1 Ndi̶ghi̶n kuur ki̶ nyemso ndang Jesu ɗi mon Antiyok, ɓe pak nyemsatpo kì̵ Naan mo, ki̶ nyemkam-kam mo ɗi. Barnabas, ki̶ Simiyon ɗi moo pet wuri a ɗiitup, ki̶ Lusiyus ngu Sairin, ki̶ Manayen ɗi wuri wurang ashak ki̶ mishkagham Herot, ki̶ Sool. 2 Kaaɗi mon nkaa seyil Daa ki̶ mon nkaa wet ki̶ neen zak, ɓe Riin Ɗiiɓang wuri sat nee, "Wu bi̶lip Barnabas ki̶ Sool wu le nwan, mpee ɗak ɗi wan ki̶n pet mo mpee c`in ni." 3 Ɗangɓe mo wet ki̶ neen, ki̶ mo c`in aduwa zak, ɓe mo lesar nkaa mo, ɓe mo sel Barnabas ki̶ Sool mo so. 4 Riin Ɗiiɓang lop Barnabas ki̶ Sool mo so nSelusiya, ɓe mo so ɗel njirgi am mpeemi̶ni, ku mo so ɗi nSaiprus. 5 Kaaɗi mo wul nSalamis, ɓe mo satpo kì̵ Naan ngurum mo ndi̶ghi̶n lu kì̵ Naan mu nyem Yahudi mo. Joon ɗi sum fi̶ri a Maak sí, wuri ɗi ashak ki̶ mo mpee ɓam. 6 Aɓwoon ɗi mo kì̵ mwaan ndi̶ghi̶n yil ɗi am neer ni cighi̶r kaat jir, har mo so wul mPafos, ɓe mo kat mee ngu Yahudi ɗi moo petsum fi̶ri a Barjesu wuri a nguc`in yen ɗiibish, ki̶ wurii leshin a kaa ngusatpo kì̵ Naan si, amma ba wuri a ngusatpo Naan kas. 7 Wuri ɗi ashak kì̵ nguɗak mu ngo ɗiiɗes ni, gofna Sarjiyus Polus, wuri a mee ngumanshii mbii zam. Gofna ni wuri pet Barnabas ki̶ Sool, mpeeɗi wurii riɓet ki̶lingpo kì̵ Naan pu mo ɗi. 8 Amma Elimas nguyen ɗiibish si, (A sum fi̶ri ni mmi̶ni shi li̶po mu Heleni) wuri cíi mmo, mpeeɗi wuri riɓet ku taji gofna ni wuri cínzeen po kì̵ Naan kas. 9 Amma Sool ɗi moo pet wuri a Pool, wuri gam ki̶ Riin kì̵ Naan, ɓe wuri ti̶ghi̶r yit fi̶ri nzi̶ng nkaa nguc`in yen ɗiibish ni, 10 ɓe wuri sat nee, "Wugha làa kì̵ Shetan! Wugha a shaarlek kì̵ mbii ɗin ndi̶re mo jir. Ki̶ putughup fugha ni gam ki̶ numpee, ki̶ c`in nyang. Aa gung shidaar-shidaar, mpeku a cighi̶r ki̶ zeen mu Daa, mpeku ni ɗee ɗi a ɗung. 11 A naa yaksi, Daa Naan wurin nle ku wugha ɗee a vum. Ba wughan mmak naa puus kas, mpee reppee lee." Abet-abet, ɓe vuun, ki̶ peerap mo j`i paa Elimas, ɓe wuri ɗoghom pyakpee, mpee tang ngo ɗin nyaa kam nwuri. 12 Kaaɗi gofna ni wuri naa mbii aapo mi̶ni, ɓe wuri cínzeen, mpeeɗi ni fes aapo nwuri nkaa kám ɗi wuri ki̶ling ni nkaa Daa Naan. 13 Pool ki̶ nyem ɗi mo ashak ki̶ wuri, mo yaghal mPafos, ɓe mo ɗel ndi̶ghi̶n jirgi am, ku mo so ɗi mPerga ɗi nin nyil mPamfiliya, ɓe Maak wuri yit mo mpeemi̶ni, ku wuri baaso ɗi nJerusalem. 