Ɗak 14

1Ndi̶ghi̶n Ikoniyum, ɓe Pool ki̶ Barnabas mo ɗel ndi̶ghi̶n lu kì̵ Naan mu nyem Yahudi mo. Ɓe mo satpo kì̵ Naan, har gurum mo ɗes ndi̶ghi̶n nyem Yahudi mo, ki̶ nyem ɗi ba mo a nyem Yahudi mo kas, mo cínzeen. 2Amma nyem Yahudi ɗi mo kwar cínzeen mpo ni, mo kar, ki̶ mo jwakshii nyem ɗi ba mo a nyem Yahudi mo kas, mpeku mo yaghal ɗi ki̶ po ɗiibuu nkaa nyemso ndang Jesu mo. 3Pool ki̶ Barnabas mo tong birni mi̶ni, mpee teer mo ɗes hakyeng, ki̶ mo satpo ngurum mo nkaa Daa shiɓal agaak, ba ashak ki̶ mee ki̶i̶rmuut kas. Mo c`in langting mu po fi̶ri ɗiiret ni, mpeeɗi Daa wuri le ku Pool ki̶ Barnabas mo c`in mbii lukshik mo, ki̶ mbii aapo mo. 4Nyem birni ni mo ɓàksut vul, pak mo so ndang po kì̵ nyem Yahudi mo, ki̶ pak mo so ndang po kì̵ jeplop ni mo. 5Nyem ɗi ba mo a nyem Yahudi mo kas, ki̶ nyem Yahudi mo, mo ɓàlpo furu mo ashak ki̶ nyemnan-nan mu birni ni mo, mpeku mo lejeel ɗi njeplop ni mo, ku mo car mo ɗi shi ndi̶ng zak. 6Ɓe kaaɗi jeplop ni mo ki̶ling mi̶ni, ɓe mo pwat swa so mbirni nListi̶ra ki̶ Deebi, ɗi mon nkoghop yil nLukoniya, ki̶ rep jepyil ɗi mo neer birni mi̶ni mo. 7Mo satpo ɗiiret ngurum mo mpeemi̶ni mo zak. 8Ndi̶ghi̶n Listi̶ra ni, ɓe mee gwar wuri ɗi, ɗi shii fi̶ri mo kuram, mpeeɗi pugyet mo làa wuri a ɗiikukut ɗi ba wuri kì̵ kyam mwaan shi shii fi̶ri kas. 9Wuri lekom mpeku wuri ki̶ling Pool ɗi nkaa satpo. Pool ti̶ghi̶r yit nzi̶ng nkaa gwar ni, ɓe kaaɗi wuri naa gwar ni ki̶ cínzeen ɗi ni mak ku mo bar gwar ni. 10Ɓe Pool sat shi ɗoo ɗiiɗes nee, "A yaghal a ɗar shi shii fugha!" Ɓe gwar ni wuri sham yaghal metpee, ki̶ wuri mwaan zak. 11Kaaɗi kuur kì̵ gurum ni mo naa mbii ɗi Pool wuri c`in ni, ɓe mo ɗiyeep ɗoo furu mo shi li̶po mu nyem Lukoniya mo, mo sat nee, "A naan mo sham pe mun ɗi, ndi̶ghi̶n nan kaa mun gurum si." 12Mo pet Barnabas a Ziiyos, ki̶ mo pet Pool a Hamis, mpeeɗi a Pool wuri a ngusatpo ni. 13Ɓe mishkagham k`um ɗii mu Ziiyos, ɗi lu k`um fi̶ri ni kus ki̶ birni ni, wuri j`i ki̶ kus randong mo, ki̶ pel mo, nkoghop polu ni, mpeeɗi wuri ki̶ kuur gurum ni mo, moo riɓet wus mbiizughum njeplop ni mo. 14Amma, kaaɗi, Barnabas ki̶ Pool mo ki̶ling mi̶ni, ɓe mo yilang nli̶r furu mo. Mo swa so ɗel ndi̶ghi̶n kuur gurum ni mo, ɓe mo le or, ki̶ mo sat nee, 15"Kai daa mo! A me le ɗang wuu riɓet c`in mbii mi̶ni ye? Mun a gurum mo kaa wun si. Mu j`i mpesi a mpeku mo satpo ɗiiret ɗi nwun, mpeku wu yit mbii ɗiibuu si mo ɗi, ɗi ba mo ki̶ mee koghop ni kas. Mpeku wu j`i pe Naan ɗi wuri ki̶ seen. A wuri le ɗeng, ki̶ yil, ki̶ am bahar mo, ki̶ mbii ɗin ndi̶ghi̶n mo jir zak. 16Jí yam ɓe, a Naan wuri cínpee ngurum mo jir, ku mo mwaan ndi̶ghi̶n ar ɗi moo riɓet. 