Kolosi 1

1Wasika ɗiisi ni put a nsar mi̶na Pool, ɗi Naan wuri kì̵ ten bi̶lip wan mpeku wan ɗee ɗi a laalop mu Jesu Kristi, ki̶ Timoti ɗymni̶ghi̶n funu ndi̶ghi̶n Kristi. 2So pe nyem kì̵ Naan ɗi mo ndi̶ghi̶n yil nKolosi, ki̶ pe ɗyemni̶ghi̶n funu mo ɗi mo ɓàlkáa furu mo ashak ki̶ Jesu Kristi. Ɗiiret kì̵ Naan puun funu ki̶ tongriyang fi̶ri ɗee ashak ki̶ wun jir. 3Muu c`in aduwa nNaan mpee wun shidaar-shidaar. Ki̶ zak, muu naa pi̶lang Naan ɗi wuri a puun kì̵ Daa funu Jesu Kristi. 4Mu pi̶lang Naan shidaar-shidaar, mpeeɗi mu ki̶ling nee, cínzeen fuu ndi̶ghi̶n Jesu Kristi nii sekiyeen, ki̶ zak ne, wuu wal nyem kì̵ Naan mo jir. 5Mbii ɗi ni le ɗang wu cínzeen nKristi, ki̶ wuu wal ngurum mo, a mpeeɗi wuu leyit nkaa mbii ɗi Naan wuri kì̵ ten ɗak ni le ndi̶ghi̶n ɗengnaan, mpeku wuri cín ni ɗi nwun. Wu ki̶lingpo nkaa mbii ɗiisi mo a ndi̶ghi̶n po ɗiiret ɗi ni azeen ɗi jí wuu ten wu ki̶ling ni. 6Po ɗiiret ɗiisi ni, nin nkaa so wul koo a pee ɗiiɗang ye ndi̶ghi̶n yil ɗiisi. Nii cighi̶r ki̶ putughup kì̵ gurum mo, har nii le ku mo c`in ɗak ɗiiret mo. Yaksi, gurum mo ɗes, mo nkaa cínzeen ɗiki̶-ɗiki̶. Ni aasi, ɓe ni kì̵ so wul mpee fuu, ki̶ ni nkaa cighi̶r ki̶ putughup fuu mo, mpeku wu c`in ɗak ɗiiret mo ɗi. Yaghal mparpuus ɗi jí wu shee ki̶ling ni, ɓe yaksi wu manshii kì̵ ni azeen-nzeen, kaaɗi Naan wuri le ɗiiret nkaa wun si. 7Wu shee ki̶lingpo ɗiiret ɗiisi, a mpo kì̵ Abafaras, ɗi muu wal nwuri, ki̶ wuri a shaarɗak funu. Wuri c`in ɗak kì̵ Jesu Kristi shi putughup mi̶ndong nnaar fuu a koppee funu. 8A wuri sat mmun po nkaa wal fuu ndi̶ghi̶n Riin Ɗiiɓang. 9Ni aasi, ɓe yaghal mparpuus ɗi jí mu ki̶lingpo mi̶ni nkaa wun, ɓe muu c`in aduwa mpee wun shidaar-shidaar. Muu ɗang pu Naan, mpeku wuri gam wun ɗiiseen mu man ɗyen fi̶ri, man ɗi ni put a pe Riin fi̶ri j`i ɗi. 10Man mi̶ni le, ku mwaan fuu mo lapshak ki̶ mu nyem ɗi mo so ndang Jesu. Mwaan ɗi ni tongɗyen nJesu. Katɗang wu mwaan a ndi̶ghi̶n ɗyen kì̵ Jesu, ɓe mi̶se fuu nin nle ku wu c`in ɗak ɗiiret mo, ki̶ wu sat a nwurang ndi̶ghi̶n man po nkaa Naan ɗak. 11Muu c`in aduwa nee, Naan ɗi wuri ɓal met jir, wurin ncínɓal nwun, mpeku wu ɗar ɗi ɓal-ɓal ndi̶ghi̶n mbii mo jir. Ki̶ zak, koo ɗi a me c`in ye, ɓe wu sat a ngung ɗi ɗak, ki̶ wu kat retnyit ɗi zak. 12Wu pi̶lang puun funu ɗi wuri aɗeng, wuri ɗi wuri wang ar ni mmun, mpeku mu sekop fi̶ri ɗi ashak ki̶ nyem fi̶ri mo ndi̶ghi̶n pee ɗiiɓang. 13Wuri put ki̶ mun ndi̶ghi̶n iiko mu peenkoo, ɗangɓe wuri waa mang mun ɗel ki̶ mun ndi̶ghi̶n mulki kì̵ Làa fi̶ri. 14A Làa fi̶ri, wuri ang mun, ki̶ wuri fwo shikbish funu mo mmun zak. 15Ba mee ngo kì̵ kyam naa Naan kas, amma gurum mo kì̵ naa Jesu ɗi wuri lapshak kì̵ Naan. A wuri kám tong kì̵ Naan mmun agaak. Jesu wuri a Làa kì̵ Naan ɗin nshee, ɗi wuri met mbii ɗi Naan wuri le mmo jir. 16A ndi̶ghi̶n Jesu, ɓe Naan wuri le mbii ɗi mo ndi̶ghi̶n yil ni jir. Mbii ɗi mo ndi̶ghi̶n ɗengnaan ki̶ ɗi mo ndi̶ghi̶n yil ɗiisi. Mbii ɗi gurum moo mak naa mo, ki̶ mbii ɗi ba gurum moo mak naa mo kas. A ndi̶ghi̶n ɗiiɗes fi̶ri, ɓe Naan wuri le mbii ɗi mo ki̶ iiko ndi̶ghi̶n ɗengnaan. Mbii