Ɗak 4

1Kaaɗi Pita ki̶ Joon, mo ɗi nkaa satpo ngurum ni mo, ɓe pak pris mo, ki̶ ngo ɗiiɗes mu nyemtap ki̶ Lu kì̵ Naan ɗiiɗes, ki̶ pak nyem Saddusi mo, mo j`i pe mo ɗi. 2Ni láa mmo mɓut, mpeeɗi jeplop ɗiivul ni, mo nkaa kám ngurum mo nee, Jesu wuri kì̵ yaghal a peemúut. Ɗi ni kám ne, katɗang gurum mo murap, ɓe mon nyaghal a peemúut mmi̶ni. 3Mo yaa Pita ki̶ Joon, ɓe mo so shaghat mo teer nlu shaghat, mpeeɗi kansi̶ghi̶n kì̵ c`in. 4Amma gurum mo ɗes mo cínzeen mpo ni, har daas mo wul duɓu paat. 5Daɗaar ni, ɓe nyemti̶leng mu nyem Yahudi mo, ki̶ nyemnan-nan furu mo, ki̶ nyemkám Waar kì̵ Mosis mo, mo kuur ashak, nJerusalem. 6Ki̶ Aanas ɗi wuri a pris ɗiiɗes met jir, wuri ɗi ashak ki̶ mo, ki̶ Kayafas, ki̶ Joon ki̶ Alekzanda, ki̶ nyem ɗi mo a dang kì̵ pris ɗiiɗes met jir ni zak. 7Kaaɗi mo lop ku mo so j`i ki̶ Pita ki̶ Joon, ɓe mo le mo ɗar ntoghom furu. Ɓe mo ɗoghom tal pu mo nee, "A shi iiko kì̵ we, koo a ndi̶ghi̶n sum kì̵ we, ɓe wuu c`in mbii ɗiisi ye?" 8Mpeeɗi Pita wuri gam ki̶ Riin Ɗiiɓang, ɓe wuri lap mmo nee, "Wun nyemti̶leng mu gurum mo, ki̶ nyemnan-nan mo. 9Katɗang wuu fwor mun cicinsi a mpee ɗiiret ɗi mo c`in ngwar ɗi jí wuri a kukut si, ki̶ nkaa ar ɗi gwar ni wuri ɗee a ɗiibi̶bar si, 10ɓe wu yit ku mbii ɗiisi ɗee a mi̶man pe wun ɗi, ki̶ nyem Isreil mo jir nee. A shi sum kì̵ Jesu Kristi ngu Nazaret, ɗi wu pwas wuri nkaa shiyeep har wuri muut, amma Naan yaghal ki̶ wuri a peemúut. A mpee Jesu, ɗangɓe gwar ɗiisi wurii ɗar ntoghom fuu a ɗiibi̶bar. 11A Jesu wuri a ngo ɗi mo kì̵ ten ran po nkaa wuri ndi̶ghi̶n takarda kì̵ Naan nee, 'Jwak ɗi wun nyem ɗiklu mo wu kwar, ɓe a ni ɗee a jwak ɗiikoghop ni met jir ndi̶ghi̶n kwang kì̵ lu ni.' 12Ba gurum mon nwaa mak kat mee ɓam pe mee ngo ɗi kas. Mpeeɗi ndi̶ghi̶n yil ɗiisi jir, ɓe ba Naan wuri ki̶ c`in iiko mmee ngo, mpeku wuri ɓam gurum mo ɗi kas, see a ndi̶ghi̶n sum kì̵ Jesu Kristi ɓejee ɗak" 13Kaaɗi mo naa Pita ki̶ Joon, mo katpo shiɓal, ba ki̶ mee ki̶i̶rmuut kas, ɓe ni aapo mmo, mpeeɗi ba Pita ki̶ Joon mo a mee mbii kas, ki̶ ba mo kì̵ c`in mee makaranta ɗiijurung kas zak. 14Ba nyemɓeetpo ni mo mak c`in mee mbii kas, mpeeɗi mo naa gwar ɗi mo kì̵ bar wuri ni, wurii ɗar ɗi ashak ki̶ Pita ki̶ Joon. 15Aasi, ɓe mo le ku mo pwat ki̶ Pita ki̶ Joon, mpeku mo ɓeet ɗi ashak mbii ɗi mon nc`in ki̶ Pita ki̶ Joon. 16Mo sat nee, "Mun nc`in a me ki̶ nyem ɗiisi mo ye? Azeen-nzeen gurum ɗi moo tong ndi̶ghi̶n nJerusalem jir, mo kì̵ man nee, Naan wuri kì̵ c`in mee mbii lukshik ɗiiɗes nsar kì̵ Pita ki̶ Joon, ki̶ ba mun mmak cíipo ni kas. 17Mpeku taji gurum mo ɗes mo ki̶lingpo ɗiisi ni kas, ɓe wu yit ku mu cíi mmo ne, taji mo ba satpo ɗi mmee gurum ndi̶ghi̶n sum ki̶ Jesu kas." 18Kaaɗi mo waa pet Pita ki̶ Joon mo ɗel, ɓe mo sat mmo shiɓal nee, "Taji wu baa wu sat meepo, koo wu kám mee mbii ndi̶ghi̶n sum kì̵ Jesu kas." 19Amma Pita ki̶ Joon mo lap mmo nee, "Wun shikáa fuu wu ɓeet, kyet nin nret nNaan nyit ku mu c`in a mbii ɗi wun sat aa? Koo a mbii ɗi Naan sat ye? 20Ba mun nnook satpo nkaa mbii ɗi mu naa, ki̶ mbii ɗi mu ki̶ling kas." 21Aɓwoon ɗi mo kì̵ gwak mo shiɓal ki̶ leki̶i̶rmuut mmo, ɓe mo ɓwot mo, ba nyemɓeetpo ni mo mak cín mee kar ɗiibish mPita ki̶ Joon kas, mpeeɗi gurum ni mo jir, mon nkaa kwoop Naan mpee mbii ɗi mo naa ni c`in. 22Gwar ɗi mo bar wuri shi ar ɗii mu aapo ni, ɓit fi̶ri mo met nlaarfeer. 