Ɗak 18

1Aɓwoon ɗiisi, ɓe Pool wuri yaghal yit Afens, ɓe wuri so nKoronti. 2Ɓe wuri kat mee ngu Yahudi, ɗi moo petsum fi̶ri a Akwila, ɗi mo làa wuri a mPontus. Wuri ki̶ mat fi̶ri Priskila mo yaghal a Itali j`i nKoronti ni. Mpeeɗi mishkagham Klaudiyus wuri sat nee, nyem Yahudi mo jir, mo yaghal aku Rom. Pool wuri so pe mo ɗi. 3Ɓe wuri tong pe mo ɗi, mpeeɗi wuri a nguɗak tent kaa mo si, ki̶ mo c`in ɗak furu ashak zak. 4Koo a parpuus Nookɗi ɗiiɗang ye, ɓe Pool wurii naa mɓeetshik ki̶ nyem Yahudi mo, ki̶ wurii le ku nyem Yahudi mo, ki̶ nyem Heleni mo cínzeen. 5Kaaɗi Silas ki̶ Timoti mo tong mMasidoniya j`i wul, ɓe Pool wuri fes lekáa fi̶ri kyap, mpee satpo ɗiiret ni, ki̶ wuri c`in langting nyem Yahudi mo nee, Jesu wuri a Kristi. 6Amma kaaɗi nyem Yahudi mo kwarpo ni, ki̶ mo satpo ɗiibuu nwuri, ɓe wuri cighi̶r ki̶ ki̶ɓwoon mmo, ɓe wuri sat mmo shi tughup nee, "Katɗang wu murap ndi̶ghi̶n shikbish fuu mo, ɓe a wun lesuk. Ba mee sar fi̶na ɗiɓut kas. Yaghal nyaksi, ɓe wan nso a pe nyem ɗi ba mo a nyem Yahudi mo kas." 7Wuri yaghal nyit lu kì̵ Naan mu nyem Yahudi ni mo, ɓe wuri so ɗel ntulu kì̵ mee gwar ɗi moo petsum fi̶ri a Tituyus Jastus. Wuri a mee nguseyil Naan, ɗi lu fi̶ri ni kus ki̶ lu kì̵ Naan ni. 8Krispus ngo ɗiiɗes lu kì̵ Naan ni, wuri cínzeen nDaa ashak ki̶ nyemlu fi̶ri mo jir. Ki̶ gurum mo ɗes ndi̶ghi̶n nyem Koronti mo, ɗi mo ki̶lingpo kì̵ Pool ni, ɓe mo cínzeen, har mo c`in baptisma mmo zak. 9Parmeeci sí mpar, ɓe Daa wuri katpo ki̶ Pool ndi̶ghi̶n sughun nee, "Taji ki̶i̶rmuut yaa wugha kas, amma a satpo ni, ki̶ taji a nook sat ni kas. 10Mpeeɗi wan ɗi ashak ki̶ wugha. Ba mee gurum mmak c`in mee mbii nwugha kas. Mpeeɗi wan ɗi ki̶ gurum mo ɗes ndi̶ghi̶n birni ɗiisi ni." 11Aasi ɓe, Pool wuri tong ndi̶ghi̶n birni nKoronti, mpee ɓit mi̶ndong ki̶ kaghar, wurin nkaa kámpo Naan ngurum mo. 12Amma ndi̶ghi̶n ɓit ɗi moo le Galiyo wuri a gofna mu yil Akaya, ɓe nyem Yahudi mo ɓàlkáa ashak, ɓe mo yaa Pool so ki̶ wuri pe nyemtokɗiyeel mo ɗi. 13Mo sat nee, "Gwar ɗiisi wuri nkaa pi̶ring ki̶ pan mu gurum mo, mpeku mo seyil ɗi nNaan ndi̶ghi̶n ar ɗi ba ni ntiit ki̶ Waar ni kas." 14Amma kaaɗi Pool wuri ɗoghom katpo, ɓe Galiyo ɗi wuri a gofna, wuri sat nyem Yahudi ni mo nee, "Wun nyem Yahudi mo! Katɗang ɓe ɗi gwar ɗiisi wuri c`in a mee mbii ɗiibish, ki̶ koo ɗi wuri wat a mee mbii, ɓe ɗi wan mmak lekom kun ki̶ling wun ɗi. 15Amma kaaɗi ni a ɓeetshik nkaa