Hiburu 11

1Shii kì̵ cínzeen, a ni nɗiisi. Katɗang mu cínzeen mmee mbii, ɓe mu man nee, mun nkat mbii ɗi mu canciin nkaa ni, koo ɗi ba mu mak naa ni shi yit funu yaksi kas. Ni ɗee a gam kì̵ mbii ɗi ba mu naa mo kas. 2A mpee cínzeen kì̵ nyem ɗi gyet yam mo, ɓe mo kat langting ɗiiret pe Naan ɗi. 3A mpee cínzeen, ɓe mu man nee, gyet Naan wuri leyil ni a shi satpo, mpeeɗi mbii ɗi muu naa mo yaksi, ɓe gyet mo ɗak mo a mɓut mbii ɗi ba mu mak naa mo kas. 4A mpee cínzeen, ɓe gyet Ebel cín mbiizughum ɗiiret nNaan met mu Kein. A mpee cínzeen, ɓe Naan satpo ɗiiret nkaa Ebel kaa ngo ɗin ndi̶re si, mpee mbiizughum fi̶ri, ki̶ mpee cínzeen kì̵ Ebel, ɓe wurii katpo ɗi har cicinsi, koo ɗi pugyet wuri kì̵ muut ɗi. 5A mpee cínzeen, ɓe ba gyet Enok kyam muut kas, amma gyet Naan mang wuri kàa ki̶ wuri aɗeng, peeɗi ba gurum mo baa naa wuri ɗi kas. Akuɗang Naan kì̵ mang wuri kàa ki̶ wuri aɗeng, ɓe gyet mo kì̵ ten satpo ɗiiret nkaa wuri nee, wugwar kì̵ ten c`in mbii ɗi mo shang nNaan nyit zam. 6Katɗang ba a shi cínzeen kas, ɓe ba mee gurum mak c`in mbii ɗiiret nyit ki̶ Naan kas. Koo a weye ɗi wuri j`i kus kì̵ Naan, ɓe ni a ting, ngo mi̶ni cínzeen ne, Naan wuri ɗi, ki̶ zak wuri cínzeen nee, Naan wurii kwat nyem ɗi moo tang wuri mo. 7A mpee cínzeen, ɓe gyet Nowa ki̶ling gwakshik kì̵ Naan, nkaa mbii ɗi ba gyet wuri kì̵ ten naa mo kas. Amma gyet ndi̶ghi̶n ki̶i̶r ɗiiɓang, ɓe gyet wuri ɗik jirgi am ɗiiɗes mpee ɓamkáa fi̶ri ki̶ nyemtulu fi̶ri mo. Mpee cínzeen ɓe gyet cínzeen fi̶ri ni kám shikbish kì̵ yil ni nwura, ki̶ gyet wuri kat ɗiiret pe Naan, ɗi a mpee cínzeen fi̶ri. 8A mpee cínzeen, ɓe gyet, kaaɗi Naan pet Abraham, mpeku wuri so ɗi mmee yil ɗi Naan kì̵ ten tuwoorpo nee, nin nɗee a mu Abraham. Ɓe gyet Abraham yaghal yit yil fi̶ri, ku wuri so ɗi mpee ɗi ba gyet wuri kì̵ manpee ɗi wuri ki̶ so ni ɗi kas. 9A mpee cínzeen, ɓe wuri tong ɗi ndi̶ghi̶n yil ni, kaa mee mi̶zep si. Gyet wuri tong ndi̶ghi̶n tent mo, ki̶ Aizik ki̶ Jekop, mo a nyemsekop ɗiimi̶ndong mu po ɗi Naan kì̵ ten tuwoor nin Abraham. 10Gyet Abraham wuri kì̵ leyit a nkaa mee birni ɗi nii kuk ɗii ɓal-ɓal mo, ɗi nguɗik ni a Naan shikáa fi̶ri. 11A mpee cínzeen, ɓe gyet Seera wura kat aak, koo ɗi gyet ɓit làa-làa fi̶ra ni kì̵ ten ɗel. Mpeeɗi gyet wura cínzeen nee, Naan wurin ngam po ɗi wuri kì̵ ten tuwoor nin Abraham. 