14 Mo yaghal mPerga, ɓe mo ɗel so Antiyok ɗi nin mPisidiya. Parpuus Nookɗi, ɓe mo ɗel ndi̶ghi̶n lu kì̵ Naan, ɓe mo tong ɗi. 15 Aɓwoon ɗi mee gurum kì̵ tang ndi̶ghi̶n takarda mu Waar kì̵ Mosis mo, ki̶ ndi̶ghi̶n takarda mu nyemsatpo kì̵ Naan mo, ɓe nyem ɗiinan-nan nkaa lu kì̵ Naan ni, mo lop sat mmo nee, "Ɗyemnaa mo, katɗang wun ki̶ mee po ɗi wun nsat ngurum ni mo, ɓe wu sat." 16 Pool wuri yaghal ɗar ating, ɓe wuri ɗiyeep sar fi̶ri, mpeku gurum ni mo ɗok ɗi titik, ɓe wuri sat nee, "Wun nyem Isreil mo, ki̶ wun nyem ɗi ba wun a nyem Isreil mo kas, ɗi wuu ki̶i̶r Naan, wu lekom fuu mo. 17 Naan kì̵ nyem Isreil mo, wuri bi̶lip puun funu mo ki̶ wuri le mo a ɗiiɗes, ɓe mo a mi̶zep ndi̶ghi̶n yil Ijip. Wuri put ki̶ mo ndi̶ghi̶n yil Ijip ni shiɓal fi̶ri ɗiiɗes zak. 18 Mpee ɓit mo laarfeer, ɓe wuri gung ki̶ mo a naar yil. 19 Wuri le ku mo twa mee saghan mo povul ndi̶ghi̶n yil Kenaan, ɓe wuri cín yil mi̶ni nyem fi̶ri Isreil mo, har ni ɗee mo a mbii hi̶r kop. Mo tong ndi̶ghi̶n yil mi̶ni mpee ɓit mo ɗari feer ki̶ laarpaat. 20 Aɓwoon mi̶ni, ɓe wuri cín nyemtokɗiyeel mo mmo, har j`i wul mɓít kì̵ ngusatpo kì̵ Naan Samuwel. 21 Kaaɗi mo ɗang pu Naan ku wuri cín mishkagham mmo, ɓe Naan wuri cín Sool làa kì̵ Kish mmo, ɗi wuri a dang mu Benjami. Sool wuri se mishkagham ni mpee ɓit mo laarfeer. 22 Aɓwoon ɗi Naan shang Sool mɓut nɗak mishkagham ni. Ɓe wuri bi̶lip Devid ku wuri ɗee a mishkagham furu. Naan wuri cín langting nkaa Devid nee, 'Wan kat Devid làa kì̵ Jesse, wuri a ngo ɗi wan riɓet hakyeng. Wurin ncín mbii ɗi wan sat mo nwuri jir.' 23 A ndi̶ghi̶n dang mu gwar ɗiisi, ɓe Naan j`i ki̶ Jesu Nguɓam mpee nyem Isreil mo, kaaɗi gyet Naan wuri kì̵ ten tuwoor mmo si. 24 Akuɗang Jesu wuri j`i, ɓe Joon kì̵ ten satpo Naan nyem Isreil mo jir nee, 'Mo tuwap, mpeku mo cín baptisma ɗi mmo zak.' 25 Kaaɗi Joon kus ki̶ kyes ɗak fi̶ri, ɓe wuri tal pu gurum ni mo nee, 'Wun, wu pan nee, wan a weye? Ba a wan a ngo ɗi wun ndung gong j`i fi̶ri kas. Amma wu lekom, mee gurum wurin ndung j`i mɓwoon fi̶na, ɗi koo a teng kwaghazak ɗin nshii fi̶ri mo, ɓe ba ɗiiret fi̶na ni mak ku wan fwoon teng kwaghazak fi̶ri ni mo kas.' 26 "Ɗyemnaa mo! Jep mu dang kì̵ Abraham mo, ki̶ nyem ɗi ba mo a nyem Yahudi mo kas, ɗi moo ki̶i̶r Naan ndi̶ghi̶n wun. A mpee wun jir, ɓe Naan wuri kì̵ lop po ɓam ɗiisi ni j`i. 27 Nyem ɗi moo tong ndi̶ghi̶n Jerusalem ki̶ nyemnan furu mo, ba mo man nee, Jesu wuri a Nguɓam kas, ki̶ ba mo manshii kì̵ po kì̵ nyemsatpo mu Naan mo, ɗi moo tang ni koo a parpuus Nookɗi ɗiiɗang ye kas zak. Gyet mo gampo ɗi gyet nyem satpo kì̵ Naan mo kì̵ ten sat ni, kaaɗi gyet mo tokɗiyeel muut nJesu sí. 28 Koo ɗi ba gyet mo kat wuri kì̵ c`in mee shikbish ɗi ni mak muut nwuri kas, ɓe mo ɗang pu Pailet ku mo tu wuri ɗi. 29 Kaaɗi mbii ɗi mo kì̵ ten ran nkaa wuri mo gam jir, ɓe mo sham kì̵ kúm fi̶ri nkaa shiyeepyoghom ni, ɓe mo so le kúm fi̶ri ndi̶ghi̶n ki̶cir. 30 Amma Naan yaghal ki̶ wuri a peemúut. 31 Mpee shiiteer mo ɗes, ɓe wuri kámshin fi̶ri nyem ɗi gyet moo mwaan ashak ki̶ wuri, yaghal nGalili j`i nJerusalem. Yaksi ɓe mo ɗee a langting fi̶ri pe gurum mo ɗi. 32 Mun, muu satpo ɗiiret nwun, a po ɗi gyet Naan kì̵ ten tuwoor nin mpuun funu mo. 33 Naan wuri kì̵ gam ni pe mun jep furu mo nɗiisi, kaaɗi wuri yaghal kì̵ Jesu a peemúut. Ɗiisi ni ntiit ki̶ mbii ɗi mo kì̵ ten ran ni ndi̶ghi̶n Zabura ɗiivul si nee: 'Wugha a Làa fi̶na, cicinsi wan ki̶n ɗee a puun fugha.' 34 A po ɗi Naan sat nkaa yaghal kì̵ wuri a peemúut nɗiisi nee. 'Ba wurin mbaa kyam muut ɗi zak kas' ki̶ Naan wuri sat zak nee: 'Wan nle ɗiiret ɗi ni azeen-nzeen nkaa wun, ɗi gyet wan kì̵ ten tuwoor ni nDevid.' 35 Ki̶ zak, wuri sat ndi̶ghi̶n mee Zabura nee: 'Ba wugha mmak yit ku ngo fugha ɗiiɓang wuri wam ndi̶ghi̶n ki̶cir kas.' 36 "Gyet Devid wuri kì̵ c`in ɗak ntiit ki̶ ɗyen mu Naan mɓít fi̶ri mo, ɓe wuri muut, ɓe mo wum wuri ashak ki̶ puun fi̶ri mo, har wuri wam. 37 Amma Jesu ɗi Naan kì̵ yaghal ki̶ wuri a peemúut, ba wuri wam ndi̶ghi̶n ki̶cir kas. 38 Mpeemi̶ni ɗyemnaa mo! Wu man nee, a mpee ɗiiret kì̵ gwar ɗiisi ni, ɓe mun nkaa satpo nwun nkaa fwo kì̵ shikbish fuu mo. 39 A mpee Jesu zak, ɗangɓe koo ngo ɗiiɗang ye ɗi wuri cínzeen, ɓe wurin nkat ɓam ndi̶ghi̶n shikbish mo jir. Amma ba Waar kì̵ Mosis ni mo mak ɓam wun mɓut shikbish fuu mo kas. 40 Mpeemi̶ni, wu tap ki̶ káa fuu mo, ku taji mbii ɗi gyet nyemsatpo kì̵ Naan mo sat ni sham taa nkaa wun kas. Gyet mo sat nee: 41 'Wu lekom, wun nyemɓákpee