Ɗak 20

1Aɓwoon ɗi or ni kyes, ɓe Pool wuri pi̶rep nyemso ndang Jesu mo, ɓe wuri katpo ki̶ mo, mpee cínɓal mmo mputughup, ɓe wuri sat ɗang mukaat mmo, ɓe wuri yaghal so mMasidoniya. 2Wuri mwaan so nkoghop nyil mi̶ni mo jir, wuri nkaa cínɓal mputughup ngurum ni mo, har wuri j`i wul nyil nGriis. 3A peeɗi wuri c`in tar kun ɗi. Nyem Yahudi mo ɓalpo furu ashak nkaa wuri, ɓe kaaɗi wurin ndung ɗel njirgi am mpee so nyil nSiriya, ɓe wuri waa yaa ar ni a mMasidoniya. 4Ɓe Sopata làa kì̵ Pires ngu Beriya, wuri so ndang Pool ki̶ Aristaakus ki̶ Sekundus, ɗi mo a nyem Tasoloni mo, ki̶ Gayus ngu Deebi, ki̶ Timoti, ki̶ Tikikus, ki̶ Trofimus ɗi mo a nyem Eshiya mo. 5Nyem ɗiisi mo shee so wul nTrowas mmun nti̶leng, ki̶ mo gong j`i funu a mbirni mi̶ni. 6Mun mu ɗel njirgi am nFilipi, aɓwoon kì̵ retnyit mu se bred ɗi ba ni ki̶ yist kas. Ɓe ndi̶ghi̶n teer mo paat, ɓe mu so mu wul pe mo ɗi nTrowas ni. Har mu c`in teer povul ɗi mpee mi̶ni. 7Parpuus ɗin nshee mɓut teer ɗiipovul, ɓe mu kuur ashak mpee se Tong Ashak. Pool wuri kì̵ ɗak shin, mpeku daɗaar wuri so mwaan ɗi, ɓe wuri satpo ngurum mo. Wuri sat a nyaapo ni ɗak, har so wul nnaar mpar. 8Mo kì̵ le fitila mo ɗi ɗes ndi̶ghi̶n luɗeng ɗi muu kuur ɗi ni. 9Mee zi̶lang ɗi moo pet sum fi̶ri a Yutikus wurii tong mpo fung mu luɗeng ni, ɓe kaaɗi Pool sat a nyaapo Naan ni ɗak, ɓe saam ɗoghom nyaa Yutikus, har saam ni j`i met nwuri mɓal, ɓe wuri yaghal mpo fung mu luɗeng ɗiikun ni, sham taa nyil, kaaɗi mo sham mang wuri, ɓe mo kat wuri kì̵ muut. 10Ɓe Pool sham zan shin fi̶ri nkaa kúm kì̵ zi̶lang ni, ɓe wuri kup kúm ni, ɓe wuri sat ngurum ni mo nee, "Taji ni daampee nwun kas, mpeeɗi wuri ɗi ki̶ seen." 11Ɓe Pool wuri baakàa ɗi nluɗeng ni, wuri yal bred se. Aɓwoon ɗi wuri kì̵ katpo ki̶ mo har ɓit mang, ɓe wuri yaghal so. 12Mo so ki̶ ɗyem zi̶lang nin ntulu ki̶ seen, ɓe mo kat retnyit ɗes hakyeng. 13Pool wuri sat mun nee, wuɗi riɓet so Asos a nshii, mpeemi̶ni ɓe mun mu so mu ɗel ndi̶ghi̶n jirgi am, har mu so mu wul Asos nwurin nti̶leng, a peeɗi mun mmang wuri ɗi. 14Kaaɗi wuri j`i kat mun Asos, ɓe mu mang wuri ndi̶ghi̶n jirgi am ni, ku mu so ɗi mMitilini. 15Mu waa mu yaghal mMitilini ni, ɓe daɗaar ni mu jí mu wul kus ki̶ yil nKiyos. Daar ni zak, ɓe mu j`i mu wul nkoghop nSamos, ki̶ daar ni zak, ɓe mu j`i mMiletus. 16Pool wuri lepan mpee ɗel so Afisus ndi̶ghi̶n jirgi am ni, mpeku taji wuri waa taa ɗee ndi̶ghi̶n yil nEshiya kas, mpeeɗi wuri riɓet wurung, mpeku kat ni mak c`in, ɓe wuri wul ɗi nJerusalem parpuus Pentikos. 17Kaaɗi Pool wuri wul mMiletus, ɓe wuri lop so nyemnan-nan mu Eki̶lisya ɗin Afisus mo, ne mo j`i kat wuɗi. 18Ɓe kaaɗi mo j`i wul pe wuri ɗi, ɓe wuri satpo mmo nee, "Wun shikáa fuu, wu man tong fi̶na nnaar fuu puji wan shee j`i ɗi nkoghop nyil nEshiya. 