Ɗak 10

1Mee gwar ɗi ndi̶ghi̶n Sizariya, ɗi sum fi̶ri a Konilus, wuri a mee ngo ɗiiɗes, ɗi wurii tap ki̶ sooja mo ɗari mi̶ndong, ɗi mu yil Itali. 2Wuri a mee ngo ɗi wurii le putughup fi̶ri nkaa Naan, ki̶ wurii ki̶i̶r Naan ashak ki̶ nyemtulu fi̶ri mo jir. Wurii cín zughum ngurum mo ɗes, ki̶ wurii naa nc`in aduwa nNaan shidaar-shidaar. 3Parmeeci si, kaa karfe kun ɗii mu puus si, ɓe ndi̶ghi̶n sughun, ɓe wuri naa ngulop kì̵ Naan agaak, ki̶ ngulop ni sat nwuri nee, "Konilus," 4Ɓe Konilus wuri naa ngulop ni shi yit ki̶i̶rmuut, ɓe wuri sat nee, "A meye Daa?" Ngulop kì̵ Naan sat nKonilus nee, "Naan kì̵ lap aduwa fugha mo, ki̶ mbiizughum ɗi aa cín nyemjeel mo, har mo ki̶ kàa wul pe Naan ɗi aɗeng, ki̶ mo ɗee a mbii ɗi Naan wurii pan wugha zak. 5Yaksi, ɓe a lop mee gurum mo so nJoppa, mpeku mo so pet mee gwar ɗi moo pet sum fi̶ri a Simon Pita, j`i ntulu fugha. 6Wurii tong a lu kì̵ Simon nguɗak shim, ɗi tulu fi̶ri ni kus ki̶ po am bahar si." 7Kaaɗi ngulop kì̵ Naan katpo ki̶ Konilus, ɓe Konilus wuri pet ki̶rom fi̶ri mo vul ki̶ mee sooja, ɗi wuri a ngo ɗin ndi̶re mɓut nyem ɗi moo c`in ɗak ntulu fi̶ri shidaar-shidaar. 8Aɓwoon ɗi wuri kì̵ sat mmo mbii ɗi ni c`in jir, ɓe wuri lop mo so nJoppa. 9Daɗaar ki̶ ni, ɓe mo yaa ar, ɓe mo j`i wul kus ki̶ birni ni. Pita wuri kàa nluɗeng mpee c`in aduwa, kaa puus a naar si. 10Neenláa nwuri, ki̶ wuri riɓet mee mbii ɗi wurin nse. Kaaɗi mo kuɗi nkaa ɗak mbiise ni, ɓe Pita wuri naa mee sughun. 11Ɗi wuri naa ɗengnaan ni wang, ɗangɓe mee mbii tong aɗeng sham kaa fuwaat ɗiiɗes si. Mo yaa ni sham ki̶ni nyil shi kwang kì̵ ni mo feer. 12Ndi̶ghi̶n ni, ɓe koo a luwa ɗiiɗang ye, ɗi moo mwaan shi shii feer mo, ki̶ ɗi moo fee shi ɓut mo, ki̶ ny`er ɗi moo yaghal ncáap mo ɗiɓut jir. 13Ɓe Pita wuri ki̶ling mee ɗoo ki̶ sat nee, "Pita a yaghal, a fet a se." 14Amma Pita wuri lap nee, "Waash Daa! Ba wan ki̶n kyam se mee luwa ɗiibuu, koo ɗi ba ni ret ku ngu Yahudi se kas." 15Pita wuri waa baa ki̶ling ɗoo ni ɗi zak, ɗi ni sat nee, "Mbii ɗi Naan kì̵ le ni a ɗiiɓang, ɓe taji wugha le ni a ɗiibuu kas." 16Mo c`in aasi har yit kun, ɓe mo waa baakàa ki̶ fuwaat ni aɗeng. 17Kaaɗi Pita wuri nkaa panshii kì̵ sughun ni, ɓe nyem ɗi Konilus lop mo sí, mo kì̵ ten tang tulu kì̵ Simon ni mo kat, har mo j`i ɗar mpolu ni. 18Mo petpee, ɓe mo tal nee, "Kyet gwar ɗi moo pet wuri a Simon Pita si, wurii tong a ntulu ɗiisi wa?" 19Kaaɗi Pita wuri kuɗi nkaa panshii kì̵ sughun ɗiisi ni, ɓe Riin kì̵ Naan sat nwuri nee, "A naa mee gurum mo kun, mo pu tang wugha. 