Ɗak 5

1Mee gwar wuri ɗi, ɗi moo pet sum fi̶ri a Ananiyas, ki̶ mat fi̶ri Saffira, mo mang mee maar furu seet. 2Amma wuri ki̶ mat fi̶ri mo ɓwaghatpo furu ashak, mpeku mo sok pak shaghal ni ɗi, ɗangɓe Ananiyas wuri j`i cín kaghar shaghal nin njeplop ni mo. 3Amma Pita sat nee, "Ananiyas, a me le ɗangɓe a yit ku Shetan gam putughup fugha, har ku a c`in ɗung ɗi nRiin Ɗiiɓang ye? Mpeeɗi wugha, aa sok pak shaghal maar ni. 4Akuɗang aa mang maar ni a seet, ɓe ba jí ni a mugha kas aa? Ki̶ aɓwoon ɗi jí a mang maar ni a seet, ɓe ba shaghal ni a mugha kas me? A me le ɗangɓe wugha katpan mu c`in mbii ɗiisi ndi̶ghi̶n putughup fugha ye? Ba a c`in ɗung ɗiisi ni a ngurum mo kas, amma a c`in ɗung ni a nNaan." 5Kaaɗi Ananiyas wuri ki̶lingpo mi̶ni, ɓe wuri taa nyil, har wuri muut. Nyem ɗi mo ki̶ling muut ni jir, ɓe ki̶i̶rmuut ɗiiɗes ni yaa mo hakyeng. 6Zi̶lang mo j`i ɗel ndi̶ghi̶n lu ni, ɓe mo ɓwaghat kúm fi̶ri ni shi fuwaat, ɓe mo mang kúm ni put ki̶ ni a ti̶leng, mpeku mo so wum ɗi. 7Aɓwoon ɗi mo tong kaa awa kun si, ɓe mat fi̶ri Saffira wura j`i ɗel nlu ni. Ba wura man mbii ɗi ni kì̵ c`in kas. 8Pita tal pu wura nee, "Yi sat nwan, kyet a kyes kì̵ shaghal ɗi wu seet maar ni nɗiisi wa?" Wura lap nee, "ii, a kyes kì̵ shaghal ni mmi̶ni." 9Pita sat nwura nee, "A me le ɗangɓe wu ɓàlpo ashak ki̶ mish fii, mpeku wu kyam Riin kì̵ Daa Naan ɗi ye? Yi ki̶ling shii kì̵ nyem ɗi mo waa wum mish fii mo kì̵ j`i wul mpolu si. Mon mmang kúm fii ni put ki̶ ni aasi zak." 10Abet-abet ɓe wura sham taa nyil nshii kì̵ Pita, har wura muut. Kaaɗi zi̶lang ni mo j`i ɗel nlu ni, ɓe mo kat wura kì̵ muut, ɓe mo mang kúm ni put ki̶ ni a ti̶leng, ɓe mo so wum wura pushak ki̶ mish fi̶ra. 11Ki̶i̶rmuut ɗiiɗes ni yaa nyemcínzeen ni mo jir, ki̶ nyem ɗi mo ki̶lingpo nkaa mbii mi̶ni mo. 12Jeplop ni mo c`in mbii lukshik mo, ki̶ mbii aapo mo ɗes, nnaar kì̵ gurum ni mo. Nyemcínzeen ni moo kuur ashak jir ndi̶ghi̶n kapuk mu Solomon shi putughup ɗiimi̶ndong. 13Amma ndi̶ghi̶n kaghar gurum ɗi ba mo cínzeen kas, ɓe ba mee ngo mak gung, ɗi wurin mɓàlkáa fi̶ri ashak ki̶ mo kas. Jir ki̶si, ɓe gurum moo kwoop mo hakyeng. 14Gurum mo ɗes, mish mo ki̶ mat mo, mo cínzeen nDaa, ɓe mo ɓàlkáa furu mo ashak ki̶ nyemcínzeen ni mo, har nyemcínzeen ni mo ɗes hakyeng. 