Afisus 4

1Wan ɗi wan a shishaghat mpee sum kì̵ Daa. Wan ki̶n ɗang pu wun, mpeku wu mwaan-mwaan ɗi mo lapshak ki̶ petpee ɗi Naan wuri kì̵ pi̶rep wun mpee ni. 2Wu sham ki̶ káa fuu mo. Wu c`in mbii mo ndi̶ghi̶n ɗyen, ki̶ wu gung zak. Wu kám wal fuu mo agaak, ki̶ wu fwangshak zak. 3Wu gung, ku wu tap ɗi ki̶ ɓàlkáa ɗi Riin wuri cín ni nwun, shi tongriyang ɗi ni ɓàl wun ashak. 4Shin ni a mi̶ndong, ki̶ Riin ni mi̶ndong ɓejee. Kaaɗi mo ki̶ pi̶rep wun, ndi̶ghi̶n canciin mi̶ndong nkaa mbii ɗi mo ki̶ pet wun mpee ni. 5Daa a mi̶ndong, cínzeen ni a mi̶ndong, baptisma ni a mi̶ndong. 6Naan a mi̶ndong, ɗi wuri a puun funu jir. Wuri met mbii mo jir, ki̶ a wurii c`in ɗak ndi̶ghi̶n mun jir, ki̶ a wuri ndi̶ghi̶n mun jir zak. 7Amma koo a weye ndi̶ghi̶n mun, ɓe wuri kì̵ lap ɗiiret ntiit-ntiit kì̵ zughum kì̵ Kristi. 8Kaaɗi mo kì̵ ran ndi̶ghi̶n takarda ki̶ Naan si nee: "Kaaɗi Kristi wuri kàa aɗeng, ɓe wuri pan ki̶rom ɗiiyiyak mo ɗes ashak ki̶ wuri, ki̶ wuri cín zughum ngurum mo zak." 9Yaksi, ɓe nee, "wurii kàa a ɗeng", ɓe shii kì̵ mi̶ni a meye? Shii ki̶ mi̶ni nee, nshee ɓe wuri sham ndi̶ghi̶n jurung kì̵ peekyes kì̵ yil ɗiisi. 10Mpeemi̶ni, gwar ɗi gyet wuri sham, a wuri a gwar ɗi wuri kàa a ɗeng-ɗeng a kiyeen ki̶ ɗengnaan mo, mpeku wuri gam mbii mo ɗi jir. 11A wuri c`in zughum ngurum mpeku pak mo ɗee ɗi, a jeplop mo, ki̶ pak mo ɗee a nyemsatpo kì̵ Naan mo, ki̶ pak mo ɗee ɗi a nyembishara Naan mo, ki̶ pak mo ɗee ɗi a Pasto mo, ki̶ pak mo ɗee ɗi a nyemkám mo zak. 12Wuri cín zughum ɗiisi mo, a mpeku ni ɗak nyem kì̵ Naan mo ɗi, mpee ɓamshak, ki̶ mpeku mo ɗik shin kì̵ Kristi ɗi. 13Ni aasi, ɓe mun jir, mu yaghal mu ɗee a ɗiimi̶ndong ndi̶ghi̶n cínzeen funu, ki̶ man funu ɗi ni ndi̶ghi̶n Làa kì̵ Naan. Mun nyaghal mu ɗee a nyemɗiiseen mo, har ku mu wul mpee gam kì̵ ɗiiɗes mu Kristi. 14Ɓe ba mu kuɗi a jep ɗiiɗween mo kas mmi̶ni, ɗi mon nnum mun so si, har ki̶ mo mang mun pán, shi koo a kiyeet kì̵ kám ɗiiɗang ye kas. Mo a nyemseen mo ɗi mo a koghorong mpee c`in ɗung. 15Amma ni ret ku mu sat zeen ni ndi̶ghi̶n wal. Ni ret ku mu wurang ndi̶ghi̶n mbii mo jir, ndi̶ghi̶n Kristi ɗi wuri a káa funu. 16A mpee wuri, ɗangɓe koo a ɓeep ɗiiɗang ye, mo shini-shini, mo tap