pak po mo, ki̶ sumpo, ki̶ Waar fuu mo, ɓe wu so wu ɓeet mi̶ni mbuu shikáa fuu. Ba wan riɓet ɗee a ngutokɗiyeel mu mbii kaa mi̶ni mo si kas." 16Ɓe wuri ceen mo pwat aku ndi̶ghi̶n luɗiyeel ni. 17Mo jir mo yaa Sostenis, ngo ɗiiɗes nkaa lu kì̵ Naan ni, ɓe mo ni̶ram wuri mpolu ɗiyeel ni, amma ba Galiyo wuri lekáa ɗiki̶ kas. 18Pool wuri waa baa tong ɗi nKoronti ni ɗes ashak ki̶ nyemso ndang Jesu ni mo. Ɓe wuri yaghal yit mo, ɓe wuri ɗel ndi̶ghi̶n jirgi am, mpee so nyil nSiriya, ashak ki̶ Priskila ki̶ mish fi̶ra Akwila. Akuɗang Pool wuri yaghal so, ɓe wuri sak káa fi̶ri nSenkiriya, mpeku wuri gampo ɗi wuri kì̵ ten tuwoor nin nNaan nkaa shin fi̶ri. 19Mo j`i wul ndi̶ghi̶n yil Afisus ɓe Pool wuri yit Priskila ki̶ Akwila mpeemi̶ni. Amma wuri so ɗel ndi̶ghi̶n lu kì̵ Naan, ku wuri yakshii kì̵ po mo ashak ki̶ nyem Yahudi mo. 20Kaaɗi mo ɗang pu wuri ku wuri pan yém ɗi pe mo, ɓe wuri cíi. 21Amma kaaɗi wuri yaghal yit mo, ɓe wuri tuwoorpo mmo nee, "Katɗang nNaan riɓet, ɓe wan mbaaj`i pe wun ɗi." Aasi ɓe, wuri ɗel ndi̶ghi̶n jirgi am. 22Kaaɗi wuri so wul nSizariya, ɓe wuri kàa nJerusalem, ku wuri tok ɗi ki̶ nyemso ndang Jesu ni mo. Aɓwoon mi̶ni, ɓe wuri so Antiyok. 23Aɓwoon ɗi wuri pan c`in rep teer mo ɗi, ɓe wuri yaghal so shipee-shipee, nkoghop yil nGalati, ki̶ Firjiya, wuri nkaa cínɓal mputughup nyemso ndang Jesu ni mo jir. 24Mee ngu Yahudi ɗi moo petsum fi̶ri a Apolos, ɗi mo làa wuri a nAlekzandriya. Wuri a mee nguman, ki̶ wuri man takarda kì̵ Naan ɗes hakyeng. 25Mo kì̵ kám ar ɗi ni a mu Daa nwuri, ki̶ wurii ɗar ɓal-ɓal ndi̶ghi̶n ni. Wuri satpo, ki̶ wurii kám ngurum mo nkaa Daa Jesu ndi̶re-ndi̶re, amma jir ki̶si, ɓe wuri man a baptisma mu Joon ɓejee ɗak. 26Wuri ɗoghom satpo kì̵ Naan agaak, ba ashak ki̶ mee ki̶i̶rmuut kas, ndi̶ghi̶n lu kì̵ Naan ni. Kaaɗi Priskila ki̶ Akwila mo ki̶ling wuri, ɓe mo pet wuri so ntulu furu, ku mo si̶ghi̶t kám ar kì̵ Naan ɗi nwuri ndi̶re-ndi̶re. 27Apolos wuri yaghal mpee so Akaya, ɓe nyemso ndang Jesu ɗi mon Afisus mo ɓam wuri, shi ran wasika cín nwuri pán nyemso ndang Jesu ɗi mon nyil Akaya, mpeku mo kaat wuri ɗi, katɗang wuri so wul. Kaaɗi wuri so wul, ɓe wuri ɓam nyem ɗi mo kì̵ cínzeen mpee ɗiiret kì̵ Daa zam. 28Wuri gan nyem Yahudi mo ntoghom kì̵ gurum mo, mpee ɓeetshik, ki̶ wuri kám ngurum mo agaak, wuri nkaa satpo mmo nkaa mbii ɗi mo ndi̶ghi̶n po kì̵ Naan nee, "Jesu wuri a Kristi azeen-nzeen."

will be added

X\