15Mpee mbii aapo ɗi jeplop ni mo c`in, ɓe gurum mo hi̶r nyemgok mo j`i le pukom ar nkaa mbiisaam mo, ki̶ ti̶barna mo, mpeku katɗang Pita wuri j`i ɗel, ɓe riin fi̶ri ni táa tuwaas pak nyemgok ni mo ɗi. 16Nyem ɗi mon ndi̶ghi̶n yil ɗi mo neer Jerusalem cighi̶r kaat mo j`i kuur. Mo j`i ki̶ nyem ɗi ba mo kat kagham kas, ki̶ nyem ɗi riin ɗiibish moo lejeel mmo, ɓe jeplop ni mo bar mo jir. 17Pris ɗiiɗes met jir ni, ki̶ nyem ɗi mo ashak ki̶ wuri jir, ɗi mo a saghan mu nyem Saddusi mo, mo gam ki̶ zughur mpee jeplop ni mo. 18Mo yak jeplop ni mo, mo so le mo ndi̶ghi̶n lushaghat. 19Amma mpar, ɓe mee ngulop kì̵ Daa wuri j`i wang polu shaghat ni mmo, ɓe wuri pwat ki̶ mo, ki̶ wuri sat mmo nee, 20"Wu so, wu ɗar ndi̶ghi̶n Lu kì̵ Naan ɗiiɗes ni, ku wu satpo mu seen ɗiisi ni ɗi ngurum mo jir." 21Kaaɗi mo ki̶lingpo mi̶ni, ɓe daɗaar mɓít-mɓít, mo so ɗel ndi̶ghi̶n Lu kì̵ Naan ɗiiɗes ni, ɓe mo yaa kámpo Naan ngurum mo. Ɗangɓe pris ɗiiɗes met ni wuri j`i ki̶ nyem ɗi mo ashak ki̶ wuri, ɓe mo pi̶rep nyemɓeetpo mo, ki̶ nyemnan-nan ɗii mu nyem Yahudi mo, mo kuur ashak jir. Ɓe mo lop laakám mo so nlushaghat ni, mpeku mo j`i ɗi ki̶ jeplop ni mo. 22Amma kaaɗi laakám ni mo so, ɓe ba mo so kat jeplop ni mo ɗi ndi̶ghi̶n lushaghat ni kas. Ɓe laakám ni mo baaj`i sat mmo nee, 23"Mu kat lushaghat ni a shishaghat riret, ki̶ nyemtappee ni moo ɗar ɗi mpolu ni mo, amma kaaɗi mu wang lu ni, ɓe ba mu kat jeplop ni mo ɗi kas." 24Kaaɗi ngo ɗiiɗes nkaa nyemtap Lu kì̵ Naan ɗiiɗes ni, ki̶ pris ɗiinan-nan mo ki̶lingpo mi̶ni, ɓe ni daampee mmo zam, mpee jeplop ni mo, mpeeɗi ba mo man mbii ɗi ni kì̵ c`in njeplop ni mo kas. 25Mee gurum j`i sat mmo nee, "Wu naa, nyem ɗi wu le mo ndi̶ghi̶n lushaghat sí, mon nkaa kam-kam ngurum mo ndi̶ghi̶n Lu kì̵ Naan ɗiiɗes ni." 26Yaksí ngo ɗiiɗes nkaa nyemtap Lu kì̵ Naan ɗiiɗes ni wuri so, ashak ki̶ pak nyemtap lu kì̵ Naan ni mo, mo so j`i ki̶ jeplop ni mo. Amma ba mo so j`i ki̶ mo a shi mee ɓal kas, mpeeɗi moo ki̶i̶r gurum ni mo, mpeku taji gurum ni mo car mo shi ndi̶ng kas. 27Kaaɗi mo j`i ki̶ jeplop ni mo, ɓe mo le mo ɗar ntoghom kì̵ nyemɓeetpo ni mo. Ɓe pris ɗiiɗes met jir ni wuri tal pu Pita ki̶ Joon nee, 28"Mun kì̵ cíi nwun shiɓal ne, taji wu baa wu kám mee mbii ngurum mo ndi̶ghi̶n sum kì̵ Jesu kas. Amma mbii ɗi wuu c`in ɗiisi ni, wuu gung a mpeku wu sat ɗi ngurum mo ne, a mun tu gwar ɗiisi ni, ki̶ har wu gam Jerusalem shi kám fuu ɗiisi ni zak." 29Amma Pita ki̶ jeplop ni mo, mo lap mmo nee, "Ni a ting ku mu c`in a mbii ɗi Naan sat, met mbii ɗi gurum mo sat. 30Jesu ɗi wun kì̵ tu wuri, ɗi wu pwas wuri nkaa shiyeepyoghom, ɓe Naan mu puun funu mo, wuri kì̵ yaghal ki̶ Jesu a peemúut. 