ɗiinan mo ki̶ ɗiiɗween mo ntiit-ntiit ki̶ ɓal furu mo. A ndi̶ghi̶n Jesu, ɓe Naan wuri le mbii mo jir, ki̶ mbii mo jir, a Jesu wuri ki̶ mo nsar, ki̶ mo a mu wuri jir zak. 17Pugyet ɗi yam-yam, ɓe Jesu wuri ɗi, akuɗang Naan wurii le mbii mo ndi̶ghi̶n yil ni. Naan ɓàl mbii mo jir ashak a ndi̶ghi̶n Jesu. 18Ndi̶ghi̶n nyem kì̵ Naan mo, ɓe Jesu wuri a káa kì̵ mo. Kaghar gurum ni mo a shin fi̶ri. A Jesu wuri a káa mu nyemso ndang Naan mo. A wuri a ɗin nshee, ki̶ zak, a wuri shee yaghal a peemúut. Mpee mbii ɗiisi mo, ɓe a wuri a ɗin nshee ndi̶ghi̶n mbii mo jir. 19Ni ret nNaan nyit, har wuri le ku ɗyen fi̶ri ni gam, ki̶ ni tong ndi̶ghi̶n Jesu. 20Ni ret Naan nyit zak, mpeku wuri baaj`i ki̶ mbii mo jir pushin ɗi ndi̶ghi̶n Jesu. A ndi̶ghi̶n toghom ɗi Làa kì̵ Naan wuri ɓeer ni nkaa shiyeepyoghom, ɗangɓe Naan wuri riɓet waa baaj`i ki̶ mbii mo jir, pu shin ɗi. Mbii ɗi mo ndi̶ghi̶n yil ɗiisi, ki̶ ɗi mo ndi̶ghi̶n ɗengnaan, ku mo cighi̶r ɗii putughup furu, mpeku mo baaj`i ɗi ndang wuri. 21Jí mmee nnaar, ɓe wuu tong a jong-jong kì̵ Naan, ki̶ jí wun a shaarlek kì̵ Naan, mpee mbii ɗiibish, ɗi jí wuu c`in mo, ki̶ pan fuu ɗiibish mo. 22Amma yaksi, mpee muut kì̵ Làa kì̵ Naan, ɗi mo làa wuri ndi̶ghi̶n nan, ɓe Naan wuri le ku wu ɗee a shaar fi̶ri mo, mpeku putughup fuu mo ɗee ɗi a ɗiiɓang, ki̶ mpeku wuri j`i ki̶ wun ɗi ntoghom kì̵ Naan, ɗi wuri a ɗiiɓang. 23A mbii ɗi Jesu c`in nwun mmi̶ni, katɗang wu sekiyeen ki̶ cínzeen ndi̶ghi̶n po ɗiiret ni. Ki̶ zak, katɗang wu ɗar ɓal-ɓal ndi̶ghi̶n mbii ɗiisi mo. Wu sat a nleyit, nkaa mbii ɗi wu ki̶lingpo nkaa mo ndi̶ghi̶n po ɗiiret ni. A po nkaa po ɗiiret, ɗi moo ten sat ni nkoo a weye, ndi̶ghi̶n yil ɗiisi. Wan Pool, ɗak fi̶na ni a mpeku wan sat ɗi ngurum mo, po nkaa po ɗiiret ɗiisi ni. 24Kaaɗi wan nkaa shwaajeel mpee sum fuu, ɓe wan ki̶ retnyit mputughup. Kaaɗi gyet Daa Jesu shwaajeel si, ɓe wan zak, ki̶n shwaajeel ndi̶ghi̶n nan mpee sum kì̵ nyem fi̶ri mo ɗi mo a shin fi̶ri. Wan shwaajeel ni a mpeku wan si̶ghi̶t nkyes kaghar ɗak fi̶ri ni ɗi. 25A Naan wuri bi̶lip wan, mpeku wan ɗee ɗi a ki̶rom mu nyem kì̵ Jesu mo, har wuri le ɗak ɗiisi ni nsar fi̶na mpee sum fuu. Ɗak ɗi wuri le nsar fi̶na ni, a mpeku wan satpo fi̶ri ɗiiret ɗi ngurum mo hakyeng. 26Po ɗi wan ki̶n sat ngurum mo, ɓe gyet yam, ɓe ni a ɗiisi̶sok. Mpeemi̶ni ɓe ba gyet gurum mo manshii ni kas, amma yaksi Naan wuri woo ni agaak nyem fi̶ri mo. 27Ni ret nNaan nyit, har wuri le, ku nyem fi̶ri mo manpo ɗiijurung ɗiisi, ɗi ni a mbii aapo zam. Nii koghop ni hakyeng, mpee gurum mo jir, koo a ndi̶ghi̶n yil ɗiiɗang ye. Po ɗi wuri woo ni mmun, a nee, Jesu Kristi wurii tong ndi̶ghi̶n wun. Mpeemi̶ni, ɓe wu leyit, mpee parpuus ɗi wun ntong ashak ki̶ wuri ndi̶ghi̶n ɗiiɗes fi̶ri. 28A mpeemi̶ni ɓe muu satpo ngurum mo jir nkaa Jesu Kristi. Muu satpo nkoo a weye, ku wuri tap, ki̶ zak, muu kám seen ngurum mo nkaa mbii ɗiisi ni mo, a mpeku koo a weye, ɓe wuri ɗee ɗi ki̶ seen ndi̶ghi̶n Kristi. 29A mpeemi̶ni, ɓe wan ki̶n c`in ɗak shiɓal ɗi Jesu wuri cín nwan, ki̶ wan ki̶n gung mpeku wan kyes ɗak ɗiisi ni ɗi.

will be added

X\