Ɗak 1

1So pe wugha Fiyofilus. Ndi̶ghi̶n takarda fi̶na ɗin nshee, ɓe wan ran po nkaa mbii ɗi Jesu wuri c`in mo, ki̶ mbii ɗi wuri kám mo. 2Har parpuus ɗi Naan mang wuri kàa aɗeng. Akuɗang Naan mang wuri kàa aɗeng, ɓe wuri satpo nyem ɗi wuri kì̵ bi̶lip mo, mpeku mo ɗee ɗi a jeplop fi̶ri mo, shi iiko mu Riin Ɗiiɓang. 3Mpee teer mo laarfeer aɓwoon ɗi Jesu wuri kì̵ yaghal a peemúut, ɓe wuri kámshin mmo yit ɗes, ndi̶ghi̶n ar mo shini-shini, ɗi ni kám agaak nee, wuri ɗi mmeen azeen-nzeen. Mo naa Jesu, ki̶ wuri satpo mmo nkaa mulki mu Naan. 4Parmee puus si, ɓe kaaɗi wuri ɗi ashak ki̶ jeplop fi̶ri mo, ɓe wuri satpo mmo shiɓal nee, "Taji wu yaghal wu yit Jerusalem kas. Amma wu tong, wu gong gam kì̵ zughum ɗi puun fi̶na wuri kì̵ ten tuwoor ni, ɗi wun kì̵ ki̶ling ni mpo fi̶na. 5Jí Joon wuri c`in baptisma ngurum mo a shi am, amma ɗee shiiteer mo ɗi a lee ɗak, ɓe mon nc`in baptisma nwun a shi Riin Ɗiiɓang." 6Kaaɗi jeplop kì̵ Jesu mo kuur ashak, ɓe mo tal pu wuri nee, "Daa, wughan ndung baa ki̶ mulki ni nyem Isreil mo a ndi̶ghi̶n shiiteer ɗiisi mo me?" 7Jesu lap mmo nee, "Ba ɗiisi ni a muu, mpeku wu man puus ni, ki̶ ɓit ɗi Daa wuri kì̵ ten le mo ndi̶ghi̶n iiko fi̶ri kas. 8Amma Naan wurin ncín ɓal nwun, katɗang Riin Ɗiiɓang wuri sham nkaa wun. Ɗangɓe wun nɗee a nyem c`in langting fi̶na mo ndi̶ghi̶n Jerusalem, ki̶ ndi̶ghi̶n nJudiya jir, ki̶ Sameriya, har so wul ndi̶ghi̶n yil ni mo jir zak." 9Kaaɗi wuri satpo mi̶ni, ɓe mo mang wuri kàa aɗeng a yit furu. Ɓe nluu j`i paa wuri, har ba mo kuɗii naa wuri kas. 10Kaaɗi mo ɗi nkaa ti̶ghi̶r yit furu mo kàa aɗeng, ɓe mee gurum mo vul, mo j`i ɗar pe mo ɗi, ki̶ nli̶r ɗiipiyaa-piyaa mo. 11Das ni mo sat nee, "Wun nyem Galili mo, a me le ɗang wuu ɗar, ki̶ wuu ti̶ghi̶r yit kàa aɗeng ye? Jesu ɗi wu naa mo kì̵ mang wuri kàa aɗeng aku pe wun ɗi si, ɓe wurin mbaa sham aasi zak." 12Ɗangɓe jeplop kì̵ Jesu mo yaghal yit Jwakpaat ɗi ni kus ki̶ Jerusalem, ɗi jong kì̵ ni ki̶ Jerusalem a meel mi̶ndong ɓejee ɗak. 13Kaaɗi mo j`i wul ndi̶ghi̶n birni ni, ɓe mo so kàa ndi̶ghi̶n luɗeng, a peeɗi moo tong ɗi. A mon nɗiisi, Pita, ki̶ Joon, ki̶ Jemis, ki̶ Andru, Filip ki̶ Tomas, Bartolomi, ki̶ Matiyu, ki̶ Jemis ɗyem kì̵ Alfiyas, ki̶ Simon Zeelot, (memee mɓut mee nyem ɗi gyet mo ɓàlkáa furu mpee tang mulki mu yil furu,) ki̶ Juda làa kì̵ Jemis. 