31Naan wuri kì̵ yaghal ki̶ Jesu a peemúut, ɓe yaksi Jesu wurii tong nsarse kì̵ Naan, ki̶ a wuri a nguti̶leng ki̶ nguɓam zak. A wuri wang ar tuwap nyem Isreil mo, mpeku Naan fwo shikbish furu mo ɗi zak. 32Mun a langting kì̵ mbii ɗiisi mo, ki̶ Riin Ɗiiɓang ɗi Naan wuri cín nyem ɗi mo c`in ɗyen fi̶ri, moo c`in langting ni aasi zak." 33Kaaɗi kuur kì̵ nyemɓeetpo ni mo ki̶lingpo mi̶ni, ɓe ni láa mmo mɓut hakyeng, har mo riɓet twa jeplop ni mo. 34Amma mee ngu Farisi ɗi wurii kám Waar kì̵ Mosis, ɗi sum fi̶ri a Gamaniyel, gurum mo jir moo cín ɗiiɗes nwuri. Wuri yaghal ɗar a ting ndi̶ghi̶n lu ɓeetpo ni, ɓe wuri le ku mo pwat ki̶ jeplop ni mo a ti̶leng. 35Ɗangɓe wuri sat nyemɓeetpo ni mo nee, "Ɗyemnaa mo, nyem Isreil mo. Wu tap ki̶ mbii ɗi wuu riɓet c`in nin ndaas ɗiisi mo. 36Gyet yam, ɓe mee gwar, ɗi moo pet sum fi̶ri a Teyudas, wuri kì̵ kyam yaghal aasi. Gyet wuri lekáa fi̶ri a kaa mee ngo ɗiiɗes si, har gurum mo kaa ɗarifeer si mo so ndang wuri. Amma aɓwoon ɗi mo tu wuri, ɓe nyem ɗi mo so ndang wuri ni jir, mo rangkáa, har ba mo ɗee a mee mbii kas. 37Aɓwoon kì̵ Teyudas, ɓe Judas, mee ngu Galili wuri yaghal zak, ndi̶ghi̶n ɓit ɗi moo ran ɗuu kì̵ gurum mo ɗi, har wuri dul pak gurum mo so ndang shin, amma aɓwoon ɗi mo tu wuri zak, ɓe nyem ɗi mo so ndang wuri jir, mo rangkáa. 38Yaksi wan sat nwun, taji wu c`in mee mbii ndas ɗiisi mo kas. Wu yit mo mmusut. Mpeeɗi katɗang po ɗi moo kám ngurum mo, ki̶ ɗak ɗi moo c`in ni a mu mi̶se mu gurum, ɓe nin nyaghal ɗee a ɗiibuu. 39Amma katɗang mbii ɗi moo c`in ni a mu Naan, ɓe ba mun mmak se koghorong nkaa mo kas. Wu tap taji wu ɗee kaa wun a nlek kì̵ Naan si kas." 40Nyemɓeetpo ni mo lappo kì̵ Gamaniyel ni. Mo pi̶rep jeplop ni mo j`i ɗel zak, ɓe mo si̶ram mo, ki̶ mo sat mmo shiɓal nee, "Taji wu baa wu sat mee po ɗi ndi̶ghi̶n sum kì̵ Jesu zak kas." Aɓwoon ki̶ po mi̶ni, ɓe mo ɓwot mo. 41Jeplop ni mo pwat ntoghom kì̵ nyemɓeetpo ni mo shi retnyit, mpeeɗi mo mak shwaajeel mpee sum kì̵ Jesu. 42Yaghal mparmi̶ni, ɓe ba mo nook kám ki̶ satpo kì̵ Naan ngurum mo, ndi̶ghi̶n Lu kì̵ Naan ɗiiɗes ni ki̶ ndi̶ghi̶n tulu kì̵ gurum mo, koo puus ɗiiɗang ye kas, nee Jesu a Kristi.

will be added

X\