Ɗak 21

1Aɓwoon ɗi muu sat ɗang mukaat mmo, ɓe mu ɗel njirgi am, ɓe mu yaa ar wur-wur mu so nyil nKos. Daɗaar ni, ɓe mu so mu wul nRodes. Mu yaghal mpeemi̶ni, ɓe mu so mPatara. 2Kaaɗi mu kat mee jirgi am ɗi ni ndung can ɗel nFonisha, ɓe mu ɗel ndi̶ghi̶n ni, ɓe mu yaghal. 3Kaaɗi mu naa yil nSaiprus ki̶ ɗee, ɓe mu yit ni nsarkul, mu ɗel mu so akiyeen har nyil nSiriya. Mu so mu sham mbirni nTaya, mpeeɗi jirgi am nin nsham kì̵ lee mo a mpeemi̶ni. 4Kaaɗi mu katpee ɗi pak nyemso ndang Jesu mo ɗi, ɓe mo sat mPool nee, taji wuri so nJerusalem kas. 5Amma kaaɗi puus so funu ni j`i wul, ɓe mu yaghal mu sekiyeen ki̶ mwaan funu. Ɓe nyemso ndang Jesu ni mo ashak ki̶ mat furu mo, ki̶ jep furu mo, mo so ndang mun har mɓwoon birni ni, a peeɗi mu kurum nfurum mpee c`in aduwa ɗi ashak ki̶ mo mpo bahar ni. 6Aɓwoon ɗi mu sat ɗang mukaat nshak, ɓe mun mu ɗel ndi̶ghi̶n jirgi am ni, ɓe mo baa ntulu. 7Ɓe mun mu sekiyeen ki̶ mwaan funu. Mu yaghal nTaya, ɓe mu j`i mu wul nPolemayas. Ɓe mu so mu tok ki̶ nyemso ndang Jesu mo mpeemi̶ni, ki̶ mu tong ashak ki̶ mo, har mu teer ashak ki̶ mo. 8Daɗaar ni, ɓe mu yaghal, mu so mu wul nSizariya, ɓe mu tong ntulu kì̵ Filip ngubishara ɗi wuri a memee mɓut nyem ɗiipovul si mo, ɗi gyet mo kì̵ bi̶lip mo nJerusalem. 9Filip wuri ki̶ jiraap mo feer, ɗi ba mo kì̵ soɗik kas. Jiraap ɗiisi ni moo satpo nkaa mbii ɗi ni ndung j`i. 10Kaaɗi mu pan mu yém ɗi, mpee shiiteer mo kong, ɓe mee ngusatpo kì̵ Naan ɗi sum fi̶ri a Agabus, wuri tong nJudiya j`i ɗi. 11Kaaɗi wuri j`i pe mun ɗi, ɓe wuri mang fuwaat ɗi Pool ki̶ ɗiin mɓwoon, ɓe wuri ɓwaghat sar kì̵ shii fi̶ɗi mo ɗishik. Ɓe wuri sat nee, "Riin Ɗiiɓang wuri sat nee, nyem Yahudi ɗi mon nJerusalem, mon nso mɓwaghat ngufuwaat ɗiisi ni aasi zak, ki̶ mon ncín wuri nsar kì̵ nyem ɗi ba mo nyem Yahudi mo kas." 12Kaaɗi mu ki̶ling po mi̶ni, ɓe mun ki̶ kaghar ni mo, mu ɗang pu Pool mpeku taji wuri so nJerusalem kas. 13Amma Pool wuri lap nee, "A me le ɗang wuu wal, ku wuu wat putughup fi̶na ɗi ye? Yaksi wan ki̶n ɗak san, ba a mpeku mo ɓuɓwaghat wan ɗi ɓejee ɗak kas, koo a mpeku wan muut ɗi ndi̶ghi̶n yil nJerusalem zak, mpee sum kì̵ Daa Jesu." 14Kaaɗi ba mu mak cíi nwuri kas, ɓe mu nook, ki̶ mu sat nee, "See a mbii ɗi Daa Naan c`in ki̶ wugha ɗak." 15Aɓwoon kì̵ rep shiiteer mo, ɓe mu ɓwaghat lee funu mo, ku mu kàa ɗi nJerusalem. 