ nii rap shek-shek, ki̶ nii ngummbit zak. 19Ni ki̶ wal mu feer, ki̶ mee ɗoo si ɗi, ɗi nyemki̶ling ɗoo ni mo ɗang nee, taji wuɗun waa baa ki̶ling ɗoo ni ɗi zak kas. 20Mpeeɗi ba mo mak gung mbii ɗi ɗoo ni sat kas. Ɗoo ni sat nee: "Katɗang koo a mee long tung jwak ni, ɓe mon ncar ni shi ndi̶ng ku ni muut ɗi." 21Gyet mbii ɗiisi ni a mbii ki̶i̶rmuut hakyeng, har gyet Mosis sat nee: "Wan ki̶n ɗaar ki̶ ki̶i̶rmuut." 22Amma wun kì̵ j`i wul a jwak nZayon, Jerusalem ɗi ni a mu ɗengnaan, yil kì̵ Naan ɗi wurin mmeen, peeɗi kuur kì̵ nyemlop kì̵ Naan mo ɗi duɓu-duɓu ɗes, mon nkaa c`in retnyit. 23Wu wul a peekuur ɗin nshee mu retnyit mu nyem kì̵ Naan mo. Jep kì̵ Naan ɗin nshee mo mni̶ni, ɗi sum furu mo a riran ndi̶ghi̶n ɗengnaan. Wu wul a pee Naan, ɗi wuri a ngutokɗiyeel ngurum mo jir, ki̶ peeɗi riin kì̵ nyem ɗin ndi̶re moo ɗee ɗi a ɗin ndi̶re-ndi̶re zak. 24Wu wul a pee Jesu ɗi mmi̶ni, nguar mu ɓi̶lemcuk shi toghom ɗiipoo, a peeɗi mo wat toghom ɗi nii satpo ɗiiret met ntoghom kì̵ Ebel si. 25Wu tap taji wu kwar ki̶ling gwar ɗi wurii katpo ni kas. Katɗang ba gyet mo kat bar kas, ɓe a mpeeɗi gyet mo kwar ki̶ling gwakshik ɗi wuri c`in mmo ndi̶ghi̶n yil ɗiisi. Cirang ɗang mumun nkat bar ye? Katɗang mu cighi̶r kì̵ ki̶ɓwoon ngwar ɗi wuri ki̶ gwak mun a ndi̶ghi̶n ɗengnaan ye? 26Gyet ɗoo fi̶ri ni yoghon yil ni, amma yaksi ɓe wuri kì̵ tuwoorpo nee, 27"Ba wan nyoghon a yil ni yit mi̶ndong ɓejee kas, amma wan nyoghon har ki̶ ɗengnaan ɗiki̶ zak." Shii kì̵ po ɗi yit mi̶ndong si, ni kám agaak nee, mbii ɗi Naan wuri kì̵ le mo, ɓe mon nyoghon mo, ki̶ hi̶r mo baa ki̶ mo aku. Mpeeɗi mbii ɗi mo mak nyoghon ni, ɓe ba nin ntong ɗi vit kas. 28Mpeemi̶ni, kaaɗi muu lap a mulki ɗi ba ni mak nyoghon kas si, ɓe wu yit ku mu pi̶lang Naan, ki̶ mu seyil nwuri ndi̶ghi̶n ar ɗi ni shang nwuri nyit, shi cín ɗiiɗes nwuri, ki̶ ki̶i̶r wuri zak. 29Mpeeɗi, azeen-nzeen, Naan funu wuri a kaa wus ɗi nii lappee si.

will be added

X\