2 Koronti 5

1Yaksi ɓe mu man nee, katɗang ɓe sun funu ɗi mun ki̶ mo ndi̶ghi̶n yil ɗiisi, mo wam, ɓe Naan wuri kì̵ ɗak mee sun funu ɗi mon ntong ɗi har ngaa-ngaa ndi̶ghi̶n ɗengnaan. A Naan wuri ɗak sun mi̶ni mo shikáa fi̶ri. 2Ndi̶ghi̶n sun funu, ɓe muu gwaar gwan, ki̶ muu kyaghar, mpeku Naan cín sun funu ɗi mo a mu ɗengnaan si ɗi mmun. 3Mpeeɗi katɗang Naan cín sun funu mi̶ni mo mmun, ɓe ba mo mmak kat mun ngum kas. 4Kaaɗi mu kuɗi muu tong ndi̶ghi̶n sun funu ɗi ni a mu yil ni, ɓe muu gwaar gwan mpee jeel ɗi muu shwaa. Ba a mpeeɗi ne, muu riɓet a ɓàkshak ki̶ sun funu ɗi mo a mu yil ɗiisi kas. Amma muu riɓet ku Naan cín sun funu ɗi mo a mu ɗengnaan si mmun. Ɓe sun funu ɗi mo ki̶ seen si, mon nɗee ɗi a koppee kì̵ sun funu ɗi mo a mu muut yaksi. 5A Naan wuri ɗak mun, mpee cighi̶r ɗiisi mo, ki̶ wuri kì̵ ten cín Riin fi̶ri mmun, ɗi ni ɗee a alama mu mbii ɗi wuri kì̵ ɗak mo le mpee mun. 6Mpeemi̶ni, ɓe koo a pi̶rang ye, ɓe mun ki̶ cínzeen ndi̶ghi̶n putughup funu, ki̶ mu man zak nee, kaaɗi mu kuɗi ndi̶ghi̶n sun funu ɗii mu yil ɗiisi, ɓe ba mun ashak ki̶ Daa kas. Mu jong ki̶ wuri. 7Muu tong ndi̶ghi̶n yil ɗiisi ni a shi cínzeen, ba a shi mbii ɗi muu naa mo shi yit kas. 8Azeen-nzeen mun ki̶ cínzeen ndi̶ghi̶n putughup funu, ki̶ ɗyen mmun mɓàkshak ki̶ sun ɗiisi ni mo, mpeku mu tong ɗi ashak ki̶ Daa ntulu. 9Mpeemi̶ni ɓe koo ɗi mun ɗi ndi̶ghi̶n yil ɗiisi, ki̶ koo a ndi̶ghi̶n yil ɗi nin ndung j`i, ɓe ɗyen mmun ku mu cín a mbii ɗi mo ret nNaan nyit. 10Mpeeɗi ting, mun jir, mun nɗar ntoghom kì̵ mbiitong mu tokɗiyeel kì̵ Kristi, mpeku koo weye ɓe wurin nlap kwat mu ɗak ɗi wuri kì̵ cín mo, ɓe wuri kuɗi ndi̶ghi̶n shin mu yil ɗiisi. Kyet kwat ni a ɗiiret aa? Aa koo a ɗiibish ye? 11A mpeeɗi mu manshii mu ki̶i̶r Daa, a ni le ɗang muu gung mpee dul gurum mo j`i pe Kristi ɗi. Ndi̶ghi̶n tong funu, ɓe Naan wuri man riret hakyeng, ki̶ muu canciin nee, wun wu man mun aasi zak, ndi̶ghi̶n putughup fuu mo. 12Ba muu gung a mpeku mu waa mu baa mu sat mee ɗiiret ɗi nkaa sun funu mo pe wun ɗi kas. Amma muu kám a ar nwun, mpeku wu c`in retnyit ɗi shi mun, ki̶ mpeku wu katpee lappo ɗi nyem ɗi moo canjagham a shi ɗiiɗes furu mo. Ba a shi mi̶se furu mo kas si. 13Mpeeɗi koo ɗi ba mun ɗi mɓut mi̶se funu mo kas, ɓe mi̶ni a mpee Naan, ki̶ katɗang mun ɗi ndi̶ghi̶n mi̶se funu mo, ɓe mi̶ni a mpee wun. 14Yaksi, ɓe wal kì̵ Kristi nii se mulki ndi̶ghi̶n putughup funu mo mpee wun, ki̶ mu man azeen nee, mee ngo mi̶ndong wuri kì̵ muut mpee gurum mo jir. Mpeemi̶ni, ɓe gurum mo jir mo kyam muut zak. 15Wuri muut a mpee gurum mo jir, mpeku nyem ɗi mo kì̵ lap seen fi̶ri, ɓe taji mo waa baa tong ɗi a mukáa furu zak kas. Amma see mo tong amu ngo ɗi wuri kì̵ muut mpee mo, ki̶ wuri waa baa yaghal a peemúut mpee mo zak. 16Mpeemi̶ni, yaksi, ɓe ba mu kuɗi muu naa tong kì̵ gurum a shi yit ɗi mu yil ɗiisi kas. Jí muu naa Kristi a shi shin ɗi mu yil ɗiisi, amma yaksi, ɓe ba mu kuɗi muu naa wuri a shi shin ɗii mu yil si kas. 17Koo ngo ɗiiɗang ye ɗi wuri tong ndi̶ghi̶n Kristi, ɓe ngo mi̶ni kì̵ ɗee a ɗiipoo. Mpeeɗi mi̶se fi̶ri ɗiisi̶ghi̶r mo kì̵ ɗel so jee, ki̶ koo meye ni kì̵ ɗee a ɗiipoo zak. 18Mbii ɗiisi mo jir, a c`in kì̵ Naan, ɗi wuri cighi̶r ki̶ mun shaarlek fi̶ri mo, mpeku mu ɗee ɗi a shaar fi̶ri mo shi Kristi. Wuri cín ɗak ɗiisi mmun, mpeku mu cighi̶r ki̶ gurum mo, ɗi mo a shaarlek fi̶ri mo, mpeku mo ɗee ɗi a shaar fi̶ri mo zak. 19A po ɗi mun nkaa sat ni ɗiisi nee, Naan wuri nkaa le gurum ɗi mo ndi̶ghi̶n yil ni, ku mo ɗee a shaar fi̶ri. Ba Naan wuri tang shikbish kì̵ gurum ni mo nkaa mo kas, ki̶ wuri kì̵ lepo mu cighi̶r ki̶ gurum ɗi mo a shaarlek fi̶ri mo, ku mo ɗee a shaar fi̶ri mo nsar funu zak. 20Mpeemi̶ni, ɓe yaksi mun a jeplop mu Kristi mo, ɗi Naan wurii pi̶rep gurum mo a shi mun. Mu ɗang pu wun a koppee kì̵ Kristi, wu yit ku Naan wuri cighi̶r ki̶ wun, ku wu ɗee ɗi a shaar fi̶ri mo. 21Wuri ɗi ba wuri man c`in mee shikbish kas, ɓe Naan le wuri mang shikbish funu mo, mpeku ndi̶ghi̶n wuri ɓe mu ɗee ɗi a nyem ɗin ndi̶re mo, nyit kì̵ Naan.

will be added

X\