20A yaghal, a sham, ku a so ashak ki̶ mo, ba a shi mee kyetwa kas, mpeeɗi a wan lop mo." 21Ɗangɓe Pita sham pe nyem ni mo ɗi, ɓe wuri sat mmo nee, "Wan si, a wan a ngo ɗi wuu tang ni. Wu j`i a mpee meye?" 22Mo lap nee, "A mee ngo ɗiiɗes nkaa sooja mo, ɗi moo pet sum fi̶ri a Konilus ɗi wuri a mee ngo ɗin ndi̶re, nguki̶i̶r Naan. Ɗi nyem Yahudi mo jir moo kwoop wuri. A mee ngulop kì̵ Naan ɗiiɓang j`i sat nwuri nee, wuri lop mo pet wugha, ku a so ɗi ntulu fi̶ri, mpeku wuri ki̶ling mbii ɗi wughan nsat ɗi nwuri." 23Pita wuri ɗel ki̶ das ɗiikun ni mo nlu, mpeku mo teer ɗi. Daɗaar ni, ɓe Pita wuri yaghal so ashak ki̶ mo. Pak nyemso ndang Jesu ɗi mon nJoppa mo so ashak ki̶ wuri. 24Daɗaar ni, ɓe mo so wul nSizariya. Konilus wuri nkaa gong mo. Wuri kì̵ ten pi̶rep dang fi̶ri mo, ki̶ shaar fi̶ri mo, mo kuur ashak ɗes. 25Kaaɗi Pita wuri a ar ɗel ndi̶ghi̶n lu ni, ɓe Konilus kaat wuri, ki̶ wuri taa mPita ntoghom, mpee cín ɗiiɗes nwuri. 26Amma Pita ɗiyeep Konilus, ki̶ wuri sat nee, "A yaghal ating, wan shikáa fi̶na, wan a gurum kaa wugha si zak." 27Pita wuri nkaa katpo ki̶ Konilus, ɓe kaaɗi wuri ɗel, ndi̶ghi̶n lu ni, ɓe wuri kat gurum moo kuur ashak ɗes. 28Pita wuri sat mmo nee, "Wun shikáa fuu wu man nee, ba ni a ndi̶re ku ngu Yahudi ɓàlkáa fi̶ri ashak ki̶ mee saghan ɗiici mo, koo wuri j`i pe mo ɗi kas. Amma Naan wuri ki̶ kám nwan, ku taji wan pet mee gurum a ɗiibuu, koo ɗiiɓish kas. 29Mpeemi̶ni, kaaɗi wu lop mo pet wan si, ɓe wan j`i pe wun ɗi, ba wan kwar kas. Yaksi wan riɓet ki̶ling mbii ɗi ni le ku wu pet wan ni." 30Konilus wuri sat nee, "Ni kus aa teer mo feer cicinsi, ntiit ki̶ pee ki̶si, ɓe wan nkaa c`in aduwa, karfe kun mu puus ndi̶ghi̶n lu fi̶na. Ɓe wan naa mee gwar sí, ɗi nli̶r fi̶ri mo piyaa peng-peng, wuri j`i ɗar a kiyeen fi̶na. 31Ɓe wuri sat nee, Konilus! Naan kì̵ lap aduwa fugha, ki̶ mbiizughum ɗi aa cín nyemjeel mo sí, mo ɗee a mbii ɗi Naan wuri pan wugha zak. 32Mpeemi̶ni a lop-lop so nJoppa, ku mo so pet mee gwar ɗi sum fi̶ri a Simon Pita, wurii tong a ntulu kì̵ Simon nguɗak shim, ɗi tulu fi̶ri ni kus ki̶ po am bahar sí. 33Abet-abet ɓe wan lop-lop so pe wugha ɗi. Ni ret zam kaaɗi a j`i mpesi. Mun si jir ntoghom kì̵ Naan yaksi, mpeku mu ki̶ling mbii ɗi Daa wuri sat nwugha, mpeku