23Kaaɗi mo ɓwot Pita ki̶ Joon, ɓe mo so pe niyee furu mo ɗi. Mo sat niyee furu ni mo, mbii ɗi pris ɗi nan-nan mo, ki̶ nyemnan-nan mo sat mmo jir. 24Kaaɗi nyemcínzeen ni mo ki̶lingpo mi̶ni, ɓe mo c`in aduwa nNaan shi putughup mi̶ndong, nee, "Daa Ɗiihai, ɗi wugha le ɗeng ki̶ yil, ki̶ am bahar mo, ki̶ mbii ɗi mon ndi̶ghi̶n mo jir. 25Gyet a shi Riin Ɗiiɓang, ɓe wugha satpo nsar kì̵ ki̶rom fugha ɗi wuri a puunkaam funu Devid nee: 'A me le ɗangɓe gurum ɗi ba mo a nyem Yahudi mo kas, mo yaghal tughup ye? A me le ɗang gurum ni mo ki̶ pan ɗiibish ndi̶ghi̶n putughup furu mo, mpee c`in mbii ɗiibuu mo ye? 26Mishkagham ɗii mu yil ni mo, mo kì̵ ɗak sut furu mo mpee lek, ki̶ nyemmulki mo kì̵ ɓàlkáa furu mo ashak, mpeku mo c`in lek ɗi nkaa Daa Naan ki̶ Kristi fi̶ri zak.' 27Mpeeɗi azeen-nzeen ndi̶ghi̶n birni ɗiisi, ɓe Herot ki̶ Pontus Pailet, ashak ki̶ nyem ɗi ba mo a nyem Yahudi mo kas, ki̶ nyem Isreil mo, mo ki̶ kuur ashak, mpeku mo ɗee a shaarlek ki̶ nguɗak fugha Jesu Ɗiiɓang, ɗi wugha kì̵ bi̶lip wuri, har wugha le wuri ɗee a Kristi. 28Mo kuur ashak, mpeku mo c`in koo a mbii ɗiiɗang ye ɗi wugha kì̵ ten leshii iiko fugha ne, mbii ni mon nc`in aasi. 29Yaksi Daa Naan a naa ki̶i̶rmuut ɗi moo le mmun. A cínɓal mmun ki̶rom fugha mo, mpeku mu satpo fugha ɗi shiɓal, ba ashak ki̶ ki̶i̶rmuut kas. 30A le ku iiko fugha ni bar gurum mo, ki̶ a le ku mbii lukshik mo ki̶ mbii aapo mo c`in ndi̶ghi̶n sum kì̵ nguɗak fugha Jesu Ɗiiɓang." 31Kaaɗi mo kyes c`in aduwa mi̶ni, ɓe peeɗi moo kuur ɗi ashak, ni tungpee. Mo gam ki̶ Riin Ɗiiɓang jir, har mo yaa satpo kì̵ Naan shiɓal agaak, ba ashak ki̶ ki̶i̶rmuut kas. 32Nyem ɗi mo cínzeen nJesu jir, ɓe pan furu mo, ki̶ mi̶se furu mo ɗee a ɗiimi̶ndong jir zak. Ba mee gurum ndi̶ghi̶n mo mak sat nee, long fi̶ri ni a mi̶ɗi mmi̶shin kas, amma mo le mbii furu mo jir, ashak. 33Jeplop ni mo c`in langting shi iiko ɗiiɗes, nkaa yaghal kì̵ Daa Jesu a peemúut. Daa Naan wuri le ɗiiret nkaa mo jir hakyeng. 34Ba mee ngo ɗee, a ngujeel ndi̶ghi̶n mo koo mi̶ndong kas, mpeeɗi nyem ɗi mo ki̶ maar mo, ki̶ lu mo, ɓe mo si̶rep mo jir, 35har mo j`i cín shaghal kì̵ mbii ɗi mo kì̵ si̶rep ni mon njeplop kì̵ Jesu ni mo. Ɗangɓe jeplop ni mo ɓàk shaghal nin nyemcínzeen ni mo ntiit-ntiit, mpeku koo ngo ɗiiɗang ye, ɓe wuri kat mbii ɗi wuri riɓet. 36Kaaɗi mo nkaa c`in mi̶ni ki̶si, ɓe Josep ngu Livai, ɗi wuri put a nyil nSaiprus, ki̶ ɗi jeplop ni mo lesum nwuri a Barnabas, (ɗi shii kì̵ sum mi̶ni a nee, Ngo ɗi wuri caapee). 37Wuri mang mee maar fi̶ri seet, ɓe wuri j`i cín shaghal ni jir njeplop ni mo.

will be added

X\