Ɗak 22

1"Ɗyemnaa mo, ki̶ puun fi̶na mo, wu lekom ku wu ki̶ling wan ɗi, ku wan satpo ɗi nwun agaak, ɗi nin nkám nee, ba wan ki̶n c`in mee mbii ɗiibish kas." 2Kaaɗi mo ki̶ling wuri satpo ni mo a shi li̶po mu nyem Yahudi mo, ɓe mo si̶ghi̶t ɗok titik. Ɓe Pool wuri sat nee, 3"Wan a ngu Yahudi, ki̶ mo làa wan a nTarsus mu yil nSilisiya. Amma wan wurang a ndi̶ghi̶n birni ɗiisi. Wan c`in makaranta a nsar kì̵ Gamaniyel. Mo kì̵ tap kám nwan riret hakyeng ndi̶ghi̶n Waar ɗi mo a mu puun funu mo, har wan ki̶ zughur ɗes zam mpee c`in ɗak kì̵ Naan, kaa wun si. 4Har gyet wan ki̶n lejeel ɗes, nkaa nyem ɗi moo so ndang Jesu Kristi, ki̶ zak, wan ki̶n twa pak mo, ki̶ wan ki̶n ɓwaghat mat mo ki̶ mish mo, har wan le mon lushaghat. 5Koo a pris ɗiiɗes si, ki̶ nyemnan-nan ɗiisi mo, ɓe mon mmak c`in langting fi̶na, nee po ɗi wan sat ni azeen. Mpeeɗi gyet wan ki̶n lap takarda a pu mo, mpeku wan so ki̶ ni nɗyemni̶ghi̶n funu nyem Yahudi mo, ɗi moo tong ndi̶ghi̶n Damaskus, ku wan yak nyemso ndang Jesu, ɗi moo tong birni mi̶ni. Mpeku wan j`i ɗi ki̶ mo nJerusalem a ɓuɓwaghat, ku mo lejeel ɗi mmo." 6"Kaaɗi wan a ar so mwaan ni, ɓe wan j`i nwul kus ki̶ Damaskus, kaa puus a naar si. Nɗin mman, ɓe mee peeɓang ɗiiɗes, ni tong aɗeng sham ɓangpee ɗi wan ɗi cighi̶r kaat. 7Ɓe wan taa nyil, ki̶ wan ki̶ling mee ɗoo nii sat nwan nee, 'Sool, Sool, a me le ɗang aa cín jeel nwan ye?' 8Ɓe wan tal nee, 'A wugha weye Daa?' Wuri sat nwan nee, 'A wan Jesu ngu Nazaret ɗi wugha nkaa lejeel nwan.' 9Nyem ɗi mo ashak ki̶ wan, mo naa peeɓang ni, amma ba mo ki̶ling ɗoo ki̶ ngo ɗi wurii katpo kì̵ wan ni kas. 10Ɗangɓe wan tal nee, 'Daa, wugha riɓet ku wan c`in a meye?' Ɓe Daa wuri sat nwan nee, 'A yaghal a so nDamaskus, a mpeemi̶ni ɓe mon nsat mbii mo nwugha jir, ɗi wan ki̶n le mo mpeku wugha c`in ɗi.' 11Wan cighi̶r nɗee a vum, mpee ɓal kì̵ peeɓang ni. Ɗangɓe nyem ɗi mo ashak ki̶ wan, mo yaakam nwan, ɓe mo so ki̶ wan nDamaskus. 12"Mee gwar ɗi moo petsum fi̶ri a Ananiyas, wuri a mee nguso ndang Naan, ɗi wurii c`in mbii ɗi Waar kì̵ Mosis moo sat riret. Nyem Yahudi ɗi moo tong nDamaskus jir, moo cín ɗiiɗes nwuri. 13Wuri j`i ɗar kus ki̶ wan, ɓe wuri sat nwan nee, 'Ɗyemni̶ghi̶n fi̶na Sool, a naapee' Abet-abet ɓe wan naapee, har wan naa wuri. 14Ɗangɓe wuri sat nwan zak nee, 'Naan kì̵ puun funu mo, wuri kì̵ bi̶lip wugha, mpeku wugha man mbii ɗi Naan wuri riɓet ku wugha c`in ɗi, ki̶ mpeku wugha naa Ngo ɗin ndi̶re si, ki̶ a ki̶ling ɗoopo fi̶ri ɗi zak. 15Mpeeɗi wugha nɗee a langting fi̶ri, mpeku wugha satpo ɗi ngurum mo nkaa mbii ɗi wugha naa, ki̶ mbii ɗi wugha ki̶ling zak. 16Yaksi, ɓe aa gong a meye? A yaghal ku mo c`in baptisma ɗi nwugha. Mpeku wugha ɗang ɗi ndi̶ghi̶n sum kì̵ Daa, ku wuri vwang shikbish fugha mo ɗi.' " 17"Kaaɗi wan baaj`i nJerusalem, ɓe wan nkaa c`in aduwa ndi̶ghi̶n Lu kì̵ Naan ɗiiɗes, ɓe wan c`in mee sughun. 18Wan naa Daa, ɓe wuri sat nwan nee, 'A yaghal kyen, a put aku ndi̶ghi̶n Jerusalem ni, mpeeɗi ba mon nlap langting ɗi wugha sat ni nkaa wan kas.' 19Wan lap nee, daa, mo shikáa furu, mo man nee, gyet wan kì̵ ɗel koo a lu kì̵ Naan ɗiiɗang ye, mpeku wan twa nyem ɗi mo cínzeen nwugha, ki̶ gyet wan ki̶n ni̶ram mo zak. 20Ki̶ zak, kaaɗi gyet mo tu Stivin ngusatpo fugha, ɓe gyet wan ki̶n ɗar ɗi zak, ki̶ gyet wan mɓwoon kì̵ mbii ɗi mo c`in ni jir, har gyet a wan yaa nli̶r kì̵ nyem ɗi mo tu Stivin ni zak. 21Ɗangɓe Daa wuri sat nwan nee, 'A yaghal a so, mpeeɗi wan nlop wugha so jong-jong, pe nyem ɗi ba mo a nyem Yahudi mo kas.' " 22Kuur kì̵ gurum ni mo lekom pe ki̶ling Pool har j`i wul mpo ɗi wuri sat ni, ɗangɓe mo waa baa fwo or ɗi zak, mo sat nee, "Wu tu wuri! Wu tu wuri! Wu baa ki̶ gwar mi̶ni aku ndi̶ghi̶n yil ni. Ba ni ret ku mo yit gwar mi̶ni ɗi mmeen kas!" 23Kaaɗi mo nkaa fwo or ni, ki̶ mo nkaa taat nli̶r furu mo kàa aɗeng, ki̶ mo nkaa woo i̶rong kàa aɗeng zak. 24Ɓe komanda mu sooja mo, wuri le ku mo ɗel ki̶ Pool ndi̶ghi̶n lu ɗi a peetong mu sooja ni mo. Wuri le ku mo kyam Pool shi ngwam, mpeku wuri mak manshii kì̵ mbii ɗi ni le ku kuur gurum ni moo fwo or ɗi nkaa wuri. 25Amma kaaɗi mo ɓwaghat wuri shi teng shim, mpeku mo fwo ngwam ɗi nwuri, ɓe Pool wuri sat mmee ɗiiɗes mu sooja ni mo, ɗi wurii ɗar kus ki̶ wuri nee, "Ashee, kyet ni a ndi̶re ku wu fwo ngwam ngo ɗi wuri a ngu Rom, ɓe ba mo kì̵ tok mee ɗiyeel ɗi ni yaa wuri kas wa?" 26Kaaɗi sooja ɗiiɗes wuri ki̶ling po mi̶ni, ɓe wuri so sat nkomanda mu sooja ni mo nee, "Aa riɓet c`in a me ngwar ɗiisi ye? Gwar ɗiisi ni wuri a ngu Rom." 27Ɗangɓe komanda ni wuri j`i sat mPool nee, "A sat wan azeen-nzeen, wugha a ngu Rom me?" Ɓe wuri lap nee, "Ii wan a ngu Rom!" 28Ɓe komanda ni wuri sat nwuri nee, "Gyet wan kwat a shaghal ɗes, akuɗang ɓe wan ɗee a nguyil nRom ni." Pool sat nee, "Amma mo làa wan a ngu Rom." 29Mpeemi̶ni ɓe nyem ɗi moo riɓet c`in tal pu wuri ɗi, mo yaghal abet ɓe mo yit wuri mmi̶shin. Kaaɗi komanda ni wuri man nee, Pool a ngu Rom, ɓe ki̶i̶rmuut yaa wuri hakyeng, mpeeɗi wuri kì̵ ten ɓwaghat wuri. 30Amma daɗaar ni, ɓe komanda ni wuri riɓet man zeen kì̵ mbii ɗi ni le ku nyem Yahudi mo riɓet yaa wuri ni. Ɓe wuri fwoon Pool, wuri le ku mo pi̶rep pris ɗiinan mo, ki̶ nyemɗiyeel mo, mo kuur ashak jir, ɗangɓe wuri so le Pool ɗar ntoghom kì̵ nyemɗiyeel ni mo.

will be added

X\