Galati 1

1Wan Pool, laalop kì̵ Jesu Kristi, ɗi ba a gurum mo pet wan, koo le kun ɗee a laalop fi̶ri kas, amma a shi riɓet kì̵ Jesu Kristi, ki̶ Naan puun, ɗi wuri yaghal ki̶ Jesu a peemúut. 2Ɗyemnaa ɗi mo ashak ki̶ wan, moo lop tokshik furu mo so pe nyemso ndang Naan (Eki̶lisya) ɗi mo ndi̶ghi̶n yil nGalati. 3Naan puun kì̵ Daa funu Jesu Kristi mo naa wun shi yit mu naajeel, ki̶ mo cín tongriyang nwun zak. 4Jesu Kristi wuri cín shin fi̶ri mpee shikbish funu mo, mpeku wuri ɓam mun ɗi ndi̶ghi̶n ɓit ɗiibish ɗiisi mo, ntiit-ntiit ki̶ riɓet kì̵ Naan puun funu. 5Ɗiiɗes ɗee pe wuri har ngaa-ngaa ki̶ ngaa-ngaa. Amin. 6Ni aapo nwan zam, mpeeɗi wu cighi̶r ku wu kwar ngo ɗi wuri pet wun shi yit naajeel mu Kristi ki̶lak-ki̶lak aasi, mpeku wu so ɗi ndang mee po Naan ɗiici. 7Azeen-nzeen ba mee po ɗiiret waa ɗee ɗi, ɗi ni waa met ɗi wuu ki̶ling pe wan ɗi kas. Amma pak gurum moo daampee nwun, ki̶ mo riɓet cighi̶r ki̶ po ɗiiret mu Kristi ni. 8Amma koo ɗi a mumun, koo ɗi a mee ngulop kì̵ Naan tong a ɗengnaan sham, ɗangɓe wuri sat mee po ɗiiret ɗi nwun, ɗik kì̵ mbii ɗi muu ten mu sat nwun, ɓe gwar mi̶ni ɗee a mbii ɗiibuu-buu har vit. 9Kaaɗi muu ten mu sat si, wan ki̶n baa sat ɗi nee. Katɗang mee ngusatpo ɗiiret ɗi nwun ɗik ki̶ ɗi muu ten mu sat nwun, ɓe wu yit ku gwar mi̶ni ɗee nder kì̵ tughup mu Naan har vit. 10Wu pan nee, wan ki̶n tang a ɗiiɗes pe gurum mo ɗi aa? Aa koo a pe Naan ɗi ye? Koo wu pan nee, wan tang a tong ɗyen ngurum mo ye? Katɗang ɗi wan ki̶n tang a tong ɗyen ngurum mo, ɓe ɗi ba wan a ki̶rom kì̵ Kristi kas. 11Ɗyemnaa mo, ɗyen nwan ku wu man nee, po ɗiiret ɗi gyet wan ki̶n sat ni nwun, ba ni put a pe mee gurum ɗi kas. 12Mpeeɗi, ba gyet wan lap ni a nsar kì̵ mee gurum kas. Ki̶ zak, ba a mee gurum kám ni nwan kas, a Jesu Kristi shikáa fi̶ri, wuri woo ni nwan. 13Wu ki̶lingpo nkaa shiimwaan fi̶na, ɗi gyet yam, ndi̶ghi̶n seyil nNaan mu nyem Yahudi mo, mɓít mi̶ni, ɓe wan cínjeel Eki̶lisya kì̵ Naan mo hakyeng, har gyet wan ki̶n gung mpeku wan tu ni ɗi. 14Gyet ndi̶ghi̶n gang fi̶na mo, ɓe wan met mmo jir, mpee mwaan ndi̶ghi̶n waar kì̵ nyem Yahudi mo. Gyet wan c`in zughur mpee mwaan ndi̶ghi̶n waar mu puun fi̶na ɗi moo ten murap mo. 15Amma Naan ɗi wuri ten bi̶lip wan yam-yam, akuɗang moo làa wan, ɓe ndi̶ghi̶n ɗiiret fi̶ri, ɓe wuri pet wan mpeku wan ɗee ɗi a mu wuri. 16Ɓe ni ret nNaan wuri nyit har wuri kám Làa fi̶ri nwan, mpeku wan sat po ɗiiret ɗi nkaa wuri, nyem ɗi ba mo a nyem Yahudi mo kas. Ba gyet wan ɓeet mi̶ni ki̶ mee gurum kas. 17Ki̶ zak, ba gyet wan kàa nJerusalem, pe jeplop kì̵ Jesu Kristi mo ɗi kas, ɗi gyet wuri shee pi̶rep mo baa ɗang wurii pet wan. Amma wan so yil Arebiya, aɓwoon mi̶ni ɓe wan waa baaso nDamaskus. 18Aɓwoon kì̵ ɓit mo kun, ɓe wan kàa nJerusalem, mpeku wan naa Kefas ɗi. Wan tong ashak ki̶ wuri mpee teer mo kaghapaat baapaat. 19Ba gyet wan waa kaat ki̶ memee ndi̶ghi̶n jeplop kì̵ Jesu mo kas. Gyet wan kaat aa Jemis ɗyemni̶ghi̶n kì̵ Daa, ɓejee ɗak. 20Ntoghom kì̵ Naan, ɓe mbii ɗi wan ran nwun, ba mo a ɗung kas. 21Aɓwoon mi̶ni, ɓe wan so nkoghop nyil nSiriya ki̶ Silisiya. 22Ba gyet nyemso ndang Kristi ɗi mo ndi̶ghi̶n Yahudi ni mo man wan kas. 23Moo ki̶ling a gurum mo nkaa sat ni nee, "Gwar ɗi jí wurii cínjeel mmun si, yaksi ɓe wuri nkaa satpo ngurum mo nkaa cínzeen ɗi gyet wurii gung mpee tu ni." 24Mo kwoop Naan mpee wan.

will be added

X\