mo, nin aapo nwun, ki̶ wun mmurap. Mpeeɗi wan ndung c`in mee ɗak ndi̶ghi̶n ɓit fuu mo cicinsi, ɗak ɗi ba wun ncínzeen nni kas, koo diɓen. Koo ɗi mee gurum satpo nwun nkaa ni, ɓe ba wun ncínzeen kas.' " 42 Kaaɗi Pool ki̶ Barabbas mo a ar put ndi̶ghi̶n lu kì̵ Naan ni, ɓe gurum ni mo ɗang pu mo, mpeku mo baa satpo ɗi nkaa mbii ɗi mo kì̵ sat mo, parpuus Nookɗi ɗin nj`i zak. 43 Ɗangɓe aɓwoon ɗi gurum mo rangkáa a peekuur ni, ɓe nyem Yahudi mo ɗes, ki̶ nyem ɗi mo kì̵ cighi̶r ɗee a nyem Yahudi mo. Nyem ɗi moo leyit nkaa Naan, mo so ndang Pool ki̶ Barnabas. Ɓe Pool ki̶ Barnabas mo satpo mmo, cínɓal mmo mputughup, mpeku mo mwaan ɗi ndi̶ghi̶n ɗiiret mu Naan. 44 Kaaɗi parpuus Nookɗi ni j`i wul, ɓe nyem birni ni mo ɗes hakyeng mo baaj`i kuur, mpee ki̶lingpo kì̵ Naan ni, ɗee rep pak mo ndi̶ghi̶n birni ni a lee ɗak. 45 Amma kaaɗi nyem Yahudi mo naa gurum mo kuur ɗes, ɓe putughup furu mo gam ki̶ zughur zam, har mo sat nee, mbii ɗi Pool sat ni mo a ɗung, ki̶ mo satpo ɗiibuu nkaa wuri zak. 46 Ɓe Pool ki̶ Barnabas mo waa si̶ghi̶t satpo ni shiɓal agaak ba ki̶ mee ki̶i̶rmuut kas. Mo sat nee, "Ni a ting ku mo shee satpo kì̵ Naan ni a nwun, amma wun kì̵ kwarpo Naan ni, ki̶ wu lesuk a kaa ba wun ki̶ koghop ni mpee kat seen ɗiiso ngaa-ngaa kas. Ɓe yaksi, mun nyit wun, mpeku mu so mu satpo kì̵ Naan ni ɗi nyem ɗi ba mo a nyem Yahudi mo kas. 47 Mpeeɗi Daa wuri kì̵ sat mmun nee: 'Wan ki̶n le wugha, mpeku wugha ɗee a peeɓang mpee nyem ɗi ba mo a nyem Yahudi mo kas. Mpeku ndi̶ghi̶n wugha, ɓe gurum ɗin ndi̶ghi̶n yil ni mo jir, mo kat ɓam ɗi.' " 48 Kaaɗi nyem ɗi ba mo a nyem Yahudi mo kas, mo ki̶lingpo mi̶ni, ɓe mo kat retnyit zam, ki̶ mo lepo kì̵ Naan a ɗiiɗes. Nyem ɗi mo kì̵ ten bi̶lip mo le, mpeku mo kat seen ɗiiso ngaa-ngaa ɗi. 49 Po kì̵ Daa Naan ni so shipee-shipee ndi̶ghi̶n yil mi̶ni jir. 50 Amma nyem Yahudi mo kar pak mat ɗi mo ki̶i̶r Naan, mat ɗiinan-nan mo, ki̶ nyemnan-nan mu birni ni mo, ku mo lejeel ɗi nkaa Pool kì̵ Barnabas. Ɓe mo ceen Pool kì̵ Barnabas put aku ndi̶ghi̶n yil furu. 51 Ɓe Pool ki̶ Barnabas mo ɓwap i̶rong ɗi nin nkaa shii furu mo, mpeku ni ɗee ɗi a langting nkaa nyem birni ni mo, ɓe mo so Ikoniyum. 52 Nyemso ndang Jesu mo gam ki̶ retnyit zam, ki̶ mo gam ki̶ Riin kì̵ Naan zak.
