Ɗak 27

1Kaaɗi mo ɓeet ne, mun nɗel jirgi am, ku mo so ɗi nyil Itali, ɓe mo le Pool ki̶ pak nyem ɗi mo a ɓuɓwaghat, nsar kì̵ mee ngo ɗiiɗes nkaa sooja mo, ɗi moo pet sum fi̶ri a Juliyus, ɗi ni a saghan mu nyemtap kì̵ mishkagham Agustus. 2Mu ɗel ndi̶ghi̶n mee jirgi am ɗi ni tong a nyil Adramitiyum j`i, ki̶ nin ndung yaghal mpee so nkoghop yil ɗi mon nkoghop yil Eshiya mo. Ɓe mu yaghal mwaan ni ndi̶ghi̶n jirgi ni. Aristaakus mee ngu Masidoniya mu yil nTasoloni, wuri ɗi ashak ki̶ mun zak. 3Daɗaar ni, ɓe mu wul nSidon. Juliyus wuri c`in ɗiiret mPool, wuri cínpee mPool ku wuri so pe shaar fi̶ri mo, mpeku mo ɓam wuri ɗi. 4Kaaɗi mu yaghal mpeemi̶ni, ɓe mu so nkì̵ ng kì̵ yil nSaiprus ni, mpeeɗi kut ni daampee mmun zam. 5Aɓwoon mi̶ni, ɓe mu so mu wul mɓin bahar ɗi nin nkoghop nSilisiya ki̶ Pamfiliya. Ɓe mu so mu wul mMira ɗi nin nyil nLisiya. 6A mMira ni, ɓe ngo ɗiiɗes nkaa sooja mo, wuri kat mee jirgi am ɗi ni tong Alekzandriya j`i, ɗi nin ndung so Itali, ɓe wuri le mun ndi̶ghi̶n ni. 7Mu c`in teer mo ɗes-ɗes mun mmwaan lee-lee, nkaa am bahar ni, har a dikyet ɗang mu j`i mu wul kus ki̶ Nidus. Kaaɗi ba kut ni yit mmun so ɗi a kiyeen kas, ɓe mu waa mu yaa ar ni nkì̵ ng kì̵ yil nKrit, kus ki̶ Salmone. 8Dikyet ku mu j`i mu wul ɗi pukom ɗi̶ghi̶r ni, har mu j`i mu wul mmee peeɗi moo pet ni a peeɗar ɗiiret, ɗi ni kus ki̶ birni nLasiya. 9Mpeeɗi mun kì̵ yém ɗi mpeemi̶ni mpee shii teer mo ɗes, ɓe kaaɗi mu yaa mwaan, ɓe ni j`i ki̶ jeel ɗes, mpeeɗi tar mwaan nkaa am ni kì̵ ten ɗel, ki̶ ni aɓwoon kì̵ tartong ki̶ neen, ɓe Pool wuri satpo nyem ɗi mo ndi̶ghi̶n jirgi ni. 10Wuri sat mmo nee, "Daa mo, wan naa mwaan funu ɗiisi nin nɗen ki̶ jeel, ki̶ lée ɗi mun ki̶ mo ndi̶ghi̶n jirgi ni mon nwat, ki̶ jirgi mi̶nin nwat, har ki̶ seen funu mo zak." 11Amma ba ngo ɗiiɗes nkaa sooja ni mo, wuri kak po ɗi Pool sat kas, see wurii ki̶ling a po kì̵ ngutung jirgi ni ɗak, ki̶ mu ngu jirgi ni met mbii ɗi Pool sat nwuri. 12Ba peeɗar kì̵ jirgi am ɗiisi nii ret tarkut kas, aasi ɓe ni̶ghi̶n kì̵ gurum ni mo ɓeet nee, gyal mu yaghal aku mpeemi̶ni, ku koo ɗi arang ye ɓe mu wul ɗi nFoniks, ɗi ni a mee pee am canɗar ɗiiret ndi̶ghi̶n birni nKrit, nii naa koghop ngween, nkoghop puus ru-ru, ki̶ nkoghop nɗeng nkoghop puusru zak, mu hos tarkut a mpeemi̶ni. 13Kaaɗi kut ni ɗoghom cut pee lee-lee nkoghop ngween, ɓe mo pan ne, nin nj`i nwuɗun ntiit ki̶ pan furu mo, ɓe mo ɗul angko, ki̶ mo tung jirgi ni so kus ki̶ pukom ɗi̶ghi̶r mu yil nKrit. 14Amma kaaɗi mo lang ɗiilee, ɓe mee kut ɗiiɗes ɗi moo pet ni a Nofista ni cutpee j`i ɗi nkaa birni ni. 15Kaaɗi kut ɗiiɗes ni cut jirgi ni, ɓe ba jirgi ni mak so nkoghop peeɗi kut ni ki̶ j`i ɗi kas. Ɓe mo yit kut ni tup mun so ɗi mmee nkoghop ɗik. 16Mu ɗel nkì̵ ng kì̵ rep mee yil ɗi am neer ni, ɗi moo pet ni a Kauda. A dikyet ɗang mu mak ɓwaghat làa jirgi ni le ɗar. 17Aɓwoon ɗi mo ki̶ ɗiyeep làa jirgi ni le ndi̶ghi̶n jirgi ɗiiɗes ni, ɓe mo ɓwaghat teng mo cighi̶r nkaa jirgi ɗiiɗes ni. Mo sham ki̶ fuwaat mu jirgi ni mo. Mpeeɗi mo ki̶i̶r nee, taji kut ni tup jirgi ni so shoor nkaa pukom ɗiyees nSirtis kas. Mo ɗul angko kì̵ jirgi ni kàa ndi̶ghi̶n am ni ku mo yit, ku kut ni tup jirgi ni so ɗi. 18Mpeeɗi kut ni ɗes zam, ki̶ ni fes yoghon mun ɗes zam. Daɗaar ni, ɓe mo ɗoghom hi̶r pak lee ɗi mo ndi̶ghi̶n jirgi ni car mɓut am. 19Parpuus ɗiikun ni zak, ɓe mo shikáa furu, mo hi̶r lee jirgi ni mo car mɓut am zak. 20Mu c`in teer mo ɗes, ba mu mak naa puus koo zar mo kas. See a kut ɗiiɗes, kì̵ ngummbit mo kàa paa mun ɗak, har ni le ku mu put ki̶ putughup ne ba mun mbar kas. 21Mpeeɗi gurum ni mo kì̵ c`in teer mo ɗes nɗin nse mbiise, ɓe Pool wuri yaghal nnaar furu, ɓe wuri sat nee, "Daa mo, katɗang ɓe jí wu ki̶lingpo fi̶na, ɓe ba jí wun nyaghal ndi̶ghi̶n yil nKrit, ku wu shwaajeel ɗiisi, ki̶ wu ɓi̶lang nlée fuu mo ki̶rong kas. 22Yaksi wan sat nwun, wu yaa putughup fuu mo, mpeeɗi ba mee gurum ndi̶ghi̶n wun, wurin mmuut kas, see a jirgi nin mpyan rash-rash ɗak. 23Mpeeɗi doghon-doghon mpar, ɓe mee ngulop kì̵ Naan ɗi wan a mi̶ri, ki̶ ɗi wan ki̶n seyil nwuri zak, wuri j`i kámshin nwan. 24"Ɓe wuri sat nwan nee, 'Taji ki̶i̶rmuut yaa wugha kas Pool. Ni a ting wughan nɗar ntoghom kì̵ Siza. A naa Naan wuri kì̵ c`in ɗiiret nwugha, ashak ki̶n nyem ɗi mo ndi̶ghi̶n jirgi ni jir. Ba mee gurum ndi̶ghi̶n jirgi nin mmuut kas.' 25Mpeemi̶ni, daa mo, wu c`in retnyit. Mpeeɗi wan cínzeen nNaan nee, mbii ɗi mo kám nwan, ɓe nin nc`in aasi. 26Amma jir ki̶si ɓe kut nin ntup jirgi ni shoor nkaa mee yil ɗi am neer ni cighi̶r kaat." 27Ndi̶ghi̶n shiiteer ɗiikaghapaat baafeer ni, ɓe kut ni tup mun kàa ki̶ sham ndi̶ghi̶n am bahar mu Adriya. Ɓe nnaar par, ɓe nyemjirgi ni mo pan nee, muu wul kus ki̶ mee yil. 28Ɓe mo kyam jurung kì̵ am ni, ɓe mo kat ni a shii mo ɗari mi̶ndong ki̶ laarvul (120). Kaaɗi mu gyes so ɗiilee, ɓe mo baa kyam jurung kì̵ am ni ɗi zak, ɓe mo kat ni wul a shii laar pofeer (90). 29Mpee ki̶i̶rmuut ɗi ne, mmeeɓe, kut nin nso shoor jirgi ni nkaa jwak, ɓe mo fwoon angko mo sham feer mɓwoon kì̵ jirgi ni, mpeku jirgi ni ɗar ɗi caghat, mpeeɗi mo le pan nkaa ɓit ɗi nin ndung mang. 30Nyemtung jirgi ni mo nkaa tang ar ɗi mon nsu yit jirgi ni ɗi, har mo kì̵ ten shang làa jirgi ni sham mɓut am bahar ni. Mo c`in ki̶si a mpee num gurum mo, ku mo naa ɗi ne, wuɗun a ndung fwo angko ɗi mon mpukiyeen kì̵ jirgi ni, ɗi moo ɓwot sham si. 31Ɓe Pool wuri sat ngo ɗiiɗes mu sooja ni mo nee, "Katɗang ɓe ba nyemtung jirgi ni mo tong ɗi ndi̶ghi̶n jirgi ni kas, ɓe wun mmurap jir." 32Ɓe sooja mo ki̶ram teng mu làa jirgi ni, mo yit ni sham taa ndi̶ghi̶n am ni, har kut mang ni so ki̶ ni. 33Kaaɗi ɓit kus ki̶ mang, ɓe Pool sat ngurum ni mo jir ku mo se mbiise, wuri sat nee, "A teer mo kaghapaat baafeer nɗiisi, ɓe wun pu tong gongpee, ki̶ ba wuu se mee mbiise kas. 34Yaksi ki̶n ɗang pu wun, mpeku wu se mbiise, mpeeɗi mi̶nin ncínɓal wun ndi̶ghi̶n suk fuu mo. Ba mee shoopkáa kì̵ mee gurum mi̶ndong ndi̶ghi̶n wun nin nlagham kas." 35Kaaɗi Pool wuri satpo mi̶ni, ɓe wuri mang bred, ɓe wuri c`in aduwa mu pi̶lang Naan a yit kì̵ gurum ni mo jir, ɓe wuri yal bred ni, ɓe wuri yaa se ni. 36Ɓe gurum ni mo jir mo kat retnyit, ki̶ mo shikáa furu mo se bred ni zak. 37Mun gurum ɗi mun ndi̶ghi̶n jirgi am ni jir, mu wul ɗari vul ki̶ laarpovul baapeemee (276). 38Kaaɗi gurum mo se mbiise mo hi̶ɓi̶l, ɓe mo hi̶r kàss alkama ɗi ni ndi̶ghi̶n jirgi ni, mo car sham mɓut am bahar ni, ku jirgi ni pan fiyeel ɗi. 39Kaaɗi ɓitmang, ɓe ba nyemtung jirgi ni mo man yil ɗi mo ɗi ni kas, amma mo naa mee pukom ɗi̶ghi̶r ɗi ni ki̶ ɗiyees, ɓe mo ɓeet nee, katɗang ni mak c`in, ɓe mo so ki̶ jirgi ɗi pukom ni. 40Ɓe mo saa teng ɗi mo yaa angko ni mo, ku mo yit angko ni mo mɓut am bahar ni, ki̶ mo fwoon teng ɗi moo yaa mbii cighi̶r ki̶ jirgi ni. Ɓe mo ɗiyeep fuwaat ɗi nin mpukiyeen ki̶ jirgi ni nkoghop ɗi kut ki̶ j`i ɗi, ɓe mo yaa ar so pukom ɗi̶ghi̶r. 41Amma kaaɗi mu wul mmee peeɗi kut ki̶ cut am ni j`i kaat ɗi, ɓe pukiyeen kì̵ jirgi ni ɗel sham ru mɓut ɗiyees, har ba ni kuɗi ki̶ tungpee kas, ɓe nkoghop mɓwoon kì̵ jirgi ni ɗoghom pyan, mpee ɓal kì̵ kut ɗi nii cut ni. 42Ɓe sooja ni mo ɓeetpo, mpee twa nyem ɗi mo a ɓuɓwaghat jir, mpeku taji mo c`in lung, ku mo so lagham ɗi kas. 43Amma ngo ɗiiɗes nkaa sooja ni mo, wurii riɓet ɓam Pool, ɓe wuri cíi mmo. Wuri le ku nyem ɗi mo man lung jir, mo mi̶rep sham mɓut am ni, ku mo c`in lung so wul ɗi a po ɗi̶ghi̶r. 44Aɓwoon mi̶ni, ɓe kaghar gurum ni mo mi̶rep sham taa nkaa katako mo, ki̶ pak mo nkaa yoghom kì̵ jirgi ɗi ni pyan ni zak.

will be added

X\