14Nyem ɗiisi mo ɓàlkáa furu mo ashak mpee c`in aduwa shidaar-shidaar, shi putughup mi̶ndong ashak ki̶ pak mat mo, ki̶ Meeri ni̶ghi̶n kì̵ Jesu, ki̶ ɗyemni̶ghi̶n fi̶ri mo zak. 15Ndi̶ghi̶n shiiteer mi̶ni mo, ɓe nyemcínzeen ni mo kuur ashak, (ɗi ɗuu furu ni wul ɗari mi̶ndong ki̶ laarvul), ɓe Pita wuri yaghal ɗar a ting nnaar furu mpee katpo, ɓe wuri sat nee, 16"Ɗyemnaa mo, ni a ting ku mo gampo ɗi mo kì̵ ten ran ni ndi̶ghi̶n takarda kì̵ Naan. Po ɗi gyet Riin Ɗiiɓang le ku Devid satpo nkaa Judas ngo ɗi wuri ɗee a ngukám ar nyem ɗi jí mo yaa Jesu. 17Jí wuri a memee mɓut mmun, ki̶ jí wuri c`in pak ɗak funu ɗiisi ni zak." 18(Shi shaghal ɗi Judas lap ni mpee kwat ki̶ ɗak fi̶ri ɗiiɓish, ɓe wuri so seet mee bong ɗishik. A peeɗi wuri sham taa har wuri muut, ki̶ wuri piin ɓut fi̶ri, har welweet mu ɓut fi̶ri mo pwat ɓeer. 19Mbii ɗiisi ni ɗee a ɗiimi̶man ngurum ɗi moo tong ndi̶ghi̶n yil nJerusalem jir, har moo pet bong ɗiisi ni shi li̶po furu a Akeldama. Ɗi shii kì̵ mi̶ni a bongtoghom). 20"Mpeeɗi mo kì̵ ten ran ndi̶ghi̶n takarda Zabura nee: 'Wu yit ku tulu fi̶ri ni ɗee a kì̵ rom. Taji mee gurum tong ndi̶ghi̶n ni kas,' ki̶ mo ran zak nee: 'Wu yit ku mee gurum ɗee ɗi a koppee fi̶ri ni.' 21"Mpeemi̶ni, ɓe ni ret ku mu bi̶lip mee gurum mɓut nyem ɗi pugyet mo ɗi ashak ki̶ mun, kaaɗi jí Daa Jesu wuri kì̵ mwaan so ki̶ mun shipee-shipee si. 22Yaghal mɓít ɗi Joon ki̶ c`in baptisma ɗi ngurum mo, har so wul parpuus ɗi Naan mang Jesu kàa aɗeng, aku pe mun ɗi. Ni ɗee a ting ku memee mɓut nyem ɗi munn mbi̶lip si mo, wuri ɗee a ngusatpo nkaa yaghal kì̵ Jesu a peemúut ni ashak ki̶ mun." 23Aasi ɓe mo le gurum mo vul ɗi sum furu mo a Josep ɗi moo pet wuri a Barsabbas koo Jastus, ki̶ Matayas zak. 24Ɓe mo c`in aduwa nee, "Daa, wugha ɗi a man putughup kì̵ gurum mo jir. A kám ngo ɗi wugha bi̶lip mmun, ndi̶ghi̶n das ɗiivul si mo. 25Mpeku ngo ni c`in ɗak ɗi a koppee kì̵ Judas kaa memee ndi̶ghi̶n jeplop kì̵ Jesu mo si. Jí Judas wuri yaghal yit ɗak ni ɗi, mpeku wuri so ɗi a peelagham fi̶ri." 26Kaaɗi mo c`in bi̶lip ni, ɓe ni taa nkaa, Matayas. Yaghal mmi̶ni, ɓe mo tang Matayas ashak ki̶ jeplop ɗiikaghapaat baami̶ndong ni mo.

will be added

X\