16Pak nyem Jesu ɗi mon nSizariya mo j`i ndang mun, har mo j`i wul ki̶ mun ntulu ki̶ Mason, a peeɗi mu tong ɗi. Wuri a ngu Saiprus, ki̶ wuri a memee mɓut nyemso ndang Jesu ɗin nshee mo. 17Kaaɗi mu j`i mu wul nJerusalem, ɓe nyemso ndang Jesu mo kaat mun shi retnyit. 18Daɗaar ni, ɓe Pool so ki̶ mun pe Jemis ɗi, a peeɗi nyemnan mu Eki̶lisya mo ɗi ashak jir. 19Aɓwoon ɗi Pool wuri kì̵ tok ki̶ mo, ɓe wuri yaa yakshii ni mmo ndangshak-ndangshak, mbii ɗi Naan le ku wuri c`in mo ndi̶ghi̶n nyem ɗi ba mo a nyem Yahudi mo kas. 20Aɓwoon ɗi mo ki̶ling po nkaa mbii mi̶ni mo, ɓe mo kwoop Naan hakyeng. Ɗangɓe mo sat mPool nee, "Ɗyemni̶ghi̶n funu, a naa nyem Yahudi mo ɗes hakyeng mo kì̵ ɗee a nyemcínzeen mo, ki̶ mo fes le putughup furu mo nkaa Waar kì̵ Mosis. 21Mo kì̵ ki̶lingpo nkaa wugha ne, 'Wugha kì̵ kám nyem Yahudi mo jir, ɗi moo tong mɓut nyem ɗi ba mo a nyem Yahudi mo kas, ne, mo yit Waar kì̵ Mosis mo, ki̶ taji mo can jep furu mo kas, ki̶ taji mo tap ki̶ mbii ɗi puun funu moo loghot ki̶ c`in mo kas.' 22To, yaksi, ɓe wughan nc`in a meye? A lekom ku a ki̶ling mbii ɗi mun nsat, ɗi ni ret ku a c`in. Mpeeɗi ting mon nki̶ling nee, aa j`i. 23A mbii ɗi muu riɓet ku a c`in nɗiisi. Mun ki̶ gurum mo feer, ɗi mo kì̵ tuwoorpo nDaa Naan nkaa káa furu. 24A so ashak ki̶ mo, ku wu c`in mbii ɗi wun nlesuk ɗee ɗi a ɗiiɓang nyit kì̵ Naan. A wughan nkwat shaghal mpee mbii ɗi mon nc`in jir. Ɗangɓe mon mmak sak shoopkáa furu mo zak. A ndi̶ghi̶n ar ɗiisi, ɓe koo a weye mman nee, ba mee zeen mɓut po ɗi mo kì̵ sat nkaa wugha ni kas, mpeeɗi wugha shikáa fugha aa tap ki̶ Waar kì̵ Mosis ni mo. 25Mpee nyem ɗi mo cínzeen ɗi ba mo a nyem Yahudi mo kas, ɓe mun kì̵ ran wasika mmo, nkaa po ɗi gyet mu yaghal mu ɗar nkaa ni, nee, taji mo se mee mbiise ɗi mo kì̵ ten cín nk`um kas, ki̶ taji mo se toghom kas, [ki̶ taji mo se long ɗi mo mweer took nni kas,] ki̶ taji mo cín ngaa kas." 26Daar ni, ɓe Pool wuri so ashak ki̶ das ɗiifeer ni mo, ku mo c`in mbii ɗi mon nlesut ɗee ɗi a ɗiiɓang nyit kì̵ Naan. Ɓe wuri ɗel ndi̶ghi̶n lu kì̵ Naan ɗiiɗes ni, mpeku wuri sat ɗi ngurum mo, puus ɗi mon nlesut ɗee a ɗiiɓang nin nkyes ɗi, parpuus ɗi koo a weye, ɓe wurin ncín mbiizughum mpee shin. 27Kaaɗi shiiteer ɗiipovul ni mo kus ki̶ gam, ɓe pak nyem Yahudi ɗi moo tong nEshiya mo j`i naa Pool ndi̶ghi̶n Lu kì̵ Naan ɗiiɗes, ɓe mo kar, ki̶ mo jwakshii nkuur kì̵ gurum ni mo jir, har mo yaa Pool. 28Moo le or, ki̶ mon nkaa sat nee, "Wun nyem Isreil mo, wu ɓam mun! Wu naa gwar ɗi wurii so shipee-shipee ndi̶ghi̶n yil ni mo, mpeku wuri kám ngurum mo, ku mo ɓák mun nyem Isreil mo ɗi, ki̶ Waar kì̵ Mosis mo, ki̶ Lu kì̵ Naan ɗiiɗes si zak. Ba a mi̶ni ɓejee ɗak kas, har wuri kì̵ ɗel ki̶ pak nyem ɗi ba mo a nyem Yahudi mo kas ndi̶ghi̶n Lu kì̵ Naan ɗiiɗes zak. Wuri kì̵ le Lu kì̵ Naan ɗiiɗes ni ɗee a ɗiibuu." 