19Gyet wan c`in ɗak mu Daa ni, ba shi mee ɗiyeepkáa kas, ki̶ wan ki̶n shwaajeel ɗes mpee c`in ɗak ni shiparci-shiparci, ki̶ mpee cip ɗi jí nyem Yahudi mo le mpee wan. 20Wun shikáa fuu wu man zak nee, ba gyet wan ɓes mpee sat mee mbii ɗi ni ki̶ koghop ni pe wun ɗi kas. Wan ki̶n kámpo nkaa Jesu nwun jir agaak, ki̶ wan ki̶n son nkámpo ni nwun shilu-shilu zak. 21Gyet wan ki̶n sat zeen nyem Yahudi mo, ki̶ nyem ɗi ba mo a nyem Yahudi mo kas, shiɓal nee, ni ret ku mo tuwap jir, ku mo j`i pe Naan ɗi, ki̶ mo cínzeen ɗi nDaa funu Jesu Kristi zak. 22Yaksi, wu naa wan ndung so nJerusalem, mpeeɗi a Riin Ɗiiɓang wuri lop wan so, ki̶ ba wan man mbii ɗi nin nso kat wan ɗi mpee mi̶ni kas. 23Amma Riin Ɗiiɓang wuri kám nwan nee; koo a ndi̶ghi̶n birni ɗiiɗang ye, ɓe jeel ki̶ gong wan, ki̶ gurum mon nyaa wan shaghat zak. 24Ba wan le san fi̶na ni ki̶ mee koghop ni pe wan ɗi kas, amma wan ki̶n riɓet ku wan kyes a ɗak ɗi Daa Jesu wuri kì̵ cín nwan mpee c`in ni. Ɗak ɗi wuri cín ni nwan nɗiisi, ku wan satpo ɗiiret ɗi ngurum mo nkaa zughum kì̵ Naan. 25"Yaksi wan man nee, ba memee ndi̶ghi̶n wun, ɗi gyet wan ki̶n mwaan nnaar fuu, mpee satpo nwun nkaa mulki ki̶ Naan ni, wun mbaa wu naa wan ɗi kas. 26Mpeemi̶ni, wan ki̶n sat nwun cicinsi nee, katɗang ɓe memee fuu muut mɓut shikbish, ɓe sar fi̶na mo paat. 27Mpeeɗi ba gyet wan ɓes mpee sat pan kì̵ Naan mo jir nwun kas. 28Mpeemi̶ni, wun nyem ɗi Riin kì̵ Naan wuri kì̵ le a nyemnaa kuur kì̵ tum ni mo jir, wu tap ki̶ káa fuu mo riret, ki̶ wu kiyeer Eki̶lisya mu Naan ɗi wuri kì̵ seet ni [nshin shi toghom mukáa fi̶ri.] 29Wan man nee, aɓwoon ɗi wan ki̶n so, ɓe ncuwe ɗiiɓiyaal mo, mon nj`i ɗel nnaar fuu, ɓe ba mon nyit tum ni mo ɗi kas. 30Pee nii j`i, ɓe pak gurum mon nyaghal nnaar fuu, mon nsatpo ɗi mo a ɗung nkaa zeen ni, mpeku mo ɗul nyemso ndang Jesu mo so ɗi ndang mo. 31Mpeemi̶ni, ɓe wu tong shi gongpee, ki̶ taji wu mander kas nee, gyet mpee ɓit mo kun, ɓe ba wan nook satpo ni nwun mpar ki̶ puus shiɓal, ki̶ shi yitmwaan kas. 32"Yaksi, ɓe wan le wun nsar kì̵ Naan, ki̶ po ɗiiret fi̶ri ɗi ni ki̶ ɓal mpee ɗik wun, ku ni cín ɗiiret mu Naan, ɗi wuri ki̶ ni mpee nyem fi̶ri mo jir nwun zak. 33Ba wan ki̶n kyaghar mee azurfa, koo zinariya, koo nli̶r kì̵ mee gurum kas. 34Wun shikáa fuu wu man nee, a shi sar fi̶na ɗiisi mo, ɓe wan ki̶n c`in ɗak shi mo, mpee mbii ɗi wan ki̶n riɓet mo, har ki̶ mpee mbii ɗi nyem ɗi mo ashak ki̶ wan moo riɓet zak. 35Wan ki̶n kám nwun ndi̶ghi̶n mbii mo jir, nee, a shi ɗak mu káa fuu mo, ɗangɓe wun mɓam nyem ɗi ba mo kat ɓal kas, kaaɗi muu panpo ɗi Daa Jesu wuri kì̵ sat shikáa fi̶ri si nee. 'Kat gurum cín mbii, ɓe wurin nkat ɗiiret met ngo ɗi wuri lap ni.' " 36Aɓwoon ɗi Pool satpo mi̶ni, ɓe wuri nkurum furum ashak ki̶ mo jir, ku wuri c`in aduwa ɗi. 37Kaaɗi mo ɗoghom sat ɗang mukaat mPool, ɓe mon nkaa wal, ki̶ moo j`i lesar wurin ntook, ki̶ moo tuwaas wuri shi mi̶shpoo zak. 38Mbii ɗi ni si̶ghi̶t wat putughup mmo met jir, ni a po ɗi Pool wuri sat mmo nee, ba mon nkuɗi ki̶ naa yit fi̶ɗi kas. Mo so sel wuri har mpo jirgi am.

will be added

X\