ɓàl ashak, ki̶ koo a peeɓal ɗiiɗang ye, nii kat ɓal a ndi̶ghi̶n wuri. Katɗang koo a ɓeep ɗiiɗang ye ni ki̶ c`in ɗak fi̶ra riret, ɓe shin nin nwurang, ki̶ ni ɗik sat kàa ndi̶ghi̶n wal zak. 17Ndi̶ghi̶n sum kì̵ Daa, ɓe wan ki̶n satpo wun shiɓal nee, taji wu sat a ntong kaa nyem ɗi ba mo a nyem Yahudi mo kas si, ɗi pan furu mo a ɗiibuu. 18Pan ɗin ndi̶ghi̶n putughup furu mo, ni a mu peenkoo, ba mo ki̶ mee li̶ɓet ndi̶ghi̶n seen ɗi Naan cín kas, mpeeɗi ba mo ki̶ mee man kas, ki̶ mo ɗee a nyemciishik mo. 19Ba mo kuɗii nashoop kì̵ mee mbii kas. Mo fes cínkáa furu mo mpee c`in mbii ɗiibish mo, ki̶ moo kyaghar mpee c`in koo a mbii ɗiibish ɗiiɗang ye. Ba moo mee yaasut kas. 20Amma ba a mbii ɗi wun wu kám pe Kristi ɗi mmi̶ni kas! 21Mo sat nee, wuu ten wu ki̶lingpo nkaa wuri, ki̶ mo kám nwun a ndi̶ghi̶n wuri, kaaɗi zeen ni ndi̶ghi̶n Jesu si. 22Wu shwat suk fuu ɗiisi̶ghi̶r ni mo wu baa ki̶ mo aku, ɗi jí moo num wun ndi̶ghi̶n kyaghar mu nan. 23Ni a ting ku putughup fuu mo ki̶ pan fuu mo ɗee a ɗiipoo. 24Ki̶ zak, ni a ting ku wu jwal suk fuu ɗiipoo ni mo, ɗi Naan wuri ɗak mi̶ni kaa shin fi̶ri si, ki̶ni woo káa ki̶ni agaak ndi̶ghi̶n seen ɗi ni azeen-nzeen ɗi ni a ɗiiret ki̶ ɗiiɓang. 25Mpeemi̶ni, wu baa ki̶ ɗung ndi̶ghi̶n wun, ki̶ koo weye ɓe wuri sat a zeen ngi̶ni̶ghi̶n fi̶ri ɓejee ɗak. Mpeeɗi mun a ɗiimi̶ndong ki̶ shak. 26Katɗang wu langtughup, ɓe taji wu c`in shikbish kas. Taji puus shamru, ɓe wun ɗi nkaa langtughup kas. 27Taji wu cínpee nShetan kas. 28Ngo ɗi jí wurii c`in wat, ɓe taji wuri baa c`in ɗi kas, amma ni ret ku wuri c`in ɗak ɗiiret shi sar fi̶ri, mpeku wuri mak cín mee mbii ɗi nyem ɗi mo mɓut njeel mo. 29Taji po ɗiibish mo put ndi̶ghi̶n po fuu mo kas, amma see a mbii ɗiiret mo, ɗi mon nɗik wun, kaaɗi ni tap ret ki̶ pee ni si. Mpeku ni j`i ɗi ki̶ ɗiiret nyem ɗi moo ki̶ling ni. 30Taji wu wat putughup nRiin Ɗiiɓang mu Naan kas, wuri ɗi a wuri ɗee a langting nee, wuu ɗee a ɗii fufwang mpee parpuus ɗi mon mɓam wun. 31Wu pwat ki̶ po ɗiiɗeet mo, ki̶ tughup ki̶ ɓutbish, ki̶ fuluppee ashak ki̶ c`in nyang mo jir. 32Amma ni ret ku wu naajeel ki̶ shak, kì̵ wu fwo ɗin nshak, kaaɗi Naan wuri fwo ɗi nwun ndi̶ghi̶n Kristi si.

will be added

X\