Galati 6

1Ɗyemnaa mo, katɗang mee gurum taapal, ɓe wun ɗi wun ɗi ɓal-ɓal ndi̶ghi̶n Riin kì̵ Naan wu ɓam wuri, mpeku wuri tuwap ɗi. Wu sham ki̶ káa fuu mo, kaaɗi wun nkaa ɓam wuri. Wu tap ki̶ káa fuu, mpeku taji wun wu waa wu ɗel ndi̶ghi̶n jwaan ni kas. 2Wu ɓamshak, katɗang wu c`in aasi, ɓe wu gam Waar kì̵ Kristi mmi̶ni. 3Katɗang memee fuu lekáa fi̶ri a mee mbii, amma ndi̶ghi̶n zeen ni, ɓe ba wuri a mee mbii kas ɓe, gwar mi̶ni num a kaa fi̶ri ɓejee ɗak. 4Amma ni ret ku, koo a weye ɓe wuri kyam ɗak fi̶ri, ɗangɓe wurin ncanjagham shikáa fi̶ri, ba shak ki̶ ɗi wuri kám shin ki̶ mee gurum kas. 5Koo a weye ndi̶ghi̶n mun ɓe wuri mang toghon ki̶ mbii ɗi wurii c`in mo shikáa fi̶ri. 6Koo weye ɗi wuri nkaa lap kámpo kì̵ Naan, ɓe ni ret ku wuri ɓàk mbii ɗiiret mo jir, ashak ki̶ ngukám ni. 7Taji mee gurum numkáa fi̶ri kas, mpeeɗi ba mee ngo nkyam num nNaan kas. Mbii ɗi gurum kop ɓe wurin nɗiip a ni. 8Ngo ɗi wuri kop a ndi̶ghi̶n nan fi̶ri, ɓe wurin nɗiip a mbii ɗiiwam ndi̶ghi̶n nan ni. Amma ngo ɗi wuri kop ndi̶ghi̶n Riin kì̵ Naan, ɓe ndi̶ghi̶n Riin ɓe wurin nɗiip a seen ɗiiso ngaa-ngaa. 9Taji kwak funu mo waam mpee c`in mbii ɗiiret mo kas, mpeeɗi katɗang pee ni wul, ɓe mun nɗiip ɗiiret mu ɗak funu mo, kat ba mu taa mu muutleet kas. 10Aasi, ni ret ku mu c`in mbii ɗiiret mo, kaaɗi mu katpee ni si. Mu c`in mbii ɗiiret ngurum mo jir, met jir, a ɗyemni̶ghi̶n funu mo, ɗi mo a nyemso ndang Kristi mo. 11Ran ɗiinan-nan ɗi wu naa si mo, a wan ran mo shi sar fi̶na so nwun. 12A nyem ɗi mo riɓet canjagham ndi̶ghi̶n nan ɗiisi, a moo riɓet leting nwun, mpeku wu can-can ɗi, ki̶ zak, mpeku taji mo shwaajeel, mpee shiyeepyoghom kì̵ Kristi kas. 13Nyem ɗi moo ten can mo, mo shikáa furu, ba mo tap ki̶ waar ni kas. Amma ni a riɓet ki̶ mo, ku mo can wun, mpeku mo katpee ɗi mpee canjagham nkaa wun ndi̶ghi̶n nan. 14Amma pe wan ɗi ɓe a shi shiyeepyoghom kì̵ Daa funu Jesu Kristi, a ni a mbii mi̶ndong ɗi nin mak le ku wan canjagham ɓejee ɗak. A mpee shiyeepmúut fi̶ri, ɓe mbii ɗi mu yil ɗiisi mo, ba mo kuɗii mee koghop ni pe wan ɗi kas. Ni ɗee a kaa moo ten pwas mo nkaa shiyeepmúut ki̶ Kristi, ki̶ zak, wan a kaa ngo ɗi ki̶n ten muut si, har wan ki̶n yit mbii mu yil ɗiisi mo mɓwoon. 15Koo ɗi mo can gurum, ki̶ koo ɗi ba mo can gurum kas, ɓe ba nii mee koghop ni kas. Mbii ɗi nii koghop ni hakyeng nin nɗiisi, Naan wuri cín seen ɗiipoo mun. 16Mpee nyem ɗi mo mwaan ndi̶ghi̶n seen ɗiipoo ɗiisi ni, ɓe mo a nyem kì̵ Naan mo azeen. Moo tongriyang kì̵ Naan ki̶ wurii naa mo shi yit naajeel zak. 17Yaghal nyaksi, ɓe ba ɗyen nwan ku mee gurum daampee nwan zak kas, mpeeɗi mi̶mer ɗi mo nkaa san fi̶na, mo kám nee, wan a ki̶rom mu Jesu. 18Ɗyemnaa mo, ɗiiret mu Daa funu Jesu Kristi ni tong ashak ki̶ riin fuu mo jir. Amin.

will be added

X\