Ɗak 16

1Pool wuri j`i wul nDeebi ki̶ Listi̶ra. Ɓe wuri kat mee nguso ndang Jesu ɗi ndi̶ghi̶n Listi̶ra ni, ɗi sum fi̶ri a Timoti. Wuri a làa kì̵ mee mat Yahudi ɗi wura cínzeen nDaa Jesu, amma puun fi̶ri a ngu Heleni. 2Nyemso ndang Jesu ɗi mon nListi̶ra ki̶ Ikoniyum, moo kwoop mi̶se kì̵ Timoti ni. 3Pool wuri riɓet ku Timoti so ndang wuri, aasi ɓe Pool can Timoti, mpee nyem Yahudi ɗi mo ɗi ndi̶ghi̶n peemi̶ni mo. Mpeeɗi mo jir, mo man ne, puun kì̵ Timoti wuri a ngu Heleni. 4Kaaɗi mo a ar mwaan, ɓe mo so ɗel ndi̶ghi̶n birni mo, ki̶ mo satpo nyemso ndang Jesu ɗi mon mpeemi̶ni mo, nkaa Waar ɗi jeplop mo, ki̶ nyemnan mu Eki̶lisya ɗin nJerusalem mo ki̶ sat, mpeku nyemso ndang Jesu mo tap ɗi ki̶ Waar ni mo. 5Aasi ɓe, nyemso ndang Jesu ni mo ɗar ɓal-ɓal ndi̶ghi̶n cínzeen furu, ki̶ mo ɓul koo a puus ɗiiɗang ye. 6Pool ki̶ nyem ɗi mo ashak ki̶ wuri, mo ɗel so ndi̶ghi̶n yil nFirjiya ki̶ yil nGalati zak, mpeeɗi ba Riin Ɗiiɓang yit ku mo satpo kì̵ Naan ndi̶ghi̶n yil nEshiya kas. 7Kaaɗi mo wul a pee ɓàkyil mu nyem Misiya mo, ɓe moo riɓet ɗel so nyil mBisiniya, amma Riin kì̵ Jesu cíi mmo. 8Aasi ɓe, mo ɗel so ndi̶ghi̶n yil mMisiya, mpeku mo ɗel sham ɗi nyil nTrowas. 9Mparmi̶ni, ɓe Pool wuri teer sughun nee, ɗi naa mee ngu Masidoniya ki̶ ɗar, ki̶ wuri nkaa ɗang pu ɗi nee, "A can a ɗel nyil mMasidoniya ku a ɓam mun ɗi!" 10Kaaɗi Pool wuri naa sughun ɗiisi, ɓe abet-abet mu ɗak sun mpee so Masidoniya ni, mpeeɗi mu man azeen-nzeen nee, a Naan wurii pet mun, mpeku mu so mu satpo fi̶ri ɗi mpee mi̶ni. 11Mu yaghal njirgi am nTrowas, ɓe mu ɗel mu so wur-wur mpee so nSamotras. Daɗaar ni ɓe mu j`i mu wul Niyapolis. 12Mu yaghal a peemi̶ni, ɓe mu j`i nFilipi, ɗi ni a birni ɗiiɗes nkoghop mMasidoniya. Ni a mee yil ɗi nin nder kì̵ nyem Rom mo. Ɓe mu c`in shiiteer mo kong ndi̶ghi̶n birni mi̶ni. 13Parpuus Nookɗi, ɓe mu put mbirni ni, ku mu so ɗi mpodung, a peeɗi mu pan ne, mun nkat mee pee c`in aduwa ɗi. Mu tong ɗi mpodung ni, mu katpo ki̶ mat ɗi mo j`i kuur ɗi. 14Mee mat wura ɗi mɓut nyem ɗi mo ki̶ling mun, sum fi̶ra a Lidiya ɗi wura a mat Tayati̶ra, ɗi wuraa seet ki̶ fuwaat ɗiiriret mo, ki̶ wura a mat ɗi wuraa seyil nNaan zak. Daa Naan wuri wang putughup fi̶ra, har wura