Kolosi 2

1Ɗyen nwan, ku wu man ɗak ɗi wan ki̶n gung mpee c`in ni mpee sum fuu, ki̶ mpee nyem ɗi mo ndi̶ghi̶n yil Lodisiya. 2Wan nkaa c`in ɗak ɗiisi ni, a mpeku mo kat ɓal ɗi mputughup furu mo, mpeku mo wal ɗin nshak, har ku mo ɗee ɗi a ɗiimi̶ndong. Ɗyen nwan ku mo man jurung, ki̶ man nkaa Jesu hakyeng, mpeku mo manshii kì̵ mbii ɗiisi mo ɗi jir. Ɗiisi ni j`i ki̶ ɗiiret nkaa mo hakyeng. Mbii ɗiijurung ni, a Kristi shikáa fi̶ri. 3Mo sok long mu seen ki̶ man mo jir, a ndi̶ghi̶n Jesu. 4Wan ki̶n sat mbii ɗiisi mo nwun, a mpeku taji mee gurum num wun shi liispo ɗi ni shangki̶ling kas. 5Koo ɗi ba wan ashak ki̶ wun ndi̶ghi̶n nan kas, ɓe wan ɗi ashak ki̶ wun ndi̶ghi̶n riin. Ni shang nwan zam, kaaɗi wan ki̶ling nee, wuu c`in mbii mo a ntiit-ntiit ndi̶ghi̶n ar ɗiiret, ki̶ zak, wuu ɗar ɓal-ɓal ndi̶ghi̶n cínzeen fuu ɗi ni ndi̶ghi̶n Kristi. 6Kaaɗi, wu mang Jesu Kristi kaa Daa fuu si, ɓe ni ret ku wu mwaan-mwaan ɗi ni ret ku nyem ɗi mo ɓàlkáa furu mo ashak ki̶ Jesu, mo c`in. Wu tong ndi̶ghi̶n wuri. 7A mpee wuri, ɓe wu kat seen ki̶ ɓal. Wu sekiyeen ki̶ cínzeen nwuri azeen-nzeen, kaaɗi mu kám nwun si. Ki̶ zak, wu pi̶lang wuri shidaar-shidaar mpee mbii mo jir. 8Wu tap, taji mee gurum num wun shiman mu yil ɗiisi, mpeku wu taa wu mer ɗi a ar ɗiiret ni kas. Kiyeet kì̵ man ɗi ni put a ndi̶ghi̶n waar mu gurum mo, ki̶ ndi̶ghi̶n riin ɗiibish mu yil ɗiisi, ba nii put a pe Kristi ɗi kas. 9A ndi̶ghi̶n Jesu, ɓe muu naa gam kì̵ ɗyen kì̵ Naan, ki̶ tong ndi̶ghi̶n nan ni zak. 10Mo cín seen nwun, a mpeeɗi wuu ɓàlkáa ashak kì̵ Jesu. A wuri a káa kì̵ mulki ki̶ iiko mo jir. 11A ndi̶ghi̶n wuri, ɓe mo can wun, ba a can ɗi moo c`in shi sar ndi̶ghi̶n nan kas, amma a can ɗi Jesu Kristi wuri c`in nwun ɗi ni put ki̶ wun ndi̶ghi̶n shikbish. 12Kaaɗi gyet mo c`in baptisma nwun si, ɓe ni ɗee a kaaɗi gyet mo wum wun ashak ki̶ Kristi si, ɗangɓe mo waa yaghal ki̶ wun ashak ki̶ wuri a peemúut si. 13Gyet yam ɓe wun a ɗiimumuut mpee shikbish fuu mo, ki̶ ba gyet wun a nyem kì̵ Naan mo kas. Amma Naan wuri cín seen nwun ashak kì̵ Kristi, ki̶ zak, Naan wuri kì̵ fwo shikbish fuu mo jir. 14Gyet yam ɓe mun a ɗiimumurap mo nder kì̵ waar mu Naan, mpeeɗi ba gyet muu c`in mbii ɗi waar kì̵ Naan ni sat kas. Amma yaksi, Naan wuri mang shikbish mi̶ni mo baa ki̶ni aku nkaa káa funu mo, ki̶ wuri fwo ɗi mmun jir zak. Mpeeɗi gyet mo pwas Jesu Kristi nkaa shiyeepyoghom, a mpee shikbish funu ɗiisi ni mo. 15Kaaɗi gyet Jesu Kristi wuri muut nkaa shiyeepyoghom, ɓe wuri se koghorong nkaa riin ɗiibish mo ki̶ iiko mo, wuri kám ngurum mo a agaak nee, wuri ɓal met mmo jir. 16Mpeemi̶ni, ɓe taji wu yit ku mee gurum lewaar nwun nkaa mbii ɗi wuu se, ki̶ shwaa kas, koo a nkaa puus ɗiiɓang mo, koo nkaa mbii ɗi wuu c`in mo, mpee tar ɗiipoo, koo nkaa puus Nookɗi. 17Mbii ɗiisi mo ɗee a muriin, ɗi gyet moo kám ngurum mo mbii ɗi mon ndung j`i akiyeen. Mbii ɗi gyet moo ɗee a muriin ɗiisi ni, moo gam, a Kristi wuri shikáa fi̶ri. 18Mpeemi̶ni, taji wu yit ku nyem ɗi mo lesut a kaa nyemɗiinan mo si, mo tokɗiyeel ɗiibish nwun kas. Nyem ɗi mo sat nee, Naan kì̵ woo mbii mo nwuɗun zughum. Mo sat nee, wu sham ki̶ káa fuu mo, ki̶ zak, ne wu seyil nyemlop kì̵ Naan mo. Nyem mi̶ni, moo roghop, koo ɗi ba mo a mee mbii kas. Pan furu mo a mu yil ɗiisi. 19Ba moo riɓet ɓàlkáa furu ashak ki̶ Kristi ɗi wuri a káa mu nyemso ndang Naan ni mo kas. Ɗi a wurii cínɓal mmo, ki̶ a wurii cín mbiise mmo zak. Jir nyem ɗi moo ɓàlkáa furu mo ashak kì̵ Jesu, ɓe wuri kì̵ cínɓal mmo, mpeku mo j`i ɗi ashak zak. Ki̶ mpeku, mo wurang ɗi a ndi̶ghi̶n mbii ɗi mo a mu Kristi, kaaɗi Naan wurii riɓet si. Ɓeep mu sun funu moo lang ashak, mpeeɗi mo ki̶ peeɓal mo, ki̶ paar mo. Ni a kaaɗi Kristi wuri ɓàl nyemso ndang wuri mo, ɗi mo a shin fi̶ri si. 20Katɗang wu murap ashak kì̵ Kristi, ɓe ba riin ɗii mu yil ɗiisi mon nkat ɓal nkaa wun kas. Amma a me le ɗang wuu sekiyeen ki̶ mwaan kaa kaghar gurum ɗii mu yil ɗiisi mo ye? A me le ɗangɓe wu cínkáa fuu nder kì̵ waar ɗi gurum sat ne, wu c`in ye? 21Kaaɗi moo sat nwun nee, taji wu tuwaas mbii ɗiisi shi sar kas. Taji wu se mbii ɗiisi kas, ki̶ zak, taji wu tung mbii ɗiisi shi sar kas. 22Kiyeet kì̵ waar ɗiisi mo, mo a kám mu gurum. Ɗi katɗang mo gung c`in ɗak ki̶ mo, ɓe mo ɗee a ɗiibuu. 23Waar kaa ɗiisi mo si, mo ki̶ lapshak kaa mo aa mee koghop mu seen si. Mpeeɗi waar ni mo leting ngurum mo, ku mo seyil ɗi ndi̶ghi̶n ar ɗiiret, ki̶ mo sham ki̶ káa furu mo, mu ɗung zak, ku moo cínjeel ɗi nsut furu mo, amma azeen-nzeen, ba moo mee koghop ni kas, mpeeɗi ba moo mee ɓal ɗi mon mɓam gurum, mpeku wuri tap ɗiikyaghar mu nan ni kas.

will be added

X\