2 Pita 1

1A wan Simon Pita, ki̶rom ki̶ laalop kì̵ Daa Jesu Kristi, wan ran wasika ɗiisi so pe wun ɗi jir, wun nyem ɗi wun kì̵ lap cínzeen ɗi nin ntiit ki̶ munu, ndi̶ghi̶n ɗiiret kì̵ Naan funu, ki̶ Nguɓam funu Daa Jesu Kristi. 2Ɗiiret ki̶ riyang mo ɗee a muu ɗes hakyeng, ndi̶ghi̶n man Naan ki̶ Jesu Daa funu. 3Naan ndi̶ghi̶n ɗiiɗes mu man fi̶ri, ɓe wuri kì̵ ten bi̶lip mun, mpeku mu tong ɗi ashak ki̶ wuri ndi̶ghi̶n ɗiiɗes fi̶ri, ki̶ ndi̶ghi̶n ɗiiret fi̶ri zak. A ndi̶ghi̶n ar ɗiisi, ɓe wuri c`in ɗak ki̶ ɓal fi̶ri ɗiiɗes, mpeku wuri cín mbii mo ɗi mmun jir. Mbii ɗi ba mun ki̶ mo kas, ku mu kat seen ɗi, ki̶ mpeku mu mwaan ɗi ndi̶ghi̶n ar ɗi ni shang wuri nyit. 4A ndi̶ghi̶n ar ɗiisi, ɓe wuri cín mbii mo mmun ɗes, mbiizughum ɗi gyet wuri kì̵ ten sat ne, wuɗin ncín mmun. Wuri cín mbii ɗiisi mo jir, a mpeku ndi̶ghi̶n mbiizughum ɗiisi mo, ɓe mu pwat aku ndi̶ghi̶n mbii ɗiibish, ɗi mo ɗi ndi̶ghi̶n yil ɗiisi, ɗi gurum mo fes riɓet mo. Amma wuri kì̵ ten pi̶rep wun, mpeku wu tong ɗyen ɗi nNaan. 5Mpeemi̶ni, ɓe wan ki̶n sat nwun nee, kaaɗi wuu ten wu cínzeen nJesu Kristi, ɓe wu gung, mpeku shiimwaan fuu mo ɗee ɗi a ɗiiret hakyeng, ki̶ zak, wu gung ku wu man mbii mo ɗi. 6Taji wu yit ni ɗee a man mbii mo ɓejee kas, amma wu gung ku wu yaasuk fuu mo ɗi. Kaaɗi wuu gung mpeku wu yaasuk ɗi, ɓe wu ɗar ɓal-ɓal ndi̶ghi̶n mbii ɗiiret mo jir, ki̶ wu cín ɗiiɗes nNaan. 7Kaaɗi wuu mwaan ndi̶ghi̶n ar ɗi ni shang nNaan si, ɓe ni ret ku wu tap ki̶ shak a kaa ɗyemni̶ghi̶nshak mo si. Wu wal ngurum mo jir. 8Katɗang wuu sat a c`in mbii ɗiiret ɗiisi mo ɗak, ɓe ba man fuu ɗi ni ndi̶ghi̶n Jesu Kristi nin nɗee a ɗiibuu kas, amma seen fuu ni mon nlàa-làa ɗiiret mo. 9Amma nyem ɗi ba mo ki̶ ɗyen ɗi ni a mu Naan kas, mo a kaa vum ɗi ba moo naapee kas si. Mo mander nee, Naan wuri kì̵ ten fwo ɗi mmo mpee shikbish ɗi kì̵ mo c`in. 10Mpeemi̶ni, ɗyemnaa mo, wan ki̶n ɗang pe wun, mpeku wu ɗar ɗi ɓal-ɓal ndi̶ghi̶n mbii ɗiisi mo, mpeeɗi Naan wuri kì̵ ten pi̶rep wun, ki̶ wuri bi̶lip wun, mpeku wu ɗee ɗi a nyem fi̶ri mo. Katɗang wuu c`in mbii ɗiiret ni mo, ɓe ba wun nkyam taa pal kas. 11Ni aasi ɓe, Naan wuri wang polu