lappo ɗi Pool kì̵ sat mo. 15Aɓwoon ɗi mo c`in baptisma nwura ki̶ nyemtulu fi̶ra mo jir, ɓe wura ɗang pu mun nee, "Katɗang ɓe wu le, nee wan a mat ɗi wan cínzeen nDaa azeen-nzeen, ɓe wu j`i ntulu fi̶na." Har wura ɗiin mun, mpee so ntulu fi̶ra ni. 16Parmee puus, kaaɗi mun ndung so mpee c`in aduwa, ɓe mu kaat ki̶ mee reep ɗi wura ki̶ riin ɗiibish, ɗi nii le ku wuraa naa mbii ɗi mon ndung j`i a kiyeen. Wuraa naa nj`i ki̶ shaghal ɗes mpuun fi̶ra mo, mpeeɗi wuraa naa mbii ɗi mon nc`in a kiyeen ngurum mo. 17Wuraa naa j`i ndang mun, ki̶ wuraa le or nee, "Nyem ɗiisi mo a ki̶rom mu Naan Ɗiihai, ki̶ mon nkaa sat a ar ɗii mu ɓam nwun!" 18Wuraa naa nc`in aasi, mpee shiiteer mo ɗes, har ni láa mPool mɓut ɗes hakyeng, ɓe wuri cighi̶r sat nriin ɗiibish ni nee, "Wan sat nwugha ndi̶ghi̶n sum kì̵ Jesu Kristi, a put aku mɓut nwura." Abet-abet ɓe riin ɗiibish ni put aku ndi̶ghi̶n wura. 19Amma kaaɗi puun fi̶ra mo naa ar kat shaghal furu ni jee, ɓe mo yaa Pool ki̶ Silas, mo ɗul mo so ntoghom kì̵ nyem tokɗiyeel mo nkasuwa. 20Kaaɗi mo j`i ki̶ mo ntoghom ki̶ nyemtokɗiyeel ni mo, ɓe mo sat nee, "Nyem ɗiisi mo a nyem Yahudi. Moo wat gurum mo ndi̶ghi̶n birni funu. 21Mon nkaa kám mbii mo mmun, ɗi ba muu loghot kì̵ c`in mo kas. Mpeemi̶ni, ba mu lap mbii ɗi mon nkaa kám ni kas, mpeeɗi mun a nyem Rom mo." 22Ɓe ɗuu kì̵ gurum ni mo jir mo yaghal táa nkaa Pool ki̶ Silas. Nyemtokɗiyeel ni mo le ku mo yilang nli̶r mPool ki̶ Silas. Ɗangɓe mo le ku mo ni̶ram mo shi kam. 23Kaaɗi mo ni̶ram mo ɗes, ɓe mo so shaghat mo ndi̶ghi̶n lushaghat. Mo sat ngutap ki̶ nyem ɗi mo a shishaghat ni, ku wuri tap mo ɗi riret. 24Kaaɗi gwar ni ki̶lingpo ni ɓal aasi, ɓe wuri so shaghat Pool ki̶ Silas ndi̶ghi̶n lushaghat ɗi ni ndi̶ghi̶n-ndi̶ghi̶n, ki̶ wuri jwal shii furu mo mɓut nfut. 25Nnaar par, ɓe Pool ki̶ Silas mo nkaa c`in aduwa, ki̶ kook mu kwoop Naan. Nyem ɗi mo a shishaghat ni mo, mo lekom ku mo ki̶ling Pool ki̶ Silas ɗi. 26Ɓe nɗin mman, yil ni tungpee ɗes hakyeng, har kuk kì̵ lushaghat ni mo yoghon. Abet ɓe po lushaghat ni mo wang, ki̶ ti̶sek ɗi mo ɓwaghat nyem ɗi mo a shishaghat ni mo jir mo fwoon. 