17Jir ki̶si, ɓe ba wuri kì̵ kyam nook c`in langting mpee nshin fi̶ri kas, mpeeɗi wurii c`in mbii ɗiiret mo. A wurii c`in fwan sham nwun aɗeng, ki̶ mbii ki̶kop fuu mo ntarpas, ki̶ a wurii cín mbiise nwun ɗes zak, ki̶ a wurii gam putughup fuu mo shi retnyit zak." 18Jeplop ni mo satpo ɗiisi mmo, jir ki̶si, ɓe a dikyet, ɗangɓe mo cíi nkuur kì̵ gurum ni mo, mpeku taji gurum ni mo wus mbiizughum mpee seyil mmo kas. 19Amma pak nyem Yahudi mo pwat Antiyok, ɗi ni mPisidiya, ki̶ Ikoniyum, mo j`i mangkáa ngurum ni mo, har mo kar kuur gurum ni mo, mpeku mo yaghal ɗi ki̶ lek nkaa jeplop ni mo. Ɓe mo car Pool shi ndi̶ng, ki̶ mo fee wuri put ki̶ ni aɓwoon birni ni. Mo pan ne, Pool wuri kì̵ muut. 20Amma kaaɗi nyemso ndang Jesu mo j`i neer Pool, ɓe wuri yaghal, wuri ɗel ndi̶ghi̶n birni ni. Daɗaar ni, ɓe wuri ki̶ Barnabas mo pwat so nDeebi. 21Pool ki̶ Barnabas, mo so satpo ɗiiret ni nyem birni nDeebi mo, ɓe gurum mo ɗes mo cínzeen nDaa Jesu. Aɓwoon mi̶ni, ɓe mo baaj`i nListi̶ra, ki̶ Ikoniyum, ki̶ Antiyok zak. 22Mo cínɓal mputughup nyemso ndang Jesu mo. Mo satpo mmo, mpeku mo ɗar ɗi ɓal-ɓal ndi̶ghi̶n cínzeen furu, ki̶ mo kám mmo zak nee, "Mun nshwaajeel ɗes, akuɗang ɓe mun mmak ɗel ndi̶ghi̶n mulki kì̵ Naan." 23Pool ki̶ Barnabas mo bi̶lip nyemnan-nan mo, mpee koo a kuur kì̵ nyemso ndang Naan ɗiiɗang mo ye, ashak ki̶ aduwa, ki̶ wet ki̶ neen zak, ɓe mo le nyem ɗi mo bi̶lip ni mo nsar kì̵ Daa, ɗi mo kì̵ cínzeen nwuri. 24Aɓwoon ɗi mo kì̵ canɗel nkoghop mPisidiya, ɓe mo j`i wul mPamfiliya. 25Kaaɗi mo kì̵ satpo ni ndi̶ghi̶n Perga, ɓe mo yaghal sham har Attaliya. 26Mo yaghal mpee mi̶ni, ɓe mo ɗel njirgi am, ku mo baaj`i ɗin Antiyok, birni ɗi jí mo shee c`in aduwa ɗi nkaa mo, mpeku ɗiiret kì̵ Naan ni kiyeer mo ɗi ndi̶ghi̶n ɗak, ɗi yaksi ɓe mo kì̵ c`in ni kyes. 27Kaaɗi mo baaj`i wul, ɓe mo kuur nyemso ndang Jesu ni mo ashak jir, ɓe mo satpo ngurum ni mo nkaa mbii ɗi Naan wuri kì̵ le ku mo c`in, ki̶ kaaɗi wuri wang ar mu cínzeen nyem ɗi ba mo a nyem Yahudi mo kas zak. 28Mo tong ndi̶ghi̶n birni mi̶ni ɗes, ashak ki̶ nyemso ndang Jesu mo.

will be added

X\