ni nwun, mpeku wu ɗel ɗi ndi̶ghi̶n mulki kì̵ Daa funu Jesu Kristi. Wuri ɗi wuri a Nguɓam funu. Mun ntong ashak ki̶ wuri har ngaa-ngaa. 12A Mpeemi̶ni, ɓe wan ki̶n sat nwun shidaar-shidaar, mpee lepan nwun nkaa mbii ɗiisi mo jir, koo ɗi wuu ten wu man mo, ki̶ kaaɗi wuu ɗar ɓal-ɓal ndi̶ghi̶n zeen, ɗi wu man mo. 13Kaaɗi wan kuɗi ki̶ seen ndi̶ghi̶n yil ɗiisi, ɓe wan naa ni ret, mpeku wan lepan ɗi nwun nkaa mbii ɗiisi mo shidaar-shidaar, mpeku taji wu ɗee nsaam kas. 14Wan man nee, ndi̶ghi̶n rep pee lee, ɓe yak wan nyit nan mu yil ɗiisi ni ɗi, kaaɗi gyet Daa funu Jesu Kristi wuri kám nwan ne, wan c`in aasi. 15Wan ngung hakyeng, mpeku wan lepan ɗi nwun nkaa mbii ɗiisi mo koo pi̶rang ye, koo aɓwoon ɗi wan ki̶n muut. 16Gyet yam ɓe mu satpo nwun nkaa j`i kì̵ Daa funu Jesu Kristi ndi̶ghi̶n ɓal fi̶ri. Mbii ɗi gyet mun nkaa sat ni nwun, ba ni a mee po tongɗirem ɗi mo put a ndi̶ghi̶n pan mu gurum mo kas, amma mumun shikáa funu, ɓe muu ten mu naa ɗiiɗes fi̶ri shi yit funu mo. 17Kaaɗi, gyet Jesu wuri lap ɗiiɗes ki̶ ɗiihai, pu Naan ɗi, ɓe mun ɗi gyet mu ki̶ling, kaaɗi Naan ɗiiɗes met jir wuri katpo nee: "Ɗiisi a Làa fi̶na, ɗi wan wal nwuri. Ɗi wuri c`in mbii ɗi mo ret nwan nyit zam." 18Mun shikáa funu, gyet mun ɗi ashak ki̶ Daa funu Jesu Kristi nkaa ɗengjwak kì̵ Naan, gyet mu ki̶ling ɗoo ɗi ni tong a ɗeng sham. 19Po kì̵ nyemsatpo kì̵ Naan mo si̶ghi̶t kám mmun agaak nee, mbii ɗiisi mo azeen-nzeen. Ni ret ku wu lekáa fuu mo nkaa po kì̵ mo ni mo, mpeeɗi po mi̶ni, ni a kaa fitila ɗi nii ɓangpee ndi̶ghi̶n nkoo ne si, har kus ki̶ ɓitmang mu puus mmi̶ni. Parpuus mi̶ni, kaaɗi zar mangɓit ni kàa put, ɓe wu naa mbii mo agaak ndi̶re-ndi̶re ndi̶ghi̶n putughup fuu mo aasi. 20Mbii ɗi ni ki̶ koghop ni met jir, ɓe wan ki̶n sat nwun nee, po ɗi gyet nyemsatpo kì̵ Naan mo kì̵ ten sat ni, ɗi mo a riran ndi̶ghi̶n takarda mu Naan, ba mo put a ndi̶ghi̶n pan mu gurum mo kas. 21Mpeeɗi po ɗi gyet nyemsatpo kì̵ Naan mo sat, ba gyet ni put a ndi̶ghi̶n pan mu gurum mo kas, amma gyet a Riin Ɗiiɓang mu Naan, wuri ɗel ndi̶ghi̶n putughup furu, ɗangɓe wuri le ku mo katpo ɗi ni put a pe Naan ɗi.

will be added

X\