12A ndi̶ghi̶n gwar ɗiisi mi̶ndong, ɗi gyet wuri ɗee a kaa ɗii mumuut si, ɓe mo làa dang mo ɗes kaa ɗuu kì̵ zar mo ndi̶ghi̶n ɗengnaan si, ki̶ kaa ɗuu kì̵ ɗiyees mpo bahar si. 13Nyem ɗiisi mo jir, ɓe mo murap a ndi̶ghi̶n cínzeen. Ba gyet mo kat mbii ɗi Naan kì̵ ten tuwoorpo nee, wuɗin ncín ni mmo kas. Amma mo naa, jong-jong, ki̶ har mu sat mwaanlee mmo jong-jong zak. Gyet mo man nee, wuɗun a ɗiij`i-j`i mo, ki̶ wuɗun a mi̶zep mo ndi̶ghi̶n yil ni zak. 14Nyem ɗi mo satpo kaa ɗiisi si, ɓe moo leyit a nkaa mee yil mukáa furu. 15Katɗang gyet mo waa baa leyit a nkaa yil ɗi gyet mo yaghal yit ni ɗi, ɓe gyet mo ki̶ pee, mpee waa baaso ɗi nyil mi̶ni. 16Amma gyet mo ki̶ leyit a nkaa mee yil ɗiiret met. Yil ɗi ni a mu ɗengnaan. Mpeemi̶ni, ɓe ba ni shoop, Naan mpeku mo pet wuri a Naan furu kas, mpeeɗi wuri kì̵ ten ɗak mee birni le mpee mo. 17A mpee cínzeen, ɓe gyet Abraham ɗoghom wus làa fi̶ri Aizik kaa mbiizughum si, kaaɗi Naan kyam wuri. A Abraham wuri a ngo ɗi Naan kì̵ ten tuwoorpo nwuri, ki̶ wuri a ngo ɗi wuri kì̵ lap tuwoorpo ni zak, amma jir ki̶si, ɓe gyet wuri ɗoghom wus làa fi̶ri ɗiimi̶ndong kaa mbiizughum si. 18Koo ɗi Naan kì̵ ten sat wuri nee, "A ndi̶ghi̶n Aizik, ɓe dang fugha mon mpwat ɗi." 19Gyet Abraham c`in pan nee, Naan kì̵ mak yaghal ki̶ ngo ɗi wuri kì̵ muut a peemúut. Azeen kaa sumpo si, ɓe gyet Abraham wuri waa lap Aizik kaa ngo ɗi wuri kì̵ yaghal a peemúut si. 20A mpee cínzeen, ɓe gyet Aizik le ɗiiret mu mbii ɗi mo ndung j`i nkaa Jekop ki̶ Iso. 21A mpee cínzeen, ɓe kaaɗi gyet Jekop ɗoghom muut, ɓe wuri le ɗiiret nkaa jep kì̵ Josep mo, ki̶ wuri ɗar nkaa kám fi̶ri ku wuri seyil ɗi nNaan. 22A mpee cínzeen, ɓe kaaɗi gyet puusmuut mu Josep wul kus, ɓe wuri satpo nkaa pwat mu nyem Yahudi mo nyil Ijip, ki̶ wuri satpo mmo nkaa mbii ɗi mon nc`in ki̶ ɗyes fi̶ri mo. 23A mpee cínzeen, ɓe gyet puun kì̵ Mosis mo sok wuri mpee tar mo kun aɓwoon ɗi mo kì̵ làa wuri, mpeeɗi gyet wuri a làa ɗiimen zam. Ɓe ba gyet mo ki̶i̶r waar kì̵ mishkagham ni pe sok wuri kas. 24A mpee cínzeen ɓe gyet kaaɗi Mosis kì̵ wurang, ɓe wuri kwar ɓàlshin kaa làa kì̵ reep mu mishkagham Feero si. 25Gyet wuri cínshin, mpeku wuri shwaajeel ɗi ashak ki̶ nyem kì̵ Naan mo, a koppee kì̵ se shang mu shikbish mpee rep pee lee. 26Gyet wuri naa, naashoop ɗi wuri kat ni mpee sum kì̵ Kristi, ni ret met nlong ɗii mu yil Ijip ni jir, mpeeɗi gyet wuri ki̶ leyit fi̶ri a nkaa kwat ɗi ni akiyeen. 