27Kaaɗi ngutap ki̶ nyem ɗi mo, a shishaghat ni mo wuri mii nsaam, ɓe wuri naa po lushaghat ni mo a wuwang jir, ɓe wuri shang kwai fi̶ri, mpeku wuri tu shin ɗi, mpeeɗi wuri pan nee nyem ɗi mo a shishaghat ni mo, mo kì̵ pwat swa so jir jee. 28Amma Pool ɗiyeep ɗoo shiɓal nee, "Taji a le mee láa nsak kas, mpeeɗi mun ɗi jir." 29Ɓe ngutap nyem ɗi mo a shishaghat ni mo, wuri pet mo j`i ki̶ wus, ɓe wuri yaghal ki̶lak-ki̶lak, wuri ɗel taa ntoghom kì̵ Pool ki̶ Silas, wuri nkaa ɗaar mpee ki̶i̶rmuut. 30Ɓe wuri put ki̶ mo a ti̶leng, ki̶ wuri sat mmo nee, "Daa mo, wan ncín a me, ku wan kat ɓam ɗi ye?" 31Mo sat nwuri nee, "A cínzeen nDaa Jesu. Ɗangɓe wughan nkat ɓam, wugha ki̶ nyemtulu fugha mo jir." 32Mo satpo Naan nwuri ashak ki̶ nyemtulu fi̶ri mo jir. 33Ɗangɓe mparmi̶ni, wuri vwang láa furu mo. Ɓe abet-abet mo c`in baptisma wuri, ashak ki̶ nyemtulu fi̶ri mo jir. 34Wuri j`i ki̶ mo ntulu fi̶ri, ki̶ wuri cín mbiise mmo. Putughup fi̶ri ni gam ki̶ retnyit ɗes hakyeng, mpeeɗi wuri ashak ki̶ nyemtulu fi̶ri mo jir, mo cínzeen nDaa Naan. 35Ɗangɓe kaaɗi ɓitmang, ɓe nyemɗiyeel ni mo lop laakám mo, mpeku mo sat ɗi ngutap ki̶ nyem ɗi mo a shishaghat ni mo nee, "A ɓwot das ɗiivul si mo." 36Ɓe ngutap ki̶ nyem ɗii mo a shishaghat ni wuri sat mPool nee, "Nyemɗiyeel mo lop-lop nee, mu ɓwot wugha ki̶ Silas, mpeku wu so wuwun ɗi. Mpeemi̶ni wu put yaksi, ku wu so ɗi riyang." 37Amma Pool wuri sat nlaakám ni mo nee, "Doghon mo kì̵ ni̶ram mun agaak, ɓe ba mo kì̵ tokɗiyeel mmun, mpeku mo man ɗi ne kyet muu cín mee mbii ɗiiɓish ɗi kas. Mun ɗi mun a nyem Rom mo. Ki̶ doghon mo so shaghat mun nlushaghat zak. Amma yaksi, ɓe moo riɓet ceen mun a si̶sok aa? Wu so wu sat mo j`i pwat ki̶ mun shikáa furu." 38Aasi ɓe, laakám ni mo baa, ɓe mo satpo ɗi Pool wuri sat ni nyemtokɗiyeel ni mo. Kaaɗi nyemtokɗiyeel ni mo ki̶ling nee, Pool ki̶ Silas mo a nyem Rom mo, ɓe ki̶i̶rmuut yaa mo. 39Ɗangɓe nyemtokɗiyeel ni mo j`i ɗang pu Pool ki̶ Silas, mpeku mo fwo ɗi mmo. Ɓe mo tap put ki̶ mo ndi̶ghi̶n lushaghat ni, ɗangɓe mo sat mPool ki̶ Silas ku mo yit birni ni. 40Aɓwoon ɗi Pool ki̶ Silas mo kì̵ pwat ndi̶ghi̶n lushaghat ni, ɓe mo so ntulu kì̵ Lidiya. A peeɗi mo kat nyemso ndang Jesu mo ɗi, ɓe mo satpo mu caa putughup ngurum ni mo, ɗangɓe mo yaghal yit birni mi̶ni.

will be added

X\