wugha sat ɗi mmun." 34Pita wuri satpo mmo nee, "Azeen-nzeen wan naa nee, ba Naan wurii shwatyit mmee gurum kas. 35Amma Naan wurii lap gurum mo jir, ɗi moo ki̶i̶r wuri, ki̶ mo c`in mbii ɗiiret mo zak. 36A po ɗi Naan wuri lop nyem Isreil mo nɗiisi. Moo satpo ɗiiret, ɗi ni a mu tongriyang mmo ndi̶ghi̶n Jesu Kristi, ɗi wuri a Daa ki̶ mbii mo jir, 37Wun shikáa fuu, wu man mbii aapo ɗi mo kì̵ c`in ni ndi̶ghi̶n yil nJudiya jir. Gyet mo shee c`in ni a nGalili, aɓwoon ɗi gyet Joon nguc`in baptisma wuri satpo mmo nkaa ni. 38Ɗiisi ni a po nkaa Jesu Ngu Nazaret, ɗi gyet Naan ɗoo Riin Ɗiiɓang ki̶ iiko nkaa wuri. Wuri so koo a pee ɗiiɗang ye, ɓe wuri c`in ɗak ɗiiret, har wuri bar nyem ɗi mon nder kì̵ ɓal mu Shetan jir, mpeeɗi Naan ashak ki̶ wuri. 39Mun a langting ki̶ mbii ɗi wuri kì̵ c`in mo jir ndi̶ghi̶n yil nJudiya, ki̶ ndi̶ghi̶n Jerusalem zak. A wuri a ɗi gyet mo tu wuri, kaaɗi gyet mo pwas wuri nkaa shiyeepyoghom si, har wuri muut. 40Amma Naan yaghal kì̵ wuri a peemúut parpuus ɗiikun, ki̶ Naan le ku wuri kámshin fi̶ri mmun agaak. 41Ba a gurum mo jir mo naa wuri kas, amma wuri kámshin a mmun, ɗi Naan wuri kì̵ ten bi̶lip mun, ku mu ɗee ɗi a langting fi̶ri. Gyet muu se mbiise ki̶ shwaa am ashak ki̶ wuri, aɓwoon ɗi wuri kì̵ yaghal a peemúut zak. 42Wuri sat mmun shiɓal nee, mu satpo kì̵ Naan ngurum mo jir zak, ki̶ mu c`in langting ɗi nee, a Jesu wuri a gwar ɗi Naan cín iiko wuri, mpeku wuri ɗee ɗi a ngutokɗiyeel nyem ɗin mmeen koo, ki̶ nyem ɗi mo kì̵ murap mo zak. 43A wuri a ngo ɗi gyet nyemsatpo kì̵ Naan mo jir, mo kì̵ ten c`in langting fi̶ri nee, a mpee sum fi̶ri, ɗangɓe koo a ngo ɗiiɗang ye ɗi wuri cínzeen, ɓe wurin nkat fwo kì̵ shikbish fi̶ri mo." 44Kaaɗi Pita wuri kuɗi nkaa satpo ɗiisi mmo, ɓe Riin Ɗiiɓang sham nkaa nyem ɗi mo pu ki̶lingpo ni jir. 45Nyem Yahudi ɗi mo j`i ashak ki̶ Pita sí, mo cínzeen, ki̶ ni aapo mmo. Mpeeɗi mo naa Naan cín Riin Ɗiiɓang shi zughum nyem ɗi ba mo a nyem Yahudi mo kas zak. 46Mo ki̶ling moo katpo shi pak li̶po mo, ki̶ mon nkaa cín ɗiiɗes nNaan. Ɓe Pita wuri sat nee, 47"Kyet mee gurum mmak cíi nkaa am ɗi mon nc`in baptisma ɗi nyem ɗiisi mo wa? Mpeeɗi mo kì̵ lap Riin Ɗiiɓang ni a kaaɗi gyet mun mu lap si." 48Ɓe Pita wuri le ku mo c`in baptisma mmo ndi̶ghi̶n sum kì̵ Jesu Kristi. Mo ɗang pu Pita, mpeku wuri pan yém ɗi ashak ki̶ mo mpee rep shiiteer mo kong akuɗang.

will be added

X\