27A mpee cínzeen ɓe gyet Mosis yit yil Ijip, ba shi ki̶i̶rmuut mu tughup ki̶ mishkagham ni kas. Gyet wuri gung mpeeɗi gyet wuri c`in kaa wuri kì̵ naa Naan ɗi ba gurum mak naa wuri kas si. 28A mpee cínzeen, ɓe gyet wuri shee tap ki̶ se Tong Ashak mu pwat nyil Ijip ni, shi wat toghom nkaa polu mo, mpeku taji ngulop mu muut, twa jep ɗin nshee mu nyem Yahudi mo kas. 29A mpee cínzeen, ɓe gyet nyem Yahudi mo can dung ɗiinaat ɗel, kaa gyet moo mwaan ɗel a nkaa ɗi̶ghi̶r si. Amma kaaɗi gyet nyem Ijip mo riɓet can am mu dung ɗiinaat ni, ɓe am ni ɗi̶lang mo jir. 30A mpee cínzeen, ɓe gyet fwang mu yil nJeriko ni shirip, aɓwoon ɗi nyem Yahudi mo kì̵ ten neer ni cighi̶r yit povul. 31A mpee cínzeen, ɓe ba gyet Rahab, mat ngaa wura muut ndang nyemcíi ki̶lingpee mo kas, mpeeɗi gyet wura lap nyemcoghol mo le ntulu fi̶ra. 32Mun nwaa mu sat a me ɗak ye? Ai, ba peeɗi kas, mpeku wan satpo ɗi nkaa Gidiyon, ki̶ nkaa Barak, ki̶ nkaa Samson, ki̶ nkaa Jepta, kì̵ Devid, kì̵ Samuwel, ki̶ nyemsatpo kì̵ Naan mo. 33Gyet a mpee cínzeen furu, ɓe mo se koghorong, nkaa mulki mo. Mo tokɗiyeel ngurum mon ndi̶re-ndi̶re. Gyet mo lap mbii ɗi Naan kì̵ ten tuwoor mmo. Gyet mo shaghatpo kì̵ mɓwoor mo. 34Gyet mo pit aawus, ki̶ mo pwat mpo kì̵ kwai ɗi gyet gurum mo kus ki̶ twa mo ɗishik. Ba gyet moo mee ɓal kas, amma Naan wuri cighi̶r ki̶ cíinɓal kì̵ mo ni ɗee a ɓal ɗiiɗes. Mo se koghorong a peelek mo, ki̶ mo le ku shaarlek furu mo, ɗi mo a ɗiij`i-j`i mo swa. 35A mpee cínzeen, ɓe gyet mat mo waa lap nyem furu ɗiimumurap mo, ɗi mo baa yaghal ki̶ seen a peemúut. Pak mo kwar lappee mukáa furu, har mo murap ndi̶ghi̶n jeel ɗiinaat, mpeku mo baa yaghal ɗi a peemúut, ku mo ɗel ɗi ndi̶ghi̶n mee seen ɗi ni met ɗiiyaksi. 36Gyet mo nwangpo mpak mo, har mo ɗee a mbii shwar ngurum mo, ki̶ mo nas mo shii ngwam. Mo ɓwaghat pak mo le nlushaghat. 37Mo twa pak mo. Mo car mo shi ndi̶ng, ki̶ gyet mo ɓàk pak mo sham vul a naar. Mo twa pak mo shi kwai, ki̶ pak mo ɗwan a shim tum mo, ki̶ shim hi̶i̶ mo, ku mo mwaan ɗi. Jeel fes mak mo. Gurum mo cínjeel mmo, har mo le mo ɗee a kaa ki̶rom mo si shi jeel ni. 38Gyet moo piin mwaan buu, kaa nyem ɗi mo ceen mo a yil ni si. Pak ɓe, mo so a naar yil, pak mo tong ndi̶ghi̶n jwak mo, ki̶ ndi̶ghi̶n tughun mo nyil. 39Gyet Naan wuri satpo ɗiiret nkaa mo, amma jir ki̶si, ɓe ba memee ndi̶ghi̶n mo lap mbii ɗi Naan kì̵ ten tuwoor ni kas. 40Mpeeɗi Naan kì̵ ten ɗak mee mbii ɗiiret met le mmun jir, ki̶ see ashak ki̶ mun, ɗangɓe mon nɗee a ɗin ndi̶re-ndi̶re mo.

will be added

X\