Ɗak 6

1Kaaɗi nyemso ndang Jesu mo ɗoghom nkaa ɓul, ndi̶ghi̶n shiiteer mi̶ni mo, ɓe mee ɓi̶lep ni yaghal nnaar kì̵ nyem ɗi mo man po kì̵ nyem Greek mo kì̵ nyem Yahudi ɗi moo tong nJerusalem, mpeeɗi nyem ɗi mo man po Greek ni mo sat nee, ba moo c`in mbiise matkáa furu mo, mɓut mbiise ɗi moo ɓàk shipuus-shipuus kas. 2Aasi ɓe, jeplop ɗiikaghapaat baavul ni mo pi̶rep kuur kì̵ nyemso ndang Jesu mo jir, ki̶ mo sat nee, "Ba ni ret ku mu nook satpo kì̵ Naan, mpeku mu ɗee ɗi mɓàk mbiise kas. 3Mpeemi̶ni, ɗyemnaa mo, wu bi̶lip mee gurum mo povul nnaar fuu, ɗi mo ki̶ mi̶se ɗiiret, ki̶ ɗi mo gam ki̶ Riin Ɗiiɓang, ki̶ ɗi mo manshii ki̶ mbii zak. Mpeku mu le mo tap ɗi ki̶ ɗak ɓàk mbiise ni. 4Amma mun, mun nsekiyeen ki̶ c`in aduwa shidaar-shidaar ki̶ satpo kì̵ Naan." 5Po ɗi jeplop ni mo sat ni, ni ret nkuur kì̵ nyemso ndang Jesu ni mo jir. Aasi ɓe mo bi̶lip Stivin, ɗi wuri gam ki̶ cínzeen, ki̶ Riin Ɗiiɓang, ki̶ Filip, ki̶ Prokorus, ki̶ Nikanor, ki̶ Timon, ki̶ Parmenas, ki̶ Nikolas ngu Antiyok, ɗi gyet wuri kì̵ pi̶ring mpee nseyil Naan mu nyem Yahudi mo. 6Mo j`i ki̶ nyem ɗi mo kì̵ bi̶lip mo ntoghom kì̵ jeplop ni mo, ɓe mo c`in aduwa, ki̶ mo lesar furu mo nkaa mo. 7Po kì̵ Naan ni sekiyeen, har nyemso ndang Jesu ɗi mon nJerusalem mo ɓul ɗes hakyeng, ki̶ pris mo ɗes mo cínzeen nJesu Kristi. 8Stivin, ɗi wuri gam ki̶ ɗiiret ki̶ ɓal mu Naan, wuri c`in mbii lukshik mo, ki̶ mbii aapo ɗiinan mo nnaar kì̵ gurum mo. 9Amma pak gurum mo ɗi, ɗi mo a nyem kì̵ mee lu kì̵ Naan ɗi moo pet ni a lu kì̵ Naan mu nyem Frimen mo. Nyem ɗiisi mo a nyem Yahudi ɗi mo pwat nyil nSairin, ki̶ Alekzandriya, ki̶ nkoghop nyil nSilisiya, ki̶ mu yil nEshiya mo zak, mo yaghal ki̶ po mo, ki̶ ɓeetshik nkaa Stivin. 10Amma ba mo mak kat ɓal ɗi mon nɗar ku mo ɓeetshik ɗi ki̶ Stivin kas, mpeeɗi wuri katpo a shi seen ɗi Riin kì̵ Naan cín nwuri. 11Mo kar pak gurum mo a si̶sok, mpeku mo sat ɗi nee, "Mu ki̶ling Stivin wuri satpo ɗiibish nkaa Mosis, ki̶ wuri satpo ɗiibuu nkaa Naan zak." 12Po ɗi mo sat ni láa ngurum ni mo mɓut, ɓe pak nyem ɗiinan-nan mo, ki̶ pak nyemkám Waar kì̵ Mosis mo. Mo yaghal ki̶ tughup, mo so yaa Stivin, ɓe mo j`i ki̶ wuri ntoghom kì̵ kuur mu nyemɓeetpo mo. 13Ki̶ zak, mo j`i ki̶ nyemlangting mu ɗung mo, ɗi mo sat nee, "Gwar ɗiisi wurii satpo ɗiibish nkaa Lu kì̵ Naan ɗiiɗes ni, ki̶ nkaa Waar kì̵ Mosis shidaar-shidaar zak. 14Mu ki̶ling wurii sat nee, Jesu ngu nNazaret wurin nshirip Lu kì̵ Naan ɗiiɗes ni, ki̶ wurin ncighi̶r ki̶ mbii ɗi muu loghot kì̵ c`in mo, ɗi gyet Mosis wuri cín mo mmun." 15Nyem ɗi moo tong ɗi a pee ɓeetpo ni jir, mo ti̶ghi̶r yit furu mo nkaa Stivin, ɓe mo naa yit fi̶ri ni ɗee a kaa yit mu ngulop kì̵ Naan sí.

will be added

X\