2 Koronti 3

1Yaksi, ɓe mun nwaa mu ɗoghom kwoop a káa funu zak aa? Kyet muu riɓet mee wasika ɗi mun nkwoop wun ɗishik, koo ɗi wuwun nkwoop mun ɗishik, kaaɗi pak gurum moo c`in si wa? 2Wun shikáa fuu, a wun a wasika funu, ɗi mon nkwoop mun ɗishik ni. Mo kì̵ ran ni ndi̶ghi̶n putughup fuu mo, mpeku koo weye wuri man ni ɗi, ki̶ ku wuri tang ɗi zak. 3Ni kám agaak nee, a Kristi shikáa fi̶ri wuri ran wasika ɗiisi ni mo ndi̶ghi̶n putughup fuu mo, ɗangɓe wuri lop ni nsar funu. Ba mo ran wasika ɗiisi ni a shi ing kas, ki̶ ba mo ran ni a nkaa sulet mu jwak kas. Amma mo ran ni a ndi̶ghi̶n putughup kì̵ gurum mo, shi Riin kì̵ Naan ɗi wurin mmeen har ngaa-ngaa. 4Muu satpo mi̶ni, a mpeeɗi mu cínzeen nNaan ndi̶ghi̶n Kristi. 5Ba mee mbii ndi̶ghi̶n mun, ɗi ni mak le ku mu sat nee, mu c`in mbii ɗiisi mo a shikáa funu kas. Ɗak ɗiisi ni a iiko ɗi muu mak c`in pak mbii mo, put a pe Naan ɗi. 6Mpeeɗi a wuri le ku mu ɗee a nyem c`in ɗak mu ɓi̶lemcuk shi toghom kì̵ Naan ɗiipoo, ba a shi Waar ɗiiriran mo kas, amma a shi Riin. Waar ɗiiriran nii j`i ki̶ muut, amma Riin mu Naan wurii cín seen. 7Gyet mo ran Waar kì̵ Mosis ni mo a nkaa sulet mu jwak mo, ki̶ kaaɗi gyet Naan cín Waar ni mo mMosis, ɓe ɗiiɗes mu Naan j`i put agaak. Koo ɗi gyet mi̶lep mu yit kì̵ Mosis nii kyes, ɓe ba gyet nyem Yahudi mo mak ti̶ghi̶r yit furu mo nkaa yit kì̵ Mosis kas, mpee peeɓang ɗi ni ɗes ni. Katɗang ɓe gyet Waar mu Mosis ɗi nii j`i ki̶ muut ni j`i aa ɗiiɗes aasi. 8Ɓe ni a ting ɗak mu Riin mu Naan nin nɗes met mu Waar ni. 9Mpeeɗi katɗang ɓe mo le ɗak mu Waar ɗi nii j`i ki̶ lagham a ɗiiɗes, ɓe azeen-nzeen ɗak mu Riin ɗi nin nj`i ki̶ ɗiiret mu Naan, ni a ɗiiɗes met ɗak mu Waar ni hakyeng. 10Ndi̶ghi̶n ɗiisi, ɓe mu naa nee, mbii ɗi gyet ni a ɗiiɗes, ɓe mbii ɗi nin ntong ɗi har ngaa-ngaa ni fes met ɗi gyet yam ni. 11Katɗang ɓe mo kám ne, mbii ɗi nin ndung ɗel so a ɗiiɗes, ɓe mbii ɗi nin ntong ɗi har ngaa-ngaa nin nɗen ki̶ ɗiiɗes met ɗi nin ndung ɗel so ni, ɗes hakyeng. 12Mpeeɗi mun ki̶ canciin ndi̶ghi̶n po ɗiiret ni aasi, ɓe muu satpo funu shiɓal agaak hakyeng. 13Ba mun a kaa Mosis si kas, ɗi gyet wuri paa yit fi̶ri shi fuwaat, mpeku taji nyem Yahudi mo naa kyes kì̵ ɗiiɗes, mu mi̶lep mu yit fi̶ri ɗi nin nɗel so si kas. 14Mpeeɗi gyet pan furu ni mo a ɗiidudughur har mpee cicinsi. Katɗang ɓe mo ɗoghom tang po Naan ɗiisi̶ghi̶r, ɓe fuwaat paapee ɗiisi ni paa ni, ki̶ ni kuɗi, a ɗiipi̶paa pe mo ɗi. See katɗang gurum cínzeen nKristi ɓejee, ɗangɓe mon mmak mang fuwaat ni baa ki̶ ni. 15Azeen-nzeen har cicinsi, katɗang mo ɗoghom tang Waar mu Mosis ni mo, ɓe fuwaat ɗiisi, nii paa putughup furu mo ɗi vit. 16Amma katɗang mee gurum cighi̶r pe Daa ɗi, ɓe abet, mo mang fuwaat ni baa ki̶ ni aku pe ngo ni ɗi. 17Daa wuri a Riin, ki̶ peeɗi Riin kì̵ Daa ni ɗi, ɓe gurum mo ɗee a mukáa furu. 18Yaksi, mun nyemso ndang Jesu mo jir, ɓe mo kì̵ mang fuwaat ɗi ni paa yit funu mo baa ki̶ ni aku. Yaksi ɓe gurum moo naa a ɗiiɗes kì̵ Daa ndi̶ghi̶n tong funu mo, ki̶ wuri cighi̶r ki̶ mun, ku mu ɗee ɗi kaa wuri si, ndi̶ghi̶n ɗiiɗes fi̶ri ɗi ni nkaa wurang. Ɗiisi ni put a pe Riin mu Naan ɗi wuri a Daa.

will be added

X\