Ɗak 8

1Ni fes ret nSool nyit zam, mpeeɗi mo tu Stivin. Parpuus mi̶ni, ɓe jeel ɗiiɗes ni táa nkaa kuur kì̵ nyemso ndang Jesu ɗi moo tong nJerusalem. Mpee jeel ni, ɓe mo rangkáa jir, so ndi̶ghi̶n yil nJudiya, ki̶ Sameriya, see ɗee a jeplop ni mo ɗi nJerusalem ɓejee ɗak. 2Pak nyem ɗi mo ki̶i̶r Naan, mo wum Stivin, ki̶ mo yém mmaap mpee muut fi̶ri ni. 3Amma Sool wuri cínjeel nyemso ndang Jesu ni mo ɗes hakyeng. Wuri so ɗel shitulu-shitulu, ku wuri yak mish mo, ki̶ mat mo, har wuri so shaghat mo ndi̶ghi̶n lushaghat. 4Nyem ɗi mo rangkáa ni mo. Mo so satpo Naan ngurum mo koo a pee ɗiiɗang ye ɗi mo so ɗi. 5Filip wuri so mmee birni ɗi nin nyil nSameriya, wuri nkaa satpo ngurum mo nkaa Kristi mpeemi̶ni. 6Kaaɗi kuur kì̵ gurum ni mo ki̶ling, ki̶ mo naa mbii lukshik ɗi Filip wuri c`in mo zak, ɓe mo lekom, ki̶ mo lepan furu mo nkaa mbii ɗi wurii sat ni. 7Riin ɗiibish moo le or ɗiiɗes, ki̶ moo pwat aku mɓut ngurum mo ɗes. Mo bar gurum mo ɗes ɗi sut furu mo fii, ki̶ kiɓel mo. 8Mpeemi̶ni, ɓe gurum mo kat retnyit ɗes ndi̶ghi̶n birni mi̶ni. 9Mee gwar wuri ɗi ndi̶ghi̶n birni ni, ɗi sum fi̶ri a Simon, ɗi mpee ɓit mo ɗes, ɓe wurii koospaa, ki̶ wurii c`in mbii aapo mo a yit kì̵ nyem Sameriya mo. Wuri canjagham ne, wuɗi a mee ngo ɗiiɗes. 10Gurum mo jir moo leyit nkaa wuri, yaghal nɗiiɗween mo, har so wul nɗiinan-nan mo, ki̶ moo sat nee, gwar ɗiisi wuri aa ɓal kì̵ Naan ɗi moo pet a Iiko Ɗiiɗes. 11Moo leyit nkaa wuri, a mpeeɗi ɓit mo ɗes, ɓe wurii c`in mbii aapo mo a yit furu mo shi koospaa ni. 12Amma kaaɗi mo cínzeen mpo ɗiiret ɗi Filip wuri sat mmo, nkaa mulki kì̵ Naan, ki̶ nkaa Jesu Kristi zak, ɓe mo c`in baptisma mish mo, ki̶ mat mo ɗi mo cínzeen. 13Simon shikáa fi̶ri wuri cínzeen zak, ɓe mo c`in baptisma nwuri. Aɓwoon mi̶ni, ɓe wuri so ndang Filip, ki̶ ni aapo nwuri mpee mbii lukshik mo, ki̶ ɗak ɗiinan-nan ɗi wuri naa Filip kì̵ c`in mo. 14Kaaɗi jeplop ɗi moo tong nJerusalem mo ki̶ling ne, nyem Sameriya mo kì̵ lappo Naan, ɓe mo lop Pita ki̶ Joon so pe mo ɗi. 15Kaaɗi Pita ki̶ Joon mo so wul, ɓe mo c`in aduwa nkaa nyem ɗi mo cínzeen ni. Mpeku Naan cín Riin Ɗiiɓang ɗi mmo. 16Mpeeɗi ba Riin Ɗiiɓang kì̵ sham nkaa memee ndi̶ghi̶n mo kas. Mo kì̵ c`in a baptisma mmo ndi̶ghi̶n sum kì̵ Daa Jesu ɓejee ɗak. 17Pita ki̶ Joon, mo lesar furu mo nkaa mo, ɓe Naan cín Riin Ɗiiɓang ngurum ni mo. 18Kaaɗi Simon wuri naa nee, moo cín Riin Ɗiiɓang ni nyem cínzeen ni mo, a mpeeɗi jeplop ni mo lesar furu mo nkaa mo, ɓe wuri cín shaghal mPita ki̶ Joon, ki̶ wuri sat mmo nee, 19"Wu cín iiko mi̶ni nwan zak, mpeku koo weye ɗi wan lesar fi̶na nkaa wuri, ɓe wuri kat Riin Ɗiiɓang ni zak." 20Amma Pita sat nSimon nee, "Wugha ki̶ shaghal fugha ni, wun nɗel nwus. Mpeeɗi wugha pan nee, wugha mmak seet mbiizughum kì̵ Naan a shi shaghal. 21Ba mee mbii ɓàl wugha ki̶ mun mɓut ɗak funu ɗiisi ni kas. 22A tuwap mpee pan fugha ɗiibish ni, ki̶ a c`in aduwa nDaa Naan, mpeku Naan fwo shikbish mu pan kì̵ putughup fugha ɗiibish ni ɗi nwugha. 23Mpeeɗi wan naa, wugha gam ki̶ zughur ɗiibish, ki̶ wugha aa ɗee a ɗii ɓuɓwaghat ndi̶ghi̶n shikbish." 24Simon wuri sat mPita ki̶ Joon nee, "Kussuk, wu ɗang pu Daa Naan, mpeku taji memee ndi̶ghi̶n mbii ɗi wu sat si mo kat wan kas." 25Aɓwoon ɗi Pita ki̶ Joon mo kì̵ satpo nkaa Jesu, ki̶ mo satpo Naan zak, ɓe kaaɗi mo a ar kàa nJerusalem, ɓe mo taa satpo ɗiiret ni ndi̶ghi̶n jepyil mo ɗes, ɗi mon nSameriya. 26Mee ngulop kì̵ Naan sat nFilip nee, "A yaghal a sham nkoghop ngween a ar ɗi ni yaghal nJerusalem so nGaza, ɗi ni a naar yil." 27Wuri yaghal so, ɓe wuri taakáat ki̶ mee ngu Ifiyopiya ɗi wuri a miyeermuut. Wuri a mee ngo ɗiiɗes ɗi wurii tap ki̶ long mu mishkagham ɗiimat, Kandes mu yil Ifiyopiya. Gwar ɗiisi wuri waa a nJerusalem mpee seyil nNaan. 28Kaaɗi wuri a ar baa waa, ɓe wurii tong ndi̶ghi̶n keke-bi̶ring, ki̶ wuri nkaa tang takarda mu ngusatpo kì̵ Naan Aizaya. 29Ɓe Riin Ɗiiɓang sat nFilip nee, "A so kus ki̶ keke-bi̶ring ɗiisi." 30Filip wuri su so kus ki̶ keke-bi̶ring ni, ɓe wuri ki̶ling gwar ni nkaa tang takarda mu ngusatpo kì̵ Naan Aizaya. Ɓe Filip tal pu gwar ni nee, "A manshii kì̵ mbii ɗi wugha nkaa tang ni aa?" 31Gwar ni lap nee, "Cirang ɗang wan mmanshii kì̵ ni ɗi ye? Kat ba a mee gurum kámshii kì̵ ni nwan kas ye?" Gwar ni sat nFilip kàa tong ashak ki̶ wuri. 32A po ɗi wuri nkaa tang ni ndi̶ghi̶n takarda ni nɗiisi, ɗi ni sat nee: "Wuri a kaa tum ɗi moo so ki̶ni, mpee fet si. Kaa tum ɗi nii ɗok titik ntoghom kì̵ ngusaa shoop ni si, Wuri ɗok titik aasi zak. 33Mpeeɗi wuri sham ki̶ káa fi̶ri, ɓe ba mo tokɗiyeel wuri nkaa zeen kas. A we mmak yaghal satpo nkaa dang fi̶ri mo ye? Mpeeɗi mo kì̵ mang seen fi̶ri ndi̶ghi̶n yil ni." 34Ɗangɓe ngu Ifiyopiya ni wuri tal pu Filip nee, "A sat nwan. Gyet ngusatpo kì̵ Naan ɗiisi wurii satpo ni a nkaa weye? Wuri satpo ni a nkaa shin aa? Koo a mee ngo ɗiici ye?" 35Ɓe Filip wuri ɗoghom satpo ɗiiret nkaa Jesu, shi po ɗi gwar ni kì̵ tang ni. 36Kaaɗi mon mmwaan a ar ni, ɓe mo j`i wul mpee ɗi am ɗi, ɓe ngu Ifiyopiya ni wuri sat nFilip nee, "A naa am si! A me ncíi ku wugha c`in baptisma nwan ye?" 37Filip lap nee, "katɗang a cínzeen nJesu shi putughup mi̶ndong azeen-nzeen, ɓe mon nc`in baptisma nwugha." Ngu Ifiyopiya ni wuri sat nee, "Wan cínzeen ne Jesu Kristi wuri a Làa kì̵ Naan azeen-nzeen." 38Ɓe gwar ni wuri le keke-bi̶ring ni ɗar. Ɓe Filip ki̶ gwar ni, mo sham ndi̶ghi̶n am ni weet, ɓe Filip wuri c`in baptisma ngwar ni. 39Kaaɗi mo kàa pwat mɓut am ni, ɓe Riin kì̵ Daa, mang Filip so ki̶ wuri mmee pee. Ba ngu Ifiyopiya ni wuri kuɗi kì̵ naa Filip zak kas. Amma wuri sekiyeen ki̶ mwaan fi̶ri, ki̶ wuri gam ki̶ retnyit. 40Gurum mo naa Filip ndi̶ghi̶n yil Azotas. Wuri so shipee-shipee ndi̶ghi̶n birni ni mo jir, mpee satpo ɗiiret ni, har wuri so wul nSizariya.

will be added

X\