29Mo satpo ɗiisi, a mpeeɗi mo kì̵ naa Trofimus ngu Afisus ashak ki̶ wuri ndi̶ghi̶n birni, ɓe mo pan nee, ntong a Pool kì̵ j`i ki̶ wuri ndi̶ghi̶n Lu kì̵ Naan ɗiiɗes ni. 30Ɗangɓe nyem birni ni mo yaghal jir, gurum ni mo swa j`i kuur ashak abet, koo a nkoghop pee ɗiiɗang ye, mo yaa Pool, ɓe mo fee wuri put mɓwoon Lu kì̵ Naan ɗiiɗes ni, ɓe mo shaghat polu ni mo abet-abet. 31Kaaɗi mo nkaa tang pee tu Pool, ɓe komanda mu sooja kì̵ nyem Rom mo, wuri ki̶ling nee, Jerusalem ni gam ki̶ or ɗes zam. 32Abet-abet ɓe wuri pi̶rep sooja mo, ki̶ pak ɗiinan-nan mu sooja ni mo, ɓe mo swa so pe nyem ɗi mo yaa Pool ɗi. Kaaɗi mo naa komanda ni ki̶ sooja mo, ɓe mo nook ni̶ram Pool. 33Ɓe komanda wuri j`i kus ki̶ Pool, ɓe wuri yaa Pool, wuri le ku mo ɓwaghat Pool shi ti̶sek mo vul. Wuri tal nee, "Gwar ɗiisi wuri a weye? Ki̶ wuri kì̵ c`in a meye?" 34Ɓe kuur kì̵ gurum ni mo le or. Pak mo nkaa sat mee mbii, ki̶ pak mo nkaa sat mee mbii ɗiici mo zak. Kaaɗi ba komanda ni wuri mak manshii kì̵ mbii ɗi ni le ku gurum ni moo fwo or ɗes kas, ɓe wuri le ku mo so ki̶ wuri mbarak kì̵ sooja mo. 35Kaaɗi mo j`i wul a pee ki̶kàa mpolu ni, ɓe sooja mo mang wuri ɗiyeep aɗeng mpeeɗi kuur kì̵ gurum ni mo ɗee a kaa nyemtar mo si. 36Mo nkaa le or, ki̶ mo nkaa sat nee, "Wu tu wuri, wu tu wuri!" 37Kaaɗi mo nkaa ɗel ki̶ Pool ndi̶ghi̶n peetong mu sooja ni mo, ɓe wuri sat nkomanda mu sooja ni mo nee, "Kyet a mmak yit nwan sat mee mbii ɗi nwugha wa?" Komanda ni wuri tal pu wuri nee, "Aa man po ki̶ nyem Heleni mo me? 38Ashee! Ba a wugha a ngu Ijip ɗi gyet ndi̶ghi̶n shiiteer ɗiiɗel si mo, ɓe wuri yaghal ki̶ tawai nkaa gwomnati, har wuri ɗul gurum mo duɓu feer, so ndang shin a naar yil, mpee twa gurum mo si kas me?" 39Pool lap nwuri nee, "Wan a ngu Yahudi. Mo làa wan a nTarsus ndi̶ghi̶n yil nSilisiya. Wan a laayil mi̶ni, ɗi ni a mi̶man koo a weye. Wan ɗang pu wugha, a cínpee nwan katpo ɗi kì̵ kuur kì̵ gurum ni mo." 40Komanda ni wuri cínpee wuri. Ɓe Pool ɗar nkaa pee ki̶kàa ni, wuri ɗiyeep sar nkuur kì̵ gurum ni mo, mpeku mo ɗok ɗi titik. Kaaɗi mo ɗok titik, ɓe wuri satpo ngurum ni mo shi li̶po mu nyem Yahudi mo